بالفيديو – باسيل من رميش: إنتو مش بعاد عن بيروت إنتو قراب من بيت لحم.. وتنوعنا ينتصر عَ العنصرية والآحادية (Video)

– لأنو مهتمين بالجنوب عيّننا بنت الجنوب مي خريش، ومنطقة بنت جبيل أحق من البترون وجبيل بنائب مسيحي، ونشالله من الجنوب يكون في وزير..

***

مقتطف من حديث رئيس التيار الوطني الحرّ جبران باسيل من بلدة رميش في الجنوب، إثر ريسيتال ميلادي في كنيسة التجلي في رميش: (16 ك1- 2018)

الحقوق

• الحقوق يا “عصام” بتتاخَد، ما بتِنعطى، انتو بتاخدوها.. وانتو أهل رميش مش عاوزِين تبَرهنو شي، حتى تاخدو حقوقكن.. انتو عَ طول عطيتو.. إنتو جزء من المقاومة يللي حِفظت هالمنطقة، بتحريرها، وببقاءها مُحرّرة..
• انتو بتنوعّكم وحضوركم، بمعركة التحرير، وحرب تموز.. متِل ما إنتو مُحتضنين إحتضنتوا.. كيفما بِتفكروا حالكم كضيعة، أو كجماعة، انتو جماعة مُحتضنة، وحاضنة.. مُحتضنة من جوارها، وحاضنة جوارها.. ميشان هيك كلنا نُشكّل مجتمع متكامل، وصامد قادر يوقف ويواجه.. وميشان هيك في حقوق لازم تاخدوها، لأنّو يللي حرّر وطن، مش لازم يتوسّل حقوق، الدولة لازم تركض وراه تشوف شو بدّو..
• نشالله نكون بمرحلة جديدة من خلال قانون الإنتخابي، يللي عطانا فرصة، حتى نتمثّل بطريقة مختلفة، ولنصححو بالدورة الجايي.. ومنطقة بنت جبيل يكون الها نائب مسيحي، لأنو برأيي لازم نشوف بتوزيع النواب داخلياً.. ولا جبيل ولا البترون أحقّ منكم.. هيدا فكرنا وهيدا رأينا..

عَم تقول عصام، رميش بعيدة عن بيروت ومركز القرار.. ميشان هيك محرومة أكتر.. أنا بقول:

https://www.youtube.com/watch?v=tNSCyYwh9jE

• رميش وعين إبل، ودبل وكل المنطقة قريبة أكتر لبيت لحم ولمغارة الميلاد..
• رميش قريبة اكتر للناصرة محل المسيح عاش طفولتو..
• رميش قريبة أكتر للقدس محل ما المسيح علّم وبشّر..
• رميش قريبة اكتر لقانا، يللي عبّر فيا الله عن ارادتو الإلهية عبر المسيح بالأعجوبة الأولى..
• رميش فريبة للجليل، لأرض القداسة..

التنوّع

ميشان هيك مِكتَبِلنا نبقى، ونصمد، ونقاوم.. وأحلى شي شِفتو مزار أم النور، يللي زرناه اليوم.. يللي بِعبّر عن إرادة أهل المنطقة إنّو يبقو، ويِعلو ويشمخوا متل المزار، ومتل ما ام النور عاطية نورا لكل أهل المنطقة..

هالمزار نشاالله بِكون تعبير عن ايمان وتشبّث بالأرض، ومكان إضافي بلبنان للسياحة الدينية، ونِجي نزورو من لبنان وخارج لبنان.. ونردّ الإيمان أكتر لهالأرض.. حتى نتذكّر هيدي الأرض إنها مقدسة، وما في حدا يقدر يدنسّها، وما في حدا يغيّرلا طبيعتها، ولا في حدا يشيل أهل الأرض من أرضُن..

• كل نظام آخر أو إرادة تانية، بِتفكّر تقتلعكُن من أرضكن، تتِستبدل التنوع والتعدّد بآحادية، وبعنصرية متل اسرائيل، منِقلها متِل ما إنهزمتي قبل، رَح تِنهزمي بعدان.. عَ التنوّع ما فيها تنتصر الآحادية..
• نحنا بزمن التنوّع، ورسالة المسيح كانت الآخر، وكل كلامو هوّي للآخر، ولقبول الآخر، ومن هيك رح نبقى بأرضنا وننتصر.. ومن هيك نحنا عندكُن حتى نعيِّدكُن.. وحتى نقِلكُن رميش أقرب من اي مكان تاني، وما رح نعيّد لا بكسروان ولا بالمتن ولا بجبيل، ولا ببيروت جايين نعيّد برميش وبمرجعيون وبعكار.. 

الحكومة

• نشالله الهدية الكبيري، تكون الحكومة، ومع ميلاد المسيح تولد الحكومة.. وهيدي الحكومة منّا لحدا، وإذا ما تشكلّت، مش قصاص لحدا وفشل لحَدا، هيدا فشل للكلّ. وإذا وِلدتْ هيدي ولادة لكل لبنان ونجاح لكلّ اللبنانيين.
• بغلّط يللي بِفكّر إنّو العهد بيِنضرّ أكتر رئيس الجمهورية، أو رئيس حكومة.. يا كلنا منطلع وننجح، يا كلنا منِنزل ونفشل.. لأنّو الحكومة هيّي للكلّ بدها تولد، ونشالله ولادتها تكون مع ولادة المسيح، وتكون عَ اساس الخير والعدالة، والمعايير..
• ولأنو الحكومة هيّي للكلّ، الكل بدُّن يضحّوا، حتى ما تكون عَ حساب حدا..
• الكل بدّو يتنازلو حتى تِجي الحكومة،
  – بالمضمون
  – بالشكل،
  مع احترام معايير وعدالة التمثيل.. وهيك مِنكون عَم نجيب هدية (الحكومة) هدايا تانية، لأنو ما بِكفّينا تجي الحكومة، بدنا يولد معا الخير والعطاء والإقتصاد المنيح، ومحاربة الفساد..
• بدنا يِجي مع الحكومة نَفَس جديد بالبلد، وذهنية جديدي.. إنّو بدنا نعمّر مش نخرِّب..
• إذا إجِت الحكومة، مش حدا بيربح… هيدا تفكير غلط.. ومش يعني رئيس الجمهورية بيربح.. ليه اعضاء الحكومة ورئيس الحكومة ما بيِربحو..!!
• كل مرّة بيِجي حدا، مِنفكّر إنّو بدنا نفشّلو.. طيّب أيمتى منِنجح..؟؟ ما كل حدا بنظام ديمقراطي عندو خصم.. أيمتى ننجح كلنا سوا، إذا ما منفكّر كلنا سوا منِنجح مع بعضنا

الجنوب

• نحنا مصممين نهتمّ بكل الجنوب، ميشان هيك عيّننا بالمجلس السياسي للتيار الوطني الحر، بنت الجنوب مي خريش، ومنِقلها مبروك..

• نشالله قريباً يكون في عنا بالحكومة اللبنانية وزير من الجنوب، وبالمجلس النيابي للتيار الوطني الحرّ نايب من الجنوب غير جزين.

عشتم وعاش الجنوب وعاش لبنان

https://www.youtube.com/watch?v=tNSCyYwh9jE