التيار القوي للبنان القوي من الشمال للجنوب: نحنا خطط الطاقة والنفط والسياحة الدينية ونقل المشترك وهنّي موتورات التعطيل وتزفيت الزواريب والـ Fume والبينغو (Audio)

🇱🇧: طرابلس: كفى إهانة للمسيحيين
🇱🇧: عكار: سيمثلّها التيار لأول مرّة
🇱🇧: الأوّل بالبترون رح يمثّل البترون 
🇱🇧: كسروان قلب لبنان والتيار بقلبها
🇱🇧: جزين الأبيّة رح ترفض وضع اليد عليها
🇱🇧: التيار راجع على زحلة
🇱🇧: بعلبك الهرمل: رفضنا المقعد الماروني ما منقبل نربحو باصوات غيرنا، بدّنا نربح مقعدنا الكاثوليكي
🇱🇧: البقاع الغربي: انشالله يربح التعايش (الحقيقي) على الطمع (العابر)
🇱🇧: بالجنوب: 70 الف مسيحي، ما بيستاهلوا تمثيل حقيقي؟

***

كلام رئيس التيار الوطني الحرّ في حفل إطلاق لوائح التيار الوطني الحر، وتكتّل التغيير والإصلاح من “الفوروم بي دي بيروت” (الجزء الثاني – 24 آذار 2018)

وانتو يا اهلنا بكل المناطق، بدّي قلّكن:

1- بعكّار: لأوّل مرة سيحمل التيار الوطني الحر اسمكم في مجلس النواب.

2- دائرة طرابلس: قامت الدنيا كيف بدنا ننقل المقعد، واليوم عم ينقلوا المرشحين من برّا طرابلس على هالمقعد وكأنوا مسيحيي طرابلس ما في مين يمثلهم من بينهم – كفى اهانة لأهلنا هونيك.

3- دائرة زغرتا: لأوّل مرّة بيترشح التيار بزغرتا، وبقرى الزاوية تحديداً، ومش بالمدينة لنقول انو اهالي الضيع والمزارع لهم الحق بالتمثيل متل اهل المدينة مش اقلّ.

4- البترون: لأوّل مرة (من الـ 2005) الأوّل بالبترون رح يمثّل البترون بالمجلس النيابي، وعهدي الكم يا اهلي ان الاقطاع صار على طريق الزوال.

5- دائرة كسروان جبيل: كسروان قلب لبنان والتيار بقلبها، وانتو طلّعتوا للجمهورية رئيسها القوي، هل كان غريب عنكم؟ ما في غريب عن كسروان الاّ اللّي بيخون اهلها وبيبيع قرارها لخارج الحدود.

6 – المتن: على موعد مع تغيير كبير ورح يكتب مستقبلو بتعب شبابو.

7- بعبدا: هي الرمز وحاضنة القصر– خلّي شعبك يحضن نوابك ليكونوا درعه لقصر الشعب.

8- الشوف/عاليه: بدكن تحكوا عن عودة الجبل الحقيقية؟ انتخبونا لترجع الشراكة الغايبة ولتتشجّع الناس ترجع بظلّها.

9 – جزين: جزين الأبيّة رح ترفض وضع اليد عليها، وهي عرفت طعم الحرية مش لترجع للعبودية.

10- زحلة: التيار راجع على زحلة مثل الكهرباء 24/24 وعقبال كل لبنان.

11- بعلبك الهرمل: رفضنا المقعد الماروني لأن ما منقبل نربحو باصوات غيرنا، وبدّنا نربح مقعدنا الكاثوليكي اللّي منستحقوا بأصواتنا المسيحيّة والمسلمة ومش بالعيارة والاّ ما بدنا!

12- البقاع الغربي: انشالله يربح التعايش (الحقيقي) على الطمع (العابر) ويتمثّل كل مكوّن بنوّابه الحقيقيين.

13- حاصبيا – الزهراني وباقي الجنوب: 70 الف مسيحي، ما بيستاهلوا تمثيل حقيقي؟ لحقونا عالمعركة هالمرّة، ثبتوا حضوركم والمقاعد رع ترجعلكم لتكونوا حرّاس الحدود والعيون السهرانة.

14- بيروت: العاصمة لازم تكون للكل وبقلب الكل وهيك رح يرجع يتمثّل فيها الكل.

(لكل منطقة ما ذكرتها بعتذر، اكيد ما نسيت بس شو بدّي عدّد لأنو بالنسبية والصوت التفضيلي صار كل صوت مهم للتغيير).

يا رفاقي بالتيار

التيار كان شعاره دايماً الصح، ولا يوم خذلناكم، نحنا عم نحمل همكم، وندافع عنكم، لنحصّل حقوقكم، بس نحنا اقوى بكتير لمّا منكون معكم.

• نحنا معكم منفكّر كبير وهنّي بيفكّروا صغير
• نحنا خطط الطاقة وهن موتورات التعطيل
• نحنا خطة النفط وهن رخص المحطّات
• نحنا الاوتوستراد الدائري وهن تزفيت الزواريب
• نحنا السياحة الدينية وهني البينغو
• نحنا خطة السير والنقل المشترك وهن رخص الـ Fume
• نحنا بكرا وهني مبارح – ومتل ما قال الجنرال نحن لبنان الآتي وهم لبنان الراحل.

خياركم بـ 6 آيار لازم يكون صح لأن من وراه منكمّل مسيرة العهد القوي او منوقّفا.

وهيدا استفتاء للشعّب اللبناني – بدّو العهد والرئيس القوي يكفّي او بدّو ياه يضعف؟

بدكن لبناننا القوي او لبنانهم الضعيف؟

انتخبوا صح – انتخبوا التيار- انتخبوا للبنان القوي!

عشتم عاش التيار الوطني الحر – عاش لبنان