التيار القوي للبنان القوي 🇱🇧️: مع المقاومة لحماية البلد لا الفساد و عَ الوعد يا صاحب الوعد الصادق (Audio)

التيار القوي للبنان القوي – للمستقبل: الشراكة للإصلاح مش للصفقات
التيار القوي للبنان القوي – للقوات: بعد الانتخابات، بتخلص الأكاذيب، ساعتا بتشغلوا، ما بتخرّبو شغل غيركن
– ما رح نقبل حدا يمد ايدو على نفط لبنان، لا بفساده ولا باعتداءه، لا من جوّا ولا من برّا…

***

كلام رئيس التيار الوطني الحرّ في حفل إطلاق لوائح التيار الوطني الحر، وتكتّل التغيير والإصلاح من “الفوروم بي دي بيروت” (الجزء الأول – 24 آذار 2018)

التيار الوطني الحر… بحييكم،

تحيّة لكل واحد منكم وقف لَما يركع لبنان!

وقت كان البلد تحت رحمة الميليشيات والجيوش المحتلة، وقفتوا وحدكم، لتحافظوا على السيادة،

وقت حاولت ميليشيات السياسة تخطفلنا قرارنا وقفتوا وحدكم لاستعادة الشراكة،

وقت اليوم عم تحاول ميليشيات الادارة، تخطف لقمة عيشنا واقفين لوحدكم كمان لتحافظوا على الدولة.
هيك انتو، هيك نحنا، وما في شي قِدِر يوقّفنا، لا عسكر، ولا ارهاب، لا قمع ولا منفى ولو اجتمعت علينا اليوم كل ميليشيات مبارح، ما في شي بيوقّفنا.

نحنا التيار اللّي طلع من واحلامكم لتبنوا معو دولة، اليوم عم يبني حاله، وصار عنّا نظام ومواعيد دائمة ومنها هالمؤتمر السنوي لإعلان ميزانيّتنا بشفافية ولاعلان ورقتنا السياسية والسنة هي برنامجنا الانتخابي، ولاعلان مرشحّينا بآليّاتنا الديمقراطية.

يا رفاقي وأهلي، 
التيار عم يبني قوته على ثلاثة:

1 – قضيته: يعني تاريخه اللّي ما في دم ولا عمالة ولا عمولة ولا فساد.
والناخبين تيختاروا، اسهل شي يطّلعوا على تاريخ الشخص، لأن اللّي ماضيه كلّه سيء ما في يوعدكم بشي منيح.
أ – اللّي ماضيه تبعيّة للخارج، ما في يحكيكم بالسيادة (ومبارح شفناهم باللّي صار مع رئيس حكومتنا) واللّي ماضيه تبعيّة للداخل، ما في يحكيكم بشراكة (ومبارح طيّر الارثوذكسي والتأّهيلي).
ب – واللّي ماضيه قام على تخريب الدولة ما في يحكيكم ببنائها،
ج – واللّي ماضيه قام على السرقة وتدفيع الخوّات وطمّ النفايات، ما في يحكيكم بمحاربة الفساد.

2 – مأسسته: أهمّ ركائزنا الديمقراطية، ونحنا الوحيدين اللّي كان عنا الجرأة نعمل انتخابات تمهيديّة فيها نسبية ومثل الصوت التفضيلي، وهيك انتو اخترتوا المرشحين.

3 – مشروعه: اللّي عرضناه اليوم، هويّ كرامة شعب – ووحدة وطن – وسيادة بلد – وميثاقية كيان- وفعاليّة مؤسسات – وشراكة حكّام – وهيبة رئيس- وبسالة جيش – وتضحيات مقاومة – وانتاجية اقتصاد- وانتشار رسالة – وتسامح الناس.
هيدا التيار القوي للبنان القوي.
كلمة بتختصر كل شيء: القوي.

شو معناها؟
1 – لبنان القوي هو حريّة ، سيادة، استقلال.

• الحريّة هي الشجاعة انو نقول لا وقت اللّي ما حدا بيسترجي،
  الشجاعة انّك تضلّ تحارب وقت الكلّ بيستسلموا،
  وعدم الاستسلام هوّي اللّي بيوصّل للسلام… سلام الأقوياء.
• السيادة هيّ القرار يكون من هون، قرار لبناني 100%.
• الاستقلال هوّ اللّي بتاخدوا بنضالك/ مش اللّي بيعطوك ايّاه، لأنك بترجع بتخسروا اذا مش دافع حقو… نحنا دفعنا حقّو، لهيك سياستنا الخارجية مستقلة، ولهيك قاتلنا للنفط ليكون قرارنا الاقتصادي مستقل.

2 – لبنان القوي هو الميثاقية، شراكة كاملة ومناصفة، من دون اقليّات واكثريّات طائفية، وانشاالله منوصل لأكثريّة مواطنيّة واحدة.

(عم نسترّد الميثاقية بحقّنا ومش عم نستجديها من حدا بمراكز نيابية او ادارية.)

3 – لبنان القوي بوحدته، ومنعبّر عنها لمّا منوقف لجانب ايّ لبناني مظلوم، ولمّا بتحزّ المحزوزية ما بيلاقي غيرنا حدّو.

4 – لبنان القوي برئيسه – عاشوا سنين يقنعونا ان رأس الدولة لازم يكون ضعيف ووسطي وحكم وبلا قرار! وشفتوا انتوا الفرق هلّق مع رئيس قوي بشخصه ولكن الأهم انوّ قوي بكتلته وبشعبه.

5 – لبنان القوي بجيشه، ونحنا اللّي طلعنا من الجيش (انصار وعناصر وعِماد) منقول انو هوّ عِماد الاستراتيجية الدفاعية، والشعب والمقاومة هنّ من حوله.

6 – لبنان القوي باقتصاده، اقتصاد منتج مش ريعي، بيصدّروا بضاعتهم العاملين بالزراعة والصناعة والتكنولوجيا ومش بتستفيد منّو فئة صغيرة على حساب الشعب. بلد فيه سياحة (بيئية ودينية ورياضية)، وآخر مشاريعنا هي السياحة الغذائية و Gastro Diplomacy، لنقول للناس شرّفونا من برّا او نحنا منروح كمان لعندكن بمطاعمنا – كلوا لبناني واشربوا لبناني وسهروا لبناني…

7 – لبنان القوي بنفطه – عم تتخيّلوا لبنان دولة نفطية؟ ويعني ازالة الديون وفاتورة رخيصة، وآلاف فرص العمل للشباب واستثمارات كبيرة… وبعد هيك بتسألوا لي ناضلنا للنفط؟ وما رح نقبل حدا يمد ايدو على نقطة من نفط لبنان، لا بفساده ولا باعتداءه، لا من جوّا ولا من برّا…

8 – لبنان القوي بشابه، ليكونوا هني قوّة التغيير وبنساؤه ليكونوا مصدر الشفافيّة والنزاهة.

9 – لبنان القوي بانتشاره، لأن اللبنانيي (من كل عيلنا) تشرّدوا لبرّا من ورا سياساتهم هن ولكنهم نجحوا برّا، ولما جينا لنجمع طاقاتهم ونعيّش فيهم لبنانيتهم لأن دمّهم لبناني 100%، وبدنا نعطيهم حقوقهم 100%، ما عجبهم لأنو ثقافتهم (التهشيل) والتهجير (والتشريد) ونحنا ثقافتنا (اللّم والجمع) (والربط).

10 – لبنان قوي برسالته، بدوره، بوصله بين شرق وغرب، بوقفته على خطوط التناقض وقدرة احتماله واستيعابه، بفرادته وتنوّعه والعيش الواحد فيه.

يا رفاقي،
لبنان القوي بلّش بـ 88 بالعماد القوي، اللّي صار الرئيس القوي بفضل عنادنا ووفاء اصدقائنا، وهلّق منكفّي بـ 6 آيار لنعمل الكتلة القويّة اللي هي درع الرئيس وسيفه – وهيك الرئيس مش صورة على الحائط، بالعكس بيكون بالحكومة وبمجلس النواب وبالادارة وبالعسكر وبالشعب. وهيك بتكون الشراكة، وفلسفتها انّو الشريك ماسك ومش ممسوك، وانّو الناس بتلتف حوله ومش عليه، لضربه وتفشيل عهده.

مواطينينا،
انتو رح تعملوا معنا هالكتلة القوية بـ 6 ايّار. كيف؟

1 – بمرشحينا: اللّي انتو اخترتوهم، ونحنا ما تخلّينا عن ولا واحد من التيار استحق ثقتكم ولو على حساب حليف او لائحة، ونحنا ما اخذنا من تيارنا ولا واحد انتو حاسبتوا وما عطيتوا اصواتكم ولو زعلوا.

2 – بالتحالفات: اللّي عملناها كرمالكم وحتّى محل يلّلي انضربنا وتمّت خيانتنا سكتنا لنحافظ على التفاهمات الكبيرة ونحفظ البلد واستقراره. بدّن يحاصرونا ويصغرولنا كتلتنا تيخفّفوا من قوّتنا وقدرتنا، ونحنا بدنا نردّ عليهم بالصندوق بمزيد من الاصرار على التفاهم بس بكرامتكم.

أ – مع الفريق اللّي عم نعمل معه مقاومة بدّنا نحافظ عليها لحماية البلد، بس مش لحماية الفساد، ومش ليتغطّى الفاسدين فيها لينهبوا البلد، ونحنا على الموعد بعد الانتخابات ونحنا على الوعد يا صاحب الوعد الصادق اللّي ما بحياتك خلّيت بوعودَك.

ب – ومع الفريق اللّي عم نعمل معه شراكة، بس شراكة للاصلاح مش شراكة صفقات وفساد، شراكة لحل ازمة النازحين مش للاستفادة منها، ونحنا كمان على الموعد معه بعد الانتخابات.

ج – مع الفريق اللّي عملنا معه مصالحة والمصلحة بتقضي انو نكون واحد تنحافظ على الخي من دون ما نلغي الذات، نحنا على الموعد ذاته كمان بعد الانتخابات، هيك بتكون خلصت مزايدات الانتخابات واكاذيب الفساد والكهرباء وبيرجع كل واحد بيهتم يعمل شغلوا، مش ما بيعمل شغلو وبيخرّب شغل غيرو.

د – ومع كل واحد بيحبّ يحط ايدو بايدنا، نحنا الوحيدين اللّي ما حطّينا فيتوات بالانتخابات ولا عنا عقدة نحكي ونتفاهم مع اي لبناني طالما هو لبناني… (مش احسن ما نحكي مع اللّي برّا ونرفض نحكي اللّي جوّا؟!)

3 – فيكم، باصواتكم اللّي عم يزرعوا تغيير كبير تنحصدو بـ 6 آيار وبالـ 2022،
هن ما بدّن اصواتكم كتيرة/ لهيك خالفوا القانون والغوا البطاقة الممغنطة والغوا الـ Mega Center لأن ما بدّهم انّو الأقليّات الطائفيّة والاطراف المناطقية يعني اهل البقاع والجنوب والشمال البعاد وأهل الجبل، ما بدّن ياهن يصوّتوا بكثافة…

نحنا سنخوض معركة تمثيلكم ووجودكم ولو كنتم اقليّة او بعاد… انتو بالنسبة النا كتار وقراب.
a – وانتو يا اهلنا البعاد بدكّن تردّوا عليهم بإنّو تطلَعوا كتار وتصوّتوا بضيعكم، وما تخافوا.
هيك بتحرّروا هالمرّة قسم من المقاعد اللي تآمروا عليها. نحنا حرّرنا قسم بالقانون وانتو رح تحرّروا قسم بأصواتكم، ومنرجع سوا منحرّر القسم التاني بالقانون وبالتصويت بالدورة التانية.
b- وانتو يا اهلنا بالانتشار، رَفضوا يمدّدوا لكم مهلة التسجيل لحتى ما تصوّتوا كتار، ردوا عليهم وانتخبوا كتار وتعوا كتار شاركوا معنا بالتغيير.
هالمرّة رايحة لعندكن الصندوقة – المرّة الجاية بتروح الصندوقة وبيرجع معها نواب للانتشار.
لبنان بيستاهل صوتكم، ما تغيبوا عن صندوقته… وين ما كانت.