راغب علامة للحريري: يا جايي من السفر وحشاني الإبتسامة والشكوى للقمر (Audio)

– لو بدي اترشّح عَ الانتخابات كنت رحت عَ عين التينة…
– وجود داعش وأخواتها ما كانت شغلة بالهيّن، وكانت عم تطال ديمغرافية لبنان
– الله يعينو الحريري…

***

مقتطف من حديث الفنان راغب علامة لقناة “المستقبل” ضمن برنامج “Interviews”: (22 ت2 – 2017)

• بعتقد النار اللي صارت حوالى لبنان كانت عم تطال لبنان وديمغرافية لبنان.
  وجود داعش وأخواتها ما كانت شغلة بالهيّن انو الواحد يقعد يتفرّج عليا من بعيد.
• كلنا كنا خايفين.
  كل العالم كانو خايفين.
  الناي بالنفس لازم يكون بلبنان. نعم.
  على كل الأفرقاء،

لكن 

كمان نحنا بلد صحيح صغير، ولكن بوحدتنا أثبتنا انو قوايا..

ما يبعتولنا لا المصايب، ولا الإنفجارات ، ولا الإنتحاريين..

يسأل : هل تستمرّ هذه الوحدة؟؟ يقول راغب علامة:

• خلينا نقول إنو عنّا مثل انو ممكن يصير بلبنان وحدة بين العالم.
  المهم التفرقة السياسية ما تكون تابعة للخارج.
  لما بكون كل حدا تابع للخارج، إجباري ما رح يكون في نأي بالنفس.
• الإستقلالية هيي استقلاية بالكامل.
  ننأى بنفسنا.
  ينأوا بنفسن ، عنّا وعن لبنان، وعن الشعب المسكين الضعيف، اللي ما بالو الاّ يعيش، وبعدان بصير النأي بالنفس اكيد.

اليوم هيدا التوافق مشهد 3 رؤساء متفقين عَ موقف واحد.. مشهد عم يتكرّر برئاسة فخامة الرئيس ميشال عون ودولة الرئيس نبيه بري ، ودولة الرئيس سعد الحريري..

• لما كان في انقسام 8 و 14 آذار، 
  كان في استحالة البلد انو يمشي .
  واستحالة انو فريق ينتصر على فريق، او فريق يلغي الآخر..
• اليوم المشهدية تغيرت، ومنتمنى انو الكل يتوحّد حول الرئيس الحريري، لأنو الله يعينو على مسؤولياتو اللي “دَوبلتْ”. ويلو هول، وويلو هول.. وويلو شو رح يفكرو عنو إذا حكي هالكلمة..
• المسؤولية كبيري عليه، ومنتمنى الشعب اللبناني وكل السياسيين يوقفو الى جنبو، ويدعمو مسيرتو لحتى البلد يرجع يمشي على سكة الخير والسلام.

تسأله الإعلامية بولا يعقوبيان: عم تفكّر تترشّح على الإنتخابات؟ يقول:

• أبداً..
  لو بدي اترشّح ، ما كنت جيت على بيت الوسط ،
  كنت بروح على عين التينة.
  طائفياً …
• لن أترشح، وصدقاً أنا دايماً بحكي بالوطنية، وبعمري بحياتي ما فكّ{ت بالترشّح على الإنتخابات، مع انو تغيّر القانون..
• طالما في تفرقة طائفية انا زلمي بعيد عن كل هالإشيا.
  أنا زلمي تربيت على محبة الناس
  – من كل الأطياف،
  – من كل الأديان،
  – من كل المناطق
  – من كل الدول ،
  ليه بدي ارجع حط حالي بفريق معين…

بحلم ارجع شوف لبنان. لأنو ما ناقصنا شي ، نحنا شعب زرعنا علمنا، وفهمنا، وخيرنا على العالم، الاّ بس نجي على لبنان بدنا نخرّب بلبنان.. منروح برّا منوقف بالصف ومنجي هون بالمطار منبلش نخرّب.. حان الوقت انو اللبناني يرجع يفكّر بدولة بعيداً عن الطوائف.

عن كلمة يحب توجيهها للرئيس سعد الحريري أو للبنانيين جميعاً، يقول:

أنا بقلو “حمداللي عَ السلامة دولة الرئيس” كتبتلو ياها على “تويتر” … يا جايي من السفر، وحشاني الإبتسامة والشكوى للقمرررر

رصد Agoraleaks.com