غطاس خوري يتحدث عن التسوية وأجنحة تيار المستقبل و”twitter” الوفا.. ونظرية القفز بالمجهول (التفاصيل – Audio)

– ما عم إتهّم جعجع.. ومش جايين نفتح محاكمة، وجنبلاط كان معنا بهيدي “المعمعة”الصعبة

***

مقتطف من حديث وزير الثقافة غطاس خوري لقناة “المستقبل” ضمن برنامج “Interviews”: (22 ت2 – 2017)

تقول الإعلامية بولا يعقوبيان: كتير نظرو إنو التسوية إنتهت، بعدا التسوية، رجع نعطيت أوكسيجين بالتريث؟ بأي وضعية نحنا سياسياً؟؟ يردّ غطاس خوري:

• انا برأيي التسوية اخدت دعم أساسي اليوم من مشاركة كل اللبنانيين،
  وبأكّد كل اللبنانيين باستقبال الرئيس سعد الحريري.
  وبالمباركة لنفسن وللبنان، انو رئيس الحكومة عاد الى بلدو، وهو سيقود هذه المسيرة السياسية

كان في حركة دولية لافتة. في مجموعة دول اكّدت انو سلامة لبنان أساس. في دول كبرى وفاعلة بالمنطقة أكدّت انو ما في حدا حاطط ببالو يفتعل حرب بلبنان، او يعمل لبنان ساحة مواجهة.

يسأل: كان في مشروع تحويل لبنان الى ساحة صراع؟ يقول:

• إذا منحطّ معادلة مستحيلة قدامنا، 
  ما منعود نعرف نتائجا.
  ما بدنا نحط معادلة مستحيلة، بدنا نحطّ معادلات الها حل.
  بدّو يكون المُعطى مزبوط، لتلاقي حل صحيح.
  إذا المُعطى غلط الحل مش موجود بكون.
  إذا المُعطى صحيح ، وانو نحنا كبلد لا نقوى على حلّ أزمات إقليمية ودولية ، منقدر ساعتا نتفاهم على الأقل حلّ أمورنا الداخلية بالتفاهم.

الرئيس الحريري كان عامل توازن بالبلد،
التوازن كان موجود، 
إزالة سعد الحريري ما بزيد التوازن، بطير التوازن كلياً.

• الرئيس سعد الحريري اليوم محتجز بمحبة الناس لالو.
  صار بيعرف انو عليه مسؤولية كبرى بانو بدّو يكفي بالطريق الماشي فيا.
  واللي لخصا ب 4 نقاط:
  – اتفاق الطائف
  – السلم الأهلي
  – العلاقات العربية الممتازة
  – النأي بالنفس
  طبعاً مش وحدنا نحنا، لازم نفتح نقاش، ورئيس الجمهورية رح يفتح نقاش مع كل القوى السياسية للوصول الى هذه الخواتيم.

يُسأل عن الودّ والحب من شرائح ومجموعات سياسية قبل كان بالنسبة الن، “الشيطان الأكبر”، يجيب غطاس خوري:

• والرئيس عون عندو محبة من شرائح ما كانت تتعاطف معو بالسابق. اليوم في مواقف وطنية بياخدوها القادة بتأدّي لأنو يصير في عبور للحواجز الطائفية الموجودي.
• الرئيس بري كمان كان موقفو ممتاز، والناس قدرتلو ياه، وشافتلو ياه.

كما التوازن بالبلد دقيق ، الإخلال بالتوازن بهيدي الطريقة، انو بشوف إذا فينا نقلب هيدي الحكومة او انو في شخصية ما بتأدّي لنتيجة المطلوبة، بأدّي لعكسا. وبرأيي كل الناس صارت عارفي إنو إذا القادة السياسيين او زعيم سياسي عندن قاعدة شعبية حقيقية مش بالسهولة دغري فجأة تخلقي قادة او زعيم جديد.

يسأل: عم نقرا انو في أجنحة في منزل الرئيس سعد الحريري، وكأنو هذا البيت أصبح بمنازل كثيرة.. قديه هيدا الموضوع دقيق؟ وإذا بتوضّح للناس تلك “التويتر” الشهير اللي عملتو، وانحكى انو موجّه للدكتور فارس سعيد..؟

يقول غطاس خوري:

• أوّل شي بدّي قول.
  الأزمة اللي مرقنا فيا ما كانت هينة. صعبة جداً.
  وطبيعي بطرق حل الأزمة وكيفية مقاربتها، في يكون في آراء مختلفة.
  داخل البيت كان يمكن في تيارات مختلفة. الآن في الرئيس الحريري هوّي اللي بقرّر ، والكل بيمشو.. 

التويتر كان موجّه للدكتور فارس سعيد؟؟ يسأل غطاس خوري؟؟

• أنا عملت “تويتير” إذا قلت لمين موجّه ما بعود الو قيمة. “التويتر” بحدّ ذاتو في معاني متعددة، وكل واحد يقراه متل ما بحبّ..
• ما رح إنفي وما رح أكّد. أنا بقول: هيدا “التويتر” نعمل بظروف محدّدة، ولقريه “التويتر” والتويترات” الموجودة بالبلد قبل، بيعرف انو عم قول “شوية وفا“.

هل من متضررين كثر من مسألة التريث؟؟

• المؤسف إنو المتضررين من مسألة التريث ما عندن بديل الا بدي القفز بالمجهول.

يُسأل: الدكتور جعجع من هؤلاء!!

• ما عم اتهّم الدكتور جعجع..

كان عم يقول: انو لازم يستقيل من قبل ، ومن زمان ، وتأخّر.. 

• بالسياسة كل واحد بياخود موقف اللي بلاقيه مفيد لالو،
  خاصة انو نحنا على أبواب انتخابات ست بولا، بتعرفي..

يسأل: من وين بدكم تجيبو حلفا، في حلفا جداد؟؟ يقول غطاس خوري: 

• ليش ما عنا حلفا.. بفتكر تيار المستقبل عندو من الحلفاء ما يكفي.

س: يعني في حلفا جدد!!

• ليه الوزير جنبلاط حليف جديد! وقف معنا بهيدي “المعمعة” بشكل واضح وصريح، وموقفو لافت، وأكّد عن أصالتو.
• في ناس رأت موضوع آخر. هيدا راجع لإلها، وعندا حساباتها السياسية.. نحنا مش فاتحين محاكمة.
  وللإنتخابات يخلق الله ما لا تعلمون.
  ما بدّي أنا استبق كيف بدها تصير التحالفات.

لكن في تحالف أساسي لازم يصير، هوي تحالف حماية البلد.

رصد Agoraleaks.com