يا كبير عائلة العونيي، رفعتلنا راسنا وناطرينك ترفع راس الوطن.. (روبير مجدلاني)

بعدني مش عم صدق انو الحلم رح يصير حقيقة.. 
الدني مش سايعتني من الفرحة، نسيت الهموم ونسيت المشاكل، بعدني عايش احساس اللي بقول هيدي حقيقة عم شوفها بعيوني، وبين انو هيدا حلم عظيم عم صلي اني ما اوعى منو.. 
برجع بستوعب انو لأ، هيدا مش حلم، هيدا مش خيالي انا ومغمض عيوني، هيدا واقع، واقع انا عم عيشو ومفتح عيوني، يمكن هيدي اكتر مرة بفتح عيوني هالقد فيها، بدي ضلني مفتحهن تشوف هالحقيقة اكتر وتنطبع بذاكرتي اكتر واكتر متل ما رح تنطبع بذاكرة لبنان والاجيال الجايي.. 
بمشي بهالشوارع وما بشوف غير صورو، هالصور للشخص اللي انطبعت صورتو بقلبي من انا وصغير وترسخت مبادئو بعقلي لما صرت شب وكل ما عم بكبر نهار حبي تجاهو عم يزيد سنين.. 

يا جنرالنا، يا حبيبنا واملنا وبينا، يا اعظم من قائد، مرة انا قلت: 
خسرت بيوم من الايام اب، ومش رح اقبل اني اخسر التاني .. 

اليوم يا جنرال بفضلك انا ربحت اب وربحت قائد وربحت زعيم تخطى المناصب وسكن بالقلوب..
يا كبير عائلتنا، يا كبير عائلة العونيي، رفعتلنا راسنا وناطرينك ترفع راس الوطن.. 

نازلين ب31 انا عالمركزية غيري بالجديدة غيري بكسروان وغيرنا وغيرنا بكل لبنان، وبكل لبنان رح نبكي ورح نرقص ورح نوزع بقلاوة ورح نفرقع، ورح نقول للكل: 

بينا نحن بطل ملكنا، صار ملك الكل، واملنا نحن بطل املنا وحدنا، صار امل الكل..

هذا وكتب مجدلاني، “حطّينا العلم، متل ما هوّي طلب، بس العلم اللبناني .. 
#فخامة_الرئيس_ميشال_عون