Agoraleaks Agoraleaks
يا هالبكرا،
يا الجايي ع حصان المجد، يا المكلل بالغار والكرامة والوطنية والعنفوان،
يا هالدقة القلب اللي عم تعزف حماسة ما الها مثيل،
يا هالدموع الكارجي ع خدود الامل، يا هالابتسامة المرسومة بالصلا والرجا،
يا هالقيامة اللي تحققت بمعجزة إلهية من بعد درب الصليب، يا هالطيارة اللي رجعت كتار من دول الانتشار، يا هالنضال الواثق انو ما بروح ضيعان،
يا هالقلم والورقة اللي عم بشتو حبر ما انكتب ولا انسكب متلو بعمرنا،
يا هالقسم الصادق اللي حلفناه من اول طريق التحرير والتحرر، يا هالرد الاعتبار لدماء الشهدا اللي سقطوا بساحات الشرف،
جيت متأخر بس المهم انك جيت… جيت ونحن جاهزين لنستقبلك… جاهزين لنصرخك شعر وغنية، لنرفعك ع الراحات ونرش عليك زهور، لنهلل بالساحات، لنحتفل بلبنان القوي، لنفتح الباب ع احلام جديدي وامل جديد…
يا هالبكرا ناطرينك لنزفك بعرس وطني ما صار بتاريخ لبنان…
ناطرينك ليرجع بيت الشعب للشعب ونصرخ ونقول يا مية هلا بأهل الدار!
رندلى جبور
