كلام خطير عن المجنسين.. نعمة الله أبي نصر: حراميي ومجرمين أخدو الجنسية اللبنانيي (التفاصيل – Audio)

 – 75 الف فلسطيني تجنسو من اصل 200 الف… وبقلولو ما في توطين وتلاعب بالديمغرافيا
– بدنا نعمّر سورية من دون ما تعرف سورية!! بالوَمَى..!! شو هالمنطق هيدا.. (التفاصيل)

***

مقتطف من حديث النائب نعمة الله أبي نصر لقناة “تلفزيون لبنان” ضمن برنامج “لبنان اليوم”: (تشرين الأول 2017)

يسأل أبي نصر عن إنشاء محافظة كسروان – جبيل، وكيفية تطبيقها

• الإقتراح قُدّم سنة 2003، تزامناً مع اقتراحين قدمهما نواب منطقة بعلبك – الهرمل، وكذلك نواب عكار.
  الطريق بالنسبة الن كانت طريق عسكرية، ما تجاوزت سنة.
  انا اخدت معي 14 سنة ونص. يعني كان في صيف وشتي على سقف واحد.
  أثيرت نقطة انو ما في تعددية ضمن محافظة كسروان – جبيل؛ قلنالن:
  بالنبطية ما في تعددية اكتر. ونحنا عنا بجبيل نائب شيعي، وإذا في مثال للعيش المشترك بلبنان هوي بجبيل، في الشيعي، وفي السني، وفي الأرثوذكسي، وفي الأرمني، وفي الماروني.
• على كلّ من بعد كل هالشي، استعنا ببعض النواب من طرابلس وأقرّ المشروع، وفخامة الرئيس مضي القانون، ومنتأمل هلق يتنفّذ لأنو ضروري

بمحافظة كسروان جبيل، في :

– 91 بلدية موافقين عَ المشروع
– في اكبر مؤسسات سياحية اقتصادية
– 12 جامعة
– 12 مستشفى
– قلعة جبيل..
– 80 مصرف
كل هالناس بيحتاجو للدولة، بدل ما يطلع 1500 – 1800 سيارة يومية من عَ بكرا وبيجو الضهر عَ بعبدا، ميشان شو.. ؟؟؟ تيدفعو الضريبة، أو يحصلو عَ إمضا أستاذ مدرسة، عاطيهن ياها مدير.. هالأمور بتخفّف عجقة السير… وإضاعة الوقت ليصدّق ورقة، وبقولولو: تعا بكرا، أو تعا بعد بكرا…

• باختصار عم نجيب السلطة ونقربها للمواطن، حتى هيي تخدمو وهوي يخدمها.
• إجتني الفكرة بفترة الأحداث، وقت قضاء كسروان انعزل..
  تسكرّت طريق نهر الكلب، احد المواطنين الو تعويض استملاك بسيط (15 الف ليرة لبنانية) وعايزون، وما يقدر يقطع.. استأجر “فلوكا” (شختورة) مع الصيادين تقدر قطع النهر.. طلع عَ بعبدا، قالولو: تعا بكرا.. ضيّع نهارين..

آلية التنفيذ

• مكان المحافظة موجود، القائمقامية بتتحوّل لمحافظة، وعَ مهلن بيبنو طابق إضافي، وبيبنو دوائر، بس المهم يعينو محافظ، مع الجهاز العائد الو، من أمانة عامة وامين سر الخ.. وبعتقد اتحاد بلديات كسروان وجبيل مستعدين يساهمو بالموضوع مالياً وادارياً..
• كل الدوائر الموجودة ببعبدا بدو يصير في متلا بمحافظة كسروان – جبيل:
  – محكمة بدائية
  – محكمة استئنافية
  – قيادة درك
  – كل الوزارات تتمثل بالمحافظة
  – ميكانيك
  طبعاً هالأمور بدها مبلغ مالي، وبآخر مرة صرفو لمحافظتي بعلبك وعكار حوالي 100 مليون $. ولكن أهم شي يبلشو بتعيين محافظ..

الانتخابات النيابية

– إقتراع المغتربين وتمثيلن، واشراكن بالحياة السياسة واجب. سيما أنو تهجرو أو راحو لأسباب عديدة منها أمنية، وإقتصادية، وخوف على المصير وعلى الرؤية…

– بلشت من سنة 1920، طلعو من مجاعة طويلة عريضة، وعلى اثر الحصار البري، والبحري، قسم كبير مات جوع.. وقسم هاجر، وقسم بقي.. ونحنا أحفاد القسم اللي بقي.. فليه ما منردلو تذكرتو؟؟ هيدا حقن…!!!

– هلق في قانون واضح وصريح باستعادة الجنسية رقمو 41 صادر من سنتين، هيدا القانون صدر، تنفيذاً لأحكام الدستور والقانون، لأنو الهوية اللبنانية طريقة اكتسابا وحفظا تحدّد بقانون مش بمرسوم...
– للسف بمرسوم تجنّس ربع مليون زلمي
– القانون اللي صدر إذا ما رافقو حملة إعلامية بتبلش بالسفارت والقنصليات لحث اللبنانيين لتقديم الطلبات.. لأنو نحنا عم نتوجّه لأجيال الأحفاد… هالناس جدّن راح، وما بقا يحكو عربي..

• المعاملة بتاخود 4- 5 أشهر، بين تقديم الطلب، والتحقيق واللجنة، والمدير العام، ومدير عام تاني وقاضي.. إذا ما كانت معاملتك ما في حدا عم يلاحقا ما بتمرق.. وهلق المستفيدين بالمئات فقط، بينما لازم يكونو بالآلاف.

بالمقابل

التجنيس

• في مرسوم صدر مخالف للدستور، وللقانون، وبشحطة قلم، جنسو سنة 1994 حوالي 200 الف شخص. واليوم صارو 400 الف شخص.
  الأغلبية ما الها حق.. ومنهم 75 الف فلسطيني.. وعم نحكي بالأرقام
• في ناس تجنسو كانو بالحبوسة.
  والحكم صدر بابطالو بالإجماع عن مجلس شورى الدولة..!!!
  وكل رؤساء الغرف اشتركو بصياغتو؟؟؟  وصدر سنة 2003.. يعني صرلو 14 سنة صادر الحكم..
• ليه وزارة الداخلية ما بتنفّذ.. 
  ليه معالي الوزير الحالي نهاد المشنوق ما بنفّذ حكم شورى الدولة؟؟
  – في ناس حرامية تجنسو هني وبالحبس..!!
  – في مجرمين تجنسو هني وبالحبس؟
  – في 75 الف فلسطيني بطاقاتن بتدلّ انو هني فلسطينية.. وموجودي ملفاتن.. هيدا التوطين، وهيدا اللعب بجغرافية البلد ومصيرو
• توطين وتجنيس وتهجير وهجرة، وبيع أرض، وعدم إعطاءؤ المغتربين حقن،
  هيدا التلاعب بديمغرافية البلد شو نتيجتو.. !!
  هيدا التلاعب العددي لصالح مذهب او طايفة على حساب الباقيين، ما بمرّ بهالعهد هيدا، ومش لازم يمرّ بعهد ميشال عون.
• إذا منراقب نشاط وزارة الخارجية منقول: عم تعمل فيا اللي تعملو، وبالعكس عم تعمل المطلوب منها وأزود… قياساً مع الوزراء اللي كانو قبل.
  قبل ما كنا عارفين وزارة شو؟ كانت حاسرة جهودا بمنطقة معينة، أفريقيا وبس، اما هلق شاملة كل الجاليات، وبكل الأماكن ومع كل طوائفها

اقتراع المنتشرين

• المسرح مفتوح للكل، لكل المرشحين.
  مش بس لمرشحين التيار، بالعكس أنا بعرف في وجود:
  – للقوات برا
  – لحزب الله
  – لحركة امل…
  اتهام التيار عن فائدة اقتراع المغتربين مش بمحلو أبداً..
• القانون الحالي بيشترط يكون مسجّل 200 شخص لبناني ليصير عندن قلم أقتراع، ومفروض لكل 50 شخص يعملولن قلم اقترع… و20 شخص.. ليه فرض 200 شخص، وعم يجي من ضيعة بعيدي ومن ولاية بعيدي..
• في 6 مقاعد اقرت بمجلس النواب، وشغلة مهمة كتيري، انا باقتراحي 12 مقعد يقسمون مناصفة. هلق في 6 نواب لَ 6 قارات.. عال..

النزوح السوري

• اللي عم يعرقل عودتن بعض السياسيين اللبنانيين، ولكن على أمل يعودو.. البعض قد بيفتكر قد نستعملن جيش للطايفة الفلانية، متل ما استعملو الفلسطينيي بالسابق، وكانت أحداث مميتة.
• في موظف مرتشي عم يستفيد من وجود النازحين السوريين.. بياخود حصة من الأموال.. مستقبل السوري مش بلبنان بسورية. لازم يرجعو على سورية.
• السيد نصرالله حكي انو قاعدة إعمار سورية ينطلق من لبنان. يعني نحنا عم نستقطب شركات ومؤسسات دولية، ونقلا بدك تروحي تشتغلي وتشتثمري بسورية، ونحنا ما منحكي مع سورية!! بدنا نعمّر سورية من دون ما تعرف سورية!! بالوَمَى..!! شو هالمنطق هيدا، حبيتا لسورية أو ما حبيتا المصلحة بتقتضي تتعامل معا..
• الهدف شو من لقاء باسيل المعلّم؟؟ مش هدف وطني كبير، كل اللبنانيي بنادو فيه؟
  الناس صورياً وناس من كل قلبن؟
  – أولاً الهدف نبيل…
  – ثانياً، بدنا نسكّر الحدود على طول مع سورية، ليش بالسياسة في خصومة بتدوم… شو اللي بعدّل السياسة عند الناس، مش المصلحة الوطنية العليا…

إعلان دولة لبنان الكبير

يسأل عن اقرار يوم لذكرى اعلان يوم لبنان الكبير، يقول:

• وعدنا فيه دولة الرئيس نبيه بري، فلي تروك الأمور عليّي، ورح نحولو للجنة الإدارة والعدل. قلي: ما بتوثق فيّي.. انا بوثق فيه، طبعاً إذا وعد بيوفي..
• المفاجأة كانت انو في معارضة. هيدا الإقتراح عم يخرج اللبنانيين من وطن جبل لبنان الصغير، نحو رحاب لبنان الكبير، اللي ضم بيروت والشمال والجنوب وبعلبك والبقاع.. هيدا لبنان الحديث..
• وهالأمر مهم كتير لأنو بيظهر انو قررنا ننفتح ونتعاون كل المناطق بوحدة جغرافية وشعبية بوطن واحد لا بديل عنه…
• الإعتراض عنه كان: الحدود الحالية ما ضمّت القرى السبع.. إذا في زميلنا أستاذ “حسن” يضمّ القرى السبع وكل فلسطين ع لبنان.. ويصفي وطن قومي لبناني ما عندي مشكلة.. أكيد موافقين يضمّ القرى السبع..
• بعتقد نواب حزب الله منن ضد، والإقتراح رج يمرق، وعدنا بمروره. ونواب المستقبل ايدو المشروع، والنواب المسيحيي ما شفتن ضد، ولكن منن كتير مع.. وهيدي نقطة مش كتير لصالحنا

رصد Agoraleaks.com