Agoraleaks Agoraleaks
– بوعد اللبنانيي، رح أتقدم بطلب الى وزارة الأشغال، بدي لايحة بكل الزفت اللي عم يتوزّع، وين عم يتوزع؟
***
مقتطف من حديث ألمستشار القانوني لوزارة الدولة لمكافحة الفساد المحامي وديع عقل – الجزء 1: (23- أيلول 2017)
- هلق عابقة شوارع لبنان وضيع لبنان بنَفَس الزفت، كنا ننسبط بالخريف بشوية ريحة فلْ وياسمين، كانت تعطّر.
بيطلع السفرجل بضيعنا، التفاح.. شو هيدا زفــــت، رجعتو عَ الزفت؟
روحو اشتغلو تشريع، وقوانين ومصلحة الناس. رجعنا بدنا نشتغل انتخابات بالزفت، هيدي صورة مرشحين الزفت، عَ شكل الزفت، مسودين كلن سوا.. - سمالله وزير الأشغال، شو هالكرم هيدا، بكل منطقة ملاقيلو تلات أربع شبيبات بيفتحلن، وبوديلن كميونات زفت، هيدا الزفت من مصاري اللبنانيي، ما حدن يمنن اللبنانيي، يجي هلق وزير الأشغال نافذ فنيانوس انو هوي فتح زفاتة مثلاً وعم يعطي هبة، إذا عم يعطي هبة، يتفضل على مجلس الوزراء، ويفرجيني انو في هبة معطية.
إذا الوزير فنيانوس عم يعطي هبة زفت، يطلع عَ مجلس الوزرا يقول، من جيبتي عم اعطي هبة زفت، اما زفتات هني من مصريات اللبنانيي، هيدا حق للبنانيي، ما تتذاكو عليون.
يسأله الإعلامي جورج ياسمين: إذا عم يوزّع للكل، يعني في عدالة، يردّ وديع عقل:
- واجب عَ الدولة تزفّت طرقات الناس،
شو هيدا التوقيت؟ جايين يشترونا بالزفت.. لاق نحنا ما مننشرى. - نحنا عنا رئيس جمهورية شايفينو قد الدني كلها.
- يا يللي عم تتعاطو سياسة بلبنان، ميشال عون رفعكن، يللي بيعرفو حط “عفريت الزيت” وعَفْرَتكن كلكن لفوق، وقلكم طلعو.. وطلع على أعلى منبر عالمي، وعمل خطاب تاريخي، ورفعكم لفوق، لك عيب عليكم تنزلو ع خبار الشوارع لتحت والإحياء.
- لك رفعو معكم الناس، عندكم واجب ترفعو حياة الناس.. اهتمو بشؤون الناس، حاش بقا غرقانين بربشين زفت..
- انا بوعد المشاهدين، رح أتقدم بطلب الى وزارة الأشغال، بدي لايحة بكل الزفت اللي عم يتوزّع، وين عم يتوزع؟
إذا عم يتوزّع كما يجب خدمة للبنانيين تنروح نقلو للوزير فنيانوس، برافو عليك اشتغلت بعهدك، الله يعطيك العافية، ولازم الناس تروح تنتخبك بالإنتخابات إذا ترشحت. بس إذا مش عم يعمل هيك، هيدي رشوة انتخابية.. - في نهار نعزمنا على عرس بمنطقة بكسروان، وبعرف الطريق من قبل، الجلال مزفتين.
يقاطع ياسمين قائلاً: يعني نواب كسروان عم ياخدو الزفت، يعني قبلانين بهيدا الوضع، يردّ عقل:
- لاق مش هني عم يوزعوهن،
تمثال مار شربل، لما كان عم ينحط (السلام على اسمو) بفاريا، على أعلى تلة حدّ الصليب، صار في اتصال مع الوزير فنيانوس، انو يزفت الطريق والساحة، قلن: هيدي ما منعملا الاّ بواسطة فريد الخازن (ليس الدكتور النائب فريد الخازن)، خلي هوي يزفّت فوق.. اضطرينا نجيب متعهد اهتم القصر الجمهوري مباشرة لرتّب الموضع.. لاق في كيدية، وأنا صريح ما بعرف لوفق فيون. - في كيدية بالزفت، حتى عنا بقضاء جبيل، بتلاقي ناس وشوية رؤساء بلديات، كمان عم يفلشو، مش هيدي الطريقة؟؟ هيدي الطريقة منا حلوة.. هيدي كيدية بالعمل السياسي..
- هيدا نَفَس منو حلو، وهيدا النَفَس عتيق، دفناه من زمان، ما منرجعلو، ومفكرين انو الناس بيمشو هيك.. ما تفتكرو الناس رح تمشي هيك.. عم يغلطو، وأنا عم اعطيون نصيحة، يا اخي صرفو جهدكم بمكان أذكى، وافضل، بتقنعو الناس، بصيرو الناس يحبوكم اكتر. هلق الناس مش حابتكم.. عملو بالنصيحة وانتصحو.. نصحكم بيْ الكل قلكم ما تخربطو الميزان المالي تبع لبنان، عملو موازنة، وحطيتو السكة قدام الفدان..
رصد Agoraleaks.com
