تصويت “twitter” كشف ضعف النواب الحاليين (التفاصيل)

– وديع عقل يعطي سامي الجميل نصيحة.. وعلي حسن خليل رفض كشف وين عم يصرف مصاري عَ الأبنية المستأجرة! (Audio)

***

مقتطف من حديث المستشار القانوني لوزارة الدولة لمكافحة الفساد المحامي وديع عقل – الجزء 2: (23- أيلول 2017)

عن الضرائب

• الأرباح على العقارات كتير قليلي. اليوم واحد بيشتري شقفة أرض ب 100 الف $، بيرجع بعد سنة ببيعا ب 300 الف$، معليه يدفع ضريبة على الربح اللي عملو يللي هوي 200 ألف $.
• ما بصير نضل هيك جنة ضريبية، بدنا الغني يدفع، معليه. منا عم نروح لنظام شيوعي، او اشتراكي. بس يدفع جزء من الأرباح، مش غلط، ومن دون ما نضرب الإستثمارات بالبلد. ولازم نعمل انتظام ضريبي.

سلسلة الرتب والرواتب

• بخصوص سلسلة الرتب والرواتب، صار الخطأ بالتسرّع اللي ارتكب بمجلس النواب، بدو يكون في جدية اكتر بالعمل، هيدي اللجان النيابية، لازم ينسأل النائب إبراهيم كنعان، عن اللي بيحضرو؟ لازم الشعب اللبناني يعرف مين بيجي ومين بغيب!!
• بفرنسا مجلس النواب، بيجتمع كل نهار اربعا، وتُنقل وقائعو؛ هون بلبنان عنا لقاء الأربعاء في عين التينة، جيّد للتشاور ولكنهم لا ينتجوا، ويجب ان تكون بقلب البرلمان. بفرنسا بيعملو 3000 تعديل بالسنة على القوانين، بجددوها، وبعدلوها، وبيخترعولن كل سنة 50 قانون جديد.

وماذا عن قول بري ان المصارف انتصرت بقرار المجلس الدستوري، يردّ وديع عقل:

• لاق، ما فينا نقول هيك. ونحنا مع الإصلاحات، ومنأيدها، لكن كان عليه يدفع نحو إقرار الموازنة بشكل سريع تما نوقع بالمعصية اللي أشار الها المجلس الدستوري.
• في دور بالمرحلة المقبلة لدولة الرئيس بري انو يدفع نحو إقرار الموازنة، وإذا في تعديلات بالموازنة تنحسّن حياة الشعب اللبناني، ونفيدو، منقدر نعمل كتير من الإصلاحات.

وزارة مكافحة الفساد

( تويني: الوصول إلى المعلومات حق لكل لبناني )

• عم نطلب بوزارة مكافحة الفساد، حول الأبنية المستأجرة، لأنو الدولة اللبنانية مستأجرة أبنية؛
  وفي منن فيا ادارات،
  وفي منن تنفيعات. وتصور أنو أجهزة الرقابة بالدولة اللبنانية، يعني: مجلس الخدمة المدنية + التفتيش المركزي + ديوان المحاسبة + مجلس شورى الدولة، قاعدين كلن بأبنية مستأجرة.. هيدا شي معيب!!
  – الوزير نقولا تويني وجّه كتاب من 5 أشهر، لمعالي وزير المالية، بقلو: عمول معروف زودنا بلائحة بكافة الأبنية يللي انتو وزارة المالية بتدفعو ايجاراتها لصالح الدولة اللبنانية، تنعمل جردة كاملة.. (لأنو برأينا الإصلاح بدو يكون ممنهج وقانوني، ما فينا نحكي اعتباطياً)..
  – وزير المالية بردّ من 10 ايام، وبقول: انا ما فيي فيدكم بهيدا الموضوع، بتراجعو مجلس الخدمة المدنية، عم يعمل إحصاء على الأبنية…
  – مشينا بالقصة مع انو بعتقد انو وزارة المالية يللي بتدفع مصاري، مفروض تعرف وين بتدفع؟؟ مش انو ما بتعرف وين الدفع!!
  – هلق في كتاب تاني من الوزير تويني، لمجلس الخدمة المدنية عم يطلب منن، كمان عطونا لائحة بالأبنية.. هيدي الأبنية منعمل فيا وفر هائل.

الجمعيات الوهمية

• موضوع الجمعيات الوهمية، في 110 مليون $ لم تُدفع بعد للجمعيات، ومرصودة لالن. هيدا الموضوع بدو يتوقف كمان.
  اليوم فقي جمعية بتأّهل المعاقين، بتساعد ذوي الإحتياجات الخاصة، عَ راسنا وعيننا لازم يزيدولا المصاري، بس إذا وحدي شي ست زوجة وزير، أو ست زوجة نائب عاملينلا معاش بآخر الشهر تنفيعة بجمعية، هيدي كمان بدها توقف..
• الدفع نحو إقرار الموازنة، والموازنة بتموّل السلسلة، والإصلاحات بمولو السلسلة.
  وما في ربحان وما في خسران..
  لما بكون في قرار قضائي من اعلى سلطة قضائية، يللي هيي مرتين مبررة للتمديد، وما شتغلت كما يجب… بدنا نهنيهون انو رجعو “موتورات” مجلس الدستوري يشتغلو.. في تحسن… وإذا في ضرايب طارت، بترجع تنردّ هيدي الضرايب، ليه بدها تروح..

نصيحة

• النائب سامي الجميل وحزب الكتائب، وبدوري شمعون، وخالد الضاهر وبطرس حرب، (حقن وبدي احترملن رأين) هني ضدّ انو ينحط على أرباح المصارف، وعلى الأرباح العقارية، وضدّ انو نرفع غرامات على الأملاك البحرية… هنّي هيك حطّو بالطعن، هنّي ما جابو سيرة اذا فيشي ضريبة طالمة على الناس. هودي رئيس الجمهورية حذّر منن، لما جمعن ببعبدا رئيس الجمهورية قلن: محيتو الطبقة المتوسطة من لبنان، ما تمحو بعد الأمل باستعادتها.
• بعطي سامي نصيحة لأنو نحنا مجايلين مع بعض،
  وخريجين تقريباً مع بعض. التشريع مش لعبة.
  يا سامي، التشريع مش منطلع نخبّر خبرية،
  التشريع هو عمل فعلي ودؤوب، وعمل يومي في مجلس النواب.
  ما نجي نعمل عنتريات، مشي معنا بمجلس النواب، بدنا نعطي الموظفين معاشاتن، ومتقاعدين بالقوات المسلحة بدنا نعطيون زودة على المعاشات، بياخدو 800 و 900 الف ليرة بالشهر.. “Sorry” الـ800 الف ليرة ما بتعبيلو سيارتين بموكبو لسامي الجميل بنزين..
• هيدي المواكب جزء كبير من الهدر. بجلسات مجلس النواب، بينتلي شارع المصارف بسيارات المواكب، هيدا هدر لشو؟ ما عنا قوى أمنية وغلبت داعش، خايفين من مين؟

twitter

عملت تصويت على تويتر، فيها الناس تشوفا عندي، ملفتة للنظر:

• وتعرف الناس انو بـ”تويتر” مطرح ما بينعمل تصويت، ما فيك تعرف مين صوّت، في حماية، وما بتقدر تتلاعب بالنتائج.
  بهيدا التصويت طرحت سؤال: لمن تعطي صوتك التفضيلي؟
  وحطيت إحتمالات أربعة (هيدا اللي عاطيك ياه مجال “تويتر” )
  1- لمرشح الحزب
  2- لمن يؤمن خدمات
  3- للنائب الحالي
  4- لمرشح جديد
  صار مصوّت 394 صوت. (واللي بيتعاطى بالإحصاءات، بيعرف انو شريحة قاربت ال 400 صوت، هيي شريحة كبيرة).
  وإجتْ النتيجة:
  – 47 % لمرشح جديد أثق به.
  – 35 % لمشرح الحزب. (طبيعي الأحزاب عندا ثقل كبير بالإنتخابات)
  – 16 % لمن يؤمن خدمات (في ناس بتحب الخدمات بلبنان)
  – 2 % للنائب الحالي.. 
  يعني في 8 أشخاص على 400 شخص عطيو النايب الحالي..؟؟
  ليه وصلنا لهون؟؟
  ما نحنا هودي النواب كمان بدنا نساعدن؟ لأنو في خربطة تشريعية، والناس فقدت الثقة، حسنو الصورة، بعد عندكم وقت للإنتخابات…!!

رصد Agoraleaks.com