عباد زوين عن التعبئة ضدّ لبنان: سوريون بقولوها “جينا عَ لبنان لما نرجع”.. وهربو من روكز اجاهن جوزيف عون.. وكمقاوم بفهم دغري حزب الله (Audio)

– عن بطولات ضباط الجيش يوسف وهبه، ولويس خوري..
– الحرب عَ سطح الكرة الأرضية هدفها الغاء المسيحية من قبل اليهودية الصهيونية، والبقية أدوات..
– 4 مليار $ سنوياً للسوريين ليبقو بلبنان.. (التفاصيل)

مقتطف من حديث أمين عام حركة التنظيم عباد زوين قناة الـ”OTV” ضمن برنامج “حوار اليوم”:

مشكلة لبنان

• انتماء البعض من السياسيين لمصالحهم الشخصية، لا للوطن سبب مشاكل الوطن،
  وبجانب ذلك، يوجد جهل لكثيرين منهم، عندهم جهل مطبق، ولا ثقافة.
  هم يكتفون بما يسمعوه، ويقرأون بأذنهم لا بعيونهم.
  وأخطر ناس هنّي اللي بيقرو بدينتون، وما بيتأكدو وما بلاحقو اللي سمعوه، هل يُطابق الحقيقة ام لا؟
  بعض الناس تُحب الخبرية أن تناسب تفكيره، مش الحقيقة الحاصلة عَ الأرض.
• في ناس بتفتكر انو الدولة، بس توصل الها، بتصير تملكها.
  بينما مفهوم الدولة متل “الوقف” انت بتديرو ما بتملكو.
  كيف اختفى 11 مليار $ وانصرفو.. لو في مفهوم للدولة ما انصرفو من خارج الأصول والقواعد.
• مش نحنا بدنا نخترع المفاهيم. في مفاهيم لازم تتطبّق،
  والبعض بيرفض فكرة التطوّر.. بقلك: ما أنا كل عمري هيك”!! واذا كل عمرك هيك، وانتا بالغلط.. غيّر شوي بركي بتنجح.

حاجة لبنان للمقاومة

• كلمة دولة – شعب – جيش، فيها خلط.
  الدولة عندا جيش. مش بحاجة تقولا.
  واقع لبنان، بيفرض بعض الأمور. ما وصلنا للمرحلة الثابتة الطبيعية.
  والطبيعي يكون في دولة تقوم بكل واجباتا.
• حتى تقوم الدولة بدك رجال السياسة تكون عَ مستوى قيام الدولة.
  مش البعض منون بدن يعملو دولة، والبعض بدو يعمل منا مزرعة.
• ليه صارت سنة 1975؟؟ لأنو سنة 1968 عُطّل دور الجيش بالحكومة؟؟
  مع اول عمل عسكري للفلسطينيي، الجيش اشتبك معن، افتكرن اسرائيليين. وصارت القصص..
  الجيش بوقتا كتب للحكومة: فلتُحدّد الحكومة موقفها.. انقسمت الحكومة وما عاد في قرار.
  نحنا بس عرفنا انو تعطل دور الجيش، قلنا يا شباب صار دورنا نحضّر حالنا، لأنو ما رح يكون للجيش دور.
• اليوم في سلطة سياسية عم تنفذ معاني الكلمات بدورها.
  في رئيس جمهورية ما بيقبل الاّ ما يقوم بدورو، ومتقيّد بقسم اليمين اللي أقسمو.
  في طريقة عمل جديدة، بلشو يدركوها، بدها شوي تيدركوها بالكامل.

الموقف من التكفيريين. 

• من شهر صارو يشككو بالجيش.. جيشنا بتاريخو وانسانيتو.. نسينا شو عمل جيشنا بمعركة نهر البارد، كم عسكري استشهد حتى يخلص اطفل فلسطينيين. هيدا الجيش اللي عمل هيك، بيتهمو بعض السياسيين، وبدن يعملو تحقيق
• في مكنة لعدم قيام دولة مستقرة في لبنان. والجيش أحد شروط قيام دولة مستقرة.
  حصار الجيش حتى ما يحصل عَ سلاح.. ليه؟ ما عنا ضباط كفوئين؟ ليه في دورة راحو ضباطنا وحضروها، وما طلعو الأوائل، وبكل المجالات.

لويس خوري

• رحم الله الضابط “لويس خوري” خبرني عن دورات الضباط اللبنانيين، انو منروح للخارج، لأنو هون بلبنان ما فينا نقوّص، ما عنا مدى.. صرنا منقصف بالمدفعية، ومنمّر عليون، وكان يخترب بيتنا.. لأنو كان في تقليد عن اصابة الهدف.
• من يصيب الهدف كان على الفائز عليه يضيّف الجميع “شمبانيا”
  كانو الضباط اللبنانيي يفلسو، اوقات صارو قصد ما يصيبو الهدف، ليورو مصرياتن
• ضباطنا وين مكان لمعو. فاذن ليش بس يلمعو بين الجيوش المحترمة ما فيون يلمعو عَ الأرض!!!
• وقت اللي ما بدنا نعطيون مصاري. ووقت اللي ما بدنا نشتريلن سلاح. لأنو في اتفاق بين الدول الكبيري حتى ما يحصل جيشنا عَ سلاح مهم، ومن وقت ما دُمّر رادار الباروك، لم يتمّ شراء رادار جديد..ز

إقتراح ودعم معنوي

• الحروب تطال العراق وسورية واليمن، وحدودنا…
  إضعاف معنويات الجيش ليه؟؟ وشو سبب تخفيض المدفوعات؟
  من كم سنة، تكلمت مع فخامة الرئيس، (قبل انتخابه) وطلبت منو اقتراح، واقتنع فيه: هالجندي بالجيش (جندي أم ضابط) إذا استشهد بعمر معيّن، لو ما استشهد، كانت بتعلا رتبتو، ومعاشو.. شو ذنبو إذا استشهد؟
  كانت الفكرة واقتنع فيا الجنرال عون: هوي انو كنوع من تعويض معنوي، إنو يعتبر هللي استشهد، متل رفقاتو بالدورة بمدى خدمتن، لوين بيوصالو، لازم هوي من بعد استشهادو يوصل معن، ولو مادياً لعيلتو يتعوض عليا..
• اليوم في قرار سياسي، واضح، واليوم الجيش ما بقصّر.
  الجيش رِبيْ على البطولة، ومبارح نعمل ريبورتاج من ايام “المالكية” لليوم، كان في تحذير من الجيش الإسرائيلي: “إحذروا من مدفعية الجيش اللبناني“، لأنو داقو الطعمة سنة 1948، ومن بعدا.

الضابط يوسف وهبه

• الجيش اللبناني لمعو بقصف المدفعية. ومن بيناتن فخامة الرئيس العماد ميشال عون “مدفعي”
  ورحم الله الضابط يوسف وهبه. (عبقري المدفعية والصواريخ – صاروخ أرز 1 وصاروخ أرز 2 الخ) هذا الضابط غيّر بمنطومة المدفعية وجعلها تصير دقيقة أكتر، وبايامو، تعرفت عليه، كان متواضع تواضع العالم. واكتشفت انو كان الشخص الوحيد، عالم صواريخ بكل منطقة الشرق الأوسط، بما فيا جارتنا الجنوبية (اسرائيل)، وكان بس يسافر، حتى يحضر اي مؤتمر أو دورة، يبعتو 15 عنصر مرافق لحمايتو.
• معركة جرود القاع ورأس بعلبك، ستنتهي بانتصار الجيش.
  صلاتنا ما يروح منن ضحايا، لأنو ضِفِرْ جندي لبناني بيسوا كل داعش، واللي فبركو داعش.
• حكمة القيادة عم تعمل المستحيل، ليكون عدد اصاباتا حدّ الصفر. ومعليش هربو من شامل روكز اجاهن جوزيف عون.
  
  أنا بعرف القائد عون، وبقدّر فيه أخلاقو العالية، بعرفو ملازم، والتقيت فيه قائد جيش، بعدو الشخص ذاتو بكل تواضعو.. وهوي ملتصق بالعسكر، مش قاعد بالمكتب

عن معركى الجرود

• داعش، مأدلج، ما بفاوض. وانتحاري.
  بدن ينتحرو يعني الجيش مأمن الن طريق السما.
  بدن يضلن طيبين، مأمّن الن طريق البقاء.. هنّي عليون ينقو

يسأله الإعلامي جورج ياسمين: هلق ما في مارونية سياسية، وما في سنية سياسية، هل فتنا بعصر الشيعية العسكرية والسياسية؟؟ يردّ زوين:

• ما فتنا بعضر الشيعية السياسية.
  في ناس عن عجز، ما بيقدرو يعملو شي، عم يتهجمو على الناجح.
  عادة عندي تعبير شوي تقيل الدم: عادة بقومو الخصيان على الفحل. هيدي عقلية موجودة عند الناس. إذا واحد ناجح، بصيرو يركبولو تركيبات ليش نجح.
• الشيعية السياسية بعتقد بعد بكير عليا.
  حسب قراءتي، كمقاوم، بعرف كيف بفكّر المقاوم الآخر.
  حزب الله واعي، لما يوقع بالغلطة اللي اتُهم فيا غيرو.. وأنا من الناس يللي بيقدرو يفهمو بسهولة، وبقراه قبل ما يحكي، لأنو المنطق اللي بينطلق منو، منطقنا نحنا بالماضي. وعندو ولاء لأرضو، ولوطنو، ولقضيتو.
• تريد القوى الخارجية دور آخر لحزب الله باللعبة، هوي حصر دورو بالمحل التاني.
• صرلن 1400 سنة بيتقاتلو السنة والشيعة. من وقت قتل الإمام علي بن ابي طالب.
  هيدا قتال، ما بعرف، نحنا شو خصنا فيه؟
  لكن هل بيستحق يضلّ مستمرّ… إذا صراع فكري يضل صراع فكري.

النزوح السوري

• الفرق بين الفلسطيني والسوري،
  الفلسطيني في عجز للعودة الى بلدو، بسورية ما في استحالة عودة، إنما عم يتوضحلنا، الضغوطات اللي عم تمارس عَ الدولة، بدن يعطوهم جنسية.. وهيدا الشي بعود فيه لأسباب الحرب اللبنانية، وخلفيتها.. واستعمل فيها ناس كتير كأدوات فيها، من دون ما يعرفو شو عم يعملو.
• الحرب على سطح الكرة الأرضية، تدور بين فريقين:
  – اليهودية الصهيونية اللي بتهاجم المسيحية بكل العالم. والبقية يستعملو على هيدا الأساس.
  
  – الحرب هدفا الغاء الوجود المسيحي بالعالم، والبقية أدوات جوا، من دون ان يدركو
• سئلت الأمم المتحدة، عن كمية المساعدات التي تُعطى وتوزع على السوريين بلبنان، طلعت حوالي 4 مليار $ سنوياً، ومن دون علم الدولة
• الأمم المتحدة تشجّع السوريين للبقاء بلبنان.
  في اغراءات لإبقاؤن بلبنان.
  التقيت شخص منهم، بقلي: نحنا جايين ع لبنان، حتى ما نرجع.
  حاطيلن بمخُن انو بتجو، حتى ما ترجعو. في تعبئة عَ اساس الخطة اللي حكيت عنا، والخطورة هون..
• اذا كان الوجود الفلسطيني بلبنان، كِحلْ، الوجود السوري بلبنان عَمى..
  وفي ناس بتفاهة بيحكو، كأن تجربة العمل الفلسطيني ما تعلمو شي منا..
  بفكرن بكونو لغيو دور غيرن، بكونو لغيو وجودن هني. وهون بحيّي جهود الوزير باسيل.
• القرار السياسي مش حالة عاطفية. القرار السياسي قرار عقلي 100%.
  في عنا المثل اللبناني: بيي بيجبرا بس تنكسر. بس لاق، بيي بيجبرا قبل ما تنكسر. (هيدا الرجل السياسي)
• اللي بدو يتعلم سياسي يجي لعند فخامة الرئيس ميشال عون

الرشوة

• رجل سياسي اراد شراء صوت ناخب لبناني بـ100 ليرة، بقلو المواطن: روح شتريلي حمار.
  راح برم، ورجع قلو: ما فيي اشتريلك حمار، أرخص حمار 700 ليرة. بقلو: يعني عملتني مع ست أشخاص عَ سوية حمار..!! وأنا بقول أقسى من هيك، مرة انفعلت بانتخابات سنة 1964:
  – من باع بالقرشين صوت ولائه، كم كان أفضل لو يموت بدائه.
  – من ساوى نفسه بالحذاء بضاعة، ما زال اشرف منه نعل حذائه.
• يللي ببيع حالو بصير يدشّى افكار بالمجتمع، وانو هوي مصدر موثوق.. يا ما منعاني منن.. وبتبهدلن، ولكن بالآخر الحقيقة بتصحّ.

سورية

• سيعود النازحون اليها، طبعاً في صدمة عند البعض، قد يعودون الى غير مناطقهم.
  ولكن لبنان سيعمل لحل هذه المشكلة
• المشكلة بسورية مش لإلغاء النظام، ولا الى تطيير الرئيس الأسد.
  المعركة تدور أقلّه، لتدمير سورية اقتصادياً.

التنظيم وشهداء لبنان

حركة التنظيم، بيتشرف يدعيكم، تشاركو قداس يوم الشهيد، لنتذكر كل شهدا لبنان (مش شهدا حركة التنظيم فقط)، من كل الطوائف، ولَ نتذكر بالأخص اللي استشهدو من آب 2016- حتى آب 2017…

البرنامج:
الساعة 5 مسا زيارات للأرز.
الساعة 6 القداس. كلمة التنظيم بيلقيها عباد زوين.
يوم السبت 26 آب 2017، في منطقة الطبرية، أرض الشهادة والشهداء، والمقاومة.

رصد Agoraleaks.com