الأب غاريوس للقاعيين: قولو لن نترك عرين حب الله “القاع” مهما صار… ومعي “خيزرانتان”، اللي بدّو يتحرّك بياكول “قتلة”… (Audio+ Video)

– أنا قاعي وزغرتاوي، وعاقوري وأنا يسوعي، وقد ما بحبّ القاع، رح يصير معي عارض جنون وروح عَ دير الصليب
– المسيح مركز محبة الله وشرق العالم كلّه (التفاصيل)

عظة الأب الياس مارون غاريوس في بلدة القاع، بمناسبة عيد انتقال العذراء مريم بالجسد والنفس: (15 آب 2017)

• هي صادقة هذه الكلمة. (كلمة نعم العذراء مريم)
  كتير حلو نعرف انو الرب يسوع، الإبن الوحيد لله الآب، أعطيَ لنا من أجل الفداء، والخلاص والإنتصار.
• عنا مراحل عديدة ما منقدر نقفز عنا، لنقدر نكون عن جدّ أوفياء لهالكلمة العظيمة.
  ربنا اكدلنا انو الخلاص لإلنا، وقت تجسّد.. ولكن الأهم من هيك، مع الخلاص يسوع أكدلنا انو الجسد، الو مكانة عظيمة عند الله.
• اجسادنا منا ملك لالنا.
  هي هيكل لّ الله.
  ولأنو العذراء مريم حملت في أحشائها جسد يسوع المسيح.. والأجمل من كلشي، شخص من بيناتنا ومتلنا، انسان متلنا، حامل جسد متلنا، من جنسنا البشري، الله الآب اقام هذا الجسد بيننا، ورفعه بالنفس والجسد الى السماء.
• تخيلو بعقلكم، قديش الله بقلبو حامل ارواحنا وأجسادنا.. فلذلك قال: انتم هيكل الروح القدس. وملكوت الله بداخلكم.
• موطئ ذاتنا البشرية، هوي بعهد مع الله الجديد.
  ان يفنى هذا الجسد الترابي، ويظهر جسدنا المُمجّد.. ان كنا نأكل ونشرب جسد المسيح باستحقاق.
• العدرا اليوم عم توصلنا رسالة، وعم تقلنا: يا ولادي بقلكم انتصار الحب على الموت. وعم يأكدلنا انو السما، ما عادت محل غائب وغريب عنا. حتى نتخيلو. لأنو وقت مريم زارت اليصابات، ولا مرة حكيتا، انو انا مشتقتلك.. يا خالتي انا اشتقتلك.. ! ما عبّرت عن عواطفها الخاصة…! ولكن بوحي من الروح القدس عظمّت العدرا مجد الله بذاتا.
• العدرا مريم، جعلت ذاتا هيكل لَ الله. بطاعة مطلقة.
  وهيدي الطاعة جعلت عين الله بحب مطلق عَ كل البشر، ودعا الناس: تعالوا اليّ ايها المتعبون وحاملي الأثقال، وانا اريحكم..
  مريم ارادت انو يكون الله ممجّد، على كل لسان بكل الكرة الأرضية.

القاع

الأب غاريوس يجول يقرية القاع حاملاً شعاع “القربان” المقدس..

 

• اليوم نحنا بالقاع.
  تخيلو معي. العدرا مريم عَ راس التلّة. طالعا مسرعة من هون لجرد القاع، لعند داعش.
  – مش عم احكي شعرْ.
  – عم احكي ايمان.
  – عم احكي أبطال.
  – عم احكي نسوان قديسات.
  – عم احكي عن رجال قوايا، مش ضعاف.
• العدرا مريم طالعا مسرعة اليوم. لجبل داعش لفوق. حتى تقلن: انا جايبتلكم ملك المجد، ما بتقدر لا بسلاحكم، ولا بسكاكينكم، ولا بسيوفكم، بتقدرو تقتلو ولادي…. الاّ إذا كانو ولادي جبنا
• يللي مفكّر انو العدرا، عم تتسلى بالقاع، وهربان من القاع، بكون خاطي. وبكون جبان. بكون تارك أرضو وفالل تيخبر التاريخ ويقول: يه، داعش فوق مني بِ 20 متر. يا عيب الشوم. العدرااللي حاملي بذاتا الله، ويللي هيي أوجدتو بين البشر…
• بتحلمو براسكم، انو هيدا انو تابوت العهد يحمل اليكم الدمار!!!
  لاق.
  الا إذا كان تابوتكم حامل جثة، ومش حامل الله.
  ستخرب الأرض، وتمتْ. ويندثر كل شيء عليها.

لذلك

• انتو ابطال عهد الله بالخلاص، وان لن تكونوا هكذا، فأنتم اشقياء.
• مين منكم اليوم فالل عَ بيروت الليلة وبكرا؟؟؟
  جايب معي “خيزرانتين”، البدو يتحرّك من القاع، بدّو ياكول “قتلة”…

ومع التصفيق الحار من المؤمنين، يقول الأب غاريوس: الله يحميكم. 

• الخيزرانة اللي معي، مش بتلف عَ الإجرين.
  خيزرانة اسما “صليب” سلطان الرب يسوع المسيح.
  سيف الحق.
  سيف الإيمان.
  ترس الحياة.
  قدس أقداس هيكلكم. انتو هيكل الله، فكونو أشداء، وأقوياء. ولا تلتمسوا من أحد أن يرحمكم.. وحدو بيرحمكم يسوع.
• حاش لاحقين فلان، وعلتان، وشو بدو يصير؟؟؟
  ما رح يصير شي؟
  من هون يا روح قلبي، بترجاكم: العذراء مريم ركضت مسرعة، الى هذا الجبل العظيم.

• أرجوكم إجعلو من ذاتكم حالة توبة حقيقية.
  ركعو قدام الرب يسوع المسيح.
  توبوا عن خطاياكم.. اغفروا لبعضكم.. انتصروا على تعبكم وقلقكم، باسم يسوع.
  ما تقبلو تكونو خيال صحرا بهالدني. انتو خيال الله. ممنوع تكون في حالة ضعف. وتقولو: نحنا جماعة قاعدين ببيروت، صرنا “Class”، وصرنا منخاف من خيالنا… يا عيب الشوم عَ الرجال، وعَ هالبنات، وعلى هالشباب إذا بدن يكونو هيك.

صبايا وشباب وجال ونسوان قولو:

الأب الياس مارون غاريوس: لبنان شرق العالم كلّه، ومركز العالم كلّه

• لن نترك عرين حب الله “القاع” مهما صار
  لن نترك عرين محبة الله
  “القاع” مهما صار..
  لن نترك عرين محبة الله “القاع” مهما صار..
• لذلك مهما يصيبكم، فافهموا، ان عهد الله بالخلاص، هو حقيقي.. وأنتم هيكل الله.. وانتم نور المسيح في هذا العالم.. لا تسمحوا ان يمرّ تابوت الموت عليكم… الله فيكم هو عهد الله.

فتح الروح القدس قلب اليصابات وعيونا، وخلّاها تتعرّف أكتر وأكتر، انو اللي جايي لعندا هو التابوت الحقيقي، هو العهد الحقيقي، هي ام الله، وقالت اليصابات بصوت عظيم: مباركة انتي في النساء، مباركٌ ثمرة بطنك يسوع.. من أين لي هذا أن تأتي اليّ أمّ ربّي…

• من أين لكم يا أهل القاع، ان تأتي اليكم أم الإله، وتزور جرودكم..
  انتم خائفون..
  لذلك يرحم موتاكم…

ومع مباركة الأب غاريوس، لأحد الزغرتاويين الحاضرين، المستعدين للدفاع عن القاع، قال: 

• أنا قاعي وزغرتاوي، وعاقوري..
  أنا يسوعي، انا احمل يسوع في هذا الجسم المائت، لأنتصر معكم على كل تعب. ومش عم غنّي موّال، عم خبركم حقيقة.
• بنفس الوقت الروح القدس عبّى يوحنا المعمدان وهو بحشا اليصابات، ان يرتقد فرحاً في احشاء امو. ولكن لماذا ارتقد هذا الجنين؟؟
  لأن الزائر هي العذراء مريم، تابوت العهد الجديد. وهتفت اليصابات: ما ان وصل سلام الى اذني، ارتقد الجنين ابتهاجاً في بطني.
• اليوم نحنا منقول ارتقد بطني، من كثافة السكر. واكل اللحم. وبكثافة الأكل، ارتقد بطني فرحاً لأنو بطن مليان، كَيفْ تمام، والعقل فاضي والحمد لله. لذلك قومّوا طريق الرب، واجعلوا سبله قويمة.
• اليوم كلمة ارتقد، بتعني كل واحد منكم.
  اهم عمل بتعملو، انكم تسرعو صوب الله، لأنو وحدو بيستحق.. لأنو هوي خلاصكم الأبدي.

قد ما بحبّ القاع، رح يصير معي عارض جنون بدير الصليب. بس بعد بكير.
يمكن سنتان تلاتي. بس هلق انا مصرّ أنو أخوتْ معكم بالإيمان.

الأب غاريوس: يبارك الجيش اللبناني المتواجد في الجبهات

• بتمنى من قلبي، لقلبكم الحلو.
  اليوم انا وانتو، رح يرقص قلبنا فرح، لأنو ام الله العدرا حضرت الله الغايب بالتاريخ، صار فينا ومعنا.
  العدرا مريم، هالقد أصرّت انو تحب لبنان فيكم.
  من هون لازم نعرف كلنا يا أخوتي.انو نحنا بلبنان خاصة، وبالعالم كلّو.. نحنا محطة محبة الله العظيمة.
  أرض لبنان. هيي محطة محبة الله العظيمة.
  من يخون هذه الأرض، يخسر السلام… ولا تخافو، لأنو الخاين القاعد فوق منكم، حابب يسمع كلمة يسوع.
  سمعو ياها، وعزوموه، وقولولو تعا يا مجرم يا عنا. والسيف اللي عم تدبح فيه، نباركلك ياه. تيصير صليب بين ايديك.
• مستعدين…!!!
  هلق بتروح ع البيت، نزلت قذيفة. دخبلك يا أبونا، عنا ولاد صغار…
• العدرا مريم بدها تفتح قلوبكم عَ الرجا. ع مستقبل جديد، ونتعلم الطريق منها، هيي ام الاله، لأنو طريقي بتوصل لإبني… وسمعو ليسوع، لعم يخبركم كلمتو، ويقلكم: انا معكم الى منتهى الدهور.. ولا تخافو

الله يحميكم، ويحمي هالأرض الطيبة.. وتأكدو انو العدرا قاعدة فوق. بين الجيش وداعش. آمنوا فيه. ونشالله تضلكم صورة الله الحلوة ع الأرض، بحبكم وغفرانكم لبعض. لتبقو نور الله لتوصلو نورو لداعش وكل الجيران.. وتقولو للناس: يسوع ملكنا والهنا ومخلصنا، فلن نخاف الذين يقتلون الجسد، بل نخاف ممّن يستطيع ان يُهلك النفس والجسد في جهنم..

وفي عظة للأب الياس مارون غاريوس عن دور لبنان.. يقول:

• اذا انطلقت من عندكم الأبجدية
  ومن عندكم انطلق القانون،
  ومن عندكم انطلق النور للعالم؟
  انتو شرق العالم.
  لبنان شرق كل العالم. بتعرفو هالشي؟؟؟
• لبنان شرق كل العالم.
  – بمركزو
  – بمحيطو
  – بقاعدتو
  – بشعبو.. لبنان مركز كل العالم، وشرق كل العالم
  لذلك من لبنان النور الى العالم أجمع.

ولكن

• أين أبناء النور…؟؟
  حدا يجاوبني…!!
• يسوع قلكم: انتم نور العالم.
  قلكم: امشو في النور. ما دام لكم النور لئلا يدرككم الظلام.
  لذلك بَيْعدو عن قلوبكم كل تعب نفسي.
  اقبلو التعب الجسدي، التعب الجسدي يوصلكم الى حيث لا يجرؤ الآخرون.
  فلذلك، انتو ولاد الحياة.
  انتبهو هيدا النور اللي فيكم. ما بيتحول ظلام.
  اللي بحوّل هيدا النور لظلام. مصيره جهنم ونار الأبدية. والى عذاب أليم.
  من هون ما بتكفي جهنم ع الأرض. كمان جهنم هونيك رايح.
  خدو ملكوت السما، ويرحم موتاكم.

https://www.youtube.com/watch?v=lBYGRU0Clsc&feature=youtu.be

رصد Agoraleaks.com