روجيه ديب: إذا ما عرفو يحافظو عَ وحدتن التيار والقوات بدّن يتحاسبو (Audio)

– بري ما بهمو الصراع السني – الشيعي، بقلك حزب الله خايضو
– المعركة بسورية… أيا سورية، وفتفت قال: سعر المناصفة رخيص
– المسيحيي ما رح يهدو، الاّ إذا منعو الوصول نحو “الأقبطة“

مقتطف من حديث الوزير السابق روجيه ديب لقناة الـ”OTV”:

الإتفاق الإنتخابي

• هيدا اتفاق سياسي، وبرأيي هوي أوّل تطبيق لإتفاق الطائف،
  كل اللي كان قبل، وشخصياً كنت بحكومة الوحدة الوطنية سنة 1991،
  وكانت الحكومة عم تطبق الطائف، ولكن كان قرارا مش بايدها، وميشان هيك طلعنا منا،
  استمرت الحكومات، والطائف مخطوف
• هلق من 2005 لـ 2015، كان في حالة فوضى بلبنان،
  ما كان في حدا حاكم فعلياً، رغم وجود رئيس للجمهورية وحكومات،
  لكن حالة الصراع الكبيري اللي موجودي، والمواجهة اللي قاسمي لبنان بالنص، ما خلّت يكون في حكم
• نحنا اليوم، أوّل مرّة فيشي صُنع بلبنان،
  وهوي استمرار لإنتخاب الرئيس عون، عم يستمر بتطبيق جزء مهم من اتفاق الطائف،
  إذا الله تمّم وصار عنا قانون انتخاب باتفاق هالقد واسع، هيدا الشي بشير على نيّة اللبنانيين على انو يتفقو…

التحالف الكبير

• على مستوى المحلي انتاج شي عملي، مش حكي شغلة مهمة،
  بالسياسة التحالف الكبير يللي صار وأدى الى انتخاب الرئيس عون،
  بلّش مع التيار الوطني الحرّ وحزب الله: قدرو عملو تلت ما خلّا انتخاب آخر يصير، بس ما قدرو ينتخبو
  والتحاق الدكتور جعجع فيه، سهّل كتير التحاق الرئيس الحريري فيما بعد،
  الحريري كان من اول الناس حاول انّو يتفق مع الرئيس عون،
  وكانوا معارضينو بقلب 14 آذار، وما قدر استمر، وقفو ضدو (جنبلاط – السنيورة – جعجع)
  بس فات جعجع قدر يفوت الحريري
• هيدا التحالف (التيار الوطني الحر – القوات اللبنانية – حزب الله – المستقبل) رايح للآخر مع بعضو
• بحكم الحركة السياسية، تجاه القيادات المسيحية ببكركي، كانت النية بين :
  التيار الوطني الحر (باسيل) و القوات اللبنانية (جعجع) تقريباً قبل سنتين من الالتحاق الفعلي،
  مش مزبوط انو بس ضدّ فرنجية..
  هيدا التلاقي الرباعي منّو قليل، وعم نشوفو اليوم الحامي الفعلي لتسهيل وإنتاج قانون الإنتخاب
• الرئيس بري باقي خارجو، صوّت ضدّ الرئيس عون،
  والوزير جنبلاط فات على الاتفاق بشكل نصفي.. واليوم حليفو الوحيد بري

الهواجس الوطنية

• الهاجس الوطني موجود بكلّ المحلات، وهالهاجس أكتر شي حاملو موقف التيار والوزير باسيل،
  هوي هاجس الديمغرافيا. صحيح قلنا:
  – وقفنا نعدّ، – وقلنا في مناصفة بالطائف، – وقلنا في مجلس شيوخ
• عم يقول باسيل: نحنا بحاجة لإطار سياسي عام،
  قبلنا بالنسبية بدّي آخود ضمانات معينة، لحتى نحافظ على انو المسيحيين ينقو بنسبة مقبولة نوابن، وع شكل وطني.
• إذا بدنا نكمّل بالطائف، بدنا نوضّح المناصفة ونعممها،
  المناصفة موجودي بالطائف، ومجلس الشيوخ موجودي بالطائف. اللامركزية موجودي..

التوقعات الانتخابية

• المكوّن السني:
  الرئيس الحريري رح يضلّ متقدّم. بالأول كان الوحيد. ويربح وين مكان لوحدو.
  هلق بيعرف انو ما في يربح الانتخابات لوحدو. صار بدل ما يربح مناطق، صار بقاسم.
  بيربح ببيروت وصيدا. وبقاسم بالبقاع وبطرابلس وعكار
  الطرف السني اللي عندو انتشار وطني كلّي هوي الرئيس الحريري، البقايا ما عندن.
  بقول الحريري: انا مش وحدي عند السنّة، بس أنا أهم واحد بالسنة
• المكون الشيعي:
  حزب الله وامل هني الأكثرية، إذا حافظو على انو يجيبو 70-80%
  لكن هل حلفاؤن رح يجيبو اكتر بكتير.. حتى يصير عندن اكترية بالبرلمان. لا أتصوّر
• المسيحيين:
  إذا الثنائية حافظت على وحدة فعلية، وعملتْ معركة تفسّر شو هدفا.
  مش انو هدفا يربحو هنّي. هدفن يكونو رافعة لإصلاح الدولة، وانو لازم يكونو مؤثرين..
  بعتقد انو بياخدو أكثرية واكتر شوي من أكترية
  أنا بقولا علناً: إذا ما عرفو يحافظ على وحدتن، لازم تنينن يدفعو الحساب
  ما بصير تعمل عهد، وعَ أساس الإيام الماضية راحت، ونرجع نلقي بأوّل انتخاب، كل واحد راح بطريق
• الدروز
  وليد جنبلاط بضلو يجيب الـ 70%،
  إذا حطو معو للمير طلال ارسلان، بجيب 80%..

الثنائية المسيحية

• اللي صار بهالـ5- 6 اشهر اللي صار كتير مهم، حرام يروح،
  ومسؤولي التيار الوطني الحر والقوات اللبنانية لازم يحافظو عليا بكل جدية،
  والاّ بدّن يدفعو حقها.. وبدن ينفتحو على آخرين
• هل يُعقل انو اللبنانيين دايرين اهم شركات بالعالم، وبأهم جامعات،
  ما منقدر نجيب من هالقدرة ناس.. وما بالضرورة رجال أعمال أبداً
• المطلوب منن يحافظ عَ وحدتن، ينفتحو على المجتمع،
  يقدرو يفوتو النخب معن، بشير الجميل شو عمل؟ بس جاب حزبيين! (“غاما – غروب”)

رسالة المسيحيين

• بناء الدولة. محاربة الفساد. محاربة الفقر
  هذا الكيان. وهذا الميثاق والتعايش، بخطر إذا ما عملنا دولة.
  اليوم المطلوب الكفاءة. ومحاربة الفساد. لأنو اقتصادنا بالويل. الفساد وحش اكل كلشي.
• شو بيمنع لبنان اليوم يكون في دولة، من هالدول الصغيري المتقدمة والمتطورة!

ورداً ع سؤال: عن طلبات بناء الدولة على عاتق المسيحيين، وتنصل المسلمين، قال ديب:

• اذا الفرق بين العدد والمناصفة، بدو يكون في قيمة مُضافة،
  عم نعطيها اكتر من غيرا للمسيحيين..
  مع انو المناصفة اتفاق قانوني ودستوري.
• قال مرة النايب فتفت:
  انا المناصفة ارخص سعر بدفعو للمسيحيين. بغضّ النظر عن الأعداد.
  لأنو كمسلم انا، اكتر حرية كمسلم حرّ بكل العالم الإسلامي، ومنفتح ومثقف بكل العالم الإسلامي.
  وهيدا سعر كتير رخيص انو ادفعو. وهيدا بفعل الوجود المسيحي.
  
• ما بدنا ننسا رسالتنا، مش من منطق التبجّح. عم قولا.
  من منطق الرسالة، ومن منطق الطلب من الذات، قبل من الطلب الآخرين
  لبنان، كان دايماً يقول ميشال شيحا
  لبنان دستورو روح من تسوية الى تسوية، هيدي طبيعة بلادنا
• انا بس لاقي، ما حدا مبسوط بقانون الإنتخاب، أو بالطائف،
  انا بنبسط. انو ما حدا ربح عَ حدا
  التيار والقوات وبري مش مبسوط. جنبلاط الأرجح مش مبسوط.
  معناتا كل واحد عطا تنازل. وبنهاية الأمر هيدا لبنان
• بدنا نكون واقعيين. ما نركّب نظامنا، انو نحنا الجمهورية الخامسة بفرنسا.
  منا هيك نحنا. نحنا اكتر متل بلجيكا. متل البلدان المعقدّة والصعبة، وعم تنتج حالها بحالها
• بس نُوعا هالشي، ما منعود نزعلْ.
  ما لازم ننطلق بلبنان، من منطلق انصهاري ووحدة. هيدا كلام ضحك ع بعض.
  نحنا عنا خصوصياتنا، وبذات الوقت، بقوة الخصوصيات، عنا إرادة العيش المشترك
  
• انطلاقاً من هون، ما لازم نيئس من بلدنا. وننطلق لقدام.
  المهم اليوم محاربة الفساد.. وقدرات منتجة. ولامركزية مهمة جداً لإطلاق الاقتصاد والإنتاج
• الحكومات المركزية، نسبة لتعدد مراكز القرار بطيئة

بري

• متل ما بشوف حالو، بحكم ميشال عون وتركيبة التيار، اضيق من ما هيي متل ما تعوّد.
  لازم نحكيها بمحبة. الرئيس بري عندو خوف.
  انو عودة المسيحيين الى الحكم، سيكون على حساب اللي قدر يحقق ضمن الدولة، لحزبو ولطائفتو.
  ميشان هيك حكي عن حرب أهلية قبل الانتخابات. ورجع سحب الكلام الوزير علي حسن خليل.
  علماً بعرف قديه حرصو على الوجود المسيحي
• الرئيس بري منو فايت بقصة سني – شيعي. (هيك اعتقادي)
  الرئيس بري معني بوزن حركتو وطايفتو، وجمهورو، ومنطقتو داخل اللعبة اللبنانية.
  بقلك، هيديك لعبة اكبر مني بكتير. حزب الله عم يخوضا، الله معو. وايران والسعودية عم تخوضا
  انا معني، شوفيني جيب للناس اللي حواليّ، لمنطقتي.
• الحوار هون لازم يصير، لأنو الرئيس بري داعم للمسيحيين.
  عملت برمة انا وياه بالجنوب، وشفت الكنيسة اللي عم يرممها بضيعتو

عن سبب تشويه العلاقة القوية بين الطائفتين الشيعية والموارنة، باتفاق مكتوب، يقول ديب؟

• هنالك اكترية من 4 قوى انتخبت العماد عون، بري خارجiا، وجنبلاط اجر فيا، وإجر برا
  المشكلة هيي احجام سياسية، ضمن التركيبة اللي بالحكم
• المشكل منو شيعي ومسيحي، ومش قصة ما بدن يخلوهن ياخدو حصصن
• المشكلة بالعمق في اكترية جديدي (تيار – قوات – المستقبل – حزب الله) بوجّ اكترية حكمت 30 سنة

الحريري

• الحريري عمل خيار استراتيجي. وقت مشي بالعماد عون رئيس
  اعتبر انو انا احسن انو احكمْ بلبنان، مع فريق العماد عون، ومن خلالو فيني أثّر واعمل علاقة ما بتحرجني مع حزب الله،
  من انو احكم من دون قدرة، لأنو في معارضة قوية.
• خيارو، اما يحكم بحكم معطّل. او بعطّل حكم الآخرين.
  الخيار الوحيد انو يحكم، كان مع العماد عون، وبعتقد اخد هيدا القرار
  الرئيس بري ما بخليه يحكم. شو في يعطيه بري أو جنبلاط. فيهن يتحالفو تيمنعو حكم.

السعودية

• السعوديين بلبنان، عندن خيارين:
  – اما الإتكال ع الدولة وع رئيس الجمهورية لأنو الطايفة اللي بهمن امرا. هيي بكنف الدولة
  بعتقد الحريري اليوم، بعدو بذات المنطق..
  – الخيار التاني للسعودية، كتير صعب: خيار ضّ الدولة
  بتصير امام خيارات بتشبه العراق، وبسورية. وهيدي ما بتوصلا بلبنان.
  والرئيس عون واعيلا جداً. والرئيس الحريري بهالسياق، عم يشتغل ضمن السياسة العليا للسعودية
• هيدي المعادلة اللي حافظة لبنان. وعون والحريري عم يعرفو يجنبو لبنان

الهاجس الدرزي

• آمل انو المسيحيين، يتفهمو الهاجس الدرزي، لأنو نحنا بجبل لبنان، اكتر بكتير
  وعلى الطوائف الإسلامية الكبيري، السنية والشيعية، تتفهّم هاجس المسيحيي
• نحنا كمسيحيي لازم نحمل الهمّ الدرزي،
  والطائفتين الإسلاميتين الكبار هني لازم يحملو هيدا الهاجس المسيحي
  إذا بدنا نكون نحنا فعلاً بلد، عنا شراكة حقيقية
• المسيحيي ما رح يهدو، وما رح يرتاحو، الاّ إذا ما حسّو حالن وعو نفسن عَ طريق تمنعن الوصول نحو “الأقبطة”
  بمصر الأقباط من 100 سنة كانو 30% وحقوقن واصلي. اليوم بعينولن نايبين بمجلس النواب.

سوريا والعراق

• مستقبل المنطقة اللي بأثّر علينا: سوريا العراق
  هل سيتم وصل ايران – عراق – سورية – لبنان او لاق؟
  هل رح ينحط قوى بنص سورية تفصل بين العراق (هيدي المعركة الكبيري)
  وصار في تبادل قصف من القوتين الكبار:
  – الأمركان ضربو قوة سورية طالعا ع مناطق اعتبروها ممنوعة
  – روسيا ضربت صواريخ “كروز” على منطقة تدمر
• أي سورية هنا المعركة؟
  إذا صار في منطقتين سنيتين، بسورية المفيدة. سورية الأكراد. بدنا نشوف
• العراق ما بعد الموصل؟ هل سيكون بتوازن سني – شيعي – كردي؟
• لبنان متداخل باحداث سورية والعراق، من دون ان نكون منغمسين، باستثناء حزب الله…

المصالح اللبنانية

•  لازم نحدّد مصالحنا، ونشتغل عليا
  عم يصير في مناطق مستقرة بسورية، لازم نطالب ونعطي أولوية للعودة النازحين لبلادن
• الحكومة اللبنانية بدها تبادر، وتضغط ع المجتمع الدولي
  لأنو المجتمع الدولي عم يطالب بابقاؤن، وتشغيلن بلبنان، وبعاقبك..
  افضل يتدرسو الطلاب السوريي المنهاج السوري

رصد Agoraleaks.com