أمل أبو زيد: شي طبيعي رئيس التيار يكون مرشّح لرئاسة الجمهورية والمسموح لفرنجية مسموح لغيرو والهجوم عَ باسيل لأنو ناجح وما بيهدا (Audio)

– خطة القوات الكهربائية مش واضحة والحكي هيّن..
– لبنان تجمّع للأقليات، ومااعطاه السيّد للدروز أعطاه للدروز وما سواكَ بنفسه ما ظلمك 

مقتطف من حديث عضو تكتّل التغيير والإصلاح النائب أمل أبو زيد لقناة الـ”OTV”:

عن الإنتشار اللبناني في كندا

•  الإنتشاراللبناني موجود بكل بقاع العالم، واللبنانيي موجودين بكندا قديماً،
  في ناس من ضيعة “كفرمشكي” كانو بكندا من وقت فاجعة الـ”تيتانيك”،
  وفي طرفة بكندا، كانو يقولو: شو عاصمة لبنان، كانو يردو “كفرمشكي” كأنو هالضيعة كلها انتقلت من لبنان
• وجود اللبنانيي بكندا بكبّر القلب،
  الجالية اللبنانية ممتازة، ومتراصة مع بعضا، ونحنا كتيار كل سنة عنا لقاءات كنواب مع أبناء الجالية،
  التيار بنظّم اجتماعات ولقاءات وعشاوات سنوية، وبكون فيها جميع الأطياف السياسية والطائفية،
  بتحسّ انو آخدين معن لبنان عَ كندا، ولكن بأقلّ قدر ممكن من الخلافات السياسية،
  هيدي اللقاءات كتير مهمي، صحيح عايشين بكندا، ولكن بيعرفو تفاصيل الوضع اللبناني
• كان في تركيز من قبلي على موضوع إعادة الجنسية والحفاظ عليها،
  
  الغربة مش من اليوم عنا ياها، انتشارنا موجود من فترة كتير طويلة.. والإنتشار على مرّ التاريخ كان الو أسباب سياسية، واضطهادات..
• اللبنانيي عم ينجحو بالخارج، منقلن بدنا نجاحاتكم يكون الها استثمار بالداخل، لأنو هيك مننهض بالبلد،
  ومن خلال علاقاتن الموجودي، في لبنانيين نواب موجودي بالمجلس الكندي، وفي عنا مسؤولين لبنانيين على صعيد وزارة الخارجية، وكان في آنسة لبنانية بوزارة الخارجية قلبا كبر، بوجود لبناني معها بوزارة الخارجية..
  هيدي النجاحات بدنا نستثمرها، ومن هيك منقلن سجلو ولاداتكم، لأنو لبنان ما في يطير الاّ بجناحيه
• وصول الرئيس عون الى الرئاسة خلق عندن أمل جديد،
  وصلو لمرحلة كانو فاقدين المرحلة، ولكن عندن الخوف، وهوي مبرّر، انو على رغم السنين اللي مرقتْ بعد في ناس عم تشدّ البلد الى الوراء، لأنو اللبناني بقلك عم انجح بكل اعمالي بالخارج،
  بقدر كون ناجح ببلدي، بس بدنا أرضية سياسية وإدارية وقضائية، وارضية ما فيها فساد.. فالشعارات اللي اطلقا الرئيس عون بخطاب القسم متمسكين فيها، وبيتمنو تتحقّق، وهني واقعيين، بقولو: ما فيشي بصير بكبسة زر.

عن قانون الإنتخاب

• نحنا بعدنا واقفين بأرضية الإنتظار،
  قانون الإنتخاب بجميع بلدان العالم، هدفو تحقيق تمثيل أفضل للناس، ولكن انطلاقاً من عدم الإستهداف وعدم اقصاء احد من الناس
• بنهاية الأمر في مطالبة جديّة من الناس لنتوصل لقانون انتخابي جديد،
  النسبية في عندا عدّة آليات، والإنطلاقة بتكون من الساحة المحلية تبع واقعنا بالبلد، ومن الديمغرافيا تبعنا، والحاجات السياسية والإقتصادية
• مش نقول بس قانون نسبي، كيف مكان،
  ما بدنا نعمل اقصاء لشريحة معينة بالمجتمع اللبناني، ومش غلط نسميها المسيحيين، وبين مزدوجين، مع إقرار اتفاق الطائف في تنفيذ للإتفاق الثلاثي..
• في تهميش لمجموعة مش بس مسيحية، في مجموعات أخرى مهمشّة،
  مفروض نوصل لآلية قانون تمثل الجميع، بمن فيها لبعض الأحزاب المتواجدة على مستوى الوطن، كالحزب الشيوعي، والحزب القومي السوري الاجتماعي.. وحتى على مستوى الطوائف الصغيري، كالطائفة العلوية، والأقليات المسيحية
• لننطلق من الواقع الطائفي، ونوصفو..
  نحنا كتيار مستعدين للتقدم لنلغي الطائفية، هل قادر غيرنا يواكبنا،
  وهل منقدر بكبسة زر دغري نسكّر صفحة ونفتح صفحة جديدي على مستوى هيكلية الدولة أو بدها تحضير؟
• الحركة لا بدّ انو تعطي نتيجة، وبراأيي بلحظة من اللحظات رح نوصل لإتفاق حول القانون

ورداً على سؤال نقل السيّد نصرالله إشكالية قانون الإنتخاب بين التيار الوطني الحرّ وجنبلاط، قال أبو زيد:

• القول انو في مشكلة بين التيار ووليد جنبلاط خطأ،
  السيّد نصرالله ما هيك قال،
  جبل لبنان هوي قلب لبنان، خصوصاً انوفي مكونين أساسيين (الدروز والموارنة) هني وراء انطلاقة لبنان الكبير،
  مرقنا كتير بمطبات، وبفترات كتير من التعايش، لازم التعايش يكون عَ أسس صلبة،
  وما سواك بنفسه ما ظلمك.. ليطرح كل فريق مخاوفه ولنعالجها
• السيد نصرالله بس يعطي هيدا الحق للطائفة الدرزية، مش عم يمنع هيدا الحق عنا نحنا
• لبنان تجمّع للأقليات، هيدا الواقع.
  مصلحة البلد بما حدا يشدّ اللحاف لإلو، كلياتنا مع بعضنا بدنا نتواضع من دون أي ضغينة
• يروحو يخيطو بغير مسلّة، انو بدن يستعملو بعض التباينات،
  المفتكر انو في خلاف كبير بين التيار وحزب الله مغلط
• بركي اتفقنا عَ مشروع قانون انتخابي ب 30 أو ب 1 حزيران.. ما بصير في دعوة لفتح جلسة استشثنائية من قبل رئيس الجمهورية ورئيس الحكومة والحكومة مجتمعة!
  من سنتان ونص حصل فراغ برئاسة الجمهورية، وكان في كتير ناس متأملين انو الفراغ يدوم اكتر، التناقضات كانت موجودي، ووصلنا لقناعة انتخاب رئيس للجمهورية قوي، وكان تحديداً العماد عون

رداً على سؤال، عما إذا كانت قناعة، او فقدان مناعة من بعض الذين انتخبوه، يقول أمل أبو زيد:

• من حسنات التيار انو يبني تفاهمات سياسية مع الجميع، وايدو مفتوحة وممدودة للجميع،
  بدأنا بالدرجة الأولى مع حزب الله بشباط 2006،
  وكنا بنفس الوقت التيار عم يعمل مباحثات مع تيار المستقبل، والإشتراكي،
  وفي تحضير لورقة مع حركة أمل، وصار في ورقة النوايا مع القوات اللبنانية
• حركة التيار الوطني الحر، مصلحة لبنانية ووطنية، انو نعمل تفاهمات مع الجميع
• نحنا كلبنانيين منستنبط الحلول، أوقات ما حدا بيحلم فيه،
  نحنا عايشين بوقت ضاغط، وكل يوم بيمرق متل تكّة الساعة، كأنو في قنبلة موقوتة،
  انشالله هالقنبلة ما بتنفجر..

عن فرنجية اللي ما ترك نبال وخرطوش وصواريخ الاّ ما قصفا على الوزير جبران باسيل

• فرنجية بالنهاية قال، انو هوي بالموقع الإستراتيجي متحالف مع الرئيس عون
• وجّه سهامو مباشرة للوزير باسيل، يمكن هيدي لأسباب خاصة، الوزير باسيل عندو المعطيات اكتر مني، وقادر يردّ على هيدا الموضوع
• انا بدّي الفت نظر لموضوعين،
  – بالنهاية الوزير باسيل رئيس التيار الوطني الحر، وصار في اتهام للتيار، انو نحنا تقسيميين، وانو بدنا نعمل شي من جزين للمدفون،
  اللي بيذكّر التاريخ منشأ التيار ومنبعو هوي الجيش اللبناني والعماد عون، ولا مرّة كان تفكيرنا تقسيمي..
  – الإنسان اللي بيبقى ناجح كتير، متل الوزير باسيل، وعندو حركة دايمة، ولا يهدأ داخلياً وخارجياً،
  عم يتطلّع لقدام بكتير ايجابية، وما عندو ولامرة النية لإقصاء حدن، حتى اللي بيعتبرو يمكن حالن خصوم لالو، ان كان اسمن تيار المردة أو غيرن، بالعكس التيار عندو امتداد على صعيد الوطن ككل

ولكن الوزير فرنجية عم يقول: معركتو مع جبران باسيل، وبدّو يعمل كتلة..

• ايه واضح بكلامو الوزير فرنجية، الهدف من الانتخابات الحصول على كتلة برلمانية، وقال فرنجية الوزير باسيل عندو هيدا الهدف

والوزير فرنجية حيّد القوات وسمير جعجع، يقول جورج ياسمين

• بالمنطق الطبيعي، كل حزب سياسي عندو امكانية الحصول الى السلطة، بدّو يشتغل لإلها،
  ليش الوزير فرنجية ما عم يشتغل تيجي على المجلس النيابي بكتلة بيعتبر لازم تكون مميزة ووازنة، حتى يكون عندو إمكانية الوصول لرئاسة الجمهورية
• ليش المسموح لإلو ممنوع للآخر، اول سؤال بطرحو،
  شيء طبيعي انو رئيس التيار الوطني الحر، كرئيس  اكبر حزب مسيحي موجود على الساحة السياسية بلبنان، انو يكون رئيس للجمهورية، والحقيقة تثبتّت انو لازم يجي الرئيس اللي عندو قاعدة شعبية ينطلق منها، وقاعدة برلمانية،
  هيدا حق وواقع وطبيعي

عن توتر التيار والقوات

• بأي مواضيع تُطرح، بدو يصير في تنسيق،
  والتباين يجوز،
  بالمجلس النيابي طلع الوزير سيزار أبي خليل وحكيْ، وعمل مداخلة متعددة وعمل مؤتمر صحفي، وشرح بالتفصيل شو هيي الخطة، وبناءً على شو.. وشو بينعمل لفصل الصيف لأنو الحكومة قالت جايينا كتير لبنانيين ومغتربين (حوالي 700 الف لبناني) ومفروض تتأمن الكهربا حتى ما يصير في اشكالية
• قيل الكثير، وانو في صفقات شمال ويمين، سهل الحكي،
  تقدمّت 7-8 شركات، وقالو انو الباخرة جاهزة.. حكي قد ما بدّك،
  ولكن هدف القوات، انو انا عندي خطة للكهربا، انو ممكن تخفّف من الهدر، ولكن ما فيشي ملموس وتفسيري بهيدا الموضوع، عم تحكي خطوات عامة
• الخطة واضعا الوزير أبي خليل، ووزارة الطاقة أخدت موافقة من المجلس الوزران وما رح ينعمل أي شيء الاّ بالموافقة النهائية لمجلس الوزرا مجتمعاً، بدكن كهربا! بدكن خطة جديدي بديلة، تقدمو فيها بالمراحل التانية!
  نطلب من أبي خليل وضع خطة طوارئ للصيف.. نوضعت، والوزيرمقتنع فيها، ونحنا مقتنعين فيها، اللي عندو سؤال معيّن، في عندك نيابة عامة مالية، خيّي الحكيْ هيّن، بيكفي جدل متل هيدا
• انا عندي خطة، وانتا عندك خطة، مجلس الوزرا هوي بناقش،
  مجلس الوزرا نسمح يعمل مناقصات، شركة الكهربا عملتا، وبكرا بتنرفع النتيجة، وبيتخّد القرار هونيك، وحقن وزرا القوات يا يوافقو على النتيجة او يعترضو
• بالتأكيد في ناس مش مبسوطين بالإتفاق بين التيار والقوات لأسباب متعددة،
  لكن الاتفاق مع القوات، لا يعني انو ما عندك اتفاق مع حزب الله، واتفاق آخر مع المستقبل، وممكن بكرا يحصل اتفاق مع الحزب الشيوعي ومع حركة أمل

عن الوضع الاجتماعي والعمالة السورية

•  بلبنان الوضع ضاغط إجتماعياً ومالياً وسياسياً، واقتصادياً
  التطرق لوضع النازحين السوريين، مش يعني اتهامنا بالطائفية ولا بالعنصرية،
  متل ما النا نحنا سورية أقرب دولة لإلنا، ولازم يكون في عنا تبادل، وطبيعي وجود التبادل الإنساني، ولكن على الاّ يتجاوز الخطرالوجودي
• اتهّم التيار بالعنصرية، وهلق صارو عم يحكو متلو، وعم يقولو كان معو حق،
  اللجوء السياسي مابكون بمئات الألوف، بمئات قليلة جداً متل ما بصير بكل دول العالم،
• العودة لازم تكون لأماكن فيا استقرار بسورية، ونشالله اللي عم يصير بالأستانة بهاليومين الماضيين من انخفاض بمستوى التوتّر،
  وحتى تنحلّ القصص، بدّو يكون عنا قناعة انو في حكومة لبنانية يجب ان تتعاطى بشكل مباشر مع الحكومة السورية

رصد Agoraleaks.com