التيار والتكتّل: لا للتمديد بكل الوسائل ومنطلب من حزب الله والمستقبل يرفضو.. وما في فراغ.. (Audio)

– رح يكون في قانون انتخاب.. – الضغط علينا لنخسر حقوقنا لاق – أرجلنا جاهزة للإقتراع بالأقدام

مقتطف من حديث رئيس التيار الوطني الحر جبران باسيل، اثر اجتماع تكتّل التغيير والإصلاح:

• بعد الإعلان عن نية حقيقية ترجمت بدعوة مجلس النواب لجلسة للتمديد لنفسو،
  صرنا أمام واقع آخر جديد
• نحنا التيار الوطني الحرّ اللي هوّي حامي الجمهورية، وحامي الدستور، وحامي الميثاق،
  بيرفض عملية التمديد، لأنو هيدي حلقة ما بتخلص ، انو نكون عم نكرّس اكترية نيابية بتضلّ تمدّد لنفسا الى ما لا نهاية
• التمديد عملية اغتيال للحياة السياسية،
  واعتداء على كل الشعب اللبناني والديمقراطة
• اليوم واقفين لنتحمّل مسؤولياتنا بهيدا المجال، ونواجه التمديد، وقلنا عطول رح نواجهو بكل الوسائل

نتمنى

• نتوسّل ونترجّى ومنطلب، من كل القوى السياسية، يللي بتعتزم انو تشارك بعملية التمديد، انو تمتنع عن هالشي، لما نلتجئ لقرارات معيبة بحقنا كلنا سوا
• نحنا من قلن، كلن سوا، انو الخيار الصائب، انو نعمل قانون انتخابات،
  مش نهرب منو، ونعمل تمديد
• اليوم لما حزب الله بكون عم يواجه بالجنوب اسرائيل، نحنا منروح نلتحق فيه بالكامل، ومنمشي بخيارو، وما منسأل
• لما اغتيل الرئيس الحريري، نزلنا على الساحة، ومشينا بهيدا الخيار، شو ما كانت الكلفة ما سألنا
• نحنا مندعيهم اليوم، حزب الله والمستقبل، وكل القوى الأخرى انو يلتحقو بهيدا الخيار،
  ما في هيدا الخيار حياء من شي
  هيدي وقفة مع لبنان، ومع اللبنانيين، ومع الديمقراطية
• ما في فراغ،
  مبارحة رئيس الجمهورية حرص يقول: انو ما في فراغ،
  وفي 100 وسيلة بتمنع حصول الفراغ
• حصل فراغ برئاسة الجمهورية، سنتان ونص.
  هيدا فراغ بموقع مسيحي، وما قلنا انو عم نعتدي فيه، على المسيحيين، ونحنا كنّا عم نسببو
• بنفس المقياس، ما في فراغ بالمجلس النيابي، ونحنا حريصين ما يكون في فراغ بالمجلس النيابي،
  وما يكون في أي خلل ميثاقي بالبلد.

ليش 3 مرات تمديد؟

• ما وصلنا لهون من عبث، بتعرفو من زمان عم ينقال:
  في صفقات، حدا بدّو يمدّد. حدا متفّق مع التاني على الستين،
  اليوم رح نثبت مرة تانية، انو نحنا ما مندخل بصفقات، ولا باي اتفاقات تطال الأسس المكونة للبلد، والديمقراطية
• ميشان هيك ركضنا، انو نقدّم الإقتراح تلوى الإقتراح، والقانون ورا القانون،
  وتضحكو علينا لدرجة: انو ما تركنا فكرة وما قدمناها،
  معليه بدنا نذكّر اللبنانيي، انو كل اشكال الصيغ القانونية الانتخابية طرحناها:
  1) المختلط
  2) الأكثري
  3) الطائفي
  4) النسبي
  5) الوطني
  6) one Person one Vote
  7) و one Person 10 Vote
  8) لايحة مسكّرة
  9) صوت تفضيلي، بلا صوت تفضيلي
  10) مختلط على مراحل…
  11) تأهيل…
  12) مختلط بالمقاعد على النسبي، على التوزيع الميثاقي بالمذاهب
  بالحلقات المسكرّة نحكا فيهن، وما تركنا صيغة وما كنا عم نسعى من خلالا، تنقول انو نحنا فاتحين قلبنا وعقلنا لكل الصيغ
  لأنو الهدف منو الفراغ، الهدف منو التمديد، الهدف منو الستين.
  الهدف واحد، انّا نقرّ قانون انتخابي بأمّن صحة التمثيل وعدالتو
• بدّي قول للبنانيي المشغول بالن: رح يكون في قانون انتخابي،
  هيدا شي حتمي، قد ما أجلّوا. وقد ما مدّدوا. قدّ ما أخرّو.
  متل برئاسة الجمهورية. نوعدتو انو رح يكون في رئيس بمثلكم وصار.
  رح يكون في عندكم قانون بمثلكم..
  هيدا عهد ووعد بقدمو التكتل..
• يللي مبسوط انو عم يعمل تمديد، بقلو في قانون انتخابات قبل التمديد، او بعد التمديد

بكل الوسائل سنرفض التمديد

• بكل الوسائل سنمنع التمديد،
  1) بمقاطعة جلسة التمديد
  2) أي تحرّك بيسمحلنا الدستور والقانون لرفضو بالشارع وبغير الشارع رح نرفض التمديد
  3) بالحكومة عنا وسايلنا
  4) بالمجلس النيابي عنا وسايلنا
• في رئيس جمهورية عندو وسايلو وعندو صلاحياتو
  نحنا تيار وتكتل التغيير والإصلاح تيار الجمهورية وتيار رئيس الجمهورية، عنا وسائلنا وشعبيتنا، ومسؤولين قداما إنو نكون على قدر أماني الناس
• منطلب كل القوى تساندنا:
  – مرجعيات روحية
  – مرجعيات زمنية
  – أحزاب
  – تكتلات ممثلة بالبرلمان أو خارجو
  – مجتمع مدني
• مش بكرا يصيرو الكل مدّدو،
  لاق في تيار واقف عم يقول: ما بمدّد
  برفض التمديد.. مش كلنا متل بعضنا
• بنفس الوقت نحنا منمدّ ايدنا، وعم نفاوض، وعم نتباحث، وعم نقدّم أفكار لنعمل قانون انتخاب،
  من خلال لجنة وزارية، من خلال مجلس وزرا، من خلال جلسات جانبية،
  كلشي بوصلنا نعمل قانون..
• ما حدا يفكّر انو بيقدر يضغط علينا بتمديد،
  بأي وسيلة تانية، تينزلنا عن حقوقنا وحقوق الناس بتمثيلا
• الواحد يستعمل شعارات، حتى من خلالا يمدّ ايدو على الغير، ويستولي على الأصوات وعلى المقاعد، وعلى التمثيل،
  لاق.
  هيدا الشي ما رح يمرقو علينا لا صحافي، ولا وسيلة اعلامية
• العهد بينمسّ فيه، لما هوي العهد بيتنازل عن خطاب القسم،
  نحنا بينمسّ فينا، لما نحنا منتنازل عن مبادئنا،
  شو ما يحكو العالم بالإعلام، وبغير الإعلام، ولو شوهو الشي اللي قدمناه، كهربا ونفط وبلد، وموازنة، وقانون انتخاب، نحنا مش مسؤولين عنو، هيدا تشويه، وهدفو الضغط علينا لنتراجع،
  لما منقبل بالتمديد منكون عم نخسر نفسنا، وساعتا العهد بكون عم يخسر،
  لما نحافظ على المبادئ، منكون عم نربح نفسنا، وفينا نحصّل للبنانيي يللي بيستاهلو
• على هيدا الأساس منقول، ايدنا ممدودة، وعقلنا عم يشتغل، وقلبنا مفتوح، انما أرجلنا للإقتراع بالأقدام كمان جاهزة

رصد Agoraleaks.com