Agoraleaks Agoraleaks
أيا جيل مؤمن عم بتخرجوا؟؟
إن الله من حنانه يقبل كل توبة ويغفر. وهو الذي قال “من يقبل إليَّ، لا أخرجه خارجًا” (يوحنا 37:6).
يا جماعة المؤمنين الحقيقيّين والثابتين بمحبة وكلمة الله، بطلب منكن بترجّي أنا العبد الخاطي اللي بأمسّ الحاجة لرحمة الله… لازم يوقف كلّ شخص فيكن وقفة ثابتة وحازمة ضدّ كل التيارات الفكرية والأحداث المشينة اللي عم بيواجهها بلدنا الحبيب لبنان ومجتمعنا المسيحي وبالأخصّ كنيستنا الأمّ. وقفة ما فيها مساومة ولا مسايرة بس فيها حبّ ورحمة مش إدانة وفرّيسيّة، ولكن بصوت صارخ ببريّة هالعالم المتوحّش واللي فقد كل المبادئ والقيم للأسف بسبب غسل الأدمغة من خلال وسايل الإعلام ووسايل التواصل الإجتماعي.
كل فترة بيحضروا أعداء الإيمان والكنيسة حدث مسمّم كرمال يدسّوه بين شبيبتنا الصاعدين واللي عم بينموا بالإيمان وبالحياة الروحيّة والرعويّة، والهدف يفشلوا مشروع الله مع أبناءو…
صدر خطأ مؤخّراً وللأسف الشديد من جماعة مكرّسة ومضطر إنّي سميها لأن سبق وأعلنوا عن هيدا الموضوع بإعلان وهيي الرهبانية الأنطونية بأنطلياس واللي استقبلت بعيد النبي العظيم إيليا الغيور أو مار الياس الحيّ شخص متحولّ جنسيّاً أو بالأحرى Drag Queen المقلّد باسم فغالي كرمال يحيي مهرجان ديني رعوي… وسبق وطلع هيدا الإنسان وأعلن عن شذوذو وميولو الجنسي على التلفزيونات وعن إلحادو وعدم إيمانو بالكنيسة الجامعة… رجاء خاص من الجميع يكون بكلّ واحد بيناتنا غيرة مقدسة على كنيستو متل ما بيخاف وبيغار على مصلحة بيتو وعيلتو وأملاكو…
كنايسنا خط أحمر عريض!!! بس كمان مواجهة الشرور ما بتكون بالعنف والمشاكل والكلام النابي والروح الفرّيسيّة وشيطنة الآخرين… والغلط بيصدر من الجميع من أقدس نفس لأتعس نفس، والدليل قديسينا اللي ربنا حولن تحويل جذري…
بس وقفتنا بدها تكون حازمة وحاسمة بوجه التيارات الفاسدة ونرفض رفض قاطع انو يفوت عبيت الله أعدائو المندسّين ونحنا عم منزقف ونتفرج ونضحك للخدعة اللي جايي تنال من إيمانا وأرواحنا… نحنا الكنيسة مش الحجار ونحنا اللي منحافظ على العقائد والتعليم السماوية اللي هني درع وسيف بحربنا مع الأرواح والسلاطين… اذا كان روح العالم ممنوع يدخل على الكنيسة بأي شكل كيف بالأحرى إبليس وجنودو وأفكارو السامة الخبيثة… كفانا مسخرة وإستخفاف ومساومة وتراخي… وأيّ غلط أو سمّ بدو يندسّ من اليوم والرايح داخل كنايسنا وبيبقى الكلّ ساكت يعني الكلّ مشارك بالجريمة وشيطان أخرس… أيا جيل مؤمن عم بتخرجوا؟؟ بوعدكن في أقلام صحافيّة أمينة رح تكتب عنكن بقساوة كبيرة مش لتدينكن بس لتكفّوا وترتدوا عن خيانتكن لربكن وشعبكن بإسم الآب والإبن والروح القدس الإله الواحد له المجد إلى الأبد..
الخوري إدغار .ع
