📣❌⚠️ هام جداً! اختبار قوي حصل مع اربعة كهنة من خلال التقسيم 👈 التبصير هو خطيئة (ابونا انيس طحطوح)

إختبار 4 كهنة من خلال التقسيم، بصوت أبونا أنيس طحطوح لأحد المؤمنين – مُتناقل عبر وسائل التواصل الإجتماعي:

• التبصير بالقهوة خطية ثقيلة، وتسمح للشيطان أن يتدخل بحياتنا..
  سلّملي عَ ستّك، وعلى كل إنسان عَم يبصِّر، وقلو، “أوعا يبصّر” يشرب قهوة وبلا تبصير..

• أنا قبل كنت إفتكرها إنّو شي عادي، ومّنا شي..
  بس صار معنا فصل وتأكدّت من هالشي..

كيف ⁉

• عندي صديق كاهن فرنسي، إسمو أبونا “فيليب تورنول دي كلو” (Père Philippe Tournyol du Clos) وهوّي مقسّم عظيم فرنسي، وفي معرفة فيه من زمان وبيِجي لعنا بقضّي كم شهر بلبنان..

• في يوم بقلّي، عنّا حالة ثقيلة، بدنا نتعاون عليها نحنا والكهنة، مع بونا مروان خوري والبونا بولس فهد، وببلدة عشقوت الساعة 4..

• إجا التِرِم، رحنا..
  صارت الساعة 4 و12 دقيقة.. في رجال ومرا وبنت صبية عمرها شي 26-27 سنة بالصالون، ومبَينين بلا صِغرا فيكُن.. سألتو وين هالحالة القوية..⁉ رح تصير 4 وربع..!!

• قلي أبونا “فيليب دي كلو”، هنّي هون..
  قلتلو، مش مبيّن عليُن شي..؟؟
  قلي هلق بس نصلي بِتشوف..؟؟
  البنت هيّي يللي متضررة..!!

• بيِطلب الكاهن المقسّم إنّو يدخلو الأهل عَ الكنيسة، وكان معي بنت من الأخوية طلب منها تدخل عَ الكنيسة حتى يصلّوا.. 🙏

كان أبونا “فيليب تورنول دي كلو” هوّي البادئ، وبلّش بالصلا، ونحنا عَم نعاونو..

• كان عَم يصلّي.. وعم يقول بإسم سيدنا يسوع المسيح بإمرك تِطلَع منها، بتصير تِجعُر البنت بصوت قوي جدًا.. وتغيّرت هيئتها، وبلشِّ المعركة..

• قلنا كل الصلوات..
  يحكيه أبونا باللاتيني، يجاوبو باللاتيني،
  يِحكيه أبونا بالسريانة، يجاوِب بالسريانة..
  ما بدنا نقول فرنسي وإنكليزي وعربي.. بتعرفُن البنت..
  وهالبنت ملوعّة وعَم تصرّخ..

• تضايقنا، وبصراحة أنا شعرت بنوع من الإحباط،
  إنّو وَلَو يا ربّي دَخلك، بنت متل قلب الصباح، حرام 4 آباء وما عَم نِقدِر نفيدا بشي..
  ولَو دخيلك شو هيدا..؟؟

• كانت صارت الساعة شي 6:20 (السادسة والثلث)
  تخيلّوا من الساعة 4:15 لَ لـ 6:20..

• بونا بولس فهد، بقول: طيّب معنا ما عَم تطلَع، قِرِب ظهور العدرا بمديوغورية.. رح نصلّي المسبحة، وهيّي بتطلّعك.. 🙏

قعدنا نِرتاح..

• البنت كانت غايبة، ولكن بس وقّفنا التقسيم، هِديِت، بس بعدا غايبِة، مش هيّي..
  
• قَعدنا حتى أخدنا نتفة نفَس..
  قال أبونا، هات نعيّط للبَي والأم، ونبلش نصلّي المسبحة..

• البنت قاعدة حدّي،
  الباب بوِجنا.. كم دقيقة وفتح الباب، بطلّ البَي..
  شي إنّو طلّ البَي، بقبّ هالوحش بهالإم، وبشراسة بقول: هيدا قلي.. 👈
  البَي شاف بنتو بهالشكل، إرتعب..
  قلّو الأبونا: ما تخاف، صلاتك بِتساعد بِنتك.. عَم يحاول يوقفك، ويفَشلك..
  لكن ضلّ يقول: هيدا قلي.. هيدا قلي..

• أنا ما عِدِت تحملّت،
  الله يِخزيك، من وين لوين الك..
  شو إنتا خالقو للزلمي.. هيدا بخصّ الله، والله خلقو وخلقك، وما الِك فيه..
  قال: لاق هوي لي..

مع إصرارو، سألتو ليه الك؟

• قلي: هيدا عامِل كتير خطايا..
  قلتلو: كلنا عاملين خطايا،
  يسوع بدمّ, دفَع ثمن خطايانا، وحرّرنا..
  قلي: لاق هيدا قلي..

• إنتبهت لشغلة، سألت الرجال: معترف..؟؟
  قلي الرجال: معترف..

• هون بيفتح تمّ البنت منيح، وضِحكة صفراوية وبشعة، أبشع من هيك شايِف ضِحكِة..
  فيها متل مسخرة علينا،
  وإستهزاء فينا،
  تزريك النا،
  تحقير لإلنا،
  يعني 100 معنى ومعنى بهالصورة البشعة..

• قلتلو: ليه عَم تِضحَك هيك،
  معتِرِف وما الك شي معو..
  قلي: في خطايا، إستحى يِعتِرِف فيها..

• طلعّت بالرجال: وقلتلو: مزبوط..
  وبالفعل أقرّ البَي..
  قلتلو: مش مشكل، شو كا كانت الخطايا مش أكبر من رحمة ربنا، المهم تعترف..
  صار يصرّخ: بعتِرِفْــــــــــــ،
  بعترِف..

• هوي قال هيك، وكأنو شي رمح دخل ببطن هالشيطان.. بهالبنت.. (زمّت البنت عَ حالها وبلشّت صريخ وجَع..)

• ارتحنا كآباء.. وإنبسطنا، لأنّو قرار الإعتراف شو عمِل فيه..
  ولأنّو لقينا منّو ضعف..

وكان عَم يتوجّع الشرير، والبنت بالأرض ملَفلفِة عَ حالها.. الأبونا أخد البَي حتى يعترِف.. لكن شي إنّو دخل بينّت الإم دخلت.. بيرجَع بقبّ من وجعو، وبقول: هَيدي الي.. 👈 ولكن بلهجة أخفّ من البَي..

• الأم بتقلّو: يِقصِف عمرك، ما الك شي عندي..؟؟
  أنا مِعترفي بكلّ الخطايا..
  قلها: لاق، في خطية ما إعترفتي فيها..
  فكرّت المرأة، وقالت: لاق أنا معترفي بكل الخطايا
  بقِلها: في خطيّة مش معترفي فيها.. إنتي لي..

صارت تفكّر الأم، شو هيّي..

• جيت أنا إسألو شو هيّي..
  بقلّي الأبونا دخيلك، وقّف.. وقّف..؟؟
  وقفِنا..
  بِقوم الأبونا بقلها للمرا: يا إختي بتِسمَحي يقول الخطيّة علنًا..
  قالِتلو: يقولا..
  باسم سيدنا يسوع المسيح بإمرَك، شو هيّي الخطيّة..؟؟
  قال: مبصرّة بالقهوة..

• قلتلو: شو مبصرّة بالقهوة..!!
  إذا مبصرّة بالقهوة، صارت الك؟؟؟
  إنتا واحد كذاب، وأبو الكذب، وبدّك توقّع المرا بالوَسوَسِة..!!
  إنّو مبصرّة بالقهوة صارت الك..!!
  ما الك شي..

• صار يقول: الي..
  كل هالإشيا الي..

سألت المرا: إذا عَم يصير شي غير التبصير..؟؟

• قالت: شو بدنا نِعمِل يا أبونا..؟؟
  ومش بالنا لا بشيطان ولا بشي..

• قلتلو: ما الك شي ولا بالُن فيك..
  ستّات عَم يتسلّو، وعم يطبّو الفناجين..
  قال: كل هالإشيا الي..
  قلتلو: إنت عَم تحاول توقّع المرا بالوَسوَسِة، وما الك شي.. بَرهِن إذا الك..؟؟

• طلّع بالمرا: من كم يوم، طبّيتُو الفناجين، وطلعلِك شي حلو بالفنجان، كا كنتي مزَهزهَة طوال النهار.. سكتِت المرأة وتفاجأت.. ووقت طلِعلِك إشارات وحَوكتيها حول جارتِك، ما تغيّرت علاقتك بجارتِك..!! ما صرتي تتشاءمي من جارتِك..؟؟ ما صرتي تتهرّبي من جارتِك؟؟
  وقال هيداك “دلّ عَ صورة يسوع”: هيداك المحبة بالعقل والإرادة،
  عندي أنا بالتفاؤل والتشاؤم

• جمدنا نحنا..
  بونا مروان، قال: بالفعل الشيطان أكبر عالم باللاهوت..
  جمِدنا..
  معو حق الشيطان.. عند يسوع المحبة بالعقل والإرادة، ويسوع بقول: أحبوا أعداءكم (بَدها عقل وإرادة) بينما عند الشيطان، هيدا مهضوم وهيدي حلوة.. هيداك شو بيِجينا منو مصلحة الخ..

• ساِعتها قلنا للمرأة: شو بِتقولي، يا إختي..
  بِتقوم راكعة لإجرَيها لَبِدْ.. وبتقول: دخيلك يا أبونا عطيني الحلّة، ويِحرم عليّ مش التبصير، حتى القهوة..