بالصوت الأب مروان خوري وقصة المحلل: ليه حجم البلوطة ربع وقية والبطيخة 10 كلغ؟ (Audio)

– اختبار إمرأة اثر عودتها من مديوغوريه.. وربحها من السوبر ماركت برقم 5000

ليه حجم البلوطة صغير وحجم البطيخ كبير

مقتطف من حديث الأب مروان خوري في قداس جماعة سيدة البشوشي في كنيسة سيدة الزروع  (معالتين) 17-1-2017:

• عقل الإنسان متل الهارديسك تبع الكمبيوتر، الهارديسك إذا بتفوتلو “فيروس” بتتخربط الحسابات كلها تبعو
• عقلنا ضربتو جرثومة الخطية، ما عاد المطرح الصالح تقدر تسألو ويعطيك الجواب الصحيح

قصة البلوطة والبطيخة والفيلسوف

• مرة بخبرو خبرية عن شخص وكان مستسرسل بأفكارو ومبسوط بحالو إنّو بحلّل..
  كان متشلقح تحت سنديانة، وعم يتأمل بالبلوطات فوقو، وقال للرب:
  انت منك عادل بالخلق؟؟ معقول شتلة بطيخ طولها شبر بتحمل راس بطيخ 10 كيلو، وسنديانة طولا 10 متورا بتحمل بلوطة ما بتطلع انجأ ربع وقية

قلو انتا مش عادل… وقد ما فكّر غفي
هوي وغافي، بتقشط بلوطة من السنديانة، بتنزل ناقرتو على مخو
بيوعا نقزان شو صار؟
بيطلّع بلاقي بلوطة اجت عليه…
بيتطلع ب الله وبقلو: بشكرك انو هالسنديانة مش حاملي بطيخ

• أوقات مندعّي على الله، انو فيشي غلط بيللي عاملو معي.. بس يا ريت منطق الله

• خرج الزارع ليزرع.. تركو عندو خبرة، بيعرف شو الحقلة، بيعرف كيف بحضرا، لأن شو هم الزارع؟
  يعطي محصود مرتب

• تطلّع مقابيل كل أحداث حياتك، تطلع بالهدف تبع الله.. هدفو انك تكون قديس. هدفو تكون انسان صالح..
  في سبيل تحقيق هالهدف، شو بيعمل الزارع بيلقط المقص بايد، والمعدور بايد وببلش
  كلشي منو صالح، شوك وعليق بيضرب في المقص بقصو.. الزارع بقطش اشيا يمكن بتحبا انت، مريحتك الحياة
  متلاقي الرب يصيبك الضربات، متل حط سكينوبقلبك وبلش فيك
• خرج يسوع من البيت، وجلس على شاطئ البحيرة، واحتشدت لديه جموع كثيرة،
  الله كل يوم بيترك وبيجي صوبك، البحر هو العالم.. كل واحد منا هوي واحد من الجموع
  بأصغر الإشيا الله بيقطع.. أوقات الناس بمديوغوريه بكونو ناطرين شي تيشوفو العدرا
  يا ريتك بتعرف العدرا كل يوم بتقطع لعندك هيي ام. ويسوع كل يوم بيقطع، ما تنبش عليون بالغيمات وبالحلم
  نبش عليون بامور صغيري.. لغتو مش لغة الأرض، وتتقدر تفهما بدك تتعلما بمدرسة روح القدس (الروح يصلّح فينا)
• أوقات بيجي لعندي بأحداث حلوة، وأوقات بأحداث مرّة.. بس الله يمرّ، وعندو شي يقولو لك.. بدك تلقط موجتو، وبتكتشف ايد الله يللي عم تشتغل فيك

عن اختبار بمديوغوريه (Audio)

• مرّة راحت امرأة على ميدوغوريه، سمعت انو العدرا بدنا ندخلا بحياتنا بكلشي، مش بس انو بس عم نكون عم نصلي المسبحة؟
• هالمرأة قالت ما رح اعمل شي الاّ ما تكون العدرا مباركي أي قرار…
  صارت تطلب بكل عمل تعملو، العدرا تباركو
  صارت تحسّ بفرح بكلشي عم تعملو، واوقات تحسّ انوفي اشيا مش لازم تعملا
  حسّت انو فيشي خفي دايرلا حياتي
  يوم من الإيام بتخبّر وبتقول، حسيت بقلبي كأن حدا عم يحكيني، انو تنزل تشتري مونة البيت من السوبر ماركت، وقالت انا عندي الغراض بالبيت، ليه بدي اشتري المونة؟
  قالت بما انو مسلمي العدرا، رح انزل اشتري المونة
  عبّت 2 CHARIOT، وجايي عَ الصندوق، واقفي بالصف، ما بتلاقي الاّ امرأة شكّت قداما وأخدتلا مطرحا
  عصبّت، انو ليه عم تاخديلي دوري؟ ما انا متلك مستعجلة!
  اجت تخانقا، قالت لاق؟؟
  وصل صاحب السوبرماركت، وقلها مبروك.. قالتلو عشو مبروك..
  الله حضرتك رقم 5000 بتشتري بالسوبر ماركت عنا من وقت ما فتحنا، وآخدين قرار بالإدارة ورقة رقم 5000 كلشي بيشتري بكون ببلاش
  بتقول المرا، كيف العدرا بعتتلي هالمرا، مفروض هيديك تكون الربحانة..
  باختبارا بتقول المرأة.. يللي بسلّم نفسو ل الله وللعدرا.. وقديه منهتم بالعدرا، العدرا بتهتّم فينا، حتى مونة البيت بتهتم فيون
  الرب بأصغر الإشيا بيقطع، بس ما منعرف نخاطبو
• الله كلمهم بأمثال عن اموركثيرة، الله ما بخاطبك بالمباشر، بيحكيك بأحداث وبرموز.. انت بدك تكون شاطر، وتفكّ معانيها
  ليه صار معي اليوم.. يمكن حلو ويمكن بشع.. صلّي وفكّ إرادة الله تتشوف لشو هالعراقيل
  عراف انك منك متروك بالحياة..
  بتعرفو ليش خرج الرب.. لأنو البيت فاضي بلاك.. خرج ليعيدك الى البيت
  وآخر شي خرج من ملكوتو واجا لعنا، وليك كيف علقناه على الصليب، ورديناه لمطرح ما اجا
  وبعدو لليوم الله يخرج في طلبك تترجع معو الى بيتك الوالدي
  فرحة الله انو يردّني.. ومستعد يقعد معي بالغربة ليل ونهار وهيك عمل بسر القربان، بس المهم يقنع قلبي وعقلي لترجع الثقة بتسليمو امري

الأب مروان – الحديث كامل