بالفيديو – الأب مروان خوري للحجاج اللبنانيين في مديوغورية: لولا شفاعة العدرا والنعمة يللي عاطيِتها للبشرية بمديوغورية، لإنتقلنا الى حكم المسيح العادل 🙏

عن سرّ فاطيما وأسرار مديوغورية الـ10 ومستقبل البشرية

شاهد الفيديو بالضغط هنا

عظة الأب مروان خوري في عيد مولد العذراء مريم في 8 أيلول 2021 للحجاج اللبنانيين في مديوغورية:

*
(1- العدرا / ضمانة) 🌷

• مهم كتير وجود العدرا بحياتنا، وعَالأكيد من إختبر أمومة العدرا ومحبتها بيعرِف إنّو يللي ما إختبر محبة العدرا وأموتها قديه هوي إنسان فقير، وقديه حياتو محفوفة بالخطر 😔

• أحلى ضمانة النا، وجود مريم معنا.. ناخِدها شفيعة وعندا حطّو كل صعوبات حياتكم، وأمنياتكم.. لأنّو لمّا بشّرها الملاك سمّاها “المملوءة نعمة” ⚡ كل نِعَم السما حطُّن الله بين إيدَيها.. وعَطاها ملء السلطان توزّع النِعَم على أبناءها.. والأم ما بتِبخُل علينا.. وبس نصلّيلها متل إبن عَم يعيّط لإمّو.. ولا مُمكن الأم تبقا صامتة أو غير مبالية.. 🙏

• أي صلاة لمريم مسموعة، وهالشي مش يعني عَم تاخود دور يسوع (متل ما بيِحكي البعض) وإنّو التكريم فقط ليسوع.. يسوع منّو أناني.. هوّي اللي وصّاني كرّم أمي وبيّي البشريين، ولو هوّي بيِعمِل عكس وصيتو.. كيف بكرّم إمّو..❓ بكرّمها بإعطاءها شو عندو.. وهيي بتستحق.. 💖 وميشان هيك شفاعتها لا تُرّد..

(2- العدرا / شفاعة) 🌷

• نحنا بالزمن اللي عايشينو هوي بفضل مريم.. إذا منشوف مستوى خطايا البشر على الأرض والشرّ الصادر عنّو، الله مش لازم يترك مخلوق طيّب عليها.. لكن بواسطة العدرا وبتدخلها وشفاعتها الرب بعدو عَم يخلّي الشمس تشرق حتى يكون مُستطاع للعيش على الأرض.. ✋
• العدرا بظهورات فاطيما جنبّت البشرية كارثة من خلال 3 أسرار؛

• السر الأول: بإظهار العدرا رؤيا جهنم لولاد فاطيما، وإنو أعداد هائلة من النفوس عَم تسقط بجهنم 😈 وطلبت منّا لخلاص النفوس تكريس أوّل سبت من الشهر تعويض عن الإهانات اللاحقة بقلب إبني وقلبي.. 🛐 وطلبت نشر صلاة المسبحة.. والمناولة والإعتراف التعويضي عن الخطية.. لكن العالم ما إستجابو 😔
• السرّ الثاني، كان إنذار بقولها، إنّو إذا العالم ما إرتدّت عن خطاياها، خطاياها رح تاخدُن على كارثة أكبر.. وهيك صار البشرية حصدت بالحرب العالمية الثانية حوالي 90 مليون قتيل عدى عن التدمير بالعالم.. 👿

• السرّ الثالث، كان إنّو فرجِت الولاد بفاطيما رؤيا، وفيه كانت العدرا عم يضهَر من إيدَيها نور توقّف فيه نار خارج من سيف ملاك يدعو البشر للتوبة.. وعلى يمينها شافو رجال أبيض، طالع على جبل، وحَواليه قتلى ومدن محروقة. وبس وصل على الصليب بأعلى الجبل، بيتقوّص.. وطلبِت العدرا وضع هالسرّ عند البابا بروما، حتى يكرّس العالم وروسيا لقلبي 💖 حتى توقّف النظام الشيوعي.. ولكن إجا بابوات كتيري يقرو السرّ ولكن ما كانو ينقذو رغبة العدرا 😔 حتى إجا البابا يوحنا بولس الثاني، بس شاف السرّ، قرّر تكريس روسيا والعالم لقلب مريم الطاهر.. 💖 وبـِ 6 حزيران 1981 قرّر يعمِل التكريس من أكبر كنيسة للعدرا بروما (Santa Maria Maggiore) بِـ 13 أيار يوم أعطِت العدرا السر بفاطيما (13 أيار 1917) يحاول محمد علي أقجا إغتيال البابا يوحنا بولس الثاني.. 😈 طبعًا البابا ما بِموت، لكن بيتألّم.. وبيعرِف إنّو تدخّل العدرا خلّصو من الموت.. 🙏 بيبعِت كاسيت بصوتو من المستفى وبيعلُن تكريس العالم مع الأساقفة لقلب مريم الطاهر.. 🛐 ومن بعد التكريس بِ 6 حزيران.. شفنا كيف سقطت الشيوعية والتغى نظام أكبر أمبرطورية شر من دون ضربة كفّ.. 🔥 وإذا منروح عَ الفاتيكان، مِنلاقي شقفة من حيط برلين جابوها للبابا، ومكتوب تحتا “بفضلك هالحيط” سقط.. 🙏
• والأخت لوسيا (إحدى رؤاة فاطيما) بتقول: خلصّتنا العدرا من حرب نووية كان النظام الشيوعي عَم يحضّرلها.. وكان بدّن يفنو الحياة عَ الأرض.. 👿

ولكن كان مفروض الناس، من بعد اللي صار يتوبوا ويرجعو لَ الله.. لكن الشرّ زاد والوقاحة تبع الإنسان وخطاياه زادت كتير.. 👿

• بيدخُل يسوع حتى يحكم الأرض بعدالتو.. بتدخُل مريم وبتطلب بشفاعتها آخر فرصة حتى تشتغل عَ ولادا وتردّ يللي بيرتدّ..

(3- العدرا والفرصة الأخيرة) 🌷

• أكيد يسوع ما بيرفض طلب لأمّو.. عطاها فترة مديوغورية.. 🙏 وكلنا سمعنا كلام الأخت “Emmanuelle Maillard” وقولها “صرلها العدرا 40 سنة عَم تترجانا أن نعود الى يسوع.. 😔
• نحنا اليوم عايشين بفضل شفاعتها.. الإنسان اليوم ما بقا يستحقّ الحياة يكفّي فيها.. ولكن بتدخّل العدرا أد ما بحبها يسوع، وبحب ولادها يللي عَم يصلّو.. هودي يللي مخلاليين الأرض إنو يكون مُستطاع العيش عليها.. 🙏
• اليوم بمديوغورية عاطية 10 أسرار للرؤاة.. وفيها شو بدها تِعمل الخطيّة بالإنسان بمستقبل البشرية 🤔
• الله ما بِقاصِص وما بيِضرُب.. ويسوع بقول بالإنجيل: “أنا لا أدينكم، أعمالكم تُدينكم”.. الشر اليوم منتشر لأنو مزروع شرّ..

لكن

العدرا تستثني ولادها.. بتقول: يللي تكرّس لقلبي ما يخافو… وهالشي مش معناتا بتِمنَع الألم عنا.. البابا القديس يوحنا بولس الثاني سمحت بتألمو.. وهيي بتقول: آلامكم تُفيد الكنيسة 💒 تمامًا متل ما قالت للشاهدة “فيتسكا” بمديوغورية المُصابة بالسرطان.. “قالتلا بطلبلك الصحة من يسوع ولكن ببطّل إظهرلك”.. 👉

(الخلاصة)

• البارّ ويللي بصلّي ما يخاف.. بس الله عايز آلامنا لأنّو يجعلها فداء لكسر الشرّ تبع الخاطئ حتى يخلّص النفوس.. 🙏
• نقدّم معاناتنا وآلامنا للعدرا.. وبآخر رسالة للعدرا قالتلنا “أرجوكم، صلّوا من أجل تحقيق مخططي”، لأنو إبليس يسعى بكل قوتو بهالزمن إنّو يدمّر الحياة على الأرض..
• بدنا نساعد العدرا بصلاتنا، بتقديم معاناتنا لإبنا يسوع.. والألم يكون جزء من الصلاة، القديسة تريزيا بتقول: “كل ساعة ألم إذا قدَّمناها بحب أد 100 ساعة صلاة” 🙏

(عظة للراهب المريمي الأب مروان خوري في ذكرى مولد العذراء – 8 أيلول 2021 في مديوغورية)