بالفيديو – الأب نيكولا نهرا عن أسرار الصلاة وأهم طلب: كلّ مصلّي لاهوتي.. والتقدّم بها بحاجة لتدريب..💔

توما الأكويني حتى يفكّ معضلة لاهوتية دخّل راسو ببيت القربان..

زتّ همّك عَـ الله.. ولتُعرف طلباتكم أمام الله

العدرا كانت تبكي وتصلّي بحرارة حتى تحصل عَ طلباتها.. إذا أم الله هيك فكيف نحنا المعترّين..!!

أسرار الصلاة الحقيقية مع الأب نيكولا نهرا – الجزء 1
💔 🕯 كلمات حكمة ونور وحب 🕯💔

https://youtu.be/1soGYI6s6is

• يقول أحد القديسين كلام كتير مهم: الصلاة سرّ ما بيَعرفو الاّ الله.
  لأنو الصلاة بِتدخّلنا الى كيان الله. يعني بتِدخُل بِ الله. بروح الله.
  يعني روحك بتفوت بروح الله. وروح الله بتفوت فيك..
  بصير في تبادل بين كيانك وبين كيان الله.. وهالشي الو معنى غميق كتير..

• يوحنا الذهبي الفم يقول: كلّ مصلّي هو لاهوتي.. يعني بصير يَعرف الله.
  أكيد مش يللي بصلّّي مرتان أبانا ومرتان سلام.. لاق.
  يللي تدرّب عَ الصلاة.

• العدرا بتقول: تدربّوا عَ الصلاة.. الصلا بدها تدريب متل أي شي تاني.. وكل ما تقدمنا بهالتدريب، ودخلنا بسر الصلا، مندخل بسرّ الله.. لأنّو بصلاتنا بتِخلق بيننا وبين الله صداقة وعلاقة حب حقيقية. وما منشعُر فيها بالأوّل.. بدها فترة شوي طويلة حتى نشعر بالحب القوي لَ الله. بس من البداية منبلّش نحسّ بتغيّر روحي..

• بقول أحد القديسين، في نوعان من الصلاة:
  * في صلا يللي متل النهر يللي ماشي بين الوديان وبالآخر بصبّ بالبحر..
  * في صلا معاكسة.. هوّي البحر بيهجم عَ النهر.. ويصير النهر بقلبو..
  يعني في صلا إنتا بتجاهد حتى تتحّد بِ الله.
  وفي نوع تاني من الصلا، الشخص يللي صار كتير قريب من الله، ما بتلحّق تصلّي شوي، حتى الله بيِطحش عليك.. يعني بيدخل أعماقك..

• بالحالة الأولى النهر عَم يصبّ بالبحر.. في مسيرة… بدّو يِمشي بين الوديان.. يعني في جهد.. وفي صلوات منِعملا بجهد.. وأوقات منِعملها برياحة.. الصلاة يللي بِتكون برياحة، بكون الله طَحَش علينا. وهالإشيا ما بتِنفَهَم الاّ اللي إختبر الصلا..

• بالصلا مش بس منصير أصدقاء لَ الله.
  عَم نحقّق اتحاد عميق فيه.. وفي درجات.. مش كل القديسين بيتحدو بِ الله بذات الدرجة.

• أوّل علامة لمدى إتحادنا بِ الله، هوي حبنا للصلا.. أو بالأحرى تصير الصلا عادة فينا.. متل ما بقول المرشد العميق القديس المطران “فرنسوا دي سال“: النفس اللي بتحبّ الله بتتعوَّد عَ الصلا.. بتصير عفوية.

• اللي بحبّ الله، ما بيِقدِر يعيش من دون صلا أبدًا.. ونهار اللي بيمضي من دون صلا، بيعتبرو نهارو مش من حياتو، نهار مش حلو وناقص.. نهار ضعف وتقص وما فيه سلام كفاية..

الصلا سرّ وبتدخّلنا بسلام عميق جدًا.. مار بولس بقول:
سلام الله يحفظ قلوبكم وأفكاركم في المسيح يسوع..

• الصلاة بتعطي سلام بتفوق تصوّر العقل.. هوّي سلام منّو بشري.. هوي سلام الهي لأنّو من الله. ومن هيك بيدعينا مار بطرس نزّت همومنا عَ الله، كتافاتو بتِحملو..

• يللي بصلّي فعلاً، بزّت همومو.. ببطّل حامل هموم.. وببطّل حامِل السلّم بالعرض.. متل القديسة ماريا فوستين، بس تمرق بصعوبة كانت تقول: بخبرو الصعوبة المارقة فيها، وبسلمّو ياها، وأنا بكمّل حبو وبس.. هوي قادر يزبط الأمور..

• مش يعني ما منفكّر بعقلنا.. هيدي فضيلة الفطنة.. ولكن ما منضلّ على طول مَهمومين.. خلص منفكّر بحلّ.. ومنلاقيه بنعمة الله من بعد ما نكون صلّينا.. وبعدان منزتّ همّنا على الله. وصلاتنا ببطّل فيها بلبلة وقلق.. بتصير صلاتنا إستراحة بِ الله.

• إذا بدنا نلاقي حلّ لأي مشكلة، نصلّي ونرجع نفكّر.. بصير تفكيرنا عميق.. ومن بعدا نزتّ همومنا على الله. وهيك منعيش بسلام ومنرتاح بٍ الله. (الصلا الحقيقية هيي راحة بِ الله، هيّي إستراحة بحضن الله).

• يسوع كان يقول: ما عندي حضن عَ الأرض حضن إرتمي فيه. قصدو يقلنا، عندي بس حضن واحد، هوي حضن بيّي السماوي.. المؤمن ما بيرتمي بحضن حدا، الاّ بحضن الله. يعني عند الله بلاقي راحتو الحقيقية. أكيد منلاقي راحتنا عند اللي منحبُّن، بس هيدي راحة مؤقتة وبشرية، بس الراحة يللي بتَعطي سلام عميق، بسميّها مار بولس:
  
  سلام يفوق الوصف.. وهالشي بيِطلب تدريب عَ الصلا. بدنا نتدرّب نرتمي بحضن الله. ونسلمّو كل أمورنا.

وضوح الطلب

• يقول مار بولس:
  لتُعرف طلباتكم أمام الله.
  
  بحبّ الله يعرِف طلباتنا، وهوي بيعرفا أصلاً.. بس بحبّ نِطلبا.. ما بيَعطينا شي الله الاّ إذا طَلبنا، وهيدا الشي كمان سرّ من أسرار الصلا.

• الله ما بيَعطينا شي الاّ ما نِطلُبْ.. وهالشي الو معنى.. ضروري نطلُب.. إطلبوا تجدوا.. إقرعوا يُفتح لكم.. إسألوا تُعطوا..
  
  هالشي يعني بدنا نطلب..
  بدنا نطلب ونفنّد حاجاتنا..
  بدنا نلحّ..
  
  للاسف في ناس بيطلبو مرّة وِحدي، إذا الله ما استَجَبلُن.. بوقفو صلاتُن.. هيدي غلطة كتير كبري، وبيوقَع فيها الناس اللي بعد ما إختبرو عمق الصلاة..

• الصلاة مش لازم توقِّف، حتى لو ما استجاب.. في قديسين ضلّوا سنين يطلبو ذات الطلب.. الله بيَعرِف أكتر منّا أيمتى بيِستجيب بسرعة. وأيمتى ما بيستجيب بسرعة. ((طبعًا لازم يكون اللي عَم نطلبو موافق مع إرادتو)).

• القديسين بالإنجيل..
  – متل المرأة المنزوفة لمست طرف ثوب يسوع، وحصلت عَ طلبها.. (إذًا ضروري نلمس قلب الله).
  – الأعميان لمسا الله بصراخن بصوتُ، (إرحمنا يا إبن داوود) لمسو الله بقلبُن المجروح.. (صلاتُن لمست قلب الله).

• في عدة طرق للمس قلب الله، حتى يستجيب.. أهمّ شي: (الصدق) (الإلحاح) والمواظبة عَ (الصلا).. بس ننتبه عَ شغلة، ما تتحوّل صلاتنا لتجارة.. يعني بصلّيلك يا رب حتى تعطيني.. منَعطي صدقة حتى تعطيني.. صح لازم نطلب من الله طلباتنا حتى المادية، (أعطنا خبزنا) ولكن بدنا ننتبه ما تكون علاقتنا بالله طلبات وبس..

نطلبو الو

• أهم طلب بصلواتنا.. نطلبو.. نطلب الله.. مش عَ طول بدنا شي منك..!! هوّي أهم من اي شي بِطلبو..!! وجودك بقلبي أهمّ.. وحياتي الأبدية معك بالسما أهمّ.. علاقتي فيك أهمّ وعلاقتك فيّي أهم.. إذا لمسنا الله بصلواتنا بيلمسنا الله بذات الوقت.. وبيَعطينا سلام.. وهيدا هوي برهان لمستو النا.. بيَعطينا هدوء وسكينة وبعزّينا..

• لمس الله فعل فعّال.. مؤثّر.. ومفيد.. لأنو الله متل خمرة.. بس تلمس الله بتسكر بِ الله.

إنتباه

• ولازم ننتبه إنو بموازاة الصلوات، لازم نكون مستعدين للتوبة..
  الإنسان يللي ما بدّو يتوب صلاتو بلا منفعة.. التوبة تسبق لمس الله.. ولازم نصلّي حتى نتوب..

• المطران القديس ألفونس دي ليغوري، بقول:
  شي اللي ما بتِقدِر عليه طلوب بالصلا بتِقدِر عليه مع الوقت..
  
  نطلب التوبة.. الله بيَعطينا القوة حتى نتوب..
  بس نكون علقانين بخطيّة، وبدنا نِطلَع منها.. بدنا نصلّي فترة طويلة جدًا، ولكن بالنهاية منطلَع منها، إذا فعلاً عم نجرّب نساعد الله، حتى يساعدنا..

• لازم نتكّل عَ الله حتى نِضهَر من خطايانا.. ما فينا نقلّو لَ الله خلصني من الزنى، وأنا بروح عَ الملاهي.. اللي بدّو يخرج عن الزنى بدّو يوقّف أسباب الزنى، ويِبعُ> عن الأماكن اللي بتسهّل سقوطي.. وبدها صلاة بحرارة حتى الرب يخلّصني من روح الزنى، لأنّو في شيطان إسمو شيطان الزنى.. وهيك بخصوص كل الخطايا.. وأخطرها خطيئة التكبّر والبخل..

• علينا نعمل الجهد المطلوب منا.. والباقي منتكّل فيه عَ الله. مشكلة كبيري اللي بظنّ إنّو بقدرتو بيِقدِر يبتعد عن الخطيّة.. بقول الله للقديسة بنينيا كونسولاتا (Beninia Consolata) كلام واضح:
  
  كل نفس بتظّن إنّو قادرة تخلّص حالها بحالها بتركها أنا تفشل.. وبتوقَع من خطيّة لَ خطيّة.. الى أن تعرف حالها مش قادرة تنتشل حالها، فتلتجئ الي بتواضع..

التواضع

• التواضع هوي سرّ انتصارنا..
  التواضع هوّي سرّ قبولنا للصلا..
  
  القديسة كاترين لابوريه (St.catherine laboure ) شافِت مريم العدرا بإحدى ظهوراتا واقفة فوق الكرة الأرضية ومادّي إيدَيها نزول (كما صورة الحبل بلا دنس) وعَم ينزّل من إيدَيها أشعّة صوب الأرض. في بصبيعا خواتم..
  
  بتقول العدرا للقديسة كاترين لابوريه: الأشعة اللي نازلين من إيديّي هيّي النِعَم اللي عَم تطلبوها وأنا عَم أعطيكُن ياها.. والخواتم هيي النِعَم اللي ما عَم تطلبوها.. وأنا رايدة أعطيكُ، ياها..
  
  إذًا ما فيشي بيِنعطى من دون صلا وطلب..

• وبتقول العدرا للقديسة جرترود (St.gertrude) ولا مرّة أنا حصلت عَ طلب الاّ بصلا ودموع.. حتى العدرا.. (بكرّر هالشي).. العدرا كانت تصلّي بدموع وحرارة مع إنّو هيّي أم الله. وكلّية القداسة..
  
  فكيف نحنا المعترّين.. بدنا ندرّب حالنا عَ الصلا حتى نحصل عَ طلباتنا.. ((وهالشي ما بيفهَمو الناس)) الصلا سرّ عميق.. وبدّو تدريب.. وحتى يللي تدرّب عليه بضلّ الصلا سرّ أعمق من استيعابو..

التوبة

• صلاة الخاطئ مقبولة شرط في رغبة التوبة..
  لا بل صلاة الخاطئ ضرورية حتى يتوب.. ومن دون صلا ما بيِقدِر يتوب.. (الله ما بيَعطيه نِعَم حتى يتوب)..

• الخاطئ قبل ما يطلب طلبات تانية.. بدّو يطلب طلب التوبة.. إذا ما بدّو التوبة ما ينتظر تحقيق طلباتو.. لكن إذا شخص تائب ولو بعدو عَم يوقع، تُقبل طلباتو ويُستجاب لها بحال كانت ضرورية.. واللي متجّه صوب القداسة وصار ضمنا بدّو يطلب أكتر.. عند الله ما في كفاية.

• القداسة طريق طويلة.. وفي درجات.. وأي شخص ما بيِطلُب إنّو يتقدّم رح يِرجَع لورا روحيًا.. نطلب من الله نزيد حبنا الو.. القديس فرنسيس بصلاتو كان يقول بصلاتو:
  
  أريد يا رب أن أعرفك وأن أعرفك جيّد جدًا.. حتى حبّك أكتر..

• من دون ما نتعرّف عَ الله، ما فينا نحبّو.. وكل ما تعرفنا عليه أكتر، كل ما صرنا نحبّو أكتر.. وهالشي خلّى القديسين يتعلقو بِ الله أكتر منّا.. لأنو كان عندُن صلا أكتر، كان عندُن معرفة لَ الله أكتر.. وكانو يقرو بالكتاب المقدس..

• وبقراءة الكتاب المقدس، بدّي إطلب من الله يفهمني كلمتو.. والاّ بقرا عَ الفاضي.. لأنّو الله بدّو يضويلي حتى إقشع شوفي معاني.. أغسطينوس وتوما الأكويني ويوحنا الصليب وتريزيا الأفيلية، ويوحنا الذهبي الفم فهمو الإنجيل بعمق كبير.. قراءة الإنجيل من دون صلا مش كافي.. هالقديسين فهمو الإنجيل بعمق لأنّو كانو يصلّو..

• توما الأكويني مرّة كان عندو مشكلة لاهوتية وبدّو يحلها.. فدخّل راسو ببيت القربان وصار يصلّي ولاقى الجواب.. وعطا جواب رائع للمسألة اللاهوتية.. (يسوع فهمّو إنّو قوتو منّو).. حتى تفهم بدّك منّي نور.. لهالدرجة ضرورية الصلا.. وبالتالي ما فينا نفهم أبدًا الإنجيل من دون صلا.. وما فينا نفهم الرسايل من دون صلا..

• نعَم وعطايا الصلا كتيري.. وبس نتقدّم بالصلا، بصير يَعطينا الروح القدس مواهبو.. المواهب السبعة: (الحكمة ، والفهم ، والمشورة ، والقوَة ، والعلم ، والتقوى ، والخوف.) وفي درجات بممارسة الفضايل.. وبلاقيها درجات بعطايا المواهب..

• الفضائل الإلهية هيّي (الإيمان – الرجاء – المحبة) ومن بعدن محبة القريب وباقي الفضائل.. ومواهب الروح القدس بتِجي من بعد الفضائل الإلهية الثلاثة.. ومن بعدُن بتِجي الفضائل الأدبية..

• مهم جدًا نصلّي لـ الله بكل الظروف.. في ناس بظروف معينة وبظروف تانية ما بصلّو.. وفي أضرب من هيك في ناس بفرحُن ما بصلّو لـ الله..!! أو إذا ما حصلو عَ طلباتُن ما بصلّواا…!!؟؟ شي مدهش نتعاطى مع الله بهالطريقة البشعة..!!

• نتطلّع عَ مار بطرس لمّا كان محبوس.. كانت الكنيسة كلها عَم تصلّي حتى يطلَع من الحبس.. وبالفعل بعت الله ملاك وخلّصوا من الحبس.. وهيك استحق يخرج من السجن، وكان هوي رئيس التلاميذ وخليفة يسوع وأوّل بابا.. صلّتلو الكنيسة كلها وهوّي صلّى كتير.. بس هوّي بالسجن ما كان لا قلقان ولا خيفان.. كان حاسبها الله بخلصو وفي حال لاق، بكون شهيد وما فيها مشكلة، بالعكس نعمة كبيري..

• كتير مهمة الصلا بس نكون محبوسين.. محبوسين بخطيّة معينة ومش عَم نِقدِر نِطلَع منها.. صقوني ما في غير الصلا بتخلصنا من الضيقة والمشاكل.. وأد ما نعمِل.. وحتى لو ساعدنا أي شخص نحنا بحاجة معونة الله ونصلّي..

• وهيك صار مع الفتيان التلاتة بأتون النار.. صلّوا وما خافوا وما حرقتُن النار..
  وهيك الله دايمًا إمّا بطفّي النار أو ما بخليها تحرقنا متل ما صار عند تقلا (أولى الشهيدات) زتّوها بالنار كبست الدنيي بالشتي بقوة غريبة وطفّت النار..
  ومتِل النبي دانيال بين الأسود. جوّعوا الأسود كتير وزتّوا. لكن ما دَقَروه، وكان هوي عَم يصلّي.. وتقلا كمان حطّوها بين الأسودي، ما عِملو شي بالعكس لَحوسولها إجريها.. وحطّوها بين الحيّات ما دقروها لأنها كانت عَم تصلّي..

• هالقد مهمة الصلا.. وهالقَد الصلاسرّ عميق.. الصلا شي عظيم لأنها بتحطّ فينا كل قوة الله. ولمّا نتحّد بـ الله بالصلا منصير أنا وهوي واحد.. شو يللي بيِقدِر يغلبنااا.. الاّ إذا الله أراد إستشهد أو نتألّم أو نتحمّل مرض..

• الصلا مهمة حتى نِقبَل أمراضنا.. وحتى نموت بسلام.. وهون الصلا أهّم من صلاة الشفاء.. وضروري نصلّي لنِشفى المرضى، لأنّو يسوع طلب من تلاميذو شفاء المرضى. وما حدا يقول المرض إرادة الله.

• بتقول العدرا، بصلاة مسبحة الوردية بتوقف زلازل وحروب.. وكل صلا قلبية.. وأكيد صلاة الرحمة الإلهية.. وقال يسوع للقديسة فوستينا:
  
  بس تصليلي مسبحة الوردية، كلشي بتحصلي عليه..
  
  وفوستينا خلصّت نفوس ناس عَم تموت، وعَم تنازع..
  
  وكمان صلوات جروحات يسوع مهمة… ودمو.. ومسبحةالآلام.. ومسبحة الأحزان.. ومسبحة سيدة الأوجاع.. ومسبحة الأب بيو.. (مفعول الصلا كتير قوي)

• إحدى الراهبات القديسات صلّت وما استجاب الها يسوع.. زعلِت… وهيّي عَ الطاولة رفضت تاكول.. إجا يسوع من السما بذاتو يطَعميها، وبس ما عَطاها الطلب اللي بدها ياه.. وساعتها إعتذرت من يسوع، وطلبت السماح منو بدموع، ويسوع غفرلا دغري..

• يسوع بحب يستجيب لطلباتنا.. بس أوقات ما بيِقدِر يستجبلنا.. عندو غير خطط.. أو لأنو عنا ضعف إيمان.. أو لأننا ما منسحقّ ولازم نصلي أكتر ونتوب أكتر ونتقدس أكتر.. أو لأنو مابدّو يستجيب بكلبساطة ولازم ننطُرحتى يتحقّق.. والنَطرة بِتكون مفيدة لأنّو بِتقوّي إيماننا ورجانا بـ الله، حتىنوثق فيه.. مش نوقف صلواتنا.. الصلا بدها مثابرة…