الأب مروان خوري مع هلا المرّ والأسئلة الجريئة.. لماذا جينات الخطيئة نحملها (Audio)

– لماذا البعض يُشفى والآخر لا و كيف نوقف تبعات خطيئة الآباء؟
– هل الأمراض الروحية تنتقل بالجينات كالأمراض الجسدية؟
– عن يد العذراء الكبيرة بالأيقونات ؟

 

مقتطفات من حديث الراهب المريمي مروان خوري لإذاعة “سترايك” مع الإعلامية هلا المر، بمناسبة عيد الميلاد: (1/2)

• مشروع الله للإنسان، انو يصير الإنسان اله. وهيدي كلمة يسوع بالإنجيل، بقول: وتصيرون آلهة..
• هيدي دعوة الإنسان انو يوصل للألوهة وللخلود، وهيدي الميزة الله عطاها للإنسان والملاك من كل مخلوقات الكون، ونحنا كبشر شركا معو بالأبدية، ميشان هيك نحنا كائنات ابدية. منا كائنات لكم سنة على الأرض..

• هيدي الألوهة فوتتنا بحريتنا على مشروع الله، ولكن خربطنا المشروع، ونحنا سميناه بالإيمان المسيحي “الخطية الأصلية”.
• الخطية الأصلية خلّت الإنسان ينتج الشر بدل ما ينتج الخير. بدل ما يكون بالملكوت الأبدي، صار ابن جهنم هالك للأبد…
• ربنا بس عطانا الحرية، طلب منا نخضّع الحرية لالهاماتو تَ يربيها ويعلمها تتختار الحرية الصح بالحياة، الإنسان برفضو الهامات الله او تربية الله، أو حتى عشرتو، لأنو حرّ.. قلو ما الك معي..
• هيدي الصورة عطاها يسوع بمثل ابن الشاطر، قلو اعطني ما لي، وخذ ما لك..  وراح بسبيلو، بدل ما الحرية تستعمل بحدود الإختيار الجيد..
• اهم شي يكون الله بوسط قراراتي، ويكون ملهمي، راحت الحرية باتجاه البعد عن الله، وتعيش بقرارات ذاتية
• ابن قاصر إذا تركتي بلا أهل، شو ممكن يقرّر؟ ولد فلتيه من دون اهل ينتبهلو، بروح على المهوار، ما بيعرف انو في خطر.. والإنسان بلا الله تطلعي بالأرض شو عمل فيها
• اهمّ شغلة خسرنا الوهيتنا.. خسرنا الدعوة المعطاة لإلنا بنعمة من الله، انو نكون شركا معو بالملكوت، ميشان هيك لما بطّل الإنسان يقدر يصير اله، الله صار انسان تيعيدلك للألوهية..
• ما كان في مجال لعودتنا لعندو، ما كنا قادرين نرجع.. هالبيْ ترك البيت وإجا لعندي.. ورسملي الطريق، وقلي إذا بتحب العودة هيدي هييي..
• كمان هون في قرار الحرية.. ومش كلّ البشر جاوبو على دعوتو. في ناس قالولو مش مرغوب فيك. وعلى الصليب رفضو كلياً ان يسمعولو. وفي ناس بقيو مشككين، في ناس فضلو مجد الدني على المجد اللي وعدن فيه يسوع. وفي ناس قالولو انتا سيدنا وانتا الهنا، وغيرك ما في اله عنا وبدنا نرجع معك..
• من هون منفهم كلمة المسيح “أنا الطريق – انا الحق – أنا الحياة” براتي بتضيّع الطريق بتضيّع الحقيقة وبتخسر حياتك..

• من يختار يسوع، يسير بالطريق ويلتقي بالحقيقة ويجد الحياة لأنو كنا رايحين للموت
• الإنسان يللي بعدو عم يتمرجل ع الله، رح يخسر هودي التلاتي حتماً..
• لما بترفضي الله بترفضي الخير، من يرفض الأكل يرفض الصحة.. الصحة ما بتجي بالحكي مع الله، بتجي من الأكل، الغذا يؤمن الصحة
• الصحة الروحية غذاؤها الله بالكلمة، وعند رفضك اياها، الروح ستمرض وستصبح شريرة

الخطيئة الأصلية

• البعض يفهم الخطيئة الأصلية، بيْ خطي وورتا لولادو.. إذا هيك منفهما بصير الله مش عادل؟
• الخطيئة الأصلية ليه منحملا بالجينات تبعنا أو بالأحرى بطبيعتنا ؟
• بقولو كان الإنسان عايش بمملكة الله. (الملكوت) وبلحظة لأنو حرّ قلو لبيو ، ع بالي اختبرالحياة برات مملكتك. قلو البيْ، برات مملكتي في موت. ما في حياة. رجا خاص ما تخلي حريتك تاخود هالقرار. تماماً متل ولد بالبيت، عم يقلو لبيو بدي اترك البيت… يا بيّي برا في غربا ما بحبوك، رح يتلقطو فيك، ورح يقتلوك.. انا بيك يللي بحبك، وبمملكتي ما رح ينقصك شي.. قلو لاق مش مبسوط بمملكتك بدي قلْ..
• هيدي الخطية الأصلية، قرار الإنسان ما بدو يعيش مع الله، ما بدي كون ابنو
• حملت حالي وتركت هالمملكة وفليتْ، وصرت عايش بالغربة، الولاد يللي عم خلفن وين عم يجو.. بالغربة.. هيك صرنا حاملين الخطية. البشرية عم تعيش بغربة من الله

ورداً على سؤال ما ذنب الأبناء، وقول المسيح في الإنجيل عن احد العميان، ان الهدف تمجيد اسم الله رداً على قول: الآباء يأكلون الحصرم والأبناء يدرسون، يقول الأب مروان خوري:

• في كذا بعد للألم.. أحداها تمجيد اسم الله، في مطرح تاني بس شفي المخلّع، قلو لا تعد الى الخطيئة حتى لا يُصيبك أعظمْ، هون الألم ليس سببه مجد الله، سببه خطايا
• بدنا نفهم الطريقة اللي خلق فيها الله البشرية.. هناك تواصل بين الجميع، وكلنا نشكّل جسم سرّي رأسه المسيح. وكل انسان موجود بالجسم الو مكانة (عضو) بالجسم، وكل عضو بفلّ بتتأثر سائر الأعضاء، والأعضاء المنيحة بتأثر ببقية الأعضاء
• ام حاملي طفل بأحشائها.. إذا الأم مرضت، الولد بيمرض. خلي الأم تعرّض نفسا لميكروبات، بتنقلو ياهن للولد.. شو ذنبو؟ الأم تتواصل مع ابنائها
• الأم صحتا منيحة بتنقلن صحة منيحة للأولاد.. وصحتا عاطلة بتنقلن أمراض
• هيك الله خلق البشرية.. ما خلقنا افراد، ما خلقنا أشخاص.. في فرق كبير بين الفرد وبين الشخص. الشخص يتفاعل مع الآخر، وحسب التفاعل ستكون العلاقة ان كانت سيئة ام ايجابية

عن عدم قدرة الإنسان معرفة خطايا أجداده، سؤال من الإعلامية المر، يردّ الأب خوري:

•  الخطيئة الأصلية تختلف عن خطايا السلالة او شجرة العائلة.. الخطيئة الأصلية قرار اخذه الإنسان ان يترك الله (صارالإنسان بطبيعتو يغلبط – الله بطّل مسيطر على إرادتي لأني رافضا.. بخلاف لما كنت ضمن مملكتو كانت ارادته قوية لأني اتقبل عطاياه)
• ابليس بمكان ما وضع ارادتو عليّ، وصار داير الرغبات صوب الخطية والموت..
• خطية يللي بيرتكبوها الأجداد هينة كتير. والناس قامت قيامتها علّي وصار تقول “شو خصني أنا بخطية بيّي”.. وقلت “ما خصّك بخطية بيّك، ولكن هناك تواصل.. طفل اكل مرض من امو وبيو بالوراثة؟ ليه هيدي ما بسأل عنّا واتقبلها، بس نوصل ع حياة الروح منصير نعمل أزمة!!
• الله أوجد الحل، بس الناس ما بيسمعو الاّ “لا اله”.. الحلّ هيّن، يسوع ليش طلع على الصليب ومات؟ تيلاقي حل للعنة الخطية.. روحو على القداس وقولا الو بقوة دمك يللي دفع لعنة خطاياي غفور لكل سلالتي، سامحني، وريّح نفسن بالملكوت، ووقف هالخطية تمشي بشجرة عيلتي، ورجاع عطيني البركة.. ساعتا دم الله يللي بتتناولي بالقداس بفوق ما انتجته الخطية من لعنة وبحطلا حدّ، وبيدفع الثمن بذاتو يسوع
• رايحا عند البعض لازم الله يسامحني بيشطبلي ياها، مش هيك القصة، الخطية الها مفاعيل قدام العدالة الإلهية، فيشي اسمو حق عام.. الله اوجد حل للعدل هوي ذاتو قدم حالو للعدالة هوي تألم عنك.. هيدا معنى الله تألّم
• ذبيحة القداس تكرار لذبيحة الصليب، الناس بعدا عم تخطي، وهيي بحاجة لمين يدفع عنا
• اجمل شي القداس، المناولة هيي المسيح نفسو عم نتناولو
• كل الخطايا بدها اعتراف. نقطة على السطر، ما في خطية القربانة بتشيلا. القربان بروح عليه بعد الإعتراف.

• لاهوت الخطية هو كل ما يؤذي “الحب“… من هون اجت الوصايا، ووصايا الكنيسة

• احلى فحص الضمير، وين أذيت المحبة مع ذاتي، مع الله مع الإنسان
• وين أذيت الحب لازم علي اعترف
• في خطايا انا ارتكبتن وبعدني طيّب، وفي خطايا الناس ارتكبوهم وماتوا.. اذا كنت طيّب لازم اعترف.. إذا مات وما اعترف، فيي اناروح ع ذبيحة القداس واطلب المغفرة، فاذا كان معذّب بالمطهر طالب بالمغفرة لالو حتى ينقلو ع السما، واطلب وقّف خطيتو تلحقني.. وإذا كان بجهنم هالك، عليي طالب وقف مفعول الخطية، كون ما الهو خلاص.. ساعتا دم الله بفوت وبيعمل حاجز، وبيمنع الخطية تكفي
• الناس هيدي ما بيسمعوها. وبصيرو الله مش عادل.. وبصير حمّل الله خطية أهلي واجدادي
• الله بقول نحن نتواصل بالقرابة الدموية، تماماً متل ما في امراض بتبيّن بامراض وراثية، وبتبيّن بعد كذا جيل، في أمراض روحية كمان تُنقل بالوراثة
• دم الله هوي الحلّ…

عن الصوم الكبير وصوم الميلاد.. والصوم الذي يسبق الأعياد..

• يصومو عن يللي بدن ياه، انا بعتبر الصوم هدية مني ل الله، والهدية ما عليا شرط.
• مش انو بتصومي عن شغلة ت ينقبل صومك، واذا ما صمتي عنا لاق
• الصوم شي بينك وبين يسوع.. بتقوليلو انا بحبك، وانتا مهم بحياتي… هيدي شغلة غالية لالي، رح امتنع عنا وقلك انتا الغالي، وما في أغلى منك
• هيي هدية. شو ما تنقي نقّي.. الشوكولا القهوة، الضهرة
• الكنيسة ضمن السنة الليتورجية تضع (الزمن الطقسي) بتحط زمن الصوم للمشاركة جميعاً وللتذكير ان الإنسان سيترك الأرض، حتى لا ننغمس كثيراً بها
• بالصوم أتذكر ان شهوة الكل رايحا بيوم من الأيام رايحا ع التراب. يوجد شهية أخرى اسما شهيتك ل الله. شهيتك للملكوت
• إذا نغمست كتير بالأرض بتموت شهيتك ب الله، بالصوم منضرب فرام للجسد، ومنقلو مش كل الوقت الك، في وقت ل الله، هيدا المعنى للصوم
• الصوم بتحطو قبل الأحداث الكبيري الأعياد الكبيري، لأنو مهم (عيد الميلاد – عيد الكبير – عيد السيدة – عيد الصليب)
• نذكر طبيعتنا بأهمية تلك الأحداث الخلاصية للإنسان، منحضّر حالنا للعيد شوي.. لافهم العيد ببعده الروحي
• اليوم منعرف كيف تحولّت اعيادنا، صارت أعياد أكل وشربْ، وصارالعيد زيادة للقمار والمصروف.. تحوّر العيد، والصوم بعيدو للبعد الحقيقي تبعو

عن بشارة السيدة العذراء وحبلها، هل ألسنة الناس تعرضت لها؟

• تفاجأت برسالة من رسائل العدرا، بتتوجّه للناس بتقول: انتو عم تتألمو، بس ما تفكرو أنا عشت بلا ألم
• انا تألمت وأكتر منكم.. وكل يللي بتعانو على الأرض، أنا عانيتو.. تجريح العالم. بعدو والد ابنا، ابنا رضيع وكان بلش هيرودس يهددو.. هربت ع مصر..
• بقولو دفع مار يوسف شقفة ارض كان بيملكا الوحيدي، ت استأجر حمار وسافر ع مصر، هيك التقليد المسيحي بخبّر، تتشوفي بأيا حالة فقر وأي عوز كانو
• تنقول سافرو من الناصرة على مصر.. بتعرفي الصحرا شو يعني نمشي فيها بالعراء.. قديه عانو على الطريق من قوة الطقس من الجوع ومن المخاطر ت يعيشو بالغربة هونيك حتى مات هيرودس وزال الخطر
• هيدي البداية، طبعاً ما بيذكرو الحياة الخاصة للعدرا.. لكن العدرا بلشت تضوّي على معاناتا
• نحن منفكّر ام الله، كانت عايشي بمجد وملايك يبترفرف حواليها، ام الله عانت من مسؤولية الرسالة يللي حمّلها ياها الرب، ان تكون ام ليسوع… عانت ما لم تعاني منه أيّ أمّ بهالدني

• حكمة من الله ان يختار يوسف المتواضع والفقير، حتى يعمل عيلتو منن… ما نقا اباطرة هيدا العالم…

عن شك مار يوسف والهام الله له.. كيف اليوم علينا استقصاء الإلهام

• الله يخاطبنا بطرق شتى. طريق من الطرق ان يُرسل ملائكته. طريق آخر حلمْ. مش كلّ الأحلام أكيد لاق…
• العودة للكنيسة هنا أمر واضح، شغلتها تميّز.. التجي للكنيسة وطلبي تفسير
• من هون أهمية الإنسان يكون عندو مرشد بحياتو
• القديسين بالخبرة يللي عاشوها مع الله، كان عندن مرشد، يعلمون كيف يقطعو الأحداث يللي عم يمرقو فيها
• كمان الله يتحدث من خلال الأحداث… احداث حلوة، وقد تكون أحداث مرّة.. ويرسل رسائل كثيرة، بدنا نعرف نقرا
• الله يتكلم أيضا بالإلهام… بتكوني عم تقري كتاب، في جملة بتلفتلك نظرك… كأنو الله عم يضوي على الأحداث من خلال هالجملة
• ممكن تكوني قاعدي قدام القربان عم تصلي.. تلاقي كأن حدا عم يخاطب دماغك، بأفكار وعم تعطيكي أجوبة على أسئلة طارحتيها للرب
• الله يتكلم ويُلهم الإنسان بطرق شتى
• مار يوسف لمّا وقع بالحيرة، خطيب مريم.. وهيدا إنسان عم يشوف بعينيه، وعم يشوف خطيبتو حبلي وبعد ما تجوزا ونادرين العفّة.. شكّ، يعني وقع بالحيرة كانسان، وبردو كإنسان طيّب، لم يُرد أن يُشهّر بها، أراد تخليتها سراً حتى لا يُعرضّها للخطر…
• قدام هالحيرة، وهالطيبة يللي ما فقدها مار يوسف، بعكس اليوم منستخدم الإنتقام والغضب والكره… تعامل يوسف زوادة للتعاطي مع الآخرين
• هون بيتدخل الله عبرالملايكة، وبقول لا تخف يا يوسف ان تأخذ امرأتك سراً، لأنّها حبلى من الروح القدس، والمولود منها يُدعى ابن الله

لماذا الهم الله المجوس وهم ملوك.. ولم يُلهم ملوك آخرين ؟

• الله يتكلم مع كلّ البشر. مَن مِن البشر يبحث عن الله هذا اللي سيسمع؟
• الله يُشرق شمسه على كل البشرية، بس مش كل البشرية فاتحين للنور، في ناس عايشين بالظلمة وبقولو الله ما حكاني
• الشمس لا تستثني احد.. نورا لكل الأرض، بس في ناس عايشين بالظلمة، وناس استفادو من نورا
• الله كل يوم يتكلم، والمجوس كانو ناس ناطرين مجيء المخلص، بعتلن الرب إشارة.. هيدا المخلص وُلد شرفو تعوا
• الملوك الآخرين كمان بعتلن اشارة، ما كانو ناطرين المخلص، هيرودس قري مع ولادة يسوع تهديد لملكو، تهديد للكرسي، تهديد للكرسي وراح يقتّل بأطفال بيت لحم

كيف سمح يسوع بقتل أطفال بسببه.. مش هوي القتل بس هوي سمح؟ الناس تسأل..

• ع الأكيد هودي شهدا قديسين. متل ما سمح برسلو يللي حبن ورباهم.. عطيني واحد مات موتي طبيعية. مار يوحنا ومار بطرس مار يعقوب تقطّع شقفو.. ليكي من وين مبلش “داعش”.. ت تشوفي بدنا نقرا حكمة الله بالألم
• لماذا الله يسمح بالبري ان يتألم
• بدنا نقعد هالبريّ يللي نصلب ويللي اسمو يسوع المسيح، ونقرا اناالبريء ليش عم اتألم؟
• اوعا تنبشي بحكمة بشرية رح تنصدمي وتروحي ليأس كبير.
• فقط الذي يُعطي جواب عن ألمك انتي البريّة، هوي قعدتك قدام يسوع البريء يللي نصلب.
• ليس التلميذ أفضل من معلمو، اذا كان معلمكم هوي الله، عملو في التباديع، يمكن يعملو فيكم متلو، لكن لا تخافو الله قدام المك والممر بيفتحلك من الألم نور ومخرج، ونهايتو ستكون سعيدي
• قرأت من خلال القديسة “كاترين ايميريك” ما رأته من رؤيا وبالصورة، متل كأن تعيش بهيداك الزمن، فرجاها شو عطاهن للأمهات، عطاهن الرب القدرة خاصة، الاّ يتألمو والا يتفجعو على موت أطفالن.. تدخل يسوع بحياة الأمهات.. عن نحكي روح وبالاهوت، يسوع كان بحاجةلدم هودي الأطفال تَ يقلع برسالتو

كيف؟

• يسوع كان بدو يخلص العالم من شي اسمو خطية. والخطية الها ثمن، ما بتنمحا هيك. بشحطة قلم. في حدا بدّو يدفع ثمنا، طبعاً ما بيدفع ثمنا الخاطي. ما الخاطي عليه دين؟ كيف بدو يدفعو؟ بدو يسدد الدين.. يللي بدو يسدد بدو يكون معو رصيد.. لم يُخطئ. ما الها العدالة معو
• اذا تدينت مليون $ ومعي 10 $ نهارالإستحقاق، ساعتا العدالة بتقلي مصيرك الحبس. مين بيقدر يدفع؟ شخص بعد ما تديّن
• يللي ما تديّن شخص واحد اسمو الله. ميشان هيك إذا انتي تألمتي، بتكوني عم توفي. وقد ما توفي الدين كبير. يللي معو 10$ ودينك مليون..
• هيدا الدم بعدان اخد قيمة بدم المسيح.. اخد دم الأطفال (حكمة الله بالألم) وبس مات يسوع صار دم الأطفال شركا مع الله بدفع خطايا البشر
• وع الأكيد عطاهم الله مجد بالسما مافي منو على الأرض، وجعلن بمصافي القديسين والشهدا، والكنيسي من بعد عيد الميلاد بتعيّد مقتل أطفال بيت لحم، ودمن اشترك بدم المسيح، ودمن تأسس على مبدأ الفداء، وفهمناها بموت ودم المسيح
•  هيدي حقيقة فهموها القديسين، وما عادو يخافو من الموت.. وقدمو دمن ل الله، فداء للخطأة يللي بدو يخلصن.. بس صار الهم قيمة بس شركناهم بدم يسوع على الصليب
• اكيد نحنا عم نختصر بكلام على الإذاعة، بدها مرافقة روحية للشخص المتألم

عن تقاعس الكهنة.. يردّ الأب مروان خوري

• قبل ما نسأل عن الكهنة ورمي تقاعسنا على الكهنة، هل من بيوت اليوم عم تصلّي، ت الرب يختار منها كهنة ويعطي من ثمارو؟
• عطيني بيت بتسمعي فيها كلمة حلوة عن الكنيسي؟ طيب هالولد كيف بدك ياه يطلع! وين بدو يحب الله وخدمتو ورسالتو؟
• عم يطلع الولد اقم على الكنيسة وعم يسمع مسبات.. وما بشوف نهار اهل عم يصلو..
• يللي عم تقوليه انا بردو ع قلب العيلة. انا كاهن وراهب، طلعت من عيلة بتصلي.. مش عم نلاقيها..

العدرا

• كل بريء هو شريك بدم المسيح يسوع.. مش المسيحي فقط، كل بريء يُسفك دمه شريك بالخلاص من شرّ هذا العالم
• الشر لا يُدفع ثمنو الاّ من ناس أبريا لم يُخطئو
• العدرا بالأيقونة الأرثوذكسية رائعة، بيرسمو ايدا كتير كبيري عم تدلّ ع يسوع، وكبر اليد غير المتناسق مع الجسم مقصود، لأنو فيها شيء من اللاهوت، للقول ان المجد هو ليسوع
• والعدرا والبشرية بتصبّ عند يسوع
• بمديوغوريه العدرا بتقول، لما بتسألوني شفاءات او طلبات محددة، انا باخدا وبروح فيها ليسوع بطلبا، ما تفكرو انا عم اعطيكم، انا الله بحطّ بين ايديّ وبوزّع
• الله العاطي، والله هو المركز. العدرا انسانة. هلق الله بحبا واختارا ورفعا لدرجة ام الله، لأنو هالقد كانت متواضعة وحبتو، بس بالنهاية الله هوي الله والعدرا منا الله

عن استجابة الله لبعض الشفاءات دون الأخرى ؟؟

• هذا السؤال لاهوتي
• إذا بتتذكري الأب ترديف بس اجا ع لبنان بالتسعينات، وفعلاً كان زلمي لديه مواهب منها الشفاءات حتى الجسدية
• سألوه عن سبب شفاء البعض والآخرين لا، قلن: بس موت هيداأول سؤال رح اسألو ياه. حكمة من الله مين بيعرفْ
• ع الأكيد بس اجا يسوع على الأرض. كان في ملايين الناس الساخنة. شفي اشخاص معينة، يا تُرى غيرن ما بيستحق؟
• أنا هون بنبش ع الأجوبة مش باللاهوت، بحياة القديسين، لأن حياة القديس هوي اللاهوت المعيوش اللي مبيّن، اكتر من اللاهوت النظري
• مرة بيدعو القديس دون بوسكو، (مؤسس الدومينيكان) ليصللي لشخص مريض، فات صلّى عليه، بس خلّص صلاتو بقلن، هيدا الشخص بدو يموت.. سألو ليه.. لأنو لهمني يسوع، إذا بدّو يشفى بدّو يخسر نفسو، بدو يفوت على الخطية بحياة يعيشا، ميشان هيك فضّل الرب ياخدو بعد يومين ويكون ابن السما مش ابن جهنم
• دون بوسكو قريب من الله عطا جواب.. ليه هالشخص ما نشفى؟ بس مش ضروري الجواب ينطبق! كلانسان عندو قصتو مع الله، والجواب بقعدي بينو وبين يسوع ويطلب الجواب والحكمة، من مثلاً انا مريض ليه ما شفيتني.. بس ما ننقم ع الله ونتركو

وهل بيجي الجواب؟

• الله ما بيتركك بلا جواب