بالفيديو – الأخ عمانوئيل عن الثورة.. لنفهم شو عَم يصير وكيف لازم نتصرّف.. (Video)

– ورا الثورة الروح القدس والعدرا لكن.. في مخاطر.. يللي عَم يصير جذري.. يا في حلّ أو..
– متل ما بولونيا أسقطت الشيوعية، لبنان رَح يُسقط التشريع ضدّ الله بالعالم..
– نحنا ثايرين للقمة العيش والفساد، بعدان سنثور عَ الكابيراهات اللي تحت إجرين العدرا سيدة لبنان.
– لمّا الغلط بدو يتخطّى حدودو.. الله ضابط الكلّ يتدخّل… الدول اللي شرعّت الخطية ستُعاقَب…
– يسوع لمّا لفظ الروح صار في زلزال ضرب الأرض كلها..
– كلنا بدنا نِطلَع عَالسما.. لاء يللي كان بدُن يعيشو متِل ما بدُن بالسما نِزلو عَ جهنم. وجهنم معدّة لإبليس وجنوده.
– إيماني العدرا رح تنتصر بلبنان، بس في فرق ما يكون الثمن خفيف، أو الثمن باهظ جداً..

* ♰ *

خلاص لبنان بمريم عظة الشمّاس عمانوئيل – دير قلب مريم الطاهر – كنيسة القديسة فيرونيكا جولياني: (تشرين الثاني 2019)

• أخوتي الأحباء
  لنحاول بنور كلمة الله نِفهم شو عَم يصير وكيف لازم نتصرّف..
  نحنا ما عدنا بعاد عن عيد إستقلال لبنان، هالوطن الحبيب المذكور بكتاب المقدس، واللي يمكن البلد الوحيد يللي ذكره يرمز الى شيء خَيِّر.. في بلاد ذُكرَت أوقات ترمز لخير أوقات لشر..

• نحنا شايفين أوضاع صعبة، وشايفين نَزلة عَ الشارع من شعب متألم،
  – البعض يشوف هالشي منيح،
  – البعض مش منيح.
  – البعض بقول في جهات خَلفو،
  – البعض بِقول بالعكس ما لازم نِطلَع من الشارع.

شو لازم نعمل؟؟

• بدنا نحاول ننطلق من كلمة الله (الحكمة الإلهية) ومن نظرة واسعة جداً، لَ نعرَف نقرا شو عَم يصير..؟؟
• النظرة تبدأ بكلمة نقولها بالنؤمن..

الله ضابط الكلّ

يعني الله مسَيطَر عَ كِلشي.. مش معنى ذلك مسيَّر كِلشي.. ولا معنى ذلك ما بِصير شي غلط..!! الله ضابط الكلّ يعني عند اللزوم، لمّا الغلط بدو يوصَل إنّو يخربِط أكتر من المَسموح… وإنّو يتخطّى حدودو.. ساعِتها الله يللي هوّي ضابط الكلّ يتدخّل…

• والله يتدخّل خاصةً لمّا بكون في قوّة طلب لتدخّلو من المؤمنين.. (إذاً الأمور مرتبطة ببعضا) والله ضابط الكل كفكرة كبداية تساعِدنا مش حتى:
  – ما نِقلَق
  – ما نرتعِب..
  لأنو لازِم نِقلَق.. (لأنو فيشي ما يُقلق)..
• فكرة الله ضابط الكلّ بِتساعدنا ما نِرتِعب… وما نفقُد أعصابنا.. والاّ نُقاد الى الإضطراب اللي من خلالو مِنبطّل نِعِمل إرادة الله.
• ربنا هوّي سيّد التاريخ.. 
  وكمثل صغير، في بداية إنجيل متى، يللي بيِحكي عن نسب يسوع.. شو الإفادة بكلامو، الروح القدس من خلال كاتب الإنجيل، يقلنا:
  – من إبراهيم الى داوود 14 جيل.
  – من داوود الى سبي بابل 14 جيل.
  – من سبي بابل الى المسيح 14 جيل.
  ورقم 14 هوّي 7 + 7.. ورقم 7 هوّي الكمال. (7 العهد القديم + 7 العهد الجديد) وين الإفادة ؟؟
  الإفادة منهُن يطَمنونا، إنّو الله هوّي قائد التاريخ.. رغم كل خَربطات البشر..

• وهالشي مش يعني ما بِصير في أمور عاطلة.. وبس تصير إشيا عاطلة، الناس بتصير تحطّ الحق عَ الله. لاء مش الحق عَ الله، الحق عليك يا حبيبي…

الحرية

• الله خلق الإنسان حر…
  وإذا ما خَلقو حر، يعني حكماً بدّو يكون عبد..
  وعبد يعني منّو عَ صورة الله ومثالو.. (لأنو الله حرّ) والله خلقنا كأبناء مش عبيد.. وحرية الله هيّي دايماً للخير.. فإذاً نحنا لازم نشكر الله على إنّو خلقنا أبناء، وعَ صورتو ومثالو ومش عبيد.. ولازم نجتهد حتى تكون حريتنا باتجاه الخير..

وين بيدخل الشر بالعالم..؟؟

• لما أنّا بحريتي بلّش بِمشي بالشر..
• لازم نعرِف إنّو معركتنا ليست مع لحم ودم.. بل مع الأرواح المتمردة في الجو – السلاطين – الشياطين (مار بولس).. وهنّي اللي سقَطو أمّنا حواء واللي بضلُّن يشتغلو خلال التاريخ البشري لإسقاط البشر..

بشو بدُن يسقطونا..؟؟ 

• هم يدعونا للتمرّد عَ شريعة الله. (الخطيئة)
  إذاً أعدائنا هم فوق الأحداث اليومية.. ومتل ما بقول القديسين، يللي بركّز نظرو وتأملو على المبدأ الأوّل يللي هوّي “الله ضابط الكل” الذي يسمح بسبب حرية البشر، للشر إنّو ينتشر (بسبب إختيارنا للخطيئة) وإعطائنا قوة لأفعال الشر.. وبِصيّر سيّد هذا العالم (إبليس) سيّد أكتر وأكتر..
• بهَالنظرة الشاملة مِنصير نَعرِف مين..؟؟ ومنصير ما نِدخُل بالتحزبّات والأقاويل الصغيري…!! لأنّو الأقاويل الصغيري مَزبوطَة، بس بخلّونا نضطرب وما نِفهَم شي..
• علينا نِفهَم ورا الأحداث اليومية في مشروع من سيّد هذا العالم، بدّو يُبعِدنا عن الله.. متِل لمّا بِعدِت حواء عن الله، بدأت الويلات.. وبلش أيضاً العقوبات..

العقوبات

• الله عاقب آدم وحواء.. والله بِعاقِب.. مش متِل ما بدُن يصوّروه اليوم بنوع من المحبة دون العدل.. معليه غبطة البطريرك الراعي قالها “شو متِل المهبول”.. لاء الله مش مهبول.. نحنا المهابيل بس نشيل صفة العدل، والعقاب والتدخّل من الله..
• إذاً مشروع الشيطان إبعادنا عن الله.. وعن شريعة الله.. متل ما عمِل مع حواء.. هالشي لازم أكتر شي يضلّ بالنسبة النا جرس الإنذار..
• الشيطان عَم يقود البشرية من دون نور الله.. يعني بالظلمة.. ولَو مضَوايين الأوتوسترادات بالغرب كلها سوا، بس نعيش بعيدين عن شريعة الله.. نحنا ماشيين بالظلمة… وبس نعيش بعيدين عن الله فيشي مهم بيحصل..
  بِصير بدنا ندفع ثمن بُعدنا عن الله.. لأنّو بس نبعد عن نور المسيح، مِنصير مع سيّد هذه الظلمة إبليس ومع الشيطان يللي ما بغنّجنا.. ويللي بمشّينا بالخطّية، وهالشي بسبّبلنا عقابات أبدية وزمنية..

مش عَ ذوق البعض مافي عقابات..!!

• أخوتي الأحباء كتاب المقدس هوّي المرجع مش نحنا..
  اليوم العالم كلّو الشرير ممشّى العالم بهالطريق..
• العالم كلّو عَم يترك شرائع الله.. الغرب فينا نقول سقط.. وهالكلام مش الي.. البابا القديس يوحنا بولس الثاني، قال لأوروبا الموحدّة:
  – وين إعترافك بِشلوشِك المسيحية؟؟
  – وين القيم الإنجيلية..؟؟
  – لفرنسا سألها وين معموديتك؟؟
  اليوم هالدول بلشت مش بس تعيش الغلط.. اليوم عَم تشرّع قوانين ضدّ وصايا الله..

• إبليس بعَّد كتير دول عن القيم والمبادئ..
  هالشي شو بسبّب..!!!!
  هالواقع يسبّب الها ضربات.. واللي ما بدّو يِقبَل هالحَكي مش عَم يقبَل الإنجيل..
• أخوتي الأحباء، نحنا بلبنان بثورة..
  بدنا ننتِبه كيف هالثورة بَدها تمشي.. 
  بدنا ننتبه ما يدخل إبليس، ويمَشِّيها متِل ما بدّو..

إبليس شو بدّو..!!!

• الشيطان بدّو يِنزع الله من حياتنا..
  وهالشي عِملو بالثورة الشيوعية.. نزع الله بالمرّة بطّل موجود.. ودمّر الكنايس، ومفهوم الله كـ”Concept” طار..
• البداية بلشت مع الثورة الفرنسية، ومنها إمتدّت عَ كل أوروبا.. وعَ أساس أخوّة.. بالآخر شو شفنا إلحاد تحت ستار العلم.. والشعوب صارت مُلحدة، وعاشِت بالجحود الكبير، يعني الخروج عن شريعه الله.. (وهيدا هدف الشرير)..

نحنا بلبنان مش طالعين من شريعة الله.. صَح في خطايا، وفي بالواقع عيش مش حسب شرائع الله، بس مش بالدستور.. 

توضيح

• أخوتي الأحباء
  لازم نِفهَم إنّو عيشنا الخطيّة هو ما يُسبّب كتير ويلات بحياتنا، إضافة الى الهلاك الأبدي (إذا إستمرينا بالخطية المميتة)..
• بدنا نِفهَم أهمية اللي عَم يصير بلبنان، حتى ما تِمرُق المشاريع الشيطانية.. ونحنا بلبنان بعاد عن الله بالفعل بس مش بالمبدأ.. (ويا ويلنا إذا منِبعَد بالمبدأ)..
•  أخوتي الأحباء
  الكتاب المقدس كلّو سوا.. وبعهده القديم، ربنا يؤدِّب شعبه كلّ ما يِبعُد عنو.. وربنا يؤدبّه:
  – بفقر
  – منع عنّو المطر (ومرّة مار الياس بذاتو منعو 7 سنين)
  – بقحط (المزروعات ما بتطلَع) وبجوع الشعب..
  – بحروب..
  – باحتلال شعوب غريبة..
  والكتاب المقدس بقول: ربنا إستعملها لتأديب شعبو..
  ولمّا شعبو بيِرجَع لخوف الله ويتوب.. ربنا يِرجَع يُنصرو..

أخوتي الأحباء،

• هيدا المبدأ لا يتغيّر.. وهيدا المبدأ ينطبق عَ العهد القديم وعَ العهد الجديد.. لذلك، القول ما تخَوفّو الناس اليوم.. (يللي بيِحكي هَيك هنّي أكبر خطر على الحقيقة وعَ الدين، وعَ الوطن..) هيك أشخاص متل ناس متل عَم يِمنَع النبي يونان يقلها لنينوى “إذا ما بتوبّي، بعد 3 ايام بدك تِنضربي..”.
• فينا نقول يا نبي يونان أوعا تخوّف نينوى… الدنيي بألف خير؟؟
  لاء الدنيي مش بألف خير…
• أخوتي الأحباء، بكتاب المقدس، الأنبياء الكذبة هنّي يللي بيوعدو بالسلام وبالبحبوحة، وقت الله من خلال الأنبياء المزبوطين (أشعيا – أرميا – حزقيال) عَم يحذّرو من خطر العقاب..
• العدرا بذاتها بظهوراتها، عَم تحذّرنا.. وعَم تدق ناقوس الخطر.. وعَم تِحكي عن عقابات عَ مستوى العالم.. وما بدُّن يسمعو فيها.. ويللي بيِحكي فيها.. بصيرو يقولو “لا تخَوفّوا”.. قِلها للعدرا ما تخَوِّف..
• انا أفتخر إنّو كون بالحركة الكهنوتية المريمية، يللي بِتوصّل رسالة العدرا متل ما هيّي.. والعدرا قِلقانة.. والعدرا بِتقول برسالتها “أنا قلقة، وأريدكم أن تكونوا قلقين”.

• العدرا بظهور فاطيما، دقّت ناقوس الخطر عَ هلاك النفوس وعَ حروب مدمرّة في البشرية.. والبعض بدّو يفَرجي ظهور فاطيما رشّ ورد بس.. (هيك كلام خطر) وهالشي بيِمنَع الناس من التوبة. والمسؤولين لو بعاد عن الله إذا بيِفهَمو انو في هالخطَر يمكن يتوبو.. بس إذا الدِنيي بألف خير لشو التوبة؟؟
• إذاً مش الحركة الكهنوتية يللي بِتخوّف..
  رسائل العدرا التحذيرية والتنبيهية بِتخوّف..
  والبابا يوحنا بولس الثاني قال: دخلنا بأخطر مرحلة من التاريخ.. وإنو رسالة العدرا بفاطيما هيّي خطيرة وطارئة وملحة اليوم أكتر من قبل… (وهيدي الحقيقة).
• بقول البعض: لاء بالعهد الجديد ربنا رحمة فقط.. كيف غيّر ربنا..؟؟ ما ربنا سرمدي وأزلي ولا يتبدّل ولا يُبدّل..؟؟ الله هوّي:
  * عدل
  * رحمة
  بالعهد القديم كانو شايفين وجّ العدل أكتر، ما كانو يِدخلو الرحمة أكتر.. ونحنا هلق إجا الرب يسوع وقال: أنا جئت لا لأدين بل لأخلص، وفَرجانا وجه الرحمة أكتر، حتى يصير في عنّا الوجهين..
• وقت الله بقول: أنا ما جئت لا لأدين، بل لأخلّص.. شو معناتا..؟؟ يعني بيِقدِر يدين.. يسوع ما قال ما جئت لأدين بالدينونة.. مش معناتا ما عندو سلطان الدينونة.. بِقول ما جئت لأدين إذا يعني الو حق يدين..!!
• الله العادل هوّي الديّان.. وإجا عَ الأرض يفَرجينا وجه الرحمة كِلها، ويفتحلنا الكنيسة والأسرار، وحطلّنا القديسين والعدرا عَ راسُن.. لَ يِفتَح سرّ التوبة والرحمة.. ومع لحظة موتنا يبدأ العدل..

وعَالأرض في أيضاً العدل.. ورحمتو بِتخلّيه يتدخل عند اللزوم وبالعدل وبالعقاب حتّى يوَعيّنا.. واللي بِقول غير هيك مغلّط.. ونبي كذاب، وما بدّو صالحكُن.. وضاحِك عليه الشيطان تحت ستار ما تخّوفوا العالم..

• العدرا بذاتا أمّ الرحمة، يظهوراتها عَم تهزّنا، وتحذّرنا، العقوبات على مستوى البشرية كلها.. والبعض بدّو يسكِّتها… حتى بمسيرة تكريس لبنان لقلب مريم الطاهر المتألم، يللي صارِت تَمِّت ونِعمِة من الله هالشي.. هالجانب هيدا بدُن يطَمشو..!! (كأنو التكريس شي حلو وخلص.. لاء هوي ضروري، وإذا ما عمِلناه بلدنا مش بخير..)
• غبطة البطريرك الراعي بضلّ يقول: إذا لبنان واقِف عَ إجريه، هوّي من ورا هالتكريس..

أخوتي الأحباء،

• بالعهد الجديد، برسالة بولس الى العبرانيين: فإذا خطئنا عمداً، لا يبقى هناك سوى إنتظار لهيب للدينونة، ونار مستعرة تلتهم العُصاة.. (كان يقولو الله بالعهد القديم قاسي) من خالف شريعة موسى قُتل من غير رحمة فأي عقاب اشدّ من ذلك العقاب يستحقّ من داس إبن الله وعهد دم العهد (المسكوب عَ الصليب) الذي قُدِّس به نجساً، وإستهان بروح النِعمة. إعملوا لخلاصكم بخوف ورِعدة.. (شو رأيكم هودي بالعهد الجديد) أو لاء..!!
• ربنا بمكان تاني أنا بقِلكم من مين تخافوا..!! (إذاً في خوف…!!!؟؟؟) من ذاك الذي له سلطان أن يرمي في جهنم النفس والجسد.. إذاً الرب هو ديّان وعادل..
• هوّي عَم يقول: شوفو رحمتي.. والتجئو الها، بس بدي تعرفو إذا ما التجأتو لرحمتي، بدّو يديننكم يوماً ما.. وهيدي المعرفة حتى نعرِف من شو عَم يخلّصنا ربنا.. مش نصير إذا حبيبَك عسل تِلحسو كلّو.. مَلعون من يُخطئ على رجاء الرحمة.

اللي عَم يصير بلبنان

أخوتي الأحباء،

• عدونا أبعد البشرية عن الله. وعن وصايا الله. وبعدّا خاصة من ورا ثورات كبيري، عمِلها وقادِتها أيادي خفية، من ماسونية وصهيونية وغيرو.. الى إنّو بالآخر ضربت شريعة الله. وضَرَبِت الكنيسة والأديان.
• من هالنظرة هيدي شو عَم يصير بلبنان؟؟
  نِزلِت الناس عَ الشوارع.. صرخة ألم.. صرخة وجع.. صرخة خوف من اللي ناطِرنا، لأنو بلشت الأمور توصَل الى حدّا خاصة من الناحية الإجتماعية الحياتية. واللي هيِّي دايماً السبب الأوّل بما يُسمّى الثورات. وبنزلِة صرخة الشعب.
• بس بدنا ننتبه… صرخة الشعب بروسيا اللي كان جوعان إستغلّتو أيدي وسيّسته وأخدتو الى الشيوعية، يللي أوحت إنّو الكنيسة سبب كلشي، والله سبب كلشي، وضربت الله والكنيسة.
• بأوروبا، الثورة الفرنسية (يللي هالقَد بيِمدَحو فيها) وراها الماسونية العالمية، ويللي هيّي بتِكتُب كُتُب حتى تضلّ تِمدَح فيها.. تبيَّن مع الوقت إنو همها تعلمِن، وتُلحِد.. وتُبعِد عن الله ووصاياه. وإنّو الإنسان هوّي المهم والله بدّو يخدم الإنسان. وإذا في تعارض بين حقوق الله وحقوق الإنسان بدنا نمشِّي حقوق الإنسان.
• وهلق هالهجمة العالمية بدها تجرّب تستغلّ اللي عَم يصير بلبنان، ويللي هوّي صرخة ألم.. وأنا بقول وراه شخصياً.. وراه الروح القدس.. وراه العدرا مريم..

ليه بقول وراه الروح القدس.. والعدرا مريم.. ؟؟

أخوتي الأحباء،

• إنطلقنا إنّو الله هوّي ضابط الكل، وسيّد التاريخ.. هالصرخة اللي ما بظنّ صارت بلبنان قبل… حتى بسنة 2005 الصرخة الشعبية واللي ادّت الى إنسحاب سورية من لبنان (أنا مش عَم إحكي سياسة، عَم إحكي واقع) ما صار متل هلق.. يللي عَم يصير كأنو شيء جذري.. يا في حلّ أو ما في حلّ..
• أخوتي الأحباء، هل صدفة إنّو يصير بمئوية لبنان الكبير.. لبنان هوي من البلدان الوحيدي يللي بإعلان لبنان الكبير ودستورو إيد الله موجودة. (الكنيسة وأيضاً المسؤولين الروحيين تبع غير طوائف) هنّي اللي عملو لبنان الكبير. 

• صدفة إنّو من كم شهر أعلن البطريك الياس حويك مكرَّم..
  هل صدفة إنّو بمئوية لبنان الكبير بلش يصير هالتحرّك.. (يللي أكيد خطر) ولكن نشالله رَح يكون آخِرتو لخير لبنان.
• أنا شخصياً بِعتبر إنو الروح القدس والعذراء مريم تكرّسلها لبنان، هيّي باركت هالشعب، واللي نزِل عَ الشارع، عم يقول كفى..؟؟
• أوّل صرخة هيّي للفساد الإداري والسياسي، وخاصةً المالي.. ويللي صار سرقات كتيري، وعَم يطالب من أين لك هذا؟؟ ((هيدا كلّو حق))

بس أخوتي الأحباء

• مش بس هيدا الفساد.. هالشي اللي حطيّناه بالبداية، لازم نفهَم إنّو في فساد أخطر من الفساد المالي. هوّي الفساد الأخلاقي. هوّي فساد الخطيّة. يللي هيدا أكتر شي لازم نخاف منّو. ويللي الشعب مش كلّو واعيلو…
• كل الشعب هلق جاع ونقَرَص.. بدّو يحاسب.. وممنوع لبنان يضلّ مزرعة.. كتير منيح.. بس كمان بدنا نحاسب بقداسة، وبرحمة.. ومع إمكانية التوبة.. وبدنا نصلّي للمسؤولين اللي غلطّو، واللي سَرقو، ويمكن يتوبو متل زكا العشار.. مش مقطوع الأمل.. ويقولو: هيدي مش مصرياتي، وإذا سارِق حدَن بدّي ردها 4 مرات أكتر..
• ربنا ببارك ثورة الشعب، لمّأ بِكون في مطالب محقّة، والرحمة.. ولمّا ما منِقبَل يكون ضمن هالأصوات تبلش تِدخُل أصوات غريبة أو ضايعة لبنانية، ويمكن تكون سياسية أو حزبية ما الي دخلِة فيها.. بس عن معرفة أو جهل ماشِية بمشروع إبليس. حتى يطلِّعنا عن شرائع الله. يطالب بالزواج المدني. (يللي هوي تشريع الخطيئة) وضرب لسرّ الزواج. يطالب بالإجهاض (يللي هوّي قتل). ويللي كل الدول بالخارج شرعتّه. لبنان لاء، ولازم يضلّ لاء، وهيدا اللي لازِم نِنتبهلو. والمثليين، يللي هيّي آخر إبداع للشرير بالعالم كلّو، ويا ويل يللي ما بدّو يِمشي فيه. هودي الأصوات اللي بدنا نخاف منُن، وعم نِسمَعُن من سياسيين ومن أشخاص. ونحنا كمسيحيين علينا نعتبرُن ضايعين. ويمكن يكونو عملاء. ويمكن يكونو مِنباعين.. بس علينا نقول ضايعين، وهودي الخطر الأكبر..

• البعض بدّو يدخِّل لبنان تشريعات للخطيّة..
  ساعِتها لبنان ما بكون بمنأى.. ومتلو متِل كل الدول اللي شرّعت.. وأنا مسؤول عن كلامي هالدول بالمستقبل رَح تتعاقَب بقساوة من الله، عن يد البشر أو يد اله بالذات.
• واليوم يللي بيِحكي هيك مَرفوض..
  ويكون مرفوض من الأرض ولا يكون مرفوض من السما.. هيدي لغة الإنجيل، وسدوم وعَمورة لمّا زادِتها عاقبها ربنا، مش نزِل شي صدفة من السما.. وهيدا حدث تاريخي، وحتى علم الأثار ثبتتّه..
• ممنوع نقول في ضربات من الله.
  في كاهن قديس طلِع عَ راديو “ماريا” بإيطاليا، لما صار زلزال، قلُن: هيدا لأنّو البرلمان شرّع كذا وكذا.. قامو عليه وشَحَطوه للأسف مطارين من خلال أشخاص من الفاتيكان (الدائرة الإعلامية). وهوّي عَم يِحكي الحقيقة فقط.
• لا.. لا.. لا.. هيدي عوامل طبيعية.. أوقات بتبقى ما خَصها، بس أوقات خَصها.. عوامل طبيعية جعلت يسوع لمّا لفظ الروح يصير في زلزال يضرب الأرض كلها سوا.. (ساقبِت بلحظتها)…!!! أو كان في من وراها رسالة كبيرة..

• هالنَزلِة عَ الشارع من الروح القدس وامنا مريم، ولكن.. 
  في الها أسلوب وطريقة، والها توجيه والها مخاطر.. والها متربصين بدُن يديروها على ذوقُن وللاسف أكتر الأوقات وسائل الإعلام معُن.. 
• وسائل الإعلام بدها تفَرجي إشيا متل الزواج المدني، والمثليين متل إنفتاح وحرية.. ومنها إنفتاح ولا حرية، وهيّي ضدّ شريعة الله. وبلبنان ممنوع تِمرُق وما رَح تِمرُق. والعدرا ما رَح تسمَحلا تِمرُق. لأنو تكرِّس لبنان لقلبا الطاهر..

أخوتي الأحباء،

• كل يللي عَم قولو هوّي من تعاليم الكنيسة. وهوي تعاليم إنجيلية وكنسية. ومن نور الله عَم نوصَف الحرب بين الخير والشرّ.
• مش متِل ما بقولو، بَعدو الدين عن السياسة ما الو خصّ.. لاء الو خصّ.. ويللي بدّو يبيعِّدو عَم يبيعِّد الله عن البشر. شو هيّي السياسة.. ليه إبعاد شرائع الله عن حياة البشر.. إذا صار هالشي عَم بعِّد بركة الله عن حياة البشر.. وعَم يجيب اللعنة. لأنو موسى قال: إذا منِمشي بشرائع الله بتجي البركة، وإذا ما منِمشي يتنزَل اللعنة. ويسوع ثبّتها.. وقال: يللي مشيو بشرائع الله مباركين، ولَ هوديك قلُن يا ملاعين.. (نزلِة اللعنة).
• الله مش غبي..
  أخوتي يللي بكافي المنيح والعاطل نفس الشي.. بكون غبي.. هلق الشعب ثائر على الحكام لأنّو ما كانو مُنصفين.. ما حَكَمو بالعدل.. بدكُن الله يكون هيك.. كرمال نظرة رحمة وحتى عيش متِل ما بدّي… وكلنا بدنا نِطلَع عَالسما.. لاء يللي كان بدُن يعيشو متِل ما بدُن بالسما نِزلو عَ جهنم.
• ربنا قال: جهنم المعدّة لإبليس وجنوده.
  بقولو: شو عَرَّفنا بجهنم كيف هيّي..؟؟ بقدّي فيها إبليس وجنودو.. حابِب تعيش معُن..!!

أخوتي الأحباء

• في تحليل منّي..
  أنا بِذكُر بأوّل خطاب عِملو البابا يوحنا بولس الثاني لمّا إنتُخِب.. ذكَر بس بلدين: بولونيا ولبنان.. (هلق يمكن بِتقولو يمكن كان فيهُن حروب.. ممكن..) بس الروح القدس بِروح ابعد من هيك..
• الثورة اللي صارِت ببولونيا قيادتها الحكيمة إجِت من البابا يوحنا بولس الثاني اللي كان بالفاتيكان، ويللي كان عَم ينتبه حتى ما تروح بالغلط… حتى تروح بالحكمة.. ومن وراها سقطت الشيوعية بكل أوروبا..
• أحد الأساقفة يللي كتير بحبّو البابا يوحنا بولس الثاني، وهوّي بذاتو بعتو على الساحة الحمرا بروسيا لمّا كرّس العالم لقلب مريم لأنو ما كان قادِر يلفظ إسم روسيا لأجل الضغط السياسي وأكتر الأمني المفروض عليه.. وقِف بالساحة الحمراء في روسيا وبجريدة كان حاطِط فِعل التكريس، ولما كان البابا عَم يقول التكريس، كان موكل يقولو هونيك مع ذكر روسيا (بينو وبين نفسو).. ولمّا سقطت الشيوعية من بعد كَم سنة، وراح حَيط برلين.. (مش عَم نِحكي سياسة، بل وقائع) بيِجي هالمطران وبيِعبطو للبابا يوحنا بولس الثاني، وبقلّو: هلق فينا نتمنّى أيام أفضل للعالم.

• بيبتسم البابا يوحنا بولس الثاني، وبقلّو:
  لاء.. الشيوعية سقطت دون ضربة كفّ.. أما الإستهلاكية والمادية (العالم الماشي على الرفاهية والسلطة والمصاري واللذة…) هيدا ما رَح يوقَع من دون ضربِة كفّ… ومن دون نقطة دم.. هيدا قَبعو من البشرية بدّو يكون مُكلِف.. وقبل ما يِنقَبَع ما فينا نبني حضارة الإنجيل والمحبة.
• أنا شخصياً إذا بولونيا سقطّت أوّل شغلة، نشالله لبنان بدّو يسقّط ويوقف المدّ العالمي للشرائع ضدّ الله، وللمادية الإستهلاكية..
  
• هيدا الولد مِش قادِر ربيّه أنا.. شو عرَّفك مش قادِر تربّيه..؟؟
  شو عرّفك قادِر تربّي البقيّة.. إذا الله ما سمح نقطة دم توقَف براسك وتصير مشلول بالفرشِة.. إنت اللي شايِف بِحالك.. كل طفل بيِجي وبتِجي رزقتو معو.. (يللا منشرّع الإجهاض).. (يللا منشرّع المثليين).. وايه ما عندكم محبة إذا ما بتحبّو المثليين..؟؟ إنتو اللي ما عندكم محبة يللي عَم تشرّعولُن اوتستراد الى جهنم.. اللي عندو محبة بقلو: إنتبه يا إبني وصلّح نفسك.. عندك مرض روحي ومش مرض جسدي.. لأنو المرض الجسدي ما بياخود عَ جهنم.. صلّح حالك متل ما كتار تصَلّحو..

أخوتي الأحباء

• هالشي اللي مبلش بمئوية لبنان الكبير.. وبإعلان المكرّم للبطريك الحويك، يللي كان بأساس لبنان الكبير، وسيدة لبنان بحريصا. وكان بأساس ترتيلة “يا مريم سلطانة الحبال والبحار وملكة لبناننا العزيز“.. ويللي صلّى حتى ما يفقد قوتو بمحبتو للعدرا..
• أخوتي يللي عَم يصير مهم.. بس بدنا نعرِف كيف نِمشي.. وبدنا نِمشي بقيادة الكنيسة وتوجيهاتا.. غبطة البطريرك الراعي لمّا أعلن الصلاة الساعة 5:30 مسا للمسبحة الوردية.. هيدي بداية التوجيه الحقيقي. متل ما قداسة البابا ساعد بتوجيه الثورة حتى نجحت.. بلبنان بَدها حكمة المُنورّين يللي قاريين الأمور بحسب مشيئة الله. مش منطلقا تحزبّات سياسية أو غيرو..
• السياسيين بحاجة إنتو تنوروهُن.. وإذا مش منوّرين، ما علينا ندينُن، علينا نِتركُن.. علينا نِمشي مع العدرا مريم.. ومع التوجيه الصحيح..

الأخطار

• في تلات أخطار بهالثورة، يللي الروح القدس عَم يِعمِلها.. لأنّها مطالبة حق..
  (1) تِمريق البُعد عن الله، من خلال شرائع ومدنية بعيدة عن الله.
  (2) المسّ بدستور لبنان، اللي فيه يد إلهية.. وفي محبة وتعايش، وقوانين تحجُب كلّ ما يمسّ بالأخلاق والأديان. متل ما بدُن يِعملو بالثورات اللي صارِت برّا.. وضربت الأديان والأخلاق. أوعا حدا يدقّ بالدستور اللبناني..
  (3) بدّي إقرا للمسؤولين السياسيين شو بقول سفر الحكمة، “اسمعوا أيها الملوك وإفهموا، أصغوا ايها المتسلطّون على الجماهير، والمُفتخرين بجموع أممكم..” (حتى اللي مُفتخرين بيللي نِزلو عَ الشارع) لم تَحكموا بالصواب.. ولم تحفظوا الشريعة (مش عَم تحموه عن الأخلاق) ونحنا خيّاتنا (الراهبات) نِزلو عَ جل الديب، وصلّو مسبحة كاملة، وآلاف الأشخاص صلّوها.. ومن بعد المسبحة قالو كلمة حلوة عن الأخلاق. وطلِع شخص مسؤول قال: نحنا ثايرين للقمة العيش والفساد المالي، وبعدان بدنا نثور على الكابيراهات، اللي تحت إجرين العدرا سيدة لبنان. (هيدي الثورة الحقيقية) وهيدي اللي بِتجيب نتيجة.
• الفقر المالي والحروب هيّي عقابات بيِسمَح فيها الله، لمّا نبعد عن شريعتو.. يللي هيّي:
  – العدل
  – الأخلاق
  – ضدّ الخطيّة
  وبكمّل سفر الحكمة بقول: “ولم تسيروا بحسب مشيئة الله، فسيطلَع عليكم مطلعاً مُخيفاً وسريعاً”. بِ 5 أيام شافو الشعب، عَم يقلُن: “من اين لك هذا”..!! وفينا ناخِدها عَ مستوى الدول.. “فإليكم أيها الملوك أوجّه كلامي لكي تتعلمّوا الحكمة، فمبدؤها الأول الرغبة الصادقة في التأديب، والإهتمام التأديب هو المحبة” (إذاً الله بأدّب وبقاصِص) والمحبة هي بحفظ الشرائع.. ومار بولس بيِحكي عَن خطية ضدّ القربان، بقول: لهذا السبب كثُرَت الأمراض.. وبِنهي بسفر الحكمة اللي بقول: “إن كثرة الحكماء هي خلاص للعالم، والملك أو الرئيس الفطِن هو خلاص شعبه“… إنتبهو لمين عَم تزقفوا..؟؟
•  من هلق مش بس بدنا نحاسب من أين لك هذا..!!
  بس بدّك تِنتِخب بدك تشوف شو مبادئو.. شو ورقة عملو، وشو برنامجو..!! إذا فيها شرائع ضدّ الله، لا بزَقِفلَك ولا بعرِفَك.. والاّ إنتو أيضاً مُخطئين، والتوبة مش بس بتبلّش بالصريخ عَ السياسيين، بل على ذاتي، لأنّو أنا كمان وافقت، وكمان مرَقِت بالبرطيل، وبالرشوة.. كلّو بدّو تصليح والأهّم منو الأمور الأخلاقية..

التكريس لقلب مريم الطاهر

• من عظة التكريس للبطريرك الراعي: (16 حزيران 2013)
  لا أحد منا يشكّ، في أنّ مريم سيدة لبنان هي التي كانت تنتشله بيدها الخفية في كل مرّة أشرف على الغرق والتلاشي، لا سيما في الحرب الأخيرة (975-1991). وفينا يقين لا يتزعزع أنّ مريم وحدها تستطيع بقدرة الله، وبقدرة إستحقاقاتها لديه، أن تُنقذ لبنان من أمواج الأزمات السياسية، والإقتصادية، والأمنية، والإجتماعية. فتكريس لبنان لقلب مريم الطاهر هو التزام منّا جميعاً لمحاربة الفساد الأخلاقي (في داخل إنسان) والظاهر بوسائل الإعلام، وتقنياته الحديثة والمُتفشّي في الإداء السياسي والإدارات، وعدم الحياء..
  إنّ 16 من حزيران هو يوم تاريخي حاسم بدات فيه مسيرة خلاص لبنان، بقيادة امّه مريم..
• هالمَسيرة ماشية هلق.. بس بدنا نِنتبه تضلّ ماشية بقيادة امنا مريم.. وبالصلا، مش تروح تتسيَّس..
• متِل ما 100 سنة على إعلان لبنان الكبير. 7 سنين عَ تكريس لبنان لقلب مريم منّو صدفة (ورقم 7 رقم الكمال) وسنة الجايي 16 حزيران 2010، هيّي الذكرى السابعة لتكريس لبنان، ونشالله وأكيد ولازم تكون مميزّة..

البابا بيوس 12

•  شو قال البابا بيوس 12 عن لبنان ومريم: “ألا ترون أن الكنيسة نفسها تذكر قمم لبنان أرضاً مختارة لمدح البتول. هناك رآها الروح، وقال لها: “تعالي معي من لبنان، ايتها العروس فتتكللي..”.
  ويقول: إنّ هذه الميزة النادرة التي تقرُن اسم وطنكم لبنان بالتعبّد للعذراء مريم تضطرّكم جميعاً الى أن تُضاعفوا الآمال في تلبية نداء هذه الأم“.
• هيدي الأم (العدرا) هيّي الوحيدي اللي حاطّا إجرا فوق راس الحيّة.. والحيّة هيّي اللي عَم تشرّع بالعالم كلّو، يللي وراها الشيطان، الشرائع ضدّ الله.
• بلبنان اللي مكرّس للعدرا بدّو يِندَعس راس الحيّة.. وما رَح تِمرُق كل هالأمور.

شو لازم نعمل..؟؟؟

•   يقول البابا بيوس 12 للبنانيين: “فإبقوا متحدين في إيمانكم في مريم. ولتَجمَعكم هذه الأم أخوة تحت كنف حمايتها، وسيروا في نشاط في الطريق التي تسلكونها اليوم”. وهالشي قيل بسنة (1954) لمّأ نعمَل إحتفالات كبيري لأمنا مريم وبَرَمِت أم النور على 444 ضيعة. وختموا ببيروت بِ 3 أيام صلوات شارك فيُن 300 ألف شخص.

• البابا فرنسيس برسالتو للبنان، لمّا تكرّس: إنّ سيدة لبنان هي الضامنة الأمينة للأمّة بأسرها. والمُكرّمة من  كل أولادها (مسيحيين وإسلام) والمسلمين بكتابُن بقرآنهم “مريم هيّي أقدس إمرأة”. وعَن نشوفُن بسيدة لبنان أكتر من المسيحيين..

أخوتي الأحباء، الروح البشرية تفهم مين بِساعِدها..

• مريم سيدة جميع الشعوب، ام البشرية كلها سوا..
  والبطريرك الحويك، بقول بصلاتو يللي صارِت ترتيلة “يا سلطانة الجبال والبحار”.. ولو هالكلام ما دَخَل بالترتيلة… “بصلّي إنّو لبنان ما يِفقُد يوماً منبع جمالو ومصدر قوتو وحبو وثقتو بمريم“.

أخوتي الأحباء

•   نعم في خطر بس رجانا بمريم.. بهالمعنى ظهورات مريم فيها رجاء.. لمّا نحنا منِسمَع من مريم.. العدرا عَم توعيّك في خطر أبدي، وخطر زمني..
• لبنان اليوم متِل عرس قانا الجليل.. فقد الخمر.. شفاعة العدرا مريم وجهد الخدّام اللي عبّوا ماي، هنّي حقّقوا إنو إبن الله يِعمِل الأعجوبة.
• نحنا اليوم بحاجة لأعجوبة.. السما بدّا وقادرة تِعمِلا.. والعدرا هي شفيعتها وقائدتها.. ولكن علينا نِعمُل دورنا كخدم..

شو هوّي دورنا..؟؟؟

• التوبة.. الصلا.. الوردية كل يوم.. السجود أمام القربان.. القداس الإلهي..
• وبالمعركة الكبيري لتدخّل السما، كعلامة بسيدة لبنان من كَم اسبوع بدأ سجود متواصل، ليل نهار عَ مدار السنة.. هيدي العدرا عَم تقلنا شو اسلحتنا..
• الإعتراف كشعب لبناني، وخاصة عَم نِحكي للمسيحيين.. بس نِمحي خطايانا بركة الله بتِنزَل وبِتساعِدنا.. بنينوى قلُن: توبوا والاّ 3 ايام بدها تنقلِب كلها سوا.. تابوا بالمَسح والرماد، وبالصوم.. اليوم في إعتراف ركضوا عَ كراسي الإعتراف..
• الصوم ليه حاطينو عَ جنب..!!
  الصوم هوّي اللي خلّص الشعب والكنيسة عدة مرات، وبالتاريخ.. الصوم وصية من وصايا الكنيسة السبعة، ويللي ما بيِعملا بأوقاتا بِكون عَم يخطي..

صلّوا عَ نية المسؤولين الروحيين والزمنيين يدخلو ويقودوا كل شيء للخير.. الأمور صعبة، ولكن إذا صليّنا وسجدنا منيح وتبنا منيح.. النصر رح يكون للسما بقيادة أمنا مريم، وبأقلّ ثمن ممكن.

العملية الجراحية بتوجِّع.. بس بأقل ثمن ممكن… أمّا إذا بدنا نصرّخ ونعيّط بس، وما نعرِف نصلّي وننتبه للافكار الشيطانية يللي بَدها تدخُل وما نعرِف نسكّتها.. ونمنعها، ونسكّر اللي عَم يجيبوها.. إذا ما صار هيك الثمن بِكون باهظ..

إيماني إنّو العدرا رح تنتصر بلبنان، بس في فرق ما يكون الثمن خفيف، أو الثمن باهظ جداً.. في فرق ما يكون الجيش اللبناني يدخُل بمعركة (عَم إحكي بالإجمال) وينتصر مع 100 قتيل، وفي فرق ما ينتصر الجيش اللبناني ويموت نصو..

الفرق هوي بصلاتكم، وبتوبتكم.. وبحكمتكم، ووعيكم.. وبصلاتكم للمسؤولين، وبصومكم، وبسجودكم.. والله يبارككم..♰

العظة الكاملة

https://youtu.be/3FYk1ttvvck