Agoraleaks Agoraleaks
– مرشحة بقوة عن قضاء المتن والقرار النهائي للتيار
– اتفقنا مع القوات ومع المستقبل من السهل الاتفاق مع فرنجية.. والإبن بيجي لعند بيو..
– الثنائية الشيعية عم تقوا ما حدا عم يعتبرا موجهّة ضدّو
1
2
مقتطفات من حديث الناشطة السياسية في التيار الوطني الحرّ رندة عبود، والمرشحة المحتملة عن المقعد الماروني في قضاء المتن، ضمن برنامج “يوم جديد”:
- الأحقية لا تصحّ بين العماد عون واي مرشّح، العماد عون تخلّى عن الرئاسة تاريخياً عدة مرات، بمرحلة اتفاق الطائف تخلّى عن الرئاسة، وعندما عٌرض عليه ان يكون رئيساً للجمهورية شرط ان يوافق عليه، اجابهم: بكون رئيس وانما الجمهورية لمين؟
- عام 2006 عُرض على الرئيس عون منصب الرئاسة شرط التخلّي عن المقاومة وحزب الله، وكمان كان عندو رفض تام ونهائي..
- وصول العماد عون احقية، ولكن خارج هذا الإطار كلّه، يمكن معالجة كافة القضايا.. العلاقة بين فخامة الرئيس ومعالي الوزير فرنجية، الفريقان من نفس المنطلق بيتحدثو، من منطلق الأبوة ومنطلقة البنوة.
- اذا كان علاقة ابوة ورسختها أكثر، الرسالة اللي وجها فخامة الرئيس مؤخراً، ويللي دعي فيها الكلّ للتلقف، ونحنا ما صعب علينا التفاهم مع القوات اللبنانية ولا مع تيار المستقبل، رح يصعب علينا التفاهم مع الوزير فرنجية، يللي هوي حليف واستراتيجياً بنفس الخط
- فينا نأكّد انو الوزير فرنجية من موقعو، ومن عيلتو، ومن ثوابتو وولاد زغرتا يللي بيعرفو بالتقاليد وبالنخوة والمروّة، بيعرفو انو انا بس بدي صالح بيّي، مش بيي بيجي لعندي، انا بروح لعندو.. انا بجي لعند بييي، وطبعاً يللي بيجي لعند بيو بيطلعلو حصة كبيري، بيندبحلو العجل المسمّن.. وكيف إذا هوي ابن الحق وابن بيت سياسي عريق، وبيعرف كيف لازم يتصرف، وهيدا الموضوع قريباً بينحلّ
- واقعياً ما فينا ننكر انو القوات اللبنانية عندا حيثيتا ووجودا وتمثيلا المسيحي على الأرض
- لما صار في التفاهم بين التيار والقوات تعزز هالشي اكتر، اليوم الصدام الطويل السياسي بينن، طال كتير وكان سلباً على المسيحيين. والمسيحيين حالياً عم يتلقفو بشكل كتير إيجابي ومش بس بلبنان بالشرق الأوسط
- لبنان الدولة الوحيدي مسيحياً يللي عندا تمثيل سياسي مسيحي، وهالتمثيل السياسي مش مفروض يكون فيه تشرذم او نزاع، وبالعكس لازم نقوي
- بالمقابل اية ثنائية ما لازم الطرف الآخر دايماً ياخدا بسلبية او بخوف.. في عنا ثنائية شيعية موجودي ومن سنوات عديدية، وبعضا موجودي وعم تقوا. ليش ما منعتبرا ضدّ حدا عَ حدا؟
- نحنا نظام مفروض نقبل بالديمقراطية التوافقية، نحنا كلنا سوا نرجع نقعد على الطاولة ونقبل بعضنا، ولازم نترك كل مشاريعنا اللي منعتبر مشاريع بتهمّ الوطن، ونجي مباشرة نتحاور لنفيد الوطن
- المعيار اللي لازم كلنا نتفق عليه، معيار الشراكة الوطنية، ومعيار التمثيل.. ما حدا ياخود من حصة حدا.. انما نكون ممثلين بشكل قيّم. والحصة هلق المسيحية يتركو المسيحيي هني يقرروها. اذا التيار الوطني الحر بدو يعطي من حصتو فليكنْ.. ليش هالإنتقاد طالما هالحصة لالن.. فما حدا يمدّ ايدو عليه
- العهد بلش بقول فخامة الرئيس، بتضافر وتكاتف جميع اللبنانيين، ليش عم نبلش نضهر منّا، وبعد ما النا شهر وكم يوم؟
ورداً على سؤال الإعلامي رواد ضاهر بخصوص حصة الحزب السوري القومي الاجتماعي ووضعها ضمن الحصة المسيحية الأرثوذكسية، قالت رندة عبود:
- ليه بدها تكون عقدة عند المسيحيين، طالما الحزب القومي هوي حزب علماني.. ولا مرة قال عن نفسو حزب مسيحي.
- الناس ما بهما مين قاعد بالوزارة او اية طائفة، بهمن الأمور الحياتية، الكهربا والماي، والتلفون والزبالة. الناس تعبانين
- الرئيس بري حسما أيا تكون الظروف ما في أي خلاف هوي وفخامة الرئيس.. والرئيس بري بس بدو يخاصم بقول انا بخاصم بشرف وبعادي بشرف..
- اليوم نحنا قادمين على انتخابات، وهالوزارات بلبنان تُستعمل لغايات، وكل واحد بدّو يشدّ صوبو شوي.
- الهزّة السياسية اللي صارت حالياً، لا بدّ انو تهدى وتاخود الطبقات الأرضية مطرحا ومواقعا اللازمة
- بنتيجة تفاوضات منوصل الى حكومة وحدة وطنية وبتمثل الجميع وبترضي كافة الأطراف، خلينا ناخود الوقت اللازم للوصول الى الطريق الصحيح
- كنت بزيارة للرئيس عون قبل شي 10 أيام من انتخابو، ونحنا كمواطنين كان عنا هالخوف من يللي بدو يصير.. متل جو الشارع والصحفيين، سألتو شو رح يصير، بقلي: بعد 10 أيام رح ترجعي تأكدي انو انا الصمود وحزب الله هوي الوفاء
- هيدا امر واقع، وصار وبعدو عم يصير. حزب الله هوي الوفاء ليس فقط للمقاومة هوي وفاء بكل سياستو ووفاء لرئيس الجمهورية ووفاء لي قرار سياسي داخلي، ومنا متل ما عم يجربو يصوروها
- اليوم كل الجو إيجابي.. وما حدا يتهم حزب الله بأمور منا موجودي، لأنو الواقع الصحيح هوي الوفاء لفخامة الرئيس واكيد صمود فخامة الرئيس هوي مش صمود للوصول الى منصب، هوي صمود بمواقفو تجاه كل الكتل، وصمود لحماية المقاومة
ورداً على سؤال التعويل على المرأة بخوض غمار العمل السياسي، قالت:
- المرأة لازم تدخل الحياة السياسية، وبمقال صغير أشرت انو المرأة هيي الأم وهي الزوجة والمعلمة، رح تكون اكيد بالحياة السياسية الأكثر عدالة من الرجل والأكثر رحمة
- بينلنا الرجال بلبنان المشهد السياسي كلّو واضح.. طيب عطوها الفرصة للمرأة
- ما بدنا ياه إرث سياسي نسائي.. ميشان هيك لازم الأحزاب هيي تحفّز. وهيي يللي تدعم وهيي اللي توصّل. لأنو الحياة السياسية بتكون فعلاً ترسخّت وساعتا الحزب بكون المدرسة يللي بدها توصل السياسي للعمل العام ان كان للرجل او المرأة
وعما إذا كانت مرشحّة الى المقعد النيابي، قالت:
- مرشحّة بقوة عن دائرة المتن، بس طبعاً انا تيار وطني حرّ. واذا كنت على لوايح التيار كان به. واذا لاق، بكون قرار الحزب هوي يللي منمشي فيه.
