بالفيديو – الأخ عمانوئيل: كنيسة القديسة فيرونيكا بالقصيبة منبر إعتراف.. وبصليبنا ننمو روحياً..

– القديسة فيرونيكا جولياني نقّت لبنان، وعَم تِنعِرف أكتر شي من هون..

***

مقتطف من حديث الشماس الأخ عمانوئيل لقلب مريم الطاهر – أبرشية صور المارونية – لقناة “نورسات” ضمن برنامج: (11 تموز 2019)

(1) الصلاة
– هي صِلتنا مع الله، وبقدر ما نتقن الصلا نتقن العلاقة مع الله..
– ربنا بِحكينا بالصلا، بس نحنا بدنا شوي شوي نتعوّد نسمع.. وبقلنا شو لازم ننضّف ونزبّط حتى نصير مسيحيي متل ما هوي بيتمنّى..
– الصلاة مدرسة.. بدنا نصلّي بقلب نقي وطاهر، وبدنا نخفّف الأصوات التانية
– صوت الله بينسمَع بالهدوء.. أوقات الضجيج العالمي، وضجيج الأهواء والرغبات اللي عندي (موسيقى – حكي – واتس آب) بخفّف إمكانية سماع الرب..

(2) الصليب ✝
– ربنا هوي الصدق بذاتو لأنّو هوي الحقيقة
– ربنا فهَمنا إنو على الأرض في صليب ♰ وفي ألم ، وفي صعوبات.. نحنا بعد ما صرنا بالفردوس.. صلاتنا هيي ميشان نِحمِل صليبنا منيح.. ودعانا حتى نِحملو كل يوم، ميشان شوي، شوي.. يصير الصليب شقفِة من الفرح.. والاّ كيف فرحنا بدّو يستديم إذا الصليب بّو يضلّ عدو.. هيدا الشي بدّو نمو روحي، وشوي شوي بيوصلها.. وكلمة الله هيي اللي بتفَهِمنا هالشي..

(3) س: كيف تعرفّت عَ القديسة فيرونيكا جولياني❓

https://youtu.be/ib-eJ1yglQU

– أنا كنت بالرهبنة الكبوشية، وأثناء خدمتي، أُرسلت الى دير الزور بصحراء سورية، وهونيك طِلِعلي كتاب بالفرنسي “La passion renouvelée” سيرة القديسة فيرونيكا جولياني.. فذهلت بما قرأت بالمقدمة..
* العدرا عَم تسميها “يا إبنتي المفضلّة، قلب قلبي..”.
* يسوع بقلها “إنتظرت ولادتك منذ الأبد”..
* أحد البابوات بقول: إنها أكثر نفس مزينّة بالنِعم الفائقة الطبيعة بعد والدة الله..

بلشت فوراً إقراها وترجم سيرة حياتها.. وربي جعلني إلتقي بشخص (هوي أول شخص) بلشنا المسيرة سوا، وإسمو الأخ جلمود.. وطلِع آخد منا نِعمة بنهار 9 تموز شفاء روحي كبير غيَّرلو كل حياتو.. ولما عرِف بسيرة القديسة فيرونيكا جولياني، سافرنا سوا على إيطاليا وانطلقت المسيرة مع القديسة فيرونكيا..

– الكاردينال اللي قدمّها تصير اليوم معلمّة بالكنيسة، يقول: ربنا تركها لهالزمن حتى:
* تثبّت الإيمان الحقيقي
* تنصر المحبة، بزمن الإيمان مضَعضَع والمحبة شبه مفقودة..

(4) عن حياة القديسة فيرونيكا جولياني

– ولدت سنة 1660، وتوفيت بسنة 1726، وسنة 1839 على يد البابا غريغوريوس 16 أعلنت قديسة.. واليوم قُدّمت تكون خامس معلمّة في الكنيسة ⛪

– الرب يسوع قلها إنو كتاباتك وسيرة حياتك ستنتشر في العالم كلّه، لتثبيت الإيمان ونصر المحبة، وبإحدى إختباراتا الصوفية (آخر 12 سنة، كل يوم كانت تُخطف الى السماء بعد المناولة – و7 مرات نزلت عَ جهنم) شافِت بقلب يسوع نفوس كتيري تفاجأت.. سألت الرب يسوع عنها… قلها: إنها النفوس التي ستعتني فيما بعد بتعريف العالم عن سيرة حياتك، وما صنعته بك ومن خلالك.. هذه النفوس سيكون مقامها في السماء قلبي القدوس..

♰ نحنا بس صار هالتدخّل بحياتنا، وشعرنا بالرسالة عمِلنا مشروعين كبار:
* فيلم سينما عن سيرة حياة القديسة فيرونيكا جولياني، ونزِل بلبنان وبأوّل إسبوع كان عدد مشاهديه فاق كل الأفلام الأخرى
* بناء أوّل كنيسة بالعالم للقديسة فيرونيكا جولياني خارج إيطاليا وبلبنان.. وهالشي صار بتدخّل إلهي مع الشابة “ماريا ناكوزي” اللي قبل وفاتها بليلة، شافِت العدرا مريم عم تدلّها عَ شقفة أرض لجدها بالقصيبة، وعَم تقلها عَ هالأرض بدي تتعمّر كنيسة للقديسة فيرونيكا جولياني، ونحنا بهالوقت كنّا عَم نِعمل تساعية حتى نشوف وين بدنا نعمّر الكنيسة.. وقالتلا العدرا أمر ملفت جداً: “صرلنا 300 سنة ناطرين هالكنيسة” ⛪

– القديسة فيرونيكا نقّت لبنان، وعَم تِنعِرف أكتر شي من هون..

(5) معلومات عن القديسة
– جثمان القديسة فيرونيكا جولياني بعدو كما هو.. نشال منّو بعض نسرات عضم، ووزعت لمن يريد بناء كنيسة كما في حال كنيسة القصيبة.. لذلك كان عنا نعمة كبيري يكون عنّا خصلة من شعرا وشقفة من عضاما كذخيرة ثابتة بالمزار.. بس يِجو الناس بيتبرّكو منها.. وعنا شقفة تانية من عضاما نبرمها على المرضى..

– القديسة فيرونيكا جولياني راحت على الجوهر.. مار بطرس برسالتو يقول: انو هدف كل إيماننا خلاص النفوس.. القديسة فيرونيكا بدعوة من ربنا راحت مباشرة لخلاص النفوس..

– بادري بيو المتعبّد الها كتير، ويللي حمِل جروحات المسيح مِتلا، كان يسميّها شفيعتي الخاصة.. ومعلمتي في القداسة.. بقول: أكتر فعل محبة من إنسان مسيحي، مش مساعدة المريض بالجسد، ولا الفقير بالمال، مساعدة الخاطي عَ خلاص نَفسو.. ونحنا منشوف بأعمال الرسل تلاميذ المسيح، لما شافو حالن رح يلتهو كتير بموضوع الفقرا عِملو شمامسة حتى يضلو مركزين عَ الصلا والرسالة (التبشير)..

– القديسة فيرونيكا رسالتها خلاص النفوس.. ونحنا عم نشهد تدفق ناس غير مُنتظر للقصيبة (هالضيعة الصغيري) من يوم تدشين الكنيسة…
– يوم تدشين كنيسة القديسة بالقصيبة، كان في 11 ألف مؤمن، والقوى الأمنية قالت، إذا بنا نعدّ اللي راحو قبل وبعد بزيد كتير العدد.. واليوم كنيسة القديسة فيرونيكا منبر إعتراف.. ناس الها 30 سنة بترجع تعترف.. ♰

 

https://youtu.be/ib-eJ1yglQU