– بقدراتنا الذاتية والسياسة عاجزين تخليص بلدنا.. بالروح القدس وتكريس لبنان لقلب العدرا فادرين..

* ♰ *

مقتطف من عظة الراهب المريمي الأب مروان خوري، – تساعية صلاة من أجل السلام في لبنان، في كنيسة مار الياس أنطلياس: (18 حزيران 2019)

آبائي الأفاضل وأخوتي الأحبا، مع أصدقاء مريم ملكة السلام، يللي دأبت منذ بداية ظهوراتا، بمبادرتها الأولى لفتح رحلات الحج حتى تخلّي شعبنا ومجتمعنا يِختِبِر شو يعني حضور العذرا وظهوراتها بمنطقة مديوغوريه…

عَ الأكيد العدرا، من خلالُن ورحلات الحَج بدها تتلمذنا على يدها، وتجعلنا بالموقع اللي اختارنا فيه الرب. وكل إنسان رسول الها. وعَ الأكيد صار فئة كبيرة من شعبنا (اكليروس – وعلمانيين) اختبر رحلات الحج لهونيك. وإختبر نداءات العدرا، باختبارات خاصة.

العدرا اشتغلت بناحية من حياتنا.. والكل إكشتف همّ هالإم؟؟ وشو بدا تحملّنا..؟؟

منها جايي تِعمِل إنجيل جديد، أو تخبرنا شي ما خبرو يسوع. الحقيقة أعلنت كاملة، ولا تُقال من بعد اللي قالو يسوع في الإنجيل وبتجسدّه…

إنما العدرا هيّي الأم اللي اختبرناها بعرس قانا الجليل، وهيّي الأم اللي ما بِتنام، وبتسهر وبتراقب، وقلبا بينبض بحب لأبنائها.. اليوم العدرا هيي سِهرانة.. ولحظة بتشوف الحب بقلبنا خَفَتْ ناحية يسوع، بتلاقُوها بما أُعطيت من نِعَم وهمّة بتتدخّل وما بتهزأ إنو تشتغل لتجديد الإيمان بقلوبنا.

هيدا سر حضورها هونيك.. يمكن البعض بيسأل شو سرّ العدرا صرلا 39 سنة عَم تظهر..؟؟ مجتمعنا صار مجتمع صعب، قلبنا صار قاسي.. مش بالهيّن يقبل وينفتح.. 39 سنة مع كلشي عِملِتو العدرا وبعدا الظلمة منتشرة على الأرض بأماكن كتير واسعة.

بعدو نور يسوع، ما وِصل لكل الأرض. ولكل القلوب. والمَلامة بتُوقَع علينا أحبائي. العدرا هيدا اللي طالبتو، أن نكون شهود. والشهادة ما بتكون من خلال قدرتنا الذاتية. الشهادة لأنو نحنا حاملين اله بدنا نوَصلو.. وحاملين كلمة إلهية منها بمستوانا البشري.

من هيك نحنا بحاجة لنعمة خارقة، حتى نكون شهود ونوصِّل الرسالة.. هيدي النعمة يللي عَم نعيشا بهالزمن. زمن العَنصرَة.. الرب بيَعرِف محدوديتنا وضعفنا، وجروحاتنا، وسرعة سقوطنا.. ميشان هيك قلُن للرسل : إنتظروا الروح، لا تبرحوا أورشليم قبل أن يأتيكم البرقليط”.

شو هيّي أورشليم؟؟

أورشليم هيي المدينة المقدسة، وبالنسبة ليسوع بعد موتو عَ الصليب وقيامتو، بطلّت مكان جغرافي.. الهيكل يللي بدّو الله يسكنو وينطلق صار حياة الإنسان، وقلبك..

قبل ما تنطلق للشهادة، عَم يطلب منك الرب أنت أن تقبل الروح القدس.. حتى يعمل فينا التغيير.. وساعتها شو ما عملِت وكيف ما تصرفِّت.. حتى بأبسط زياراتك بتصير نِعمِة الله من خلالك تِقطَع..

وهيدا اليوم اللي نحنا بحاجة الو أحبائي.. منها بحاجة كتير لناس تكتّر حكي.. ولا ناس تعلّم كتير.. هيدي كلمة يسوع مطلوب نعيشا.. وحتى نِقدِر نعيش من أصعب الأمور أن نسمح لروح الرب أن يُحدث التغيير بداخلنا..

شو مهمة الروح بعالمنا اليوم؟؟

أهمّ شغلة هيي إعادة السلطان للإنسان.. يعني بدك تِفهَم بمطرح إنت فاقد السلطة.. لكن مُمكن نِنفَهَم غلط.. اليوم عالمنا مُتهافت الى السلطة، وعَم ينَبِّش انو يتسلّط من خلال:

• السياسة،
• المركز،
• الموقع،
• التملّك،
• المال..

حتى يسود ويتحكّم بالإنسان.. بس هيدي السلطة الغلط.. لأنها سلطة إبليس.. وهيي مَبنيّة عَ ملكوت الأرض.. الروح القدس أوّل سلطة بردّا هيي السيادة عَ نفسك… أن تكون سيّد نفسك، وأن تضبط كل الأمور تحت الطاعة ليسوع.

هيدا عمل الروح فينا، وهالشي بدّو تخلّي كبير، وجهد كبير.. ومن خلال هالحقيقة السلام بيِجي.. ونحنا إختبرنا هالحقيقة، وأكتر أمكنة منِنجَرَح فيها بس نكون مُستعبدين بين إيدَين الناس.. من خلال كلماتُن المِئذية، واستعمالُن السلطة لقهرنا.. ومن خلال الظلم..

كلنا عشنا هالجروحات، وما زلنا عَم نعيشا.. ببيوتنا ومجتمعنا ووطننا.. وما في غير روح الرب هوّي قادر يقوّم الإعوجاج.. عملنا بالأساس أن نكون أسياد عَ أنفسنا.. وقيمة القديس يوم اللي تسلّط على أهوائو..

وبس تحولو المعركة من برّا لجوّا.. منشهد قديه بتصير المعركة صعبة.. ما في أهون من نشبّق ببعضنا.. وننتقد بعضنا، ونجرّح ببعضنا.. بس أهم معركة بتِعملها مش إنك تكتشف عيب الغير.. مش تكتشف نقص الآخر..

أهمّ معركة بتِعملا يوم اللي بتوجّه المعركة نحو داخلك، وبتصير تضبط لسانك.. وأهواءك.. وتخضّع الميول اللي بقلبك الى سلطان الرب وكلمة يسوع..

جرّب فوتو على المعركة، وشوفو قديه بنهار واحد قديه بتسقط.. وقديه بتفشل.. ميشان هيك نحنا بأمس الحاجة لروح الرب، أن يُعطينا السلطان.. ويوم بتِقدِر تخضّع الكبريا الموجود فيك، والأهواء اللي بِجِرِّك الى أماكن بتخرُب حَياتك وحياة اللي عايش معو… إنّو تخضّع كل الرذيلة تمَلَكّت عَ قلبك وتتخلّى عنا، هيدي عملية الروح القدس. وهيدا السلطان يللي الرب بدّو يردلنا ياه.

ليه اليوم ببلدنا عايشين بالقهر؟؟

ليه عايشين بالعَتمة وبالظلمة، والظلم..!!! لأنو مَحكومين من أشخاص ما عندُن سيادة عَ نفوسُن.. بتسمع من نشرات الأخبار أو الخطابات قديه منقدّح ببعضنا.. وقديه خطاباتُن بتِحمل من الكراهية.. وبيِفتِكر هيك بكون الإصلاح.. هيدي اللغة يللي بدّو يغيّرها الروح القدس..

الرب بيِدعي تملك محبة يبسوع عَ قلوبنا.. ومحبة الله ما تفتكروها بالأمر الهيّن.. محبة الله فيها معركة حتى تحصل عليها.. بدنا نصلّي من قلبنا، ونستعين بقدرة الروح القدس.. ونحنا منصلّي :

أرسل روحك أيها القدوس ليتجدد وجه الأرض

روح الرب هوي اللي بجدِّد مجتمعاتنا… وإنساننا.. وهوي اللي بيَعطينا أشخاص صالحين يحكمونا بعدل… وبيِطفي لغة الحرب.. وبخلّينا نتخلّى عن كبريائنا، وعنادنا ويَباسنا.. هيدا الروح بدنا نصلّيلو أحبائي..

نحنا مع رحلات مديوغوريه، إجا وقت الشغل. بدنا نشمّر عن إيدَينا لنحطّا بإيد العدرا، وبالإتكال على إبنا يسوع نطلب الروح القدس حتى من خلالو نشتغل…

يللي عَم يِعِملو أصدقاء مريم ملكة السلام (تساعية السلام) هيي خلاصنا بلبنان ولبلدنا.. لا السياسة ولا المصالح ولا المال ولا الدول بتِقدِر تِعملنا شي.. السلام بدّو يجي من عند يسوع، ومن الله، والرب ما بيِعطي الاّ من خلال حريتنا اللي بتناديه وبتطلبو.. ميشان هيك كل ليلة بتكونو بهالتساعية وبتصلّو من مواقعكم أكيد عَم تساهمو بحريتكم وتفتحو مجال للرب أن يأتي بسلامو الى الأرض بقوة روحو حتى يغيّر ما هو معوّج بحياة الإنسان، ويخلق مجتمعات صالحة تكون ضمانة لمستقبل ولادنا.

مع أصدقاء مريم ملكة السلام، وأنغام كورال ” Viva Maria “.. ومع كل اللي تعبو لهَالتساعية.. من قلبنا بدنا نصلّي المسبحة ونشارك بالقداديس وننادي العدرا.. هيي اللي كانت حاضرة مع الرسل بالعليّة، وصلّت من أجل مجيء الروح القدس..

روح الرب لا يرتجل قدومه الينا.. روح الرب يأتي من خلال قلب عَم يناديه.. بدنا نصلّي حتى يأتي روح الرب حتى يخلّي هالبلد منارة يشعّ بقديسينو، وبكنيستو وبإيمان شعبو أمام شعوب الأرض يللي تخلّت عن محبة الله، وكفرِت بالإيمان..

بدنا نصلّي وشوفو إنو مع العدرا ما خسرنا الرهان.. بلدنا عايش بعجيبة، وعجيبتو إنتو عَم تعملوها بصلاتكم.. وبتدخل العدرا من خلال تكريسنا هالبلد لقلبا الطاهر..

نحط هالثقة، ونعرَف إنو مع العدرا قادرين نعمَِل مستقبل زاهر.. ومع العدرا والإتكال عَ إبنا يسوع ونعمتو قادرين نغيّر كلشي غلط مش عم نقدرلو بسواعِدنا وسلطاتنا وسياساتنا..

مع الرب سنخلق مستقبل زاهر ينعَم فيه شبابنا.. وبكون مضمون وحلو ومريح ومطمئن..

نصلّي لمريم بهالذبيحة، اللية وكل ليلة بالتساعية.. ويوم الثلثاء المقبل يوم الختام نِجي حتى نكرّس بلدنا لقلب يسوع ومريم، ونطلب منُن السلام اللي نحنا بأمس الحاجة الو…

♰ آمين ♰