باسيل للرئيس عون: أعطيتني الأمانة وسأثبّت لك أني أمين وسأزيد وزنات التيار (Video)

– لن نسمح بتسرّب فيروس الفساد الى جسم التيّار، إعرفوا انّي لا اعمل غير مصلحة التيّار
– بالنسبة للتيار مصلحة البلد قبل اي شيء اخر
– لأول مرة أقول: لا يجب ان اكون وزيراً من اجل مصلحتي، مرغماً من اجل التيار والرئيس والبلد و”انشالله بأوّل فرصة بقدر اطلع كرمال حالي ومصلحتي وموقعي…

***

مقتطف من حديث رئيس التيار الوطني الحرّ جبران باسيل في المؤتمر الوطني الرابع للتيار: (17 آذار 2019)

1 – انا والتيار
– شعور كبير بالفخر اني أعيّد معكم اليوبيل اللؤلؤي لالنا.
– 30 سنة على نشوء حركة النضال العوني بـ 14 آذار 89.
– 30 سنة على قائد علّم شعبه العظيم 3 كلمات: حريّة سيادة استقلال.
– 30 سنة هو عمر تيّارنا السياسي – هيدا عمري انا بالسياسة، فخور انا فيهم وفخور بعمرنا التنظيمي يلّلي هو 3 سنين.
– 30 سنة بالسياسة و3 سنين بالتنظيم بيخلّوني افتخر بكل شي عملناه سوا، وافتخر برفقتكم، واعدكم انو ولا يوم رح خلّيكم ما تفتخروا برفقتي او تستحوا بأي شي عملته او عمله التيّار.
– انا فخور كتير فيكم وبصداقتكم، يمكن طبعي والضغط عليّ ما بيسمحوا اني عبّر عن هالشي لكل واحد منكم، يمكن بنكعكم اوقات، بس هيدا الشي لأن بدّي انّنا نشتغل اكتر لنفختر اكتر.
انا فخور بكل واحد منكم، من هيفا حبيبة قلبي بالمركزية، لرومل ونقولا نوّابي.
وانا كل يوم بسأل حالي كيف لازم اعمل للتيّار اكتر لحتّى هوّ يفتخر فيي اكتر، وبعيش كل يوم ازمة داخلية بين كيف بدّي اعطي اكتر للتيّار، او للرئيس او للبلد، وبرجع برتاح لمّا بنتبه انّو انا مين ما اعطيته لواحد من هالثلاثة فأنا عم اعطيه للثلاثة مع بعضهم.
– انا بدّي قول شي الكم لأوّل مرة: انا مش لازم كنت اعمل وزير!
مش كرمال قانون الفصل الّلي ما مرق بس كرمال حالي ومصلحتي، انجبرت كرمال التيار والرئيس والبلد وانشالله بأوّل فرصة بقدر اطلع كرمال حالي ومصلحتي وموقعي.
انا ما كسرت شي، انا خضعت لشي. هيدي يمكن من اكتر الامور بالسياسة اللّي تعذّبت لآخذ قراري فيها ورح تعرفوا اكتر ليش انجبرت، في اشياء انت وبالمسؤولية بتضطّر تعملها، وتضحّي بحالك او بقريب منك كرمال مصلحة الجماعة – يا ما في ناس بتكون بتودّ لهم بتبعدهم عن المراكز وياما في ناس ما بترتاح لهم بتحطّهم بأعلى المراكز.
ليش؟ لأنك بتفكّر بالمصلحة الكبيرة، المصلحة العامة، مصلحة التيّار.
مصلحة التيّار اوقات انّو ناس بيفلّوا منّو لأنّ ضررهم كبير، والباب بيضلّ مفتوح لهم ليرجعوا نهار يلّلي بيطلبوا، وبتكون مصلحة التيّار برجعتهم.
وانت اوقات مصلحة التيّار تجيب عليه ناس كانوا بعاد عنّو… كيف بالأحرى الّلي كانوا قراب منّو!
– اوقات مصلحة التيار تجيب البعيد تحطّو بحرجك ولو عارف انّو بدّو يطعنك.
المهم تعرفوا انّو انا ما بعمل غير مصلحة التيّار وما عندي ابداً اي شي بالشخصي.
وانو انا بريد كون ضمانة كل واحد، انّو بيتعامل بموضوعية، وبمعيار شغله والتزامه وأخلاقه.
اليوم ما عندي الاّ همّ التيّار والرئيس والبلد، وما عندي اي مشروع تاني لا شخصي ولا عام .
الحديث عن الرئاسة هو اذى للتيّار وللرئيس وللبلد… هيدا الحديث ممنوع معي؛ ويلّلي عم يفتحو بدّو الأذى الي وللتيّار وللرئيس وللبلد!

2 – تعريف التيار

https://youtu.be/U_RxUFBbM5s

– التيار هو اولاً قضيّة ومشروع وطني لدولة حرّة مستقلّة عادلة وقادرة.
– التيار هو حالة شعبيّة بروح نضالية فوق 35 الف و 40 الف في نهاية السنة و50 الف واكثر بعدها. يتوزعون على عدّة فئات وهذا هو تنوع التيار، وبدأ يتركّز على اساسات واعمدة بناء مؤسساتي.
– التيّار منّو حزب فئوي بل هو تيار مشرقي وطني عابر للطوائف والمناطق ومنتشر بالعالم.
– التيّار هو حالة عونية بطاقة شعبية شبابية حيوية يُبنى منها (الهيكل التنظيمي)، استمراريته وعبوره من سن المراهقة الى سن الشباب تقتضي التنظيم والانضباط تحت سقف النظام والديموقراطية.

– التيار هو قبل كل شي قضية وروحية. ما في تيّار وطني من دون اخلاق وقيم. ما في تيّار وطني من دون روحية تطوّع وعطاء ما في تيّار من دون طاقة ايجابية وصمود وايمان Resilience .
– التيّار هو احلى نسخة من لبنان بالتنوع، و Resilience والايمان والطاقة الايجابية والرسالة.
– التيّار قائم على فكر غير جامد، ثابت بمبادئه ومتحرّك بوسائله، وانا جبران باسيل اقول لكم لا تساوموا على هذه المبادئ ولا تسترضوا احد بها، وفي نفس الوقت لا تهتموا بالوسائل وبالاشكال، المهم ان نصل الى هدافنا بمبادئنا الاخلاقية.
– نحن تيّار الشرعية والجمهورية، نحن (نملك الشرعية بثقة الناس) ونخسرها اذا تخلّينا عن روحية النضال وعن ثقة الناس.
– نحن اليوم في قِمة المسؤولية وليس في قِمة السلطة – بل نحن في حكم منبثق من الناس (ولأجل الناس وليس على الناس)، واي تصرّف او سلوك سلطوي يقضي على شرعية السلطة.

3 – اخلاقيّات التيّار
– خدمة الناس واجب لكن التيّار ليس مكتب خدمات، ولا هو موزّع حصص على المحاسيب. كل خدمة يجب ان تكون حقاً لصاحبها، لا تخالف القانون ولا تؤذي المصلحة العامة، لن نسمح بأن نصبح تيّار الخدمات وتطالنا لوثة الخدمات الانتخابية على حساب القوانين والاصلاح لتحسين الشعبية.
– لن نسمح بأن يتسرّب فيروس الفساد الى جسم التيّار واذا حصل سنقضي عليه استئصالاً واذا تعارضت الحقيقة مع المصالح الشخصية، فسننحاز الى الحقيقة ولن نتستّر على اي مرتكب باسم الصداقة او باسم الانتماء السياسي.
– الطموح امر مشروع ولكن تحت سقف الاخلاق والثوابت – الطموح اللي بيدفع الى اذيّة المشروع/القضية او اذيّة الآخرين او الغائهم (ليس طموحاً بل طمعاً) انا وهيفا وهذا يناقض شرعة التيّار.
– ما حدا الو حق على التيّار بمنصب الاّ بما ينصّ عليه النظام، هو الذي يعطي حقوق بالديمقراطية – (التيّار الو حق على الكل) وهو فضله على الكل وما حدا الو فضل على التيّار.
– حق التيار عليكم انّو تشتغلوا لكي ينمو، وحقه عليكم ان تتنظّموا وهو ينمو لكي (لا يتحوّل التيّار الى مارد من الفوضى) في حال لم يترافق النمو مع التنظيم.
– كل واحد منّا مسؤول عن تنظيم التيّار دون ان يعني ذلك ان نصبح سجناء المعاملات وراء المكاتب.
– بدّنا تنظيم بس ما بدنا بيروقراطية غير منتجة تقضي على روحية التطوّع وعلى روح المبادرة. روح التطوّع هي روح المبادرة الفردية – تجرؤوا واطرحوا الافكار والمبادرات واجعلوها تحدياً شخصياً للنجاح.
– بدّنا مركزية بالقرار السياسي والتنظيم، بس بدنا لا مركزية مناطقية وقطاعية بالتنفيذ.
– بدنا شبكة تواصل من القيادة للقاعدة، وكل الناس لازم تحكي مع كل الناس بالسياسة والمبادئ، امّا (الأمور الادارية التنظيميّة فلازم نحترم الهرميّة) وعدم اعتماد النكز والقوطبة.

4 – التنظيم الجديد

– نحنا اليوم في مؤتمرنا الوطني الرابع، والاوّل بعد التعديلات على نظامنا.
رح يسمح لنا انّو يكون عندنا قدرة بالمحاسبة من خلال التعيين بالمواقع (التنفيذيّة). وقدرة اكبر بالمراقبة والمحاسبة لتعييناتنا (من خلال المجلس الوطني) ومجالس الاقضية.
لذلك في فصل بين التنفيذي والتشريعي الرقابي، ولكن (دون ان يعني تقاتل).
– مجلس التحكيم مش لازم توقف عندو ولا قضية، وهو بيعرف كم استقلاليته مصانة وما حدا بيتعاطى معه. ولكن هذا لا يعني انّو هو لا يلتزم بثوابت حقيقية منها مثلاً: 1 – محاسبة فورية لمن يستعمل الاعلام للتهجّم على رفيقه – محاسبة من 2- ينتخب بعكس توجيهات التيّار  – 3- فصل من لا يتقيّد بقرارات التيّار – 4- طرد من يتبيّن انه ليس تيّار…
نحنا أجرينا كتير انتخابات في آخر 3 سنين ونحن امام انتخابات للرئيس هذه السنة.
نحنا اوّل تيار في لبنان يجري هذا الكم من الانتخابات على القاعدة الشعبية ونحن لم نؤجّل انتخابات لأسباب سياسية خارجية. الديمقراطية عندنا اصبحت امراً روتينياً طبيعياً وهي تصبح جزء من ثقافتنا، بالرغم من الثمن الباهظ الذي ندفعه على مستوى الخلافات الداخلية – هذا ثمن الديمقراطية ونحنا اخترناها، على كلفتها العالية، لأنّها (ضمانة لاستقرار) التيار واستمراره.
– نحنا اوّل تيار يختار النظام النسبي بالانتخابات، ونحنا اوّل تيّار ينتخب الرئيس من القاعدة الشعبية، نحنا اوّل تيّار يكشف ميزانيته السنوية ويصدّق عليها (وانا وعدت بالكشف عن موازنة الانتخابات واقول انها —–)،
ونحنا اوّل تيار يعلن للاعلام برامجه الداخلية واهدافه ولذا اقول امامكم وامام الاعلام.
ونحنا اوّل تيّار يعتمد التمويل الذاتي المعلن من خلال الاستثمارات وبرامج التمويل.

5 – المجلس الوطني ومجالس الاقضية:
المجلس الوطني هو المجلس النيابي وله سلطة التشريع والمحاسبة.
مجالس الاقضية ما عندا عمل تنفيذي بالاقضية، بس بدّنا نتكل عليها بسلطتها الرقابية، انها بروح من التعاون تدلّنا على اي خلل بالمناطق لمعالجته.
بالاضافة، بدنا نطلب منها زيادة عن صلاحيّاتها وبوجوب انها تعمل اجتماعات شهريّة تبحث بالسياسة، انها تهتم بـ 3 ملفات.
1 – اجراءات مناطقية لتشجيع عودة النازحين.
2 – معالجة ملفات بيئية وخاصة النفايات والمقالع والتشجير.
3 – انشاء بلديات جديدة في البلدات الصغيرة والتحضير للانتخابات البلدية المقبلة.

6 – المجلس واللجان التنفيذية

– المجلس التنفيذي هو حكومة التيّار وعليه مسؤولية البرنامج الّلي عرض اليوم
– بدّنا نوسّع قاعدة العمل ونفكّر نؤمّن استمراية نفس الشغل للناس ورانا. وانا بدّي اتوجه لكل لجنة بكلمتين:
1 – المعلوماتية: بدّنا التيّار يصير مترابط معلوماتياً يعني بدنا التيار الالكتروني e-Tayyar.
2 – الادارة والمراجعات: بدّنا كل واحد يقدر يعمل مراجعة مباشرةً من دون حواجز، وبدنا مسح القطاع العام ليكون الوسيلة لاصلاح الخلل.
3 – علاقات عامّة: بدّنا يصير عنا تنظيم موازي من المناصرين، يعني التيّار يكبر ليصير بحجم الحالة العونية.
‏4 – 50K وموارد بشرية: بدّنا نصير بعد سنتين 50 الف منتسب يعني نسبة عالية من الناخبين.
لازم يصير عنا نظام KPI’s للهيئات والافراد يصيروا يعرفوا فيه موضوعياً مدى انجازهم.
5 – اكاديمية: بدنا مدرسة كوادر عليا بس اهم بدنا كل واحد بالتيّار يكون بيعرف ميثاقه وشرعته المناقبية.
6– لوجستي: لازم يصير عنا مشروع Barter لنغني فيه موجودات التيار ونزيدهم.
7– انضباط: لازم يصير جهاز للمعلومات وخاصةً عن الفساد.
8 – نشاطات: بدّنا كل نشطاتكم ناجحة متل العشا واليوم.
9- انتشار: بدنا نصير منظمين بكل قرنة في العالم.
10 – مالية: لازم نصير بـ 5 مشاريع استثمارية.
11 – بلديات : بدنا مؤتمر لموضوع النازحين.
12 – مرأة: لازم نزيد نسبة المرأة من 1 الى 2% بالسنة.
13– انتخابات: ماكيناتنا الانتخابية لازم تكون راكبة بـ 2019.
14 – مهن: مش بس انتخابات بدّنا تنخرطوا معنا بورشة الاصلاح وسن القوانين.
15- اعلام وتواصل استراتيجي: بدّنا نصير هجوميين ومش دفاعيين.
16 – خدمات اجتماعية: التيّار لازم يصير حركة مجتمع تضامنية باعمالنا اليومية.
‏17 –app Tayyar : بدّنا بكبسة واحدة نوصل باخبارنا او تعاميمنا للـ 40 الف منتسب.

7 – هيئات الاقضية:
– بشكر المنسقين السابقين، بالمجلس التنفيذي قرّرنا استبدال كل منسقي الاقضية والبلدات لنستقطب اعضاء جدد للتيّار دون ان يعني انهم لا يترقّون الآن او لايمكن ان يعودوا لاحقاً.
– بقول للمنسقين، انو صحيح بالنظام هم يمثلون التيّار في القضاء تنفيذياً ولكن ينتبهوا ان اعضاء المجلس الوطني هم نواب التيار ولا يجب الاستخفاف بدورهم لأنهم يمكن ان يسقطوهم.
للمناطق بقول: انو من لن يقم بعمله سريعاً سيتم تغييره فوراً، ومن يعمل مشاكل مع رفاقه سيتم تغييره فوراً، ومن لا ينجز الأهداف الموضوعة سيتم تغييره ولا حدا يتّكل (انو السنة هي سنة انتخابات).

8 – الشباب:
– لهم الفكر والقلب يتّجه – التيّار بدّو يرجع شاب وكل سنة بدّنا ننزّل متوسط عمره سنة واحدة.
– كلّ واحد منكم يسأل حاله اذا اولاده منتسبين للتيار والجواب لا!! مسؤولية كل واحد منا ينسّب ويثقّف اولادو على التيّار لأنه احسن مدرسة.
– مشاريعنا كثيرة وانا ملتزم بالوقت معكم لأني اشعر (بروح النضال) تعود لي، واريد ان ابثها بكل واحد منكم، والنواب والوزراء والمدراء رح يخصصوا جهد لكم.
– رح يصير عنا كشافة للتيار اسمها “كشافة الارض” للتدليل على تمسكنا بالأرض.
– رح يكون عنا تثقيف خاص للشباب وبطاقات خاصة لهم.

9 – منشآت التيار: هي بيتنا الثاني متل ما التيّار عائلتنا الثانية.
التيّار رح يصير عندو لأوّل مرّة بتاريخو منشآت و Assets باسمه، بعد مركز المؤتمرات بسنتر طيار من عصام فارس، وعقار في كسروان من يوسف كنعان وهيدا غنى مادي للتيّار بعد الغنى الفكري والمعنوي يلّلي بيتميّز فيه.
– مقرّ التيّار الّلي اشغاله بعد شهر رح يكون اوّل مجمّع حزبي بلبنان يضم القيادة والشباب والرياضة ومكتبة وبيت عون وصالة حفلات ومواقف وCafeteria واماكن راحة وصالات ترفيه.
– مخيم دائم للكشافة والانضباط ينتهي قبل الصيف ويكون ايضاً لتأمين مداخيل.
– مركز الشبيبة ينتهي في 2019 على امل ان نعمّمه في كل لبنان.
– مركز رياضي للتيّار وهو الأوّل في لبنان يجمع الشباب ويضم ملاعب وصالات.
‏-  Tayyar Academyوهو مركز ندوات Vocational Training ومنامة ودورات تثقيف وموسيقى وفنون.
هيدي المنشآت كلّها ستبدأ او بدأت في 2019.

10- رسالة للمؤسّس: انا اليوم حكيتكم بقلبي، بعقلي وبرؤيتي يلّلي هي خليط من الاثنين. 
– للرئيس عون اقول انّك اوصيتنا ان نكون ضمانة بعضنا في التيّار، انا اليوم اعدك، بعد ان تأكّدت بالممارسة، انني سأكون ضمانة للجميع، لكل فرد في التيار؛ ضمانة بالموضوعيّة وعدم التمييز، ضمانة محبة وايمان، ضمانة ثبات وقوّة.
– انت اعطيتني الامانة وانا سأثبّت لك كل يوم (اني اميناً عليها وسأزيد وزناتها).
– لا تجعلوا الشك يتسرّب الى قلب ايّ منكم حول (مستقبل التيّارلأنّه مضمون)، ان كنا جميعاً مؤمنين اننا باتحادنا سنصنع التغيير حكماً، بمحبتنا لبعضنا سنطوّر التيّار، وبتفانينا للمصلحة الأكبر سنبني اقوى تيّار في لبنان من اجل لبنان القوي.
– عنوان مرحلة الاربع سنين الجديدة لي ستنتقل من التيار القوي الى التيار اقوى ونحن علينا ان نعمل لكي يكون التيار كل يوم اقوى من قبله.
– انا قطعت وعد على حالي انّو ما قصّر تجاهكن من ميل، وما قصّر تجاه الرئيس والبلد من ميل ثاني،
بعرف ان المهمة صعبة، ولكن كل ما التقي فيكن، آخذ (من عيونكم وايمانكم القوّة)،
وبعرف انو هيدي الاوقات واللقاءات هي الّلي عم نصنع فيها مستقبل احسن للتيّار وللبنان.

https://youtu.be/U_RxUFBbM5s