Agoraleaks Agoraleaks
– الصديق الحقيقي…
***
الله معكم
بِخَبرو عن رجال ياباني، قرّر إنّو يرمِّم بيتو، والكل بيَعرفو البيوت باليابان، مصنوعة من الخشب..
بلشِت ورشة الترميم، بس في موقف إستوقف صاحب البيت…
شاف حِردَون، عالِق بين الحَيطَين ، وفي مسمار مِخترقلو إجرو..
تعجّب الرجال كيف بعدو عايش هالحِردَون، وهالمِسمار عايش 10 سنين مِختِرقلو إجرو..!! يعني من وقت عمّر هالبيت..؟؟
صار يفكّر كيف عم ياكول..؟؟ كيف بَعدو عايِش كل هالسنين..!!
بقَرِّر يوقِّف الشغل حتى يكتشف هالسرّ..!!
إنّما السرّ ما طوّل.. لمّا شاف حردَون تاني حامِل بتمّو أكل وجايِب لرفيقو حتى ياكول..
الزوادة
الصديق الحقيقي، هوّي اللي بيُوقِف حدنا بالفرح والكره.. هوّي اللي بعيش كلام الرب يسوع، لمأ بيِدعينا نفرح مع الفرحانين، ونحزن مع الحزنانين،وما نتخلّى عنُّن عند أوّل صعوبة.. والله معكم.
