جميل السيّد: الحرب عنوانها حزب الله، وبالفعل الحرب عَ عون وعهدو ووحدو فخامة الرئيس قادر يضع النقاط عَ الحروف (Video)

– خدو 4 سنين نيابة، وعطوني 4 أيام “ديكتاتور” وأعدموني باليوم الخامس
– ما دِعتني حركة أمل، يعني عَم يفكّرو فيّي 
– أعطت نصيحة للرئيس عون بأول عهدو، وجعجع كان ضمن فريقنا وإجتمع بغازي كنعان وخلافو كان عَ الحصة
– تطرق بري لجملة، إنّو “ما حدا بيِدخل بين أمل وحزب الله”، أنا إعتبرتها موجهّة للقوات والحريري وجنبلاط،  هنّي متدخلين بين امل وحزب الله، عند كل الدول بيِشتِغلو ضدّ الحزب وبِحيدو أمل..!!
– الله بدّو يِشتِغل شِغلو.. لأنّو هنّي ما رَح يصلحّو، من شبَّ على شيء شابَ عليه..
– وصل العماد عون رئيساً متأخراً 8 سنوات.. وإذا بناية مخَردَقَة بالرصاص، شي، وإذا أساساتها خربانة شي..

***

مقتطف من حديث اللواء جميل السيّد على قناة “الجديد” مع الإعلامي جورج صليبي: (2 ايلول 2018)

أمتاز عن كثير من السياسيين بِنفس الإستراتيجية، أنا مؤمن، بإستراتيجية، ودولة، لأنو من دون إستراتيجية نكون بجسم بلا روح، وإستراتيجية بلا دولة، وذلك عبارة عن سقف من دون عواميد، سهل الإنهيار…

أساس إتفاق الطائف، كان إنّو يللي عَم يِتقاتلو عَ الأرض، ويِخطفو ويدبّحوا الناس، وعم يِقصوا بعضُن، يجو يِقعدو بالدولة، وتِنتهي الحرب.. وفعلاً الطائف جابُن عَ الدولة بإستثناءات قليلة، هيّي العماد عون يللي كان رافِض الطائف، وسمير جعجع رفضو كان خلاف على الحصّة فقط، مش على مبدأ الطائف، لأنو كان من داعمي الطائف ضدّ العماد عون.. وجعجع إجتمع مع غازي كنعان، والعميد ميشال رحباني بغدراس، والخلاف كان على الحصّة.. وكان يُعتبر من الفريق تبعنا بين “هلالين”، بموضوع الطائف.. كون جعجع قاتل ليتطبّق الطائف (الإتفاق السعودي – السوري) والحرب بالمنطقة الشرقية جزء كبير منها وسببها اتفاق الطائف..

إذاً اللي كانو ميليشيات، إجو عَ الدولة.. لِبسو “الكرافات”، بس ضلّت ثقافة الشارع براسُن..

الإعتقال والصوت العالي

أنا عَ طول ليّن.. بس في شي إسمو قساوة الحق، بالصوت العالي. الناس تعرّفوا علي شخصيتي (الوجه الثاني) بعد خروجي من الإعتقال بقضية إعتقال سياسي لمدة 4 سنين وشهود زور.. يعني قَتَلوك 4 سنين، وشوهّولَك سِمِعتِك ، وضربو عيلتك، ومحبينّك.. وحاولو يدمّرو إسمك وتاريخك، وإتهموك بجريمة العصر.. بس تِطلع عَ الناس بهيدا الموضوع، مش رح تقِلُّن: شعرات بنت خالتي حِلوين.. عَم تِحكي عن قضية فيها وجع، وظلم ومواجهة..

النيابة والبقاغ

بالنيابة صِرت صوت الناس، مش صوت الناس تبع البقاع، بالأولوية البقاع.. والنيابة ما بِتغيِّر بطبعك، إذا إنتا صادِق مع نفسك، بتِحمُل هموم الناس ووجعها بنفس الحدّة..

أنا مش مقرّر سايِر، وقلت للناس، انا صوتكم، وشعاري كان: “صوتك أمانة، صوتك بيوصَل“.. والدليل إنّو أوّل ما طِلِع مشاكل بوِّجي بالبقاع، رفعت الصوت بدرجة، يللي مش مألوفة سابقاً.. ومش إنطلاقاً من مزايدة.. ومن بعد ما إستنزفت قراءتي مع قيادة الجيش، ورئيس الجمهورية، والرئيس بري ببعض المتطلبات في البقاع.. ثم وجدت إنو بدها القضية نكهة غير شكل..

س: لماذا لم نشاهد النائب جميل السيّد (نائب عن منطقة البقاع) في ذكرى تغييب الإمام موسى الصدر، في إحتفال حركة أمل بالبقاع..!!

لأنو لم توجّه لي دعوة.. وشخصياً آخد قرار بيني وبين حالي، كل نوع من المناسبات، ما كِنت أدعى كجميل السيدّ، لا أقبل أنو روح عليها كنائب..

بخصوص عدم دعوتي.. الإحتفاء جاء بعد مواجهة معينة عنوانها البقاع، وفكّروا بعض الجماعات (مش الرئيس بري) إنو في منافسة، والدليل إنّو الرئيس بري عالجها بموضوعية، وبالعلاقات الشخصية بَعَت إلي معايدة على عيد الأضحى، وتَلفَنت وحكيت أنا وإياّه..

وبالتالي الضحة اللي عملتها بالبقاع، بعض الناس عِندو إعتبروها إنتقاص، أو إنّو واحد جايي على الساحة يقاسِمنا.. عِملو ردّة فعل بغير مَحَلها.. بَعتولي على وسائل التواصل الإجتماعي “موتوسيكلات” الكترونية، لأنو ما حدا بيِستَرجي يِبعَتلي “موتوسيكلات” عَ الطريق تِعمللي فولكلور..

لكن الرئيس بري إستدعى المعنيين عندو، وقلُّن: بِتروحو عَ وسائل التواصل الإجتماعي، بِتوقفو الحكي، وبتِمنَعو كل سفاهات نوضعَت..

بري

مضمون حديث الرئيس بري، لو أنّه تطرّق بالإحتفال بشيء ما إعتبرته موجهّة الي، كِنت بردّ.. قال: لست هنا لأستهدف شخصاً ما أو جهة ما.. وإعتبرت هيدا الكلام إيجابي وجيّد..

بخصوص عدم توجيه الدعوة أو “العزيمة”، بالنسبة إلي قضية الإمام الصدر ما الها وكالة حصرية لحدا، وبالنهاية أنا معنيّ فيا عَ طريقتي.. بالشكل هيدا تقييمُن الُن. بس هيدا دليل إنّو فكَّرو فيّي..

يعني بس ما يِدعيك، يعني فكَّر فيك..

س: بِتحسّ حالك ممثّل بحدا.. من هالحضور!!

جميل السيّد: تطرق الرئيس بري الى جملة، إنّو “ما حدا بيِدخل بين أمل وحزب الله”.. هون أنا إعتبرت في القوات والحريري وجنبلاط.. في ناس من 14 آذار.. هودي كلُّن متدخلين بين امل وحزب الله، لأنّو عند كل الدول بيِشتِغلو ضدّ حزب الله، وبِحيدو حركة أمل..!!

يللي بيِشتِغل بهالطريقة هيدي، هوّي اللي بِكون عَم يِلعب فتنة بالموضوع.. واعتبرت إنّو أحسن ما كون موجود.. ولاق مش ممثّل فيُن بالموضوع هيدا.. أنا أمثّل حالي، وتعاملت كحيثية مستقلّة، وانا شخص مستقل، وهم أحرار ما يِدعوني.. وما في مشكَل..

س: بَركي ما دعاك حفاظاً عليك.. 

جميل السيّد: حبيبي، أنا بِقعُد بالموت وبغَنّيلو.. تعرضّت لَ 3 محاولات إغتيال.. قُتل حدّي مرافقي مرّة.. وقذائف.. وفِتِت على الإعتقال.. بالموت العادي ما بِتحِسّ وما بتِشعر، يمكن بِتكون مرتاح.. بس الإعتقال بطريقة تزوير أقسى من الموت.. ما شو هوّي الموت؟؟ عَجز… العجز النهائي.. بالإعتقال كان في عجز مع شعور.. وعجز وعَم تطلَّع بكلّ الناس بحبّوك، وعيلتك.. بِتشوف الوجع وبنفس الوقت ميِّت..

أنا لا أتعاطى تلقائياً.. طَلعاتي مدروسة، بس صرت إذا بدّك تنتقد فاسد شيعي، وكنت مسيحي ما الك حق.. وإذا كنت شيعي بدّك تنتقد مسيحي ما الك حق…؟؟ ودرزي أو سنّي..!! لهالدرجة وِصلت التوزازنات الرديئة، بمعنى فترة الترشّح قلتها: تشخيصي للبلد، خدو 4 سنين نيابة، وعطوني 4 أيام ديكتاتور، وعدوموني باليوم الخامس..

س: شو بتِعمل..!!

جميل السيّد: يِمكن سفرهُن لبرّا.. أنا بَعرِف وين الدوا.. يا الله بدّو يِشتِغل شِغلو بسرعة، يا.. لأنّو هنّي ما رَح يصلحّو.. من شبَّ على شيء شابَ عليه.. مش معقولة 30 سنة بيعملو أمور واليوم يِجي يقلّك أنا تغيّرت.. 

لمّا قلّي الرئيس لحود: كيف بدنا نضبط البلد بعد حرب أهلية..؟؟ قلتلو: في 200 ألف أزعر عَ الطريق، وفي 7-8 أو 10 أكبر منُّن.. خلّي العشرة يِحسبو حسابنا.. وخلّيتُن يِحسبو حسابنا.. لمّا قتل الحريري، إنقلبوا علينا، وحبسونا، واعتقلونا..

س: يعني بوقتا حمِلت الكرباج..!!

جميل السيّد: لاق.. نحنا ما كانت عدوتنا الناس.. كانت المعادلة الأمن والقضاء برّات إيديكُن..؟؟ ما حاربناهُن بالصناديق، لا رفيق الحريري عن “سوليدير” ولا غيرو.. الفساد من هيديك الإيام..

بس لمّا الأمن والقضاء مش بإيدُن، بينضبطو، بِتصير السرقة 30% أو 40%.. بدل ما يكون القاضي والظابط بإيدُن.. ولمّا طلِعت عند فخامة الرئيس العماد عون، أوّل ما إنتخبو.. وأنا بِحكي معو إعتباطي.. لأنو رئيسي كان على مدى 10 سنوات، رئيس مخابرات البقاع بالجيش.. قِلتلو: 

فخامة الرئيس، انا بَعرِف الطائف عن الغايِب، وعايشو من أوّل يوم.. وكيف مورس..!! رؤساء الجمهوريات اللي إجو قبلك قبل الطائف، أخدو عضلات من السوري، اليوم ما في سوري، ما عندك عضلات.. المعادلة بسيطة، إمنع بالقضاء وبالأمن أي مركز الاّ إنت تحددّو.. ومن الأمن والقضاء بتِلقط البلد..

س: شو قلّك فخامة الرئيس..؟؟

جميل السيّد: قلّي سنحاول، بس إنتبه، وصل العماد عون رئيساً متأخراً 8 سنوات.. كان لازم يِجي وقت إجا الرئيس ميشال سليمان. متِل ما بِقولو، إذا وصِلت عَ بناية، إذا مخَردَقَة بالرصاص، بِتصلحها. بس إذا كلها خربانة، بصير بدّو يِعمل حرب عالمية ثالثة، وبِحطوّلو بوجهو، أنت تخرق إتفاق الطائف..

حاجة الحَكم

لاق حبيبي، في مرجع بالدولة، لازم يكون معو سلطة، مش ليتعسَّف فيها.. بس هيدا البلد يفتقد، الى مرجع، لأنو الدستور مش تارِك مجال، صفّى رئيس الجمهورية، بدّو يقاتِل حتى يشكّل.. بقولو: هودي تبع الميلشيات، منِضحك عَ كل رئيس جمهورية، إنو إنتا حكم.. يا خيّي بملعب الفوتبول، الحَكَم عندو صُفيّرة بوَقِّف اللعب، وعندو كارت أصفر يُنذر اللاعِب.. وعندو “كارت” أحمر بِقلّوا برّا، وبيِشحطو.. 

معو صُفَّيرَة الرئيس و”كارت” أحمر وأصفر.. إذا الحَكم ما معو شي، لا رأي لمن لا يُطاع.. 

إذا ما بتِشعُر بالناس، ما بتِعملُّن دولة.. إذا بِتصير نائب جزء من الدولة، إنت خِنت الناس.. إنتا مش جزء من الدولة، إنت جزء من الناس حاطّينَك فوق..

إله صغير

المدعّي التمييزي إله صغير بلبنان بصلاحياتو. ما في حدا يِقدِر يراجعو بالقضاء. بِوقِّف واحد ما بتقدر تقلّو شي؟ بيِفلُت واحد ما فيك تقلّو..؟ بِخبّي ملف ما فيك تقلّو..؟ بِمشّي ملف ما فيك تقلّو..؟

بتسألني مين الديكتاتور إذا بتِتمنّى وظيفة بالبلد (مع إنّو مش عامِل قاضي)، بقلّك المدعّي العام التمييزي.. أهم وظيفة بالجمهورية اللبنانية، إذا بدّك تشتغل شغلِك لصالح الناس، وتِمنَع الفساد. لأنو أكبر شَنَب بالدولة بِتجيبو.. واليوم مدعّي عام التمييز بيِعتبر نفسو تابِع مِتِل سعيد ميرزا، يللي زَوَّر مع سعد الحريري على بيّو..

مدعّي عام التمييزي، بيقدر يكون نصّاب بالدرجة الأولى، وإذا بدّك تعرف مين مدعي العام التمييز الأفضل بالعصر الحديث، هوّب القاضي عدنان عضوم..

القاضي ليس موظفاً، وعندما يتحوّل القاضي موظفاً، عَوَض بِسلامتك..

ظروف الإعتقال

أضعَف شي المُرتكب. وعين الحق بتِكسُر العين يللي بِوجها.. نَبشو القبر لمّا كِنت بالإعتقال، خلّو شي تفصيل، أو رواية أو من شي أملاك.. لو قِدرو لقَطو قشّة وذلّوني فِيا،كان يمكن بيِقدرو يساومو معي أكتر ما إنّو يِتهمّوني زوراً، أو يطلبو منّي بمحمد زهير الصديّق، أو يطلبو منّي سلّم الرئيس الأسد.

س: يُقال عن وضعك حدّ بأول كم يوم من الإعتقال.. ماذا فعلت؟

مع لجنة التحقيق شي، ومع عسكر وضباط ويسام الحسن شي تاني.

بالنسبة للجنة التحقيق: في محقق إلماني، إسمو روبرت. جاب واحد لابس كيس، مبَخشينلو عيونو. لابس وجّ مخدِّة، وقال شافِني بمسرح الجريمة، وانو نحنا شاركنا.. وإنّو رِحت عَ سورية 6 مرات قبل الإغتيال بِ 5 أشهر،

قلتلّو: كشِّفو عن وجّو. المفكرات موجودة هون. بِتبيِّن أيّ يوم كِنت موجود ومش موجود.. عطيني تاريخ، وإذا زَبَط معك، إنّو أنا ما عندي ولا موعد، وتلفوني مِطفي. بكون بسورية، وبِقبَل معك بشهادتك.

تلبّك شاهد الزور.. وصار يعيّط المحقق.. قلتلّو: إحترم نفسك..!!

بالنسبة لعسكر وضباط ويسام الحسن: دخلت الممرّ ، واقفين العسكريين، حوالي 20 شخص، و3 ظباط. لابِس بدلتي.. إطلّعت هيك، (أوّل شي بتِحسبو بهيك موقع كرامتك، وأنا زلمي يمكن كرامتي تِقتلني يوماً ما، مش شي تاني)..

إطلعّت هيك، شو بدّك تقلُّن هودي: “نظراتُن كلُّن موالون.. جميل السيّد جايي.. وقِفت بنص المَمشى، قلتلُّن: أنا جميل السيّد، في منكم بيَعرفوني بالإسم، وفي منكم شايفيني بالهيئة يِمكن، لأنو ما كنِت إطلع عَ التلفزيونات.. (أنا إسم بلا صورة، لحين وقت الإعتقال)..

قلتلُّن: أنا جميل السيّد تِهمتي هون، قاتِل رفيق الحريري، يا بتعتبروني قاتلو وحِسبو حسابي.. لأنو أنا إذا قاتلو لإلو، بِقدر قتِّلكُن أنا وجوّا..

يا أنا بريء، ضربو حسابي أكتر.. مِشيِت الأمور، وكنِت حامي ساحتى فوق، وراعبُن..

جرصة المحكمة

محكمة رفيق الحريري مش نحنا اللي حوّلناها مسخرة، هنّي اللي حوّلوها مَسخرة، ولمّا أنا خلصّت شهادتي عند رئيس المحكمة.. المحكمة إنبهرت بصراحة، قلّي بالحرف الواحد، وهنّي آخدين إفادات الوزير جنبلاط، والسنيورة، ومروان حمادة، إنو سورية وحزب الله إلُن مصلحة بقتل الحريري.. ليه!! قال لسبب الحريري كان ضدّ التمديد للرئيس لحود، والحريري كان بدّو يِعمل إنتخابات سنة 2005..

قِلت لرئيس المحكمة: القرار 1559، يقول 3 أمور:
– إخراج سورية من لبنان
– تجريد المقاومة من سلاحها
– مسك السلطة بلبنان

أضفت: رفيق الحريري، مدَّد للحود، وهوّي بالمجلس النيابي، وهوّي بالحكومة من مدَّد للرئيس لحود.. ومن بعد التمديد له، راح يفاوضو إنّو يِعمِل معو حكومة، وما إتفّق مع الرئيس لحود..

لمّا راح عَ الإنتخابات، إجا بدّو يِعمِل إنتخابات بظلّ الرئيس لحود.. يعني عَم يعطي شرعية للوجود السوري وللرئيس لحود..

سألني: يعني شو بتِستَنتِج من الموضوع؟ من كان له مصلحة في قتل رفيق الحريري، قلتلّو: نبِّش عَ قاتل رفيق الحريري بين اسرائيل وأميركا.. ومَجبورين يسجلّوها بالجلسة.. لأنّو من قتل رفيق الحريري هدفو إخراج سورية وتجريد المقاومة من سلاحها ومسك الدولة اللبنانية، وما بيِقدرو يِعملو الإنقلاب بالدولة، الاّ باعتقال جميل السيّد والضباّط.. وهيدا اللي صار..

مش أنا اللي نظَلمت. رفيق الحريري بقَبرو إنضحَك عليه 4 سنين، إنّو جميل السيّد والضباط قاتلينو.. وسورية قاتلتو.. واليوم نضَحَك عليه اليوم إنّو حزب الله قاتِلتو..

الوهم..

في ناس عايشين على وهم، ومفكّرين إنّو المحكمة رَح تغيّر الكون. هذه المحكمة ليس لها صلاحية، ولن تتهّم حزب الله، ولا تستطيع أن تتهّم أي أحد آخر..

حتى دليل الإتصالات المستندين إليه، كلّه خروقات، وأخطاء.. تصوّر الضرس تبع “أبو عدس” لاقوه وحللّوه.. وحللو شعراتو “أبو عدس”، ولاقو إنّو: هيدا عاش 12 سنة ببلد صحراوي قبل ما يعيش بلبنان.. وبالقيود تبع الفسلطينيين بلبنان، وعند الأمن العام والدولة، إجا عمرو 12 سنة مع أهلو من السعودية، وكان خلِق هونيك..

وين ضرسو لأبو عدس..!! قال، ضاع بمختبر بالمانيا..!! ما بِتشوف الاّ هيدي إنفقدِت، وهيدي ضاعِت..

الطائف

من سنة 1990 لفترة العماد ميشال سليمان، كان لرئيس الجمهورية حصّة.. الحكومة كما أراها اليوم بعد ما إستوِت الظروف. في ناس حِكيو عن 7 أيار سياسية..

الشخص الوحيد الذي يستطيع أن يُحرّك الماء الراكدة الحكومية، هو العماد ميشال عون، إذا حزب الله أخد زمام المبادرة في هذا الموضوع، رح يِنوضَع الموضوع بصلاحيات سنّي – شيعي..

ولمّا إجا العماد عون دق جرس إنذار، من اسبوع، وقال، بأوّل أيلول عندي كلام، وما رَح إقبل المماطلة.. بِقوم الرئيس المكلّف الحريري بيِجمع السنيورة وميقاتي، وبيِطلعو بكلام عدم المسّ بصلاحيات رئيس الحكومة..

أنا كلفتّك حتى تألّف الحكومة، وإنتا عَم تستَعمِل تفسير دستوري للمماطلة، 111 نائب يمثلون الشعب اللبناني، حطّوك حتى تكلّفها، مش حتى تلاقي فتاوى لتأجيلها.. لمّا بِسافِر 5 مرات (ضمن 101 يوم) وكل فترة إسبوع، يعني فيُن 35- 40 يوم خارج لبنان..

حرب على عون

هي حرب عنوانها الضمني، على حزب الله، وعنوانها الفعلي على الرئيس عون.. وعلى العهد الرئيس عون.. ولكن الرئيس عون بمقدوره مع حلفائه، والناس اللي موجودين يقدمو عندو عريضة نيابية، من معظم الناس اللي كلّفوه، يقولون فيها: يا فخامة الرئيس نحنا هيدا التكليف ما فينا نِنزعو، بس نحنا تجاه المماطلة، ولأنّو نمثّل الشعب اللبناني، هيدي عريضة بإسقاط التكليف المًعطى له، وشرّف فخامة الرئيس تصرّف..

اليوم سعد الحريري، شو عامِل:

• بِسايِر جنبلاط وجعجع (والإشارة السعودية واضحة)
• بِسايِر الرئيس عون من تاني مَيل
• بِغازِل حزب الله من تالت مَيل
• بِروح لعند الرئيس برّي، وكان عَم يهدِّد بجلسة تشريعية.. وإجا لعندو السنيورة، وعَم يقلّو: بلاها.. 

مين الشخص الأساسي يللي عَم يِتعطّل عهدو، واللي هوّي مسؤول عن حماية الدستور، والقانون ومصالح الناس، واللي أقسم اليمين على إدارة البلد..

إذاً العماد عون بدّو يحطّ النقاط على الحروف، والوحيد القادر وصاحب الصلاحية..

رِصد Agoraleaks.com

https://www.youtube.com/watch?v=p0Vx4I9xzR0