– إنسان لبنان مميز بكلشي.. “دراكولا” بِكفّي، ما شبِعت بدّك 50 سنة تانية حتى تِقتنع..!!  

***

أجمل الكلام عن لبنان من الممثلة والإعلامية فاء طربيه بمناسبة الذكرى الأولى لمعركة فجر الجرود، والحفل الذي أقامته جمعية “تراث ووطن” بحضور أهالي شهداء الجيش اللبناني ونخبة من الفنانين والممثلين وأبرز الفعاليات الاجتماعية والإعلامية والسياسية، في منتزه “زعتر بري” في القليعات.

وممّا قالته:

• لبنان يتألّف من كل العطور ، وهيدا الشي بِمجِّد الخالق، الدين لله والوطن للجميع.. نحنا ما منَعرِف مسلم مسيحي، وبنص الأحداث (الحرب) ما كنِت أعرف زملائي إذا كان سنّي أو شيعي، كنّا نَعرِف الدرزي لأنو في عندُن القاف.. وما منَعرف إذا هيدا كاتولي أو روم وهيدا ماروني..

كلنا ولاد الله، كلنا عَ صورتو ومثالو.. إجا عطانا دستور حياة، وقلنا عيشو بمحبة وسلام، وأنا خلقتِلكُن هالوطن الغالي عليّي كتير، لأنو عمِلتو نموذج عن كلّ الكون اللي خلَقتو..

• حبّيت إستمِخّ باليوم وما إسترَحت، خلقت هالوطن، وعمِلتو نموذج (بوستر) عن كلّ الأوطان…

حتى إنسان لبنان مميّز بكلشي..
– بِفنّو..
– بِنجاحو..
– بِنضافتو..
– وبِوساختو..
ما في مِتلو..

اللبناني ما في مِتلو والله العظيم.. وروحو شوفو برّا.. اللبناني النموذج مطرَح ما هوّي بالإستضافة، بالوطن التاني الموجود فيه..

• اللبناني مثال وقدوة، بيِشتغل من كل قلبو، بيِعمل نجاحات ما حدا بيحلم فيها.. وصلو لرؤساء الجمهوريات.. كان إبن عمتو لمرحوم بيّي (خوليو سيزار طربيه) كان رئيس جمهورية كولومبيا..
  تنورين هالبلدة المهضومة، طلَّعِت رئيس جمهورية لبلد عظيم وكبير، وكان بِشخصو مِحور حتى يوقِّف الحرب بين روسيا وبين أميركا.. يعني كان هوّي نقطة الوصل بيناتُن، حتى ما كَبسو زر الحرب بِوقتا..

إجا وقت الحرب بلبنان، وبلّش الشيطان يِشتغِل.. وصارو يحاولو بأي طريقة، إنو يهدمّوننا.. ويِلغونا، ويولعو النار بالبيت الواحد..

بقا خاب ظنُّن، والحمدلله.. نَفَسنا طِلِع كتير طويل.. وصلنا لغاية 50 سنة، بعد بدُّن 50 سنة تانيين…!!

“دراكولا” بِكفّي… ما شبِعت دم.. عمول معروف.. دم شهدائنا، ودم ولادنا.. ما بقا تحاولو تدنسو لبنان بالإشيا اللي مش منيحة..!!

لو دامت لغيركم ما وِصلت الكُن.. عملو معروف.. حلّو عن ربنا، خلوّنا نعيش بسلام مع بعضنا..

كلنا مِنحبّ بعضنا.. وكِلنا حزمة وحدِة، وليد نخلة إبني التاني، إبني إسمو وليد.. وإنتا إبني التاني.. أهنئك على كل نشاطاتِك.. ضلّك بالمحبة والإنسانية والتواضع، ونكِّش بِتلاقي كتير بالخوابي العتيقة إشيا تبرزها، ونحن إلى جانبك…

ونشكر الدولة إذا كرّمِتنا أو ما كرَّمِتنا… التكريم مش بالنوايا بالأعمال.. وبِطلُب من زملائي اللي غابو، بقول: أنا بصلّيلكُن دايماً، وانتو هلق بالمكان السليم. وبِفتِكِر عملتو مَطهركُن على الأرض، وما حدا بياخود منّا شي، إلاّ أعمالو..

بنك الآخرة شوفو شو بتحطّو فيه.. هون كلّو مجد باطل وبلا طَعمِة.. في محبة الناس وتقديرا وإحترامها.. وهيدا الشيي اللي بيسعِدني، وهيدا اللي أنا باخدو زوادة..

وألف شكر..

***

وكان قد استهل رئيس الجمعية السيد وليد نخلة اللقاء مرحّباً بالحضور وكانت كلمات مميزة لكل من قاضي مجلس شورى الدولة كوبيرت عطية، ورئيس بلدية عين عرب عصام الهادي، والممثلة القديرة وفاء طربيه، والممثل القدير يوسف فخري المعروف بـ “كوكو” في “الدنيا هيك”.

https://www.youtube.com/watch?v=m6tsdnrt3mw&feature=youtu.be