أمل أبو زيد: ما خِلِق اللي بيِمنَعني فوت عَ جزين، وما خِلِق اللي بدّو يكَسِّرلي إجريّي.. (Video)

– أقلّ الإيمان ردّ عن نفسي الأذى، وجزين مش جمهورية لشخص 

***

مقتطف من حديث النائب السابق أمل أبو زيد لقناة الـ”OTV”: (تموز 1 – 2018)

سَكَتُّ فَغرَّ أخصامي السكوتُ وظنّوني لحَقي قد نسيتُ.. 

إبتداءً من هيدي اللحظة، لن اسكت على كل تحامل صار على أمل أبو زيد مقصود منه تشويه صورتي، لأسباب خصومة سياسية..

للأسف يللي صار من اسبوع، بدأ من شخص قريب إلي ، وبِعتبرو صديق الي، هوي رئيس بلدية لبعا فادي رومانوس.. إنحكى عن موضوع كسّارة، تملكها الشركة العربية ، وكانو أمل أبو زيد متواطئ.. وعَم مارِس العلاقة وأنا كسرت حاجز كتير كبير مع أهالي صيدا..

إجتماع 2016

بالفترة الماضية كان في حيط كتير كبير من العداء بالسياسة، وأنا كنت خصم بالسياسة لتيار المستقبل، ولكن عندي القدرة روح إحكي مع الست بهية الحريري ، ومحمد الشمّاع اللي تعرفّت عليه من خلال صديق ، وما شِفت شي منّو الاّ كلشي منيح.. وما عندي فكرة إنّو عندو كسّارة.. الى أن بعد الإنتخابات الفرعية سنة 2016، يَدعيني فادي رومانوس ، حتى نِحكي بموضوع كسارة محمد الشماع.. وحضرت الإجتماع وكان يوجد عدد من رؤساء البلديات ومخاتير القرى المجاورة.. وناس قِبلِت بالواقع وناس مش قبلانة، وصار في شروط لتحسين الوضع.. وفي شخص أخد محضر.. بِجاوِبُن وبقلُّن: تِكرم عينكم، انا مستعد إعمل كذا أمر، وأمور متعلقة بموضوع البيئة ، وانا تهمنّي البيئة لأنها منطقتي.. وإنتهى الإجتماع..

السؤال، ليه هلق فِقتو.. هيدا الصراع شو سببو..؟؟؟ في الو أهداف شخصية، وأنا ما بدّي ادخل بالشَخصي، مع إنّو تناولوني بالشخصي…

وبوقتا، محمد الشماع قلّي أنا ما بَعرِف خليل حرفوش، بدّي اتعرّف عليه، وأعطي الأوراق اللي معي ياها.. وما عِدِت تعاطيت بالموضوع، الاّ بحالة قلّي محمد، بِقلّي:

وزير البيئة ما عَم يردّ عليِّ في مجال نشوفو..؟؟ قِلتلو: حاوِل مع صديق مشترك، عضو بالتيار.. قلّي الصديق المشترك، إنتي نائب افضل أنا أن اكون صلة الوصل.. ورَِحنا لعند وزير البيئة، وقلّو بشكل صريح:

الترخيص إذا مَرَق بمجلس الأعلى للكسارات والمقالع، انا ما بوقِّفو.. لكن للأسف شغلة صغيري لأساليب خاصة ومصالح ضيقة، إنّو فادي عَم يِعمل هيدا الهجوم، ومن سنة كان عَم يِبعُت خيّو يمثلو بمطعم المختار للشركة العربية..

هالقد أمّل أبو زيد ما عَم يخليّهُن ينامو ويِرتاحو !! ما بالعمل السياسي في مراحِل.. انا بدأت عملي بالحقل العام، وواضح، منطقة جزين بتِجي بالدرجة الأولى، ولكن بذات الوقت، ما بدّي إمسك السيف وقَطِّع رؤوس الناس كلها..

بدنا نفعُد مع بعضنا كل واحد بكرامتو.. بدّي إعترف بالآخر، والآخر بدّو يِعترف فيّي.. لأنّو انا أنتمي الى تيار الو موقف بالسياسة.. وبعزّ خلاف التيار مع المستقبل، كنّا نقعُد ونِحكي مع بعضنا، وحتى مع الجماعة الإسلامية.. وكنت قلُّن: انتو بِتقولو ليه مسكرين عليكم، نحنا مش مسكرين على حدا، في عنّا حق بدنا ياه…

التخويف

نحنا بدنا نكون مع بعضنا، كل واحد بياخود حقّو.. وكلّو ضمن القانون والتعاون، لأنّو نحنا منّا عايشين بجزيرة.. وبيِكفي رمي اتهامات شمال يمين، لأنّو ما في حدا الاّ بيتو من قزاز.. وإذا أتتك مذمتّي من ناقصٍ فهي الشهادة لي بأني كاملُ… هنّي الناقصين، وعندُن خوف، وبِضلّو على طول يطلعو “البعبُع” ويقولو: يا عالم مِتلي شو في..؟؟

بالفترة الماضية، نحَكى بموضوع كفرفَلوس، إنّو أمل أبو زيد عَم يتفاوض ويتشارك الصديق محمد الدنش، جايِبلنا البُعبُع الشيعي على منطقة جزين.. يا عيب الشوم..!!!

أمل ابو زيد اللي شارك بشراء بيت الأسير.. وبشراء ارض الحضارة، والحدت.. عَم يتفلسفو.. مش البطولة إنّك تتصوّر البطولة تروح تفاوض الناس وتِقنع.. ومش لوحدي إشتريت “مدرسة الحضارة”، في مجموعة من أهل المنطقة.. ونحنا اللي مَنَعنا النازحين السويين من إنّو يفوتو، مش الإستعراض الإعلامي…. وفي مطران الكاتوليك ايلي حداد بيِشهد على هيدا الموضوع..

يسأله ياسمين: الا يكفي هؤلاء إنّك ما نجحت بالإنتخابات، هل المطلوب الخروج نهائياً من جزين.. ولماذا الضربات من قلب الفريق يللي تَنتَمي الو..؟ لماذا السيف عليك..؟؟ يقول أمل أبوزيد:

ولا مرّة حكيت بهيدا الموضوع، إكراماً لعين فخامة الرئيس، ولعين الوزير باسيل، سَكتت على كل الحملات المُغرضة، والتشويه، لأني إبن مدرسة تتغاضى عن الأمور الخاصة، ولكن بس توصل لحدّ الإهانات الشخصية، والتعرّض بالكرامات..

صحيح أمل أبوزيد خسر بالإنتخابات، ولكن التيار الوطني الحرّ رِبِح.. ولكن إذا بيعتقد البعض إنّو خسارة أمل خروج من المشهد، يطمّن بالو، رح يضل أم لأبو زيد موجود.. وانا كنت وسوف أبقى بالتيار، وعملي السياسي ليس فقط عَ صعيد جزين، بل على صعيد لبنان ككل..

جزين المدينة أنا أحترمها، وأعطِتني 600 صوت، رغم إنّو عندا 3 مرشحين من المدينة.. ولكن ما حدا بِقول: وَصِّلو انّو بدّي كسِّرلو إجريه إذا بيِجي على جزين.. هوّي بيعرف لا هوّي قادِر يكسّرِلي اجرييّ، وما خِلِق اللي قادر يِمنَعني فوت على جزين.. 

هيدا الزيح من هاللحظة ورايِح ، كل واحد بيِخرقو بدّو يِتحمّل مسؤوليتو الأدبية والمعنوية والمادية.. مدرسة الرئيس عون هيّي مدرسة إحترام الآخر..

يمكن أمل ابو زيد شكلّت حالة ازعجت البعض، لأنّو ما بِقي ضيعة بمنطقة جزين، وقرية وكنيسة ووقف، ونادي وجمعية الاّ ما وقِفت حدّا.. عمِلتْ من دون تمنين، عمِلت المقتنع فيه..

إنتخابات 2018

نهار الإنتخابات، قلنا في ناس رِبحِت والتيار هوّي اللي رِبِح.. وأنا أفرح بس قول إنّو شاركت بنجاح المقعد الثاني.. المقعد الماروني كان محسوم،وما كان في عندي نوع من الوهم.. كِنت عارف رَح نِحسر مقعد ماروني.. وعارِف إنّو زياد أسود بدّو يصير النائب الثاني،مع إحترامي لكلّ القرارات.. ولكن بس تتعاطى بالإنتخابات، وبِتنزّل مسؤولين بالدولة إنّو واقفين حَدِّك وداعمينك، وتشوّعغ سمعة الآخر يللي هوّي رفيق منّا أسلوب حلو..

بنهايةالأمر الناس أخدت قرارها، وانا بعدني إبن جزين، وإبن مليخ، وعايش فوق.. والي حق قرِّر أنا وين ممكن كونموجود كداعم، ووين ما كون موجود…

يُسأل: لماذا لا يُثار داخل التيار، إنت شخص عندك موقعك، والغير عندو موقعو…؟؟ يردّ أبو زيد:

بنهاية الأمر أنتمي الى التيار، مواقفي لا تكون بناء أمور خاصة، وعلى بعض التفاصيل.. لأنّو البعض قال، بكرا أمل يترك التيار… والتيار بنهاية الأمر عندو إهتمامات كتيري.. وبرأيي رح يِجي الوقت هيدي الأمور تِنبَحث..

جمهورية خاصة

مش مسموح تِبقى بهالشكل، لكن بس الآخر بِطلّعها بهيدا الشكل، لدي الحق ردّ عن نفسي الأذى، وهيدا أقلّ الإيمان.. وكل أصحابي وأصدقاءنا بالتيار بِقولو: ليه ما بِتردّ ، كأنّو الآخر مِفتِكر إنو الوحيد القادر يعلّي صوتو.. عندي صوت، وموقف وجرأة ، بيِكفي بَقا كأنو في جمهوية خاصة فوق، إنّو شخص يملكها.. لاق القرار السياسي مش بس بايد إنسان..

طريقة التعاطي مع الناس بعد الإنتخابات، كأنو الأمر لي، والباقي مش موجود، حتى اللي خِسِر في الو وجود.. عَم تطلب من الآخر يِقعُد معك، وكتيار منفتحين عَ كل الناس ، ومادّين إيدنا للكل بقناعاتنا، في تباين سياسي، بس ما فينا نِلغي بعض… بقاموسنا مش موجودة، هيدي موجودة بقانون الغابات، نحن بشر..

جزين والمحيط..

الأمور كانت مستفحلة بالسياسة بين التيار والمستقبل، عِملتْ حاجز كبير بين أهالينا وأهالي صيدا.. واللي صار بالإنتخابات الأخيرة، عِملِت حاجز جديد بين أهلنا الشيعة بمنطقة جزين وبين أهل المنطقة.. هيدا أمر واقع ،والبرهان انو لائحة التيار انا الوحيد أخدت 300 صوت شيعي من اصل 7000 كتيار..

بالنهاية ما فينا نِبقى هيك، مش ممكن نشتغل بالشأن العام ، وما نكون عَم نِحكي مع الصداويين ومع الشيعة…

الحزب 

أنا لا أحبّ الشخصانية، الحزب إذا مربوط بشخص، يعني منّو حزب. لمّا بتِعمل حالة سياسية كبيري، هيّي اللي تخلُق حيثية سياسية وتجعل الناس تلتفّ حواليها.. برأيي هيدا الشي لازم نثبتو مش بس بجزين، بكل لبنان، وهون دور الوزير باسيل، والتيار صار كتكتّل عندو 29 نائب، يعني أكبر تكتّل..

https://www.youtube.com/watch?v=5OVTrYFCLhU&feature=youtu.be