مروان شربل للمصدر الرسمي: إذا رجال تكشف اللي قبض..!! (Audio)

– في حقد، شو هالكلام عن عون قبض.. حبيبي لو بدّو يقبض كان من زمان صارت !!
– إذا إجا شخص وقال للمسيحيّي “بدي عدّ” شو بتقلّو: عنا ديمقراطية وروق لَ يتفّقو التيار والقوات!!

***

مقتطف من حديث الوزير السابق مروان شربل لقناة الـ”OTV” ضمن برنامج “اجندة اليوم”: (4 حزيران 2018)

مرسوم التجنيس

برأيي موضوع الإعتراض على مرسوم التجنيس هو سياسي، ويتعلق بموضوع تأليف الحكومة، وبس تتألف الحكومة، ما رح يِنجاب سيرتو..

عايشين بحكم النكايات بين بعضنا، ليه مرسوم ترقية الضباط وإعطاؤن الأقدمية ما عشنا نفس التفاصيل..؟؟

لما بقولو في سوريين ممولين، او معن مصاري، أو عندن إمكانيات، مش عم يطالو رئيس الجمهورية فقط، عم يطالو رئيس الحكومة سعد الحريري والوزير المشنوق.. إنو عَم يزايدو عليُن بعلاقتن مع النظام السوري..؟؟

الوزير المشنوق ما إنسحب وقت إعتبر الوزير الفرزلي وديعة سورية، (وهيدي كلمة كتير قاسية) وهيدا الكلام مرفوض عن الرئيس الفرزلي بكل صراحة. وإذا بدنا نِحكي عن ودائع سوريين، عندي كلنا ودائع سوريين من سنة 1990 وحتى 2005.. (باستثناء التيار الوطني الحر). كلنا ودائع سوريين، ومتِل ما قال المسيح “من منكم بلا خطيئة فليرحم بحجر”. فما نكبّر الموضوع…

بدّي ذكرهم، ويحق الإعتراض (ما عَم قول لاق) بس بالوقت المناسب، والظرف المناسب. نحنا عايشين بوضع صعب إقتصادياً. إنو شو عَم نِعمُل، عَم نقول للدول بالخارج إنو عَم نجنّس مقتدرين وموالين للنظام السوري..؟؟ عَم نضرّ حالنا..!!

حل

للشخص اللي قال إنّو في دفع مصاري، إذا كنت رجال، إنت اللي قلت، إنّو في دفع مصاري، صدر بوسائل الإعلام نقلاً عن مصدر رسمي، انت أيها المصدر الرسمي إذا عَم تِسمعني، إذا إنت رجال بتطلع وبِتقول، مين اللي قبض، ومين اللي دفع، وقديه قيمة “الشيك”. وإذا إنت ما بتسترجي، تعا خبرّني، انا مستعدّ ، ما بِذكر إسمك وقول: فلان قبض، وفلان دفع.. وهيك مِنحارب الفساد.

ما بتصير محاربة الفساد بتشويه سمعة العهد، يللي هوّي انطلق من بدايتو بمحاربة الفساد. وحزب الله مشي مع رئيس الجمهورية بمحاربة الفساد، مش رئيس الجمهورية مشي مع حزب الله.

حقد

كمواطن موجود على جنب، أشعر بوجود حقد، يقولون: يللي ببيع الجنسية يبع الوطن..!! لك شو هالكلام..!! إنت عَم تقول لقائد جيش طويل عريض، صار رئيس للجمهورية هيك.. هيدا لو بدّو يبيع الوطن، كان باعو من زمان..

إصدار مرسوم التجنيس صلاحية إستنسابية لرئاسة الجمهورية، وما حدا يحق له المزايدة عليه، ويعارض الفكرة، بس رئيس الجمهورية لم يفعل كما مرسوم عام 1994.، الرئيس عون ما قال:

• جيبولي مجرمين وعطوهم الجنسية
• في محكومين بالإعدام وموجودين بسجن رومية، عَطيوهم الجنسية

اللي انا شفتُن بتجنيس 1994، في مصريي، وسوريي ، وصينيي، وفلسطينيي، وسودانيي.. ليه بقي واحد موجود بلبنان، أو مش موجود ما عطيو الجنسية… وإجو مبارح انتخبو، وما رح قلّك وين..!! وهنّي مش ساكنين بلبنان، وما بيعرفو لبنان. وعملولُن ملفات مزورّة، وبُرطل رئيس البلدية، والمختار، وسلطات كتيري إدارية وقبضو مصاري بهيداك الوقت لحتى يحطّو هالشخص المجنّس بضيعة فلانية، أو بمنطقة محددة.

مش معقول نشوّه سمعة الناس اليوم.. بدّي إسأل إذا تشوّه العهد، وإذا رئيس الجمهورية قدّم إستقالتو وفَل.. ما بتنهار الدولة اللبنانية، والإقتصاد اللبناني…!!

التوطين

توطين الفسلطينيي لازم ننتبهلو. وقت بيطلع بلجنة إنّو في 170 الف فلسطيني.. شو عَم يقولولك: ما بتِحرز في 170 الف فلسطيني، وطّنهم، حتى يصير في صلح بيننا وبين اسرائيل.

طيّب إذا أنا مديون بقيمة بِ 200 الف $ ، ومش عم إقدر سدّد.. وجيت لعندك قلتلك، عطيني 5000 $ وبردلّك ياهُن بعد يومان، أتصدقني..!! ؛ بتعطيني المصاري الاّ إذا كان في هدف منّك الي.. طيّب بلد مديون 190 مليار $ دين، وعارفين مش رح نوفي الدين.. كيف مع 11 مليار $.. بركي بكرا قالولنا: هالديون الخارجية يللي هيّي 40% منعفيكم منها، بس وطنّو الفلسطينيي.. نحنا عَم نشتغل سياسة وبدنا نفكّر..

اليوم بالأردن في إضرابات، لأنّو في ضغط لتوطين الفلطينيي بالأردن.. 400 الف فلسطيني بلبنان إذا عطينا الجنسية لَ 4 أو 5 مش توطين، في اسباب إنسانية او رفع ظلم تُجبرك بتوطينهم.. والرئيس ترامب رغم انّو علناً ضدّ الفلسطينيين، كم يوجد فلسطسيني أميركي أخذ الجنسية في حكمه..؟

الإستراتيجية الدفاعية

الترقية والأقدميات أمور خاصة، وسريّة. وهكذا بخصوص مرسوم الجنسية.. تصوّر إنّو استراتيجية الدفاعية يريدون مناقشتها علناً.. خيّي يسموها إستراتيجية سياسية وقولو بدنا نشلّح حزب الله سلاحو.. بس ما يسموها إستراتيجية دفاعية..

الإستراتيجية الدفاعية تُدرس بثالث طابق تحت الأرض، فيها عسكريين فقط. ومستشارين وخبراء عسكريين… وما فيها لا حزب الله ولا تيار وطني حرّ، ولا قوات لبنانية.. ولا حتى رئيس الجمهورية أو غيره من الرؤساء.. فيما بعد تُعرض على رئاسة الجمهورية لوجود المجلس الأعلى للدفاع وترؤسه إياّه..

الثنائي المسيحي

لازم يكون في تفاهم بين التيار الوطني الحر والقوات اللبنانية.. كما الثنائية الشيعية. بدّي قول شغلة، أنا كمسيحي إنّو بس شوف إبني مهندس قاعِد بالبيت، ومتخرّج من اليسوعية ما بيشتغل، لأنو ما في وظيفة، وما بدّي يسافر.. ما بتنقهر..؟؟

كأنو اللي عملو الحرب اللبنانيي هنّي المسيحيين.. واحد هجروه على فرنسا، وواحد حطّوه بالحبس.. لكن هلق بتصرفاتنا كتيار وطني حرّ وكقوات لبنانية عَم نقلُّن معكم حق..

هلق نحنا ماشيين بلبنان، بيللي قالو المرحوم رفيق الحريري، وقفّنا العد بين المسيحيين والإسلام..!!! 

طيّب بعد 10 سنين، إذا إجاك واحد بقلّك: أنا بدّي عِدّ.. منقلّو: عَ مهلك حتى نتفّق بين التيار الوطني الحرّ والقوات اللبنانية،نحنا عَم نقتّل بعضنا..!! ونحنا في ديمقراطية بين بعضنا… !!!

حبيبي يا في ديمقراطية بتِمشي على الكلّ، أو ما بتِمشي على حدا.. لبنان بلا مسيحيين ينهار. ولبنان بلا مسلمين ينهار.. انا ما بِقبل يقول السيّد نصرالله يقول: بدنا نصالحُن مع بعضن..!!

كيف يعني بدّك تصالحُن مع بعضن.. بدّو يصالح تيار المردة مع القوات ومع الكتائب ومع التيار الوطني الحرّ..!! ليه هودي هنّي المشكلة بالبلد..!!! 

في مشاكل كتير بالبلد.. ليه ما في مشكلة بين أمل وحزب الله..؟؟ مبلا في مشكلة بس ليك كيف ضابينا، ما أحلاهُم.. خليّنا نِنحسِد منهم ونضبّ مشكلتنا لمصلحة البلد.

رصد Agoraleaks.com