Agoraleaks Agoraleaks
نَطَرْتني ل فلّيت …. وجيت تكتب مجدك ع ارض القداسة، يللي وسخوها سياسيينا بزبالتن …كان لازم كون حدّك .، يا نضيف الكف يا آدمي يا جنرال ..
عم نبّش على حجر ما بيحبّك … ما لقيت لاحجر ولا بشر …
اسمع : ايّاك والتخاذل ..كل حقيبة بتعطيها ليلّي بيستحقها.. يللي ما بيستاهلا ، اشحطو .. والبليه …
اسمع : علّمن كيف مصلحة الوطن فوق الجميع
خلّي…النبيه … يكون نبيه..
خلّي…الوليد .. يكون لبيّو ..
الكمال….خلّي … السلام … يصفّي ..تمام
خلّي .. السمير …. للعمر هوّي … السمير
ذكّر سليمان … ب سليمان الحكيم …
ايد وحدها ما بتزقّف… ريمون جباره صديقي، وقت الوقع حد الجامعة وهوّي مفلوج … زقّف ع طيزو … ل حتى حدا يسمعو ويشيلو … وقلّي تعلّمت .. انو الانسان بإيد وحدة ما بيزقّف…
جنرال … امّنتك ع وطني يا كبير الوطن …اوعى تخلّي مار مارون يزعل منّك …
لازم تهّز الضمير وتذكّر الإكليروس انو اجرين السيد المسيح دعست بالجنوب…
ما تخافوا .. ولا تتشنشلوا بالذهب…يسوع فات ع اورشليم ع الحمارة مش بالليموزين …
على مَر التاريخ.. الفرنسي..العثماني..السوري..وكتار يللي حبّو وطني وسكنوا فيه… ممنوع من اليوم وطالع شوف دمعة الختيار ع خدّو ، لأنو..ابنو بدّو يهاجر..تيلاقي شغل…
اسمع…انا نايم ب نعشي وسكران بهالمنحوته من ايدين رودي رحمه.. وكل يوم بكتب قصيدي ل شعب لبنان العظيم …….
….انت هلّق صرت محلّي ضمير الوطن
mon general …
آلهة صور وصيدون والشمس والبحر.. ناطرين يحتفلوا ب عرس أدونيس وعشتروت ب أفقا ع ضفاف نهر ابراهيم مطرح ما كانوا يبوسوا بعضن .. وما يعتلوا هم بكرا.. ولقمة العيش.. بدّي منّك ترجّعلي نهر الكلب ، نهر الذئب…ت نطلب منّو المستحيلات.. وتوصل العالم ع اشغالها بلاقَرَف ، وعجقة ، وتعتير…تفيه…
جنرال خلّي جيشك … شامل … ع كل ارض الوطن ..ت يرجع جبينو عالي ..والاحزاب يضبضبولي حالن ت تبقى السيادة وحدا .. لأنو الفلسفة بتقول .. الإيد الوحدة ب تكسر الحيط … بينما الاصابع يللي موَزّعا بتتفكفك بضربة وحدة
بترولنا يا جنرال هوّي مش بالبحر.. لأنو بيخلص..
بترولنا هوّي شَرَف …. تضحية….وفا..
انت بتقول إني لبننت العالم … بدّي ياك تحافظ ع لبنانية لبنان..
لبنان مش سوري ..
ولا فلسطيني..
ولا ايراني..
ولا روسي …
ولا اميركاني..
لبنان كنعاني فينيقي.. ابجديتو من اللاتينية ، مستوحات من اللغة الفينيقية..
تذكّر يللي كنت قلّك ياه …
بقدّملك هالبيتين من الشعر… كنت حابب قلّك ياهن ب قصر الشعب …
يا قصر هالشعب الحاضر مجد لبنان…
ما ضَل حدا بهالكون ما زارك..
صرلك شهور ومعتّم ضَوّك وزعلان …
ع حباب راحو وغادروا دارك…
بساحة هالشَرَف قعيت البوم والغربان..
لَمّا ايادي الشر نهشت رجَالَك..
كنت التاريخ وصورة عن كل انسان ….
خاين كان ومْحِب كتموا اسرارك…..
مش هَم هَالدم اللي نزل من عنفوان ….
ودمع السقي الحيطان وحجارك…
المهم رجع المجد وصورة هالوطن لبنان…
وانرفع ع القصر صورة جنرالك…
جان بو جدعون….
