تسجيل صوتي لماهر باسيلا: أنا عَم حذّر والكلام يوصل.. فادي هوّي التيار الوطني الحرّ (Audio)

– خلّي تكون الأمور واضحة

***

تسجيل صوتي مسرّب لمنسّق مجالس اقضية الجنوب في التيار الوطني الحرّ “ماهر باسيلا” ضمن اجتماع للناشطين والمؤيدين: (5 أيار 2018)

إنّو يوصلو يرفعو دعوى على شاب من شبابنا نحنا من التيار الوطني الحرّ من مغدوشة ، كتب comment لأصحابو بقلب “غروب” group “واتس آب” داخلي للتيار الوطني الحر، وتوصل الوقاحة إنو يروحو يتشكّو عليه بالقضاء ، وهنّي بيعرفو إنو ما بتوصّل لمطرح بالقضاء.. لأنّو أصلاً الشكوى باطلة..

وهيدا الشي تدخّل بشؤوننا الداخلية، وأنا ببيتي بدّي إحكي اللي بدّي ياه، وما الك معي شو بدّي إحكي..

اللي سرّب نحنا رح نتصرّف معو.. بس إنو هنّي يِستسهلو يطالو واحد من شبابنا بالتيار الوطني الحرّ من مغدوشة، ويركبوها مع القضاء، يللي هوّي نحنا منَعرف لمين تابع، وهنّي ازلام عندو وتابعين الو..

نحنا ما رح نِقبلا ، وكلنا رح نوقف حدّو لهالشَب.. خلّي تكون الأمور واضحة، واللي بدّو يوقف معو بدّو يكون محضّر حالو، نحنا بايام السوريين ما فِرقت معنا من حدا.. مش قاشعينون، ميشان ما قلكم “برغش”.. بس نحنا ما منتصرّف بهيدي الطريقة…

نحنا ما منِتصرّف وما منستعمل السلطة حتى نقمع غيرنا، بس لمّا بدّو يمدّ إيدو غيرنا علينا ، بدنا نِقطشا لهالإيد ، ونحنا منعرف كيف منِقطشها..

عم وجه هيدي الرسالة أنا، عبر كل واحد بدكم تِلتقو فيه، وتخبروه عن لساني، وانا بِتحمّل مسؤولية كلامي، وخاصة لمنسّق مغدوشة الموجود هون.

نحنا ما رح نِقبل رئيس بلدية يتدخل.. وبقانون الإنتخابات واضح، يمنع تدخلها بالإنتخابات.. ونحنا ما رح نِقبل حدا بفلك البلدية، يبلّش يِعمل هودي السعدنات على جماعتنا..

من الآخر خلّي الكلام يوصَل ، اللي بدّو قولو ، الكلام أكتر من هيك ، أوعا يفكرونا نحنا مش قاشعين ، ومش عارفين شو عَم يصير بقلب مقدوشة بالذات.. نحنا رئيس المكنة الإنتخابية تبع البلدية هوّي ذاتو ينكّل بالعالم ، وهوّي ذاتو يستلم المكنة الإنتخابية تبع خصمنا السياسي، ويوحي إنّو ما عَم يتدخّل بالإنتخابات.. في إحتمالين:

• يا ما مش عارفنا إنو عارفين
• يا بيعرف وغاطس لدِينَيه وكل أجوائو

ما رح نِسكت، وهالذكي يللي عَم يهدّد ، ومستلم المكنة الإنتخابية ، وعم يستخدم وظيفتو ليهدّد أشغال الناس والمؤسسات.. كمان قاشعينو.. ومنَعرف وقت بدنا ندِقّ فيه، كيف ندقّ فيه.. بس نحنا ما مِنهدّد ، نحنا منِفعل.. نحنا معروف عنّا، مِنترجم أقوالنا لأفعال..

أنا عَم حذّر.. والكلام يوصل.. ما فارقة معنا من حدا.. لأنو إذا ما وِصل الحديث ما مِنكون عَم نقدّم واجبنا..

التنكيل مش بس على هيدا الزلمي ، ويللي إسمو فادي حاطوم، هيدي مَسطرة صغيري، هنّي مفَكرين إنو نحنا شبابنا بيِتراجعو ، إذا قِدرو دقّو بفادي ..

فادي يعني أنا.. تكون واضحة..

فادي يعني التيار الوطني الحرّ…

فادي هوّي كل واحد منكم.. نحنا واصلين للمواجهة، وما فارقة معنا من حدا، واللي قادر يدّق لفادي يخلّي يجرّب..