Agoraleaks Agoraleaks
– جبيل لأهلها، وفكرّوا كتير منيح إذا بدكم تعايش..
***
كلمة المرشّح الشيعي في جبيل “ربيع عواد” في مهرجان التيار الوطني الحر 2018:
“من شاور الناس شاركهم عقولهم”، هيدا قول لإمام علي عليه الصلاة والسلام، إنطلقت منّو ، وشاورت أهلنا بجبيل، وعِطيوني ثِقتُن، واكتر من هيك.. عَطيوني محبتهم… من هون بلّش الحلم، والمشوار، وانطلق ربيع 2018 من جبيل.. واللي رح يصير بِ 7 أيار ربيع كل لبنان.
مشوارنا مشوار حرية، ونبض شباب.. مشوارنا حق ديمقراطي.. مشوارنا بِقول: إنو جبيل لأهلها، ولكل حدا بيِشبها، ولكل حدا مِتلنا..
مشوارنا بلّش وما فيشي بوقفنا… وما رح يوقف بوجنّا لا تهديد ، ولا وعيد ولا مال سياسي..
ما بيقدر يِعزلنا بظلّ هالقانون، اللي فتح مجال أمام طموحات الشباب كلها.. وامام كل واحد بيِملك حيثية، وحبّ لوطنو.. بِحقلّنا نحنا اللي بلشنا مسيرتنا بعهد ووعد..
أنا إبن علمات ابن جبيل، وَعدي الكم ضلّ حَدكم، على العهد وعلى الوعد
https://www.youtube.com/watch?v=RQofhSpk9A4&feature=youtu.be
وعد منّي إنّو خلّي كل ضيعة من ضيعنا، تِنذكر بمشاريع بالمجلس النيابي..
وعد نِرسم وطن يكون لبنان باقتصادو قوي، وغني ، وفرص عمل لكل شبابنا، اللي عَم نصَدرُّن للخارج بالآلاف، ونحنا بدنا نضلّن بلبنان وبأرضُن وبجبيل..
وعد منّي إنّو إبقى على العهد مع صاحب العهد ، وسيّد العهد فخامة الرئيس ميشال عون، ومع صاحب الوعد الصادق، سماحة السيّد حسن نصرالله..
من هون أجدّد الدعوة لتحكيم الضمير، فلحظة الوقوف وراء العازل، هيّي لحظة مقدسة، بهاللحظة فَكرو بمستقبل ولادكُن.. ومين بيعطي الأمل لشبابكم، ومين بيعطي إنماء وسياحة..
فكرّو إذا بدكم تعايش..
فكرّوا كتير منيح إذا بدكم تعايش..
وأهمّ الشي إنّو المال بِروح، بس نحنا باقيين ، واللي بيشتريكم بالمفرّق، رح يبيعكم بالجملة..
فكروا اليوم ميشان ما تِندمو عَ بكرا ، وبالأخير أؤكد إنّو محبة أرضنا وأهلنا ووطننا وجبيل بتضلّ هيي الأساس، ورح تبقا الأولوية والهدف..
إذا بدكم تتهموني بالتعصّب ، إيه أنا بِعترف أنا متعصّب لجبيليتي..
إذا الحفاظ على شبابنا هوّي تهمة، إيه أنا بِقبل بهالتهمة، وهيدا وسام على صدري..
لازم كلنا نَعرِف إنّو جبيل بتِبقى فوق الحسابات السياسية، وفوق التجاذبات الإنتخابية والمذهبية، ولازم كلنا نَعرف إنّو جبيل بِ 6 أيار رح تِكتُب بحروف أبجديتها، ربيع عواد..
عشتم ، وعاشت جبيل ، وعاش لبنان
