باسيل من الكورة لحزب القوات: ما تعيّرو حدا بلبنانيتو وإنتو ناطرين “حوالات” من دول خارجية (Audio)

– من الكورة رَح نِدفُن الكذبة، وتقوم الحقيقة…

***

كلمة رئيس التيار الوطني الحرّ جبران باسيل في مهرجان قضاء الكورة: (30 نيسان 2018)

مسا الخير لأهلنا بالكورة ورفقاتنا بالتيار الوطني الحر…

بدّي قلكم الحقيقة، الواحد بالورة ما بِلاقي كلماتو، لأنو هون

• الطيبة،
• الحضارة
• العلم،
• الخضار والطبيعة

هون كلشي حلو.. بس هون ناقِص شي أساسي. ناقص نايب من التيار الوطني الحرّ بالكورة.. وهيدا الشي يا إنتو بِتصلحو، حتى تحسنوا وضع الكورة ، يا إنتو بتِتركو متل منّو.. لأنو ما عَم إقدر إتخيّل أنا، إنو التيار الوطني الحرّ منتشر بكل المناطق وبالكورة، ويكون عنّا قانون نسبي، وما يكون في للتيار الوطني الحرّ نايب بالبرلمان اللبناني من الكورة.

هيدا الشي صعبان عليّ.. وانا بَعرِف وبأكّدلكن إنّو لايحتنا رح يكون في منّا نائب بالبرلمان اللبناني، وهيدا نصر جديد ، وتغيير أساسي حاصل بالكورة.. بس أنا بدّي يكون عنّا نائبين من الكورة بالبرلمان من لايحتنا نحنا.. وهيدا التحدّي إنتو اللي بَدكم تِعملو..

بَعرف إنّو التشويش عليكم كبير.. اليوم مثلاً سمعت أكتر شي ممكن يكون إهانة بحق أهل الكورة.. سمعت حدا عَم يقول لأهل الكورة، إنتو بدكم تحدّدو إذا الكورة سورية أو لبنانية..!!

ليه مطروح السؤال إذا الكورة سورية؟؟ حدا بذهنو بيسمح يوجّه هيك إهانة لكل واحد بالكورة، ويسأل أهلا شو ما كان إنتمائو السياسي، ومعتقدُن..!! ليه إذا كان واحد بالحزب السوري القومي الإجتماعي يللي هنّي منُّن معنا عَ اللايحة، ويللي هنّي أخصامنا باللايحة التانية.. بس نحنا ما مِنقول عن واحد بالكورة إنو هوّي سوري ومنّو لبناني.. شو ما كان حِزبو، ومعتقدو..

فِيُن ناس بلبنان، يكون عندُن هوى وسياسة تؤيد سورية، وفي ناس عَم يأيدو إيران، وفي ناس عَم يأيدو السعودية، وفي لبنانيي لليوم بداخلهم مع إسرائيل.. حدا عندو شك بهيدا الموضوع.. بس ما مِنقول عنُّن إنّن هنّي اسرائيليي، وما مِنقلُّن إذا بدكم تختارو هيدا القضاء إسرائيلي أو لبناني… إذا هيدا القضاء سعودي أو لبناني..

كل قضاء لبناني، هوّي لبناني.. ما حَدَن بِغيّرلو وجّو، وهويتو.. وكل أرض ضمن 10452 كلم2 هيّي أرض لبنانية، والكورة هيّي بقلب لبنان، وهيّي أرض لبنانية.

شو هالديماغوجيا هيدي، والإستخفاف بعقول الناس..؟ شو هالخيارات من قبل ناس ما أثبتو بعد إنّو هنّي سياديين..؟؟

بدّي إسألكم، لمّا شخص بيِحكي عن حالو إنّو هوّي سيادي، وببيع قرارو..!! دَخلكم شو هيّي السيادة؟؟ شو هيّي الحرية..؟؟ شو هوّي الإستقلال.؟؟ إنو بس الأرض تكون محتلّة..؟؟

طيّب إذا الأرض مش محتلّة، والعقل محتّل.. والقرار محتل.. وشخص قرارو مش بإيدو.. بكون سيّد وحرّ ومستقل، أو بِكون بايِع قرارو لغيرو، وبِكون تَبعي..

يللي بيِتخلّى عن رئيس حكومتو، ميشان دولة أجنبية تانية، بِكون سيادي، وحرّ ومستقل.. أو تبعي..؟؟

يللي اليوم بتخلّى عن شعبو، وبسقّط قانون إنتخابي كان بِحقّقلنا المناصفة لمرة واحدة ونهائية، بكل صراحة كِرمال دولة خارجية، على حساب شعبو الناس اللي بمثلّهم، وراح على لبنان فرصة قانون المناصفة، هيدا الشخص بكون حرّ وسيّد ومستقل..؟؟

ما حدا بيقدر يعيّر لبناني تاني بموضوع السيادة، إذا هوّي منّو سيادة أكتر… كل مرة عَم نِنجبر بلبنان عَم ندفع ثمن سياسات خاطئة، بسبب التبعية هيدي.. وين السياديين من موضوع النزوح السوري.. هنّي اللي مَعُن وزارات مسؤولة عن ملف النزوح السوري..؟ وينُن ما فَتحو تِمُّن ببروكسل، وكانو موجودين ببروكسل…!!!

وينُن ما فتحو تِمُّن عَ طاولة مجلس الوزراء، لمّا حِطيّنا ورقتنا عن النزوح السوري، وعارضوها وسقطت..!!!

إنو بس مِنقول إنّو نحنا ضدّ النزوح، او نحنا مِنعمل سياسة وطنية حقيقية لحلّ القضية.. ليه؟؟

لأنو في دول خارجية ما بدها تحلّ قضية النزوح السوري، وعَم يِخضعولا لرغبتها… هودي سياديين حتى يعيّر غيرو، ويسميهن سوريي او جنسية تانية..؟

لاق ما فينا نوصل لمحلّ يصير مشكوك بلبنانية الكورة؟؟ إذا عِملتْ خيار غير الخيار اللي هوّي فارضو عليا.. نحنا التيار الوطني الحرّ عنّا حسرة كيف مَرَقِت هالسنين، ونحَرمنا من الكورة، والكورة نحَرمِتْ منّا، لأنّو أكيد بِكون وضع الكورة احسن من هلق بكتير إنمائياً وسياسياً لو التيار الوطني الحرّ ممثل فِيا…

نحنا ما منِسمح لحالنا إذا أهل الكورة ما إختارونا إنّو نِعمِلُن سوريين مش لبنانيين..!!!

أكتر من يهك.. بيِنقال: إنّو اللي بأيّد لايحتنا، بِكون عَم يأيّد لايحة فِيا فساد..؟؟ غير إنّو شو بحمّل ضميرو.. شو هوّي الفساد..؟؟ في كذب عَم يِنكذب بملفات الكذاب، والخميس الماضي القرار بمجلس الوزراء اللي صَدر دحض كل الأكاذيب تَبَعُن، من ديرعمار للبواخر…

الفساد هوّي مش بس عمولة من أي مشروع داخلي.. الفساد كمان هوّي بس ياخود شخص عمولة من دولة أجنبية، حتى يِجي يربح إنتخابات على شعبو وناسو. بيستعمل مال أجنبي بيِشتري في أصوات اللبنانيين.. !!

يللي ناطِر حوالات من دول خارجية على حساباتو، حتى يعمل إنتخابات.. هيدا الفساد السياسي بِعَينو.. يللي عَم يِعمل هيك، ومعروف عَم يِعمل هيك.. ونحنا منعرف إنّو عَم يِعمل هيك.. ومبارحة عِمل هيك… وفي وثائق بِتقول إنّو عِمِل هيك.. هيدا بيقدر يقول للناس، يللي عم يلمّو الليرة من مواطنينُن وداعمينُن، حتى يقدرو يعملو نشاط إنتخابي متِل هيدا، وما بيقدرو يِنقلو عَ كل وسائل الإعلام.. لأنّو ما عِندُن قدرة مالية..

ما بدّي إحكي عم ماضي.. بدنا نقول راح الماضي مع الماضي.. بس اللي عاش كل تاريخو على مال الناس، بيِجي اليوم يِستقوي عليُن بمال الخارج..

• ساعة بيِستقوي عليُن بمال الخارج
• ساعة بيِستقوي عليُن سياسة الخارج
• ساعة بيِستقوي عليُن بسلاح الخارج، بكل الحروب اللي نعَمَلِت على لبنان، من حرب تموز 2006، او بالحروب اللي كانت عَم تِتحضرّ عَ لبنان..

نحنا السياديين بلحظتا من راسنا وقِفنا مع رئيس حكومتنا، وقلنا: ما إستقال، وما منِعتبرو أستقال، وكيف غيرنا قال : رئيس حكومتنا إستقال، وكتّر لأنو في دولة خارجية قالت إستقال..

أهلنا بالكورة ما تخلّو حدَن يغشكم بلحظة إنتخابية ليِسرق رأيكم عَ 4 سنين. إنتو اليوم امام فرصة تِعملو التغيير، ونحنا قدام مسؤولية تجاهكم.. وأحلى وعد منعطي للكورة إنو رح تكون بقلبنا وبِفكرنا، ورح نعاملها متل البترون وجبيل وكسروان والمتن.. لأنّو الكورة الها علينا كتير، ونحنا ظلمنا الكورة لأنو وصّلناها تصير لهالمرحلة يللي بيسمَح لحالو حدا عندو تمثيل بالكورة يشكّك بلبنانية الكورة، ويِحكي عنّا هيك..

أنا اليوم أدركت قديه أخطأنا بحق الكورة، وبقِلكم “الكورة الها منّا، وعلينا، ورح يكون الها منّا كل الاهتمام… وعَ مسؤوليتكم من اليوم للأحد تقولو للكورانيين، ما تغيرو بالإختيار، صححّوا الخيار، بدنا التيار الوطني يكون بنوابو موجود بالكورة، حتى تكون الكورة جزء من المشروع اللبناني الكبير، يللي ما في الو رأس، الاّ رئيس جمهوريتو..

مشروعنا هوّي الدولة اللبناتنية، وقرارو هوّي سيادي لبناني حرّ.. والكورة جزء من هيدا المشروع، وما عندا تلوين غير اللون اللبناني، وما عندا علم الاّ العلم اللبناني..

هيدي هيّ الكورة الخَضرا، اللي بِتشرّف تاريخ كل رجالاتها الكبار.. وشبابها متأملين بمستقبل واعد.. ونحنا رح نبني مستقبل قايِم على الحقيقة، وهنّي عَم يكذبو عليكم كذبة صغيري، حتى يلهوكم فِيا ويضيعوكن يوم الإنتخابات..

لاق مش هيك بتِستاهل الكورة، ومن الكورة بدنا نِدفُن الكذبة، وتقوم الحقيقة…

عشتم وعاشت الكورة، وعاش لبنان..

رصد Agoraleaks.com