جورج عطالله للمردة والقوميّي والقوات: نحنا التيار سنُنفّذ شعاراتكم لأن أقوالنا أفعال.. (Audio)

– إذا كان في حدا ما بيِنعَس هوي التيار الوطني الحرّ ورئيسو..

***

كلمة مرشّح التيار الوطني الحرّ عن المقعد الأرثوذكسي في قضاء الكورة ، في دائرة الشمال الأول: (30 نيسان 2018)

رح إحكي معكم شوية كورانيات.. وهالأمور حكيتا أنا وياكم على مرّ فترة طويلة من الزمن.. وتوجتا من 9 سنين، بس وقفت قدامكم، وقدام اهل الكورة، وقلنا إنو علينا عهد نِعمل تغيير حقيقي، حتى يِنتشل الكورة من مطرح لمطرح، حتى تواكب كلّ الوطن اللي سَيقنا بالـ2005.

للأسف ما إجت التوقعات على قدر الأصوات اللي نلناها بسنة 2009. هيدا الشي ما خلّانا نستسلم. يمكن عطانا دفع جديد، وقوة جديدي ومثابرة.. لأنو نحنا شعب ما بِموت.

نحنا أهل الكورة من شعب لبنان العظيم..

هيدا الشي خلّانا نِرجع نعدّ العدة، ونحضّر للإستحقاق..

وشوية إستلشاء أو شوية تخاذل أو شوية عدم جديّة، خسرتنا 9 سنين من عِمرنا ومن عمر الكورة، كان فيا تكون الكورة أحلى واقوى وأفعل..

هيدا الشي اليوم مطروح، على ضمائرنا كلنا سوا بالكورة. إنو نِعمل مقارنة بين فريق سياسي موجود من عشرات السنين، واستلم السلطة، وما حقّق شي، وبين فريق سياسي عِمرو بالحدّ الأقصى 7-8 سنين، وحقّق كتير..

هيدا الفريق السياسي بشَنطتو مئات المشاريع، اللي تنفذّت على الأرض اللبنانية، من شمال لبنان لجنوب لبنان، ومن بحرو لجبلو لَ ساحلو لَ بقاعو..

هيدا التيار حامِل مشاريع كتيري، هيدا التيار قدّم مشاريع كتيري، وهيداالتيار عَم يِتجابه وعَم يِتحارَب لحتى هيدي المشاريع ما تِتحقّق، لأنو إذا تحقّقت رح تِنقل لبنان والمواطن من حالة السيطرة عليه، وارتهانو واستعمالو عند الحاجة، لإنسان تابع.. لإنسان حر وسيّد…

هيدا تحديّنا اليوم، إنّو نحطّ كلنا سوا مقارنة كأنو قدام لوح بالمدرسة، ونحطّ شو عِمِل التيار الوطني الحرّ بسنوات، وشو غيرنا ما قِدِر عِمِل بـ40 سنة.. وهالمقارنة الموضوعية كفيلة وحدا إنّو تِنقل التمثيل الكوراني من الحالة الموجود فِيا لحالة تانية حتى تكون نواة لمرحلة جديدة، تصبح فيها الكورة بِمصاف الأقضية التانية..

نحنا اليوم مِش عَم نفتخر، وعَم نشوف حالنا على غيرنا.. لا بالوطنية ولا بالشغل.. نحنا عَم نشوف حالنا أحسن من غيرنا بالوطنية، وبالشغل.. لأنو أقوالنا أفعال.

نحنا كلشي منوعد فيه، بِكون سيف مسلّط على رقبتنا.. ونحنا اللي منِحمل السيف، ومنحطّو على رقبتنا، لأنو نحنا ناس أحرار، والحرّ بيلتزم بوَعدو وبنفذو..

هالحملة الكبيري اليوم اللي عَم تنشنّ علينا.. وعلى رئاسة التيار الوطني الحر.. وعلى مشاريع التيار الوطني الحرّ، الهدف منها واحد وحيد، هوّي منع نقل لبنان من حالة التبعية لحالة الحرية وبناء المؤسسات والدولة وكرامة الإنسان.

إذإ كان البعض بيطلق شعارات بالسياسة، وإذإ كان البعض بيطلق شعارات بالوطنية، وإذإ كان البعض بيطلق شعارات حزبية، نحنا مِنقلُّن:

نحنا التيار الوطني الحرّ نحنا دايماً وطننا على حق.. ونحنا شباب التيار الوطني الحرّ فينا القوة اللي بِتغيّر التاريخ، ونحنا القوة اللي فينا رَح تغيّر التاريخ… ونحنا التيار الوطني الحرّ اللي منِعتبر إنّو الكورة هيّي القلب،ونحنا الخط الأحمر حول الكورة… 

وإذا كان في حدا ما بيِنعَس هوي وزير التيار الوطني الحرّ ورئيسو، وهوّي اللي ما بيِنعَس.. وهوّي اللي بيعطي الدرس بالسهر.. 

موعدنا معكم بـ6 أيار متل هالوقت، حتى نبلّش ننتصر بالإنتصار، وبتمثيل جديد للكورة، عشتم وعاشت الكورة وعاش التيار الوطني الحرّ، وعاش لبنان

رصد Agoraleaks.com