أبو جودة ينقل أسئلة القوات والثنائي الشيعي والعونيين المعترضين.. ؟

– إذا تساعد بري نتقارب، والاّ سنتواجه.. وبمحاربة الفساد عنّا وعد صادق من السيّد حسن

***

جاد أبو جودة: حطيّت على فايسبوك، إنو شو ممكن الناس يحبو يِسألوك.. ومن بين هالأسئلة نِقيّت 3 أسئلة بِعبرّوا عن 3 أجواء..

(1)

جو القوات اللبنانية: ليه التيار الوطني الحرّ نِسي اليوم 26 نيسان ذكرى إنسحاب الجيش السوري، وما عِمِل شي بالمناسبة؟

جبران باسيل: هنّي ليه ما عِملو شي..؟ وحقيقة نحنا مش كل سنة منِعمل شي بِ 26 نيسان.. عَ كل حال بتعرِف ليه؟؟

لأنو اللي عمِلناه قبل 2005، بدُّن 100 سنة حتى يِعِملو.

(2)

جاد أبو جودة عن جو ناشطي الثنائي الشيعي: من بعد الإنتخابات ، شو آخرتا مع الرئيس بري، رَح نضلّ هيك طلعات ونَزلات.. ولوين؟؟

جبران باسيل: المسألة الها علاقة بمجاربة الفساد، وبناء الدولة. أد ما بيِتقرّب منّا.. نحنا بلد ما فينا نعيش بالفساد وبرعاية للفساد بالشكل اللي هوّي فيه..

إذا تساعدنا منتقارب، وإذا ما تساعدنا بدنا نتواجه ، وبدها تكون مواجهة كتير قوية. ونحنا في عنّا وعد صادق من السيّد حسن، إنو هوّي رح يكون على رأس محاربي الفساد..

(3)

جاد ابو جودة عن العونيي اللي عَم يسألو : طِلِع أكتر من شخص على قناة الـ”OTV” من المَفصولين أو اللي عِندُن مشاكل مع التيار الوطني الحر.. ليه ما تدخلت لتمنع إطلالتهم؟

جبران باسيل: لأنو الـ”OTV” مَجبورة بحسب القانون إنو تستضيف، وبَعدان خلّي الناس، خصوصي الرأي العام تبع الـ”OTV” يِتسمّع شو عَم يِحكو..؟؟

هيدي مرحلة من المراحل يللي التيار عم يِبني حالو، وينضِّف حالو، وشي كتير طبيعي وصحّي يللي عَم يصير.. وأعتقد إنو التجبرة مش بس نحنا عَم نِتعلّم منها، كل الشعب اللبناني والأحزاب اللبنانية ، يا ريت يِقدرو يعملو إنتخابات داخلية.

ونحنا منعرف قديه صعبة بمجتمعنا، ونحنا بهالسنتين عاملين 7 إنتخابات داخلية، منُّن واحدة للإنتخابات النيابية.. التجربة كتير حلوة وريحتنا كقيادة من إنّو نختار، وجعلنا الناس تختار..

رصد Agoraleaks.com

https://www.youtube.com/watch?v=JLQpibyqj94