سعيد طوق: 4 حواصل للائحة “لبنان القوي” والقوات قد تخسر أحد مقاعدها ببشري، وخيار وليم طوق خاطئ (Audio)

– بشري مش قوات، بشري من قبل القوات ومكملّة بعدا..

***

مقتطف من حديث المرشّح عن المقعد الماروني لقضاء بشري سعيد طوق: (23 نيسان 2018)

عَم خوض المعركة دعماً للعهد.. ومش غلط يكون في ببشري خيارين.. القوات اللبنانية حزب سياسي، وعندُن مشروعن ونهجُن. وأثبت بالممارسة إنو يتعارض مع واقع بشري.

المقاومة مش حزب. المقاومة عمرا 1400 سنة ببشري. ومفروض تكون بشري متكاملة مع زغرتا، وممتدة على الكورة، وعلى تواصل جيّد مع ولاد طرابلس، ومع البترون، ومع الشق البقاعي..

الناس بيَعرفو تماماً إنّو لم نميّز بالسياسة.. إشتغلنا قناعات ومبادئ، ولخدمة كل الناس.

إستُهدف بيتي بِ 3 قذايف، وأُصبت بقدمي لأنو إسمي سعيد طوق، ومع إعتقال سمير جعجع، كان لازم نلتّف حول بعضنا كولاد بشري، ونحنا نتميّز بهالشغلة.. ووقفنا حدّ القوات وحَدّ سمير جعجع اللي كان مظلوم.. وكل بشري وِقفِت.. ومش أنا وحدي.

أنا ولا مرّة كِنت حزبي، انا وِقِفت حَدّ أهلي. ولمّا صارت حادثة كنيسة سيدة النجاة، بيعرفو مين كان واقف..

وليم طوق

كل العالم ببشري بيَعرفوني.. لكن القوات اللبنانية هنيّ سَكّروا بوابُن. انا تركت بابي مفتوح لكل العالم..

مع إحترامي لكل العالم، الخيار اللي آخدو وليم طوق، مش خيار صائب بهالمرحلة بالذات، وبظل وجود الرئيس القوي، أقلّ شي بشري لازم تكون واقفة حدّو.. وقلتلو للشيخ وليم، عدّل خيارك وساعتها نتوحد..

بلايحتنا نحنا مُمكن نكون 4 حواصل إنتخابية:

• نائب بالبترون
• نائب بالكورة
• نائب بزغرتا
• نائب ببشري..

بدنا نشوف كيف بدها تتوزّع حواصل القوات اللبنانية.. وين بَدُّن يفضلو.. ببشري أو بالبترون.. القوات عندا 3 حواصل…

المتابعة

الناس بدها حدا يتابعها، ويهتمّ بأمورها.. يكون عايِش معُن.. الحزب عندو خيارات أخرى..

معركة الإنتخابات الرئاسية، مش من الشمال تُخاض. الإنتخابات الرئاسية تخضع لعامل داخلي، ولعامل إقليمي ودولي..

بشري مش قوات، بشري قبل القوات وبِتكفّي بعد القوات.. بشري

• جبران خليل جبران
• الأرز
• قنوبين
• قزحيا
• مار شربل

أنا طالِع من بيت اللي بِحكيه بنفذو.. الناس بتعرف إنو نحنا إشتغلنا ببشري، وما في نهار كنا بعاد عن الناس ومشاكلُن.. وما نَعِد الناس فيه، ننفذّه.. وأنا موجود ببشري، وبردّ على تلفوني، وبيتي مفتوح للناس… أكيد إذا بدّي قول شغلة مش أكيد منها، بقول مش أكيد منها.. بس بدّي أوعد بشغلة بدي نفذها.

نزلت عَم شوف مجموعة من شباب وادي قنوبين، مطلبُن، وحلمُن يوصلو على بيتُن ومقابرهم، وكنيستهم، بسيارة مش مزفتّة طريقا.. وهنّي عَم يقولو مطلبنا نشقّ الطريق.. إذا بدّو واحد ياخود “شوال ترابة” حتى يصلّح بيتو، بدّو ياخدو على الحمار.. وإذا صار في أزمة صحية ببيتو، ما في يوصل لعندو الصليب الأحمر..

الوادي مش لأهل المنطقة.. اليوم ما بِتلاقي 200 شخص بالوادي، وفي حوالي 5000 شخص مهاجر..

القوات

إذافي مسؤول بدنا نتواصل معو، فينا نعرف كيف؟؟ انا شخص من بشري، وقت طِلِع الدكتور جعجع من الحَبس، حِبيّت قلو: حمدلله عَ السلامة، طلبت موعد.. رغم كل يللي عاملو ياه، ما أخدت موعد..

عمّي سعيد سنة 1978، بالرغم من عمرو، كان حامل بارودتو وواقف مع شباب بشري.. نحنا عيلة عايشين مع العالم.. للأسف الشباب اللي راحو يدافعو عن لبنان وتركو بشري، للأسف تُركو.. وهيدا السبب اللي جعلني اترشّح.. لأنّو هودي الناس اللي ضايع حقّو ردلّن ياه، وأنا متحالف مع العهد، وعلى الأكيد مضمونة إنّو رح ردلّن ياه..

يُسأل، عن توظيف عدد من أبناء بشري وإعتراض القوات، يقول: 

أنا مِش مستحي، أصلاً بقاديشا كل حقوقنا مسلوبة. وأنا ما بشوف حدا مفروض يتوظّف بقاديشا من خارج المنطقة، وهالشباب قاعدة بلا شغل، وما بدها إختصاص، بدُّن يِسمحولنا فِيا، واللي مزعوج عندو وزارات بالحكومة يوظّف..

رصد Agoraleaks.com