Agoraleaks Agoraleaks
– عن تحالفات التيار والمرّ وسركيس سركيس وكورين الأشقر ورؤساء البلديات.. (التفاصيل)
***
مقتطف من حديث الوزير السابق الياس بو صعب، المرشح عن المقعد الأرثوذكسي في دائرة المتن عن التيار الوطني الحر: (20 نيسان 2018)
ما في شك إنّو كل واحد بالشأن العام معرّض انو ناس تِكتُب عنّو.. وانا أقبل النقد والناس هيّي اللي تَحكم..
حق كل إنسان يكتب اللي بدّو ياه، ولكن بس بصير في إختراع وافتراء على أمور، إذا سكت الإنسان بتِفتكر الناس إنّو الخبر مزبوط، وإذا رديتّ مفروض نوضّح للناس إنّو هيدا إفتراء..
نعم صار في أوّل دعوى أمام هيئة الإشراف على الإنتخابات ، ودعوى أمام النيابة العمة بجبل لبنان، لأنو ناشر موقع “الكلمة انلاين” الإستاذ سيمون أبي فاضل، نشر مقال باسم شخص ، وفي الكثير من الإفتراءات، وفيه كذب..
كانو عَم يقولو الياس بو صعب بِروح لمحل معيّن وكل نهار سبت، وبياخود مناقيش، وانا المحل مش داعِس فيه، واللي عَم يقولو بروح لعندو فيُن يسألو… لأنّو لمّا تقدمي دعوى قضائية، بدّو يجي القاضي يسأل عن الموضوع.. ما 1+1=2 مش 700..
ميشان هيك إضطرّ الناشر سحب المقال، بطلب أحد الأشخاص.. وبرّر: إنو لم ينتبه، وقال، إنو أوقات يتمّ تنزيل هيك أخبار، وما بكون قارئها، وعِرف بالموضوع العام..
ولكن الشخص اللي تدخل يللي هوّي صديقو لناشر الموقع، قال: سَحب الخبر، بس بدّك تهتّم فيه؟
سألتو شو يعني بدّي إهتمّ فيه؟؟
قال: يعني إعطيه قِرشين.. عَم يقول بدّو 25 ألف $..
قلتلو: أنا بدّي إدفع 25 الف % حتى يبطّل حدا يكتب عنّي كذب..
كيف هالمنطق؟؟ أولاً ما عندي شي خبّيه.. ولا عندي بخشى حدا يكتبو عنّي.. ورِحت للقضاء..
حاول يِنكر، ولكن من بعدا، أرسل رسالة نصية بالإنكليزي، إنّو “خِلصت اللعبة، وبكرا نهار جديد”.
رديّت قلتلو: شو يعني تهديد.. قال: لاق ما بهدّد الناس اللي مسالمين اللي مِتلك، إنّو عَم يِتمسخَر.. ومن بعد 6 ساعات تقريباً بلش ينشر بالمقالات، وهيّي عن أمور منشورة سابقاً وموضحّة وما فيها شي..
اليوم في قضاء، يا بيطلّع هوّي مُخطئ والقضاء يحكم، يا لاق، وبالتالي مش ممكن إربح دعوى إذا ما فيها أدلة، وانا أتحفظ عن جزء منها.. أكيد من بعد المقابلة رح نشوف مقالات أكتر، حتى القضاء يقول كلمتو.. بس كل هيدي المقالات ما بِتقدّم ولا بتأخّر عند المواطن اللبناني…
يُسأل: ليه حتى يكتبو عنّك أو حتى يِستهدفوك؟ يردّ الياس بو صعب:
أنا بِقدر شك، ورح إترك القضاء حتى يِحكم… بس اللي صار مع ناشر موقع “الكلمة انلاين” الإستاذ سيمون بو فاضل، في إثباتات. ما بعرف هوّي عندو خيال واسح، بيقدر يكتب اللي بدّو ياه… بس آخر النهار بالوقائع بين إيديّي دامغة.. والشخص اللي نقل هيدا الكلام (إستأذنتو قبل) مستعد إنّو يِشهد، وأكّد إنّو يشهد على ذلك..
وعلى التلفون قلّي بالمباشر: إنّو أنا وقت كنت عَم قول عن المصاري، كنت عَم قولها بشكل مزحة.. لاق منها مزحة، اليوم في إنتخابات نيابية، في بعض الأشخاص مش كلُّن، في مواقع الكترونية محترمة..
سياسياً ما بعرف، لكن هوّي برأيو، بيِضرب عصفورين بِفّرد حجر:
1) إذا استفاد مالياً بكون إستفاد
2) إذا ما إستفاد مالياً، بِروح لعند الفريق الآخر ، يللي بدّو يضرب قوة التيار الوطني الحرّ، والمرشّح الياس بو صعب، ويقلُّن أنا عَم أعمل معركة..
يُسأل: ليه تسموّن الصحافة، ولا تسموّن السياسيين؟ يردّ أبو صعب:
أي مرشّح أرثوذكسي تاني ، إن كان دولة الرئيس ميشال المر أو مرشّح على لائحة القوات اللبنانية، أو حدا.. بَعرف إنّو هوي قريب من المرّ، وأنا أكيد إنّو المر مش طالب منّو اللي عَم يِعملو.. ولكن في ناس بِتروح تقدّم خدمات من هالنوع، لحتى تقلُّن أنا معكم..
ميشال المر
أنا أحترم ميشال المرّ ، بس مش متل ما هوّي عَم يِكتب، انو أنا كنت من جماعتو..
بخصوص التحالف اللي لم يتم.. الأرقام تبع المكنة الإنتخابية للتيار الوطني الحرّ عَم تقول: لو إجا معنا ما بضفلنا نائب، يمكن ياخود نائب من قدامنا.. ميشان هيك إرتأينا ما نكون بلائحة واحدة.
بس بدّي قول شغلة، إنّو نحنا خدعنا او تخلينا، أو حاصرنا ميشال المر، اوّل شي بسنة 2009، دولة الرئيس المر ترك التيار وراح تحالف مع النائب سامي الجميل، وعملو نواب من ورا هيدا التحالف.
هوي ترك تحالفو مع التيار، وبالنهاية شخص معو 13.500 صوت، إذا معو 3-4 أشخاص، بيعمل نايب.. يعني ما في حدا يحاصر حدا.. اللي ما بيقدر يعمل نائب، هوّي الشخص اللي ما بيقدر يِعمل تحالف لحالو… بالتالي ما بِكون حدا عم يحاصرو، فريق إنتخاب المر يقول إنّو عندو اكتر من 13.500 صوت.. فكيف نكون عم نحاصرو إذا قادر يِعمل نائب بلا جميلة أحد..
سركيس سركيس
نوضّح ومنّا مضطرين.. لكن الكلام إنّو الهدف محاصرة المر، وهيدا الشي غلط. الإستاذ سركيس سركيس عَم يِحكي معنا من اشهر، والكل بيعرف..
ما اخدنا القرار بآخر مرشحين مارونيين (2) على اللايحة، الا وقت إعلنت قبل 24 ساعة من إعلان اللوائح رسمياً.. وسركيس سركيس كان عَم يفاوض معو، وعم يفاوض معنا من قبل.. وهوّي اختار بالنهاية وين عندو مصلحة بأي لائحة.. وما حدا بيقدر يضغط عليه. وهيك صار..
كورين الأشقر
بخصوص المرشحة يللي حُكي إنو أخدناها من لائحة المر.. انا اتصلت فيها، إذا ممكن أن تترشح الى جانبنا، سألتها عمّا إذا هي ملتزمة بأي لائحة.. وقالت: الإستاذ سركيس سركيس طلب مني اترشّح، ولكن ما حدا حكاني إدخل بأي لايحة، ولهذا السبب انضمّت للائحتنا.
رؤساء البلديات
ما بقا قادرين اليوم يديرو الناس مِتل ما بَدُّن، وإنو روحو إنتخبو باتجاه والاّ..
هيد والاّ ولّت الى غير رجعة، وأنا وصلّت رسالة معينة، أحد رؤساء البلديات بمكان ما، مَنَّن العالم، إنّو إذا انتو عم تحطو صورة معينة لشخص، بكرا بدكن رخصة.. قلنالو: إنّو هيدا الزمن ولّى الى غير رجعة.. ما منقبل نمارسها على حدا، وما حدا يمارسها على أي مواطن..
رصد Agoraleaks.com
