سرّ هام يكشفه أبو فاضل فيما يتعلق ببري وعلاقته بالقوات وشارل جبور يوافق.. (Audio)

– أبو فاضل لجبور: خطابك إستسلامي، عَم تحكي متل بعض المسلمين عم تعدّ..؟؟

***

مقتطف من حديث الكاتب السياسي جوزيف أبو فاضل لقناة الـ”LBC” ضمن برنامج “نهاركم سعيد”: (الجزء 2 – 12 نيسان 2018)

يقول مسؤول الدائرة الإعلامية في القوات اللبنانية شارل جبور:

بيِقدر اليوم المسلم يقلّك ، حبيبي تعا حتى قلّك.. عم تقلّي أحراج وصلاحيات رئاسة أولى.. شو عاجبك بالبلد، تعا نعدّ من أوّل جديد.. خطاب جوزيف أبو فاضل لهون بوصّل..

يردّ أبو فاضل:

نحنا ما كنّا نعدّ.. خطابك إستسلامي… ليك وين بعدو.. وين الشراكة؟؟

يقول جبور: تكون من خلال مشروع الدولة..

جوزيف أبو فاضل: ما نحنا بدنا الدولة.. 7 أيار قطعت خطوط تلفون حزب الله، حتى تسهل اسرائيل تقوم باغتيالات..

يسأل الإعلامي بسام ابو زيد: هل يوجد شراكة حقيقية بلبنان، يقول جبوّر:

في منطق تسوية ، كنت بمنطق حرب، ورحنا عَ منطق سلام.. متل ما عَم يحكي مسألة تثير بلبلة..

يقول أبو فاضل: بدّي حقّي.. أنا مع المقاومة بس بدّي حقّي.. لو بدُّن شراكة حقيقية ودولة مزبوطا، ما كانو تآمرو على سعد الحريري وحجزو بالسعودية.. مين وِقِف معو..؟؟

يسأل أبو زيد: هل الفرقاء المسلمين ما الهن علاقة بموضوع الغبن المسيحي..؟؟ يقول جوزيف ابو فاضل:

مبلا كلّن عليهم حق.. بس إنّو مسؤول الإعلام بالقوات شارل جبور يستميت للدفاع عن الطائف، وهنّي اللي تنازلو عن صلاحيات رئاسة الجمهورية.. عَ القليلة بِتركو للرئيس صلاحيات متل أي وزير..

مين عارض قانون اللقاء الأرثوذكسي؟؟ كان برّي وافق عليه لو وافق جميع المسيحيين..؟؟ بتعرف شو عَم يقولو غير مطارح، ” يا عمي هالطائفة المارونية، كيف تنازلت عن كلشي؟؟”.

يُسأل: هل يوجد من مبادرة لدى رئيس الجمهورية لإستعادة الصلاحيات..؟؟ يقول أبو فاضل:

الإسلام ما بدُّن.. لأنو بيعتبرو هيدا الطائف إنجاز ونقطة عَ السطر.

بسام أبو زيد: مين المسلمين، السنة أم الشيعة؟ يقول أبو فاضل:

كلُّن. شارعهم ما بيِحمل.. صار بلد طائفي، وكل واحد بتِدقلّو بصلاحياتو، بقول: لاق.. وأمام هيدا الواقع ، علينا نعمل توازن بكل الوظائف، متل ما عَم يعمل فخامة الرئيس.. هوّي عَم يردّ التوازن شوي شوي، في حين إنّو بعض المسيحيين ما عندُن سهام الاّ، فخامة الرئيس والوزير جبران باسيل، والوزير جريصاتي، والوزير سيزار أبي خليل..

مش ممنوع الإختلاف، ولكن ما فينا نِنكُر الحقيقة.. وهلق عن جديد بيِطلع الدكتور جعجع لعند فخامة الرئيس، بقلّو : أنا بتصرفك، وبنسّق هوّي وياه.. هلق يمكن تصير بعد 6 أيار

كمان الوزير فرنجية مختلف، لكن الضرورات تُبيح المحظورات…

كمان حزب الكتائب، كل يوم صريخ وعويل، وعييط.. إنّو راحِت الدولة.. ما القوات والكتائب ما كانو بالدولة من سنة 2005.. وما ننسى التحالف الرباعي..

قال، بروحو بهِتّو التيار (مع إحترامي للجماعة الإسلامية) تحالفت مع الجماعة الإسلامية، طيّب ما خليّتولو محلّ الاّ الجماعة الإسلامية..

لم نسمع كلمة عن اللاجئين السوريين المليونين شخص.. مزايدات بس بموضوع الكهربا..

قال فخامة الرئيس إنو بعد في إستراتيجية دفاعية، لشو كل خطاب القوات اللبنانية..

القوات

ورداً على توقع شارل جبور، أن تكون كتلة القوات 15 نائباً.. قال أبو فاضل: 8 – 9 نواب.. لأنو بالمتن لا تملكون حاصل إنتخابي.. وفي كسروان أيضاً..

يقول شارل جبور: عنّا حاصلان ونصف.. ادي معلوف وجيسيكا عازار..

يسأل بسام ابو زيد: لو راح سركيس سركيس كان أمنو حاصل، يقول أبو فاضل:

كانو ما عَطيو حاصل. بس ما عندو ثقة معُن. لأنو هنّي شطبّو سنة 2009، القوات اللبنانية والكتائب. هلق قوتو بيِجي لعند التيار، معو نص حاصل، معو تلات أرباع حاصل.. عندو صوت تفضيلي بيطلع.. بس مع القوات ما عندو حاصل، بروح يعطيهم قوة حتى يِطلع إدي أبي اللمع.. انا عم إحكي إنتخابات..

الكتائب عندُن حاصل ونصف، القوات ليس لديهم حاصل بالمتن..

يقاطعه جبور: بدّي خليك تعتذر على التلفزيون.. يردّ أبو فاضل: لاق ما بعتذر… بقلّك صحتين. بس إجا ما جِبت حاصل، شو بتقول:

جبور: بقول أنا كنت غلطان..

أبو فاضل: في حال بدّو حَدن يربح من عندكم، هوّي ميشال مكتف..

بالنهاية إن كان القوات أو الكتائب، إذا جابو حاصل او 3 حواصل، شو رَح ياخدو من دربي..!!

التيار الوطني الحرّ مرتاح على حواصله الإنتخابية وين ما كان. اللي عَم يشدّ حتى يجيب الحاصل، هنّي الكتائب والقوات.. أكيد القوات أقوى بكتير من الكتائب، بس بالمتن لاق، بيت الجميل عندُن  ثقل أساسي، وفعاليات وشخصيات على صعيد المتن من التيار الوطني الحرّ أقوى بكتير من أيدي أبي اللمع.. وهنّي القوات والكتائب بياخدو من بعضُن.

المستقبل

بالأمكنة اللي فيها ثقل سنّة، تحالف المستقبل ليس مع التيار.. ولذلك بس يقول جعجع، إنّو هوّي مطوّق.. لاق..؟

بالزمانات بس إجو يغيرو وزرا القوات بالحكومة، بعد قضية الرئيس الحريري، وِقف بوجُّن الرئيس نبيه بري، صح أو لاق؟؟

يردّ شارل جبور: صح..

إذاً الرئيس بري منّو تارك القوات..

وليد جنبلاط متحالف مع القوات..

الحريري متحالف مع القوات..

الكتائب متحالف مع القوات..

والتيار الوطني الحرّ واضع تفاهم.. لذلك مين بدّو يطوّق جعجع..؟

التطويق يللي عَم يصير للتيار الوطني الحر، واضحة.. 

بخصوص حزب الله لديه بلوكات شيعية، وهو وأمل رشحّوا 27 شخصية شيعية، وقالو للناس تعو نتفاهم.. ومن هلق لَ 6 أيار، كل الخطاب السياسي بصير بالأرشيف، وهيدا القانون الإنتخابي يحتّم على الجميع ان يتحالف مع من يناسبه.

سؤال إذا القوات والكتائب بحبّو بعضُن كتير، ليه بدّو ينزلو مع بعض وبِخسرو بعضُن، لشو بدّن ينزلو مع بعض..

***

شارل جبور: المحور الإيراني قتل بشير الجميل وأبو فاضل: لا يُغيّر بقومٍ ، حتى يُغيروا بأنفسهم (Audio)

شارل جبور: المحور الإيراني قتل بشير الجميل وأبو فاضل: لا يُغيّر بقومٍ ، حتى يُغيروا بأنفسهم (Audio)