خاص – “الكلمة”: تحوّل شَب فجأة.. (Audio)

✝ نقطة عَ السطر… (مارينا شليطا)🙏

شَب عايِش حياتو برفاهية مطلقة، وأنانية، وكان رافض لكلّ القيم.. حاوَل بيّو أكتر من مرّة يِقنعو يِنتمي لجماعة كنسية، وكان يُرفض…

بإحدى المناسبات، كان متواجَد بالصدفة بقلب الكنيسة، وكان الكاهن عم يوعَظ ، وقال بختام وعظتو: نقطة عَ السطر محورية بحياة المسحي، ما في مسيحي تعرّف على يسوع، وبِقيِت حياتو متل ما هيّي، لا بل كان عندو نقطة مفصلية ومحورية لإنطلاقة جديدة، وسكَت.. وكمّل القداس..

من بعد هالنقطة عَ السطر، تأثّر الشَب ، ورِجِع على البيت، وقلّو لبَيّو : بتَعرِف، تمنيّت حدا يِجي يقِلّي: حُطّ نقطة على السطر، على كلشي ارتكبتو سيء بحياتك الماضية، ولكن اليوم لمّا سمعتا، حسيّتا إنقالتْ الي، فقرّرت بلّش حياة جديدي، وانطلاقة جديدي بصفحة بيضا، ما فِيا ولا أيّ سواد…

***

شو مهم نحنا كمان بهالصوم، يكون عنّا نقطة على السطر، على كلشي بِبَيعِدنا عن الله..

شو حلو يكون عنّا نقطة على السطر على كلشي عم يكبّلنا ، وعَم يخليّنا محلنا..

شو مهم يكون عنّا نقطة عَ السطر حتى يكون عنّا إنطلاقة جديدي مع الآخرين..

شو مهم كمان نعرف إنو مع يسوع ما فينا نِبقى متل ما نحنا، لأنو ما حَدا تعرّف عليه، وبِقي متل ما هوّي، لأنّو يسوع بكمّل ، وبِجمِّل، وبِبَيّض صفحة ماضينا وحاضرنا ومستقبلنا..