Agoraleaks Agoraleaks
✝ كَمْ حبل لازم نقطع حتى نثبّت إيماننا… (مارينا شليطا) 🙏
يُحكى أنّو رياضي قرّر يتسلق أعلى وأخطر قمة، وبعد سنين من التحضير، قرّر يحقّق حلمو، بالقيام بهالمغامرة لوحدو…
بتمرّ الساعات بسرعة، لدرجة إنّو بحلّ الليل، وكان هالرياضي بنصّ الطريق، فما تراجع، لأنّو التراجع بالنسبة الو كان أكتر خطورة من إكمال هالمهمّة…
بعد ساعات متواصلة من التسلّق، حقّق حلمو، ووصل عالقمّة… وهوّي هونيك، بْيفقد توازنو ، وبصير معلّق بين السما والأرض، وصارت كل لحظات حياتو تقطع…
وكان الرجال متمسّك بحبل، صار يصلّي بقوة: خلصّني يا رب.. انت وحدك خلاصي..
بيسمع صوت عم يقلّو: بتآمن إني قادر خلصك؟؟
جاوبو: اكيد يا رب، ما حدا غيرك قادر ينقذني.. ؟؟
بقلّو الصوت، قصّ الحبل…
وخاف هالرياضي، وصار يتمسك أكتر وأكتر بهالحبل… وبِتقولْ القصة، إنّو بعد يومين، بلاقي فريق الإنقاذ جثة هالرياضي على ارتفاع مترين، من سطح الأرض، متمسّك بالحبل، ومتجمّد من البرد…
***
ونحنا كَمْ حبل لازم نقطعْ، لإنقاذ حياتنا…!!
كَمْ حبل لازم نقطع حتى نثبّت إيماننا.. إيماننا القوي، والعميق، اللي ما بكونْ فيه أي تردّد، واي شك…!!
قديه مهم نتكّل على الله، ونعرف إنو أوقات، تخلّينا عن الحبال اللي بتشدنا وبتعلقنا بين الأرض والسما، بتنقذ حياتنا بكتير من الأوقات…
