Agoraleaks Agoraleaks
✝ هدية كل يوم… (مارينا شليطا) 🙏
في رجال، كل يوم قبل ما يروح عَ شغلو، بيقطع على الكنيسة، وبيقعد فترة، قدام بيت القربان، من دون ما يحكي..
وقبل ما يفلّ، بقول بصوت عالي: بِشكرِك يا رب، على هالهدية..
صار في شخص يراقبو، وهونيك نهار بقلّو:
- شو هيئتك محظوظ، كل يوم عندك هدية..
- مْنَيْنْ عِنْدَك هالهدايا كلها؟؟
بقلو: من ربنا..
سألو: وشو عم يعطيك كل يوم، نيّال قلبك، كل يوم هدية جديدي..!
قلّو: عم يهديني متلك، نهار جديد…
***
تعوا اليوم بهالنهار الجديد، نفكّر إنّو هالنهار، هوّي هدية النا من ربنا، بعد كل هالعطايا الموجودة..
نفكّر، إنّو نظرنا، وسمعنا، وحركتنا، وعيلتنا، وعَملنا، وكل لحظة بهالنهار، هيّي لحظة مقدسة، يعني هيّي أجمل هدية من الله…
