خاص – “الكلمة”: حطّ الكباية من إيدك.. (Audio)

✝ حتى يكون صومنا الو معنى جديد... (مارينا شليطا) 🙏

أستاذ ببلّش صفّو، هوّي وحامل كباية مليانة ماي.. بيسأل تلاميذو: قديه بتقولو وزن هالكباية..؟؟

جاوبو الأول: شي 100 غرام..
التاني بقلّو: انا بقول 200 غرام..

هون الإستاذ بقلُّن: ما بخبّي عليكُن، انا متلكن، ما بعرف قديه وزن هالكباية، ولا بهمني أعرف، بس بدّي أعرف منكم، شو بصير إذا حملت الكباية لمدة دقيقتين.. !!

بجاوبو تلاميذو: ما بصير شي..

قلّن لمدة ساعتتين؟؟ قالولو: بتتعب شوي..

بقلّن: إذا كانت مدة نهار كامل..!! جاوبو: إيدك بتصير توجعك، وأكد تعبك بصير ما الو حدود..

هون بيختصر الإستاذ وبقول: على الأكيد، إنّو وزن الكباية، ما تغيّر من دقيقة للتانية، ولا من ساعة لتانية، بس شو المطلوب برأيكم اعمل هلق، حتى ريّح إيدي لأنو إيدي كتير عم توجعني أنا وحامل الكباية..!!

بجاوبو تلاميذو بصوت واحد: حطّ الكباية من إيدك…

***

بنهاية هالأسبوع، شو حلو نوضع نحنا الكباية شوي من أيدينا.. تعوا نحطّ، مشاغلنا ، متاعبنا ، أفراحنا.. وكلشي بين إيدَين الله، حتى تكون إنطلاقتنا جديدة، ومتجددّة بالأسبوع المقبل..

تعوا كمان نوضع، كباياتنا المليانة أوقات من بعض ، حتى ترجع تفيض النعمة بقلوبنا، ونقدر نحمل هالتجدّد، والفرح والسلام للآخرين، حتى يكون صومنا الو معنى جديد..