طوني خليفة: أخشى تسلل ناس فكرُن مش لبناني للمجلس النيابي.. وبالمجتمع المدني في ناس مُسيّسين عضم ! (Audio)

– مار شربل “عِكَيزتي”وإمّي كانت تدعيلي “الله يِبعد ولاد الحرام”.. ومع الأسف البعض يشتم كرمال الـ”Rating”

***

مقتطف من حديث الإعلامي طوني خليفة ضمن برنامج “سطوح بيروت” مع الإعلامية داليا داغر: ( شباط 2018 )

اليوم اللي عم يصير على الشاشات مش مقبول.. بشتم كرمال الـ”Rating”؟؟

وصلنا لدرجة إنّو رؤسا المحطات بلبنان، عم يشتمو بعضن بهيدا الشكل، هيدا “Rating“؟؟

يلعن ابو الـ”Rating” إذا هيك بدّو يكون..!!

فينا نمزح، وفينا ننتقد.. بس بطريقة نعرف، إنو حريتي بتخلص لمّا بدها تبلش تدق بكرامتك، بشخصيتك..؟؟

الإنتخابات

أنا خَيفان من تسلّل بعض الأشخاص الى داخل مجلس النواب، وهودي الأشخاص ما بيشبهو لا لبنان، ولا ثقافة لبنان، ولا مجتمع لبنان.. وبقصد كتير ناس.. وبعتقد رح يتسللو من أماكن كتيري للداخل. وما بدّي حدّد..

يُسأل من قصده.. هل هو المجتمع المدني، يقول:

• ما بدنا نحدّد.. بس بما يتعلق بالمجتمع المدني، أتفاجأ إنّو داخل المجتمع المدني مترشّح ناس هنّي مُسيسين للعضم..
• أنا بفهم إنو المجتمع المدني مفروض يكون غير مُسيّس، يعني أنا ما فيّي كون محسوب على فريق سياسي معيّن، وكون نازل ضمن فريق المجتمع المدني.. أنا اليوم تيار وطني حرّ، بنزل عَ لائحة التيار، مش إذا التيار ما أخدني، بروح بنزلْ بلائحة بالمجتمع المدني..
• انا أخشى عَنْجَدّْ من تسلل بعض الأشخاص الى داخل المجلس، بثقافة على الأقل شخصياً لا تشبهني..
• أنا منّي عم هاجم المجتمع المدني، (ما تنفهم غلط) انا خايف من تسلل بعض الناس من خلال المجتمع المدني، يركبو الموجة حتى يوصلو، ولمّا يصيرو جوّا، ما الهم علاقة فيه لا من قريب ولا من بعيد..

العائلة والإيمان

• إسم إبني “نور شربل”، لأنو مار شربل شفيعي، وهوّي “العِكَيْزة” التي ترافقني كل حياتي…
• الإيمان موجود وكبير، بس للأسف بعد ما وصلت للإرتقاء الى درجة الإيمان الكليّ، يللي عم إبرمْ عليه.. أنا أقرّ بوجود الله.. إيماني به مُطلق وكبير، وقوي.. ولكن بعدني عم إبرمْ على الإيمان المطلق.. لأني أنا ضدّ مقولة (أو مش مقتنع فيها) طوبى لمن آمن ولم يرى.. حابب إقتنع بكل شي..
• مار شربل مش “عكازتي” وبس، بِحكيه (قلبياً) ولكن أنا شخصياً عايش صراع بس إطلع على مار شربل أو لمّأ روح أيضاً إسلامياً، واتواجد بأماكن فيها صلاة، واتطلع قدامي درجة الإيمان اللي موجودي.. أنا بْغَار.. وعَم إبرم.. لهذا السبب أنا بصراع أكتر شي مع رجال الدين..
• انا مش من الأشخاص المُوَسْوسين، انا مُوَسوس، وانا إنسان مَرَق عليّ كتير بالحياة.. كان في إمّي الله يرحما، كنت صغير، – من الصور النادرة اللي بحتفظ فيها – كنت كل ما كون ضاهرْ من الباب، تقلّي: الله يِبعدْ عنّك ولاد الحرام.. وما كنت إفهم شو يعني ولاد الحرام..!!
  كنت إعتبرا دعوة وتُقال.. حتى نْبعتلي ولاد حرام.. ولكن
  – بصلاة إمّي،
  – ايماني،
  – وكوني إنسان بخاف ربي.. تغلبت عليها..
  اللي بخاف منّو، إنّو أنا قدرت امرقْ فيه، واطع منّو.. لا سمح الله ولادي يصادفُن ولاد حرام..
• لمّا نقيس الآخر علينا… يعني لو أنا محل الآخر، أسأل شو ممكن اتصرف؟؟ لكن أتفاجأ إنو هيدا الشخص مش أنا، لأنو مستعدّ يعملْ أي شي…
• عمّي عوّض لي فقدان بيّي وإمّي… قلّي: الشكوى لغير الله مذلّة.. لأنو لا بدّ ولا يرجع يستعملوها ضدك، لو أقرب الناس..
• أنا كنت بفترة لا بوعيي، ولا بذكائي، في إشيا ولاد الحرام لقطوني بايدي، وأخدوني عليا.. ومار شربل اللي طلعّني منها..

المرأة

أنا مع المرأة وحقوق المرأة، ومع تقدّم المرأة على الرجل.. ومش مع المساواة، لأنّو المرأة تستطيع بأمور كثيرة أن تكون افضل من الرجل..

نزيح عن القوة المدنية، الله مخصّص المرأة بقوة هائلة، تقدر تتفوق فيها على الرجل..

الموقف الوحيد اللي اخدتو بحياتي (إعتبروه ضدّ المرأة وسيّسوه) إعتراضي على بعض الجمعيات، اللي كانت تُحرّض تحت ستار حماية المرأة، على زوجها، وعلى بيتها.. والحجّة إنّو الك حقوق روحي خديها.. ويطلعوهم على التلفزيونات.. يعني تطلع امرأة تخبّر جوزي بيضربني وكذا.. أنا كان إعتراضي، إّنو فينا نحلّ كل هالمشاكل بعيداً عن الإعلام، إلاّ إذا كان عندكم مصلحة هيدي الجمعيات، تطلعو هودي الناس على التلفزيونات، لأنو في جمعيات كبيري أوروبية وأميركية، على كلّ CD بيطلع لَ عندن، بيدفعولكم مصاري…. هيدا الموقف اللي اخدتو هوي مع المرأة لأنو عم يستخدموها لأمور مش لمصلحتها..

في يعيش رجل وحدو بالمجتمع..؟؟ ليه بدو يكون الرجل لَ وَحدو بالمجلس النيابي، كلشي لازم يكون تقاسم بالمسؤوليات…ولكن المشكلة عند المرأة أكتر من الرجال.. بآخر إحصاءات بأميركا بفترة ترشيح كلينتون بوجه ترامب، العنصر النسائي هوّي أكثر من عدد الرجال، ولكن المرأة لم تنتخب المرأة.. برأيي لينتخبوا النساء ، وما بيوصل الرجال بهذا العدد..

رصد Agoraleaks.com