نعمة الله أبي نصر: بعد كل هالشغل معقول إبرم 180 درجة، والرئيس بيعرف الإغراءات اللي إجتني (الجزء 1- Audio)

– بتقدر تسأل الجنرال روكز عن الإنتخابات.. وعن زيارة جعجع قلت لمجدلاني: بالشوالات بتحصدن. 
– عن تحالفات كسروان، عن العلاقة مع جعجع ومحافظة كسروان – جبيل وموقف خالد الضاهر..

***

مقتطف من حديث عضو تكتّل التغيير والإصلاح النائب نعمة الله أبي نصر: (16 شباط 2018)

لماذا عدم الترشّح..

• أنا أخدت القرار عن قناعة كلية، ومن أوّل ما صار في تمديد تالت مرّة للمجلس النيابي.. إنو أنا 18 سنة نائب، فعلاً صار في عندي غير إهتمامات.. مواقفي السياسية رح كفيها..
• الرجل اللي عندو مبدأ وخط سياسي، وعاشقو قبل النيابة وبعد النيابة، بصير مُدمن بالسياسة، رح كفّي العمل السياسي، بس ضمن إطار مختلف من خارج المجلس النيابي. سأدرس بعض الإقتراحات المقدمّة ، وسأسعى تطويرها..
• لم أسعى للترشّح للإنتخابات النيابية، وفيكن تسألوا الجنرال شامل روكز، إذا طلبت منه موعد.. بالعكس زارني ، وتحدثنا بكافة الأمور، الاّ أن أكون أنا مرشّح.. وطلب مني انتخبو، ورح إنتخبو… وناطرين نشوف مع مين التشكيلة.. وأنا علاقتي مباشرة مع فخامة الرئيس.

العلاقة مع عون

• مع عودة الرئيس عون سنة 2005، كان عم يفكّر العماد عون أن يترشّح في قضاء بعبدا، وأنا من شجعته على الترشّح في كسروان.. (بحبوّه..)
• عرضت على العماد عون تشكيل لائحة مشتركة مع القوات ، وكان جوابو: ايه ليش لاق.. وحاولنا، وما توفقنا.. ومن بعد سنتين، بسنة 2007 عملنا لجنة حوار بين التيار والقوات، وإجتمعت اللجنة بمكتبي أكثر من 9 مرات، وكان هدفها تقريب وجهات النظر بين الفريقين، وتلقينا وفد من الكحالة من أجل توحيد الخط المسيحي، كمدخل لخط وطني شامل..
• سنة 2005 العماد عون ما كان عارف قوته مزبوط.. أخصامو كانو عارفين قوته، وبوقتا طلعت قصة “التسونامي” بدّو يحلق للكل..
• بين كل النواب عام 2005، اختارني فقط للترشح ضمن لائحته، وكل الذين حواليه من نواب، هوي اللي عِمِلهم.. وأنا دخلت معو كنائب، وهو قلّي: منعمل لائحة سوا.. وأنا الوحيد اللي استقبلته على المطار ، كانت محصورة قصة الإستقبال بعائلته..
• معرفتي بشخص الجنرال عون، تعود لسنة 1995.. تساءلنا وين الزعماء المسيحيين؟؟ ناس بالحبس، وناس بالمنفى، وناس بالمنفى.. وشخصياً كنت عضواً بالرابطة المارونية والرئيس في حينها المرحوم جورج جبر، ومن الأعضاء الدكتور فيليب الخازن، والنائب السابق قبلان عيسى الخوري.. وفي حينها شكلنا وفد لأنو لا يمكن الإستمرار بالحالة السائدة..
• توجهنا بوفد الى باريس والتقينا ريمون اده وأمين الجميل، ومن ثم توجهنا الى مرسيليا، والتقينا العماد عون، وعملنا وثيقة لتبريد الأجواء من جهة أولى، ولكي تكون بكركي مرجعية من جهة ثانية، ووقعها فخامة الرئيس في مرسيليا، مع بعض التحفظ على بعض الأمور…
• أنا بعد كلّ هالجهاد والتعاون معقول إبرم 180 درجة، وفخامة الرئيس بيعرف الإغراءات اللي إجتني، وأنا بقيت على خطّي.. ورح ابقا، وإن شاء الله عهدو يكون عهد ناجح، وتنحلّ أمورنا ومشاكلنا السياسية والإقتصادية..

ورداً على سؤال إمكانية ترشيح أحد إبنائه مستقبلاً، يقول:

• انا عندي ولدين، وكل شخص منهم منتبه على شغلو، وبمراحل معينة إشتغلو سياسة.
• إبني الكبير فارس، كان أمين عام الرابطة المارونية لمدة 5 سنوات، ونظّم مؤتمرين بمبادرة منه في جامعة اللويزة، الأول عن وضع مسيحية الشرق، وشارك فيه عدة بطاركة. والمؤتمر الثاني، عن وضعية تملّك الأجانب.
• إبني الثاني مالك، أيضاً نظّم مؤتمر كبير على يومين، بمشاركة كل الفعاليات المسيحية والإسلامية، عن النزوح السوري في لبنان، وتمّ عرض المشكلة، ووضعت الحلول..
• أبنائي بيفهمو بالسياسة، ولكن مش ضروري يترشحو، لأنو مهتمين بأشغالن، ومش ضروري كمان تكون الشغلة وراثية، وأنا بقولها على صوت عالي.. مع العلم إنّو مالك هوي اللي عمل معركتي سنة 2000 – سنة 2005 – 2009..
• أنا مش شخص طوباوي، وسياستي من قبل ما إعمل نائب معروف خطي..
  1) أنا طعنت بمرسوم التجنيس 
  2) طعنت بتملّك الأجانب
  3) وأوّل من دعيت لحقوق المغتربين في الإقتراع، والترشّح، وفي التمثيل بالمجلس النيابي، وباستعادة الجنسية، وبمعالة أسباب الهجرة
  ما قمت به، ليس كلام، كافة الأمور موثقّة..
• من بعد 80 – 81 سنة، يحقّ للشخص يرتاح قليلاً

العلاقة مع جعجع

• لما كنت عضوا باللجنة النيابية لحقوق الإنسان، قالو: بدنا نزور السجون؟؟
  نزلنا وقلنالن ok..
  بعد ما خلصنا، قلنا ليه ما منزور سجن وزارة الدفاع..!!
  بوقتا تذكر سمير جعجع كانت مغامرة.. تزورو كارثة..!!
  بعد أخد وردّ.. قالو لاق..
  قاطعتن سنتين، بوقت انعقاد جلسة اللجنة النيابية، كنت روح إعمل مؤتمر صحفي بمجلس النواب، وقول: أنا مقاطع الجلسة لأنو في تمييز بين سجن وآخر، وبين سجين وآخر.. ورح ضلني مقاطع الجلسات، إذا ما بدهم يزورو الجلسة… وكان رئيس اللجنة النيابية في حينها الوزير مروان فارس…
• بالآخر قالولو، سكتوه وروحو نحنا ما عنا مشكل.. إجت الموافقة من رئيس مجلس النواب.. بوقتها وافق النائب غسان مخيبر من دون تردد.. النائب عاطف مجدلاني رفض، قلت له:
  يا عاطف، في إنتخابات، بكرا بتلمّهم بالشوالات الأصوات، قوم.. فكّر كتير، وما بعرف إذا فهم معنى “شوالات” كونه بيروتي.. ومضت الإيام، صار يطلع على معراب، ويتأهلو فيه أوقات اكتر مني، وصار يشكرني..
• أنا بعرف مبادئ سمير جعجع مبادئ وطنية 100%.. عم إحكي عن المبادئ.. ما في إنصاف إنّو فئة تجي من المتاريس يستلمو الحكم، وفئة تانية تتهجّر او تفوت على الحبس، أو تُنفى؟؟ 
  هالشي ما قدرت استوعبو، وهيدا خطّي، ويللي بيمشي بخط بصير مدمن عليه، وهيدا إدمان مُستحب، إنو تكون مؤمن بالسيادة الوطنية وبالولاء والإنتماء..
• اسقبلنا جعجع ، وقعدنا معو تقريباً شي ساعة ونصف.
  ووعيو كان كامل.. وحكينا بالعفو، وأبدى رأيو.. وحكينا بجريس الخوري..
  والزنزانة اللي كان فيها قستها، 120 سنتم، وما في تخت، على الأرض…
  ضهرنا الشباب برا، قلنالن: إنو الحكيم بعدو بصحتو الكاملة.. وإنو هوي قاعد بزنزانة، وشو التهمة تفجير كنيسة..!! إيه معقول إبن بشري يفجّر كنيسة؟؟ دبابة معقول؟؟ ولاد بشري عندن من كرامتن..!!

عن الإنتخابات

• اللي عاملين القانون، مش عارفين نتيجتو..
  الصحفيين والمحللين واللي نازلين مع بعض، عارفين شو هيّي النتيجة؟؟
• أنا اللي بينتخبوني ما بتلاقيهم بالشارع، يللي بينتخبوني بيحضرو “التيلي لوميار”، بيحضرو الـ”otv”… بس قاعدين ببيوتن، أنا ما عندي زلم، عندي مؤيدين، مقتنعين..
• زلمي اشتغلت معو كل هالمدة، بدّي غيّر قناعاتي..!!
  أنا لمّا بشوف بالمجلس النيابي وخارجو، طايفة شو بدها، وعندا خطة وبرنامج بمختلف أحزابها.. وطايفة تانية كذلك.. وبشوف المسيحيين كيف مفككين، ما فيّي ما قول: إنو نحنا عم نرتكب خطأ كبير.. مفروض توحيد الخطاب المسيحي الوطني، كمدخل لتوحيد الخطاب اللبناني المسيحي – الإسلامي الوطني..
• إن شاء الله تمرقْ قصة الإنتخابات، وما تأثّر على علاقة التيار الوطني الحر مع القوات اللبنانية..

رداً على سؤال عن التحالفات في كسروان، يقول:

•  بعتقد لحدّ هلق، ما في تنين اتفقوا مع بعض..
  عم يزورو بعضن، وعم يقولو يمكن إيه، وكذا، ومنشوف..؟

رداً على سؤال عمل نواب كسروان، قال:

• إقترحت على العماد عون تحديد اجتماع لنواب كسروان لبحث القضايا الإنمائية.. إختلفنا وين؟؟ عندي أو عندك..!!
• يا جنرال مش عم نتوفق.. قلّي:
  ما بتعرف شو بقول المثل: جهازة جوزتك، حظ من وين بجبلك؟؟
  عم يقلي: نواب عملتكم. حظكم ليش سيء هالقد، مش عم تتفقو؟؟

محافظة كسروان – جبيل

سنة 2003، قدمّت إقتراح قانون بانشاء محافظة جبيل  -كسروان.
ما حدا وقّع على الموضوع.
لكن بنفس التاريخ نواب بعلبك – الهرمل، قدمّوا اقتراح بانشاء محافظة، ونواب عكار كذلك..
– هنّي ب 6 – 7 أشهر حصلو على المحافظة
– انا أخدت معي 14 سنة و4 اشهر.. حتى صار عنّا محافظة

حزب الله وأمل وافقوا على إنشاءها، وكنا بحاجة لصوت، إجا النائب خالد الضاهر خصوصي وحضر اجتماع لجنة الدفاع والبلديات، كان صرلو 3 سنين مقاطع اللجنة، تأهلو فيه: قلّن على مهلكم، لا رضيت ولا شي، جايي إنتخب شو بدّو نعمة الله.. إنشاء محافظة كسروان – جبيل.

مش مسموح إنو 7 وزراء داخلية ما يوافقو عليها..؟؟ بحجّة بكرا بتجي اللا مركزية – الإدارية.. وأنا من أوّل ما خلقت بسمع بالمركزية، ومش عم تجي اللامركزية..

بس مرقتْ، صار كل زملائي صارو معها، وتبويس.. وأنا ممنونهم.. وبشكر دولة الرئيس نبيه بري.. كل واحد بالسياسة موقفو شي، بس بهيدا الموضوع منشكرو عليه..

أدعو زميلي أمين سر تكتّل التغيير والإصلاح النائب كنعان، يرصد المبلغ الكافي لمحافظة كسروان جبيل.. كما اناشد فخامة الرئيس ورئيس التيار متابعة الموضوع، حتى لا تكون المحافظة إسم دون مُسمّى.. لأنو فعلاً الناس بتكفر من عَ بكرا، وبتفكر بس ترجع حتى تعمل معاملاتها..

الحزب المسيجي الديمقراطي

نحن ضمن منظومة الأحزاب الديمقراطية المسيحية العالمية. وبعد وفاة جورج جبر، إنتخبت مكانه في لبنان، وعلى الدوام نشارك في المؤتمرات المسيحية الديمقراطية، إن كان في فرصوفيا، وفي المكسيك.. وفي إحدى المرات شاركنا العماد عون، بزيارة الأحزاب الديمقراطية المسيحية في الإتحاد الأوروبي في بروكسل، وكان لدينا هدف معيّن وبرنامج معيّن.

رصد Agoraleaks.com