الأب مجدي علاوي: 99,9% يسوع ما عيّد ببيوتنا.. (Audio)

– بس تغفر كل الأمراض بتنشفا منها… مريم ما توجعّت بس كانت تحفظ كلشي بقلبا.. !!!

***

عظة الأب مجدي علاوي في ميلاد سيدنا يسوع المسيح: (25 كانون الأول 2017)

المجد لله في العلى وعلى الأرض السلام والرجاء الصالح لبني البشر

• ملك الكون، إجا حتى يحطّ سلام على الأرض. ما إجا تياخود مطرح حدا أبداً.. إجا تيكون بعكس كل ملوك العالم.
• إذا منشوف هلق، كل الملوك بتقتل، وبتعمل حروب، ويكون في أمراض ويكون في فساد.. وهيدا الشي عكس يسوع
• الله صار إنسان وتجسّد بأحقر مطرح باصطبل للبهائم، تيرفع الإنسان ويألّهو ويبطّل الإنسان عبد عند حدا.. امّأ نحنا كلنا بدنا نضل تابعين لحدن…
• شوفولي شي ملك ما همّو مصالحو الشخصية…
  شوفولي شي ملك ما همّو يحط شوارع باسمو…
  وين قصرو ليسوع؟؟؟
  منسمع قصر فخر الدين.. وقصر الملك بنت فهد.. وقصر وقصر…
• سمعنا شي مرة بقصرو ليسوع.. منعرف بمزود يسوع بكنيسة المهد.. ويللي اليوم الرئيس ترامب بمشروعو بدّو يلغيه..

اليوم منسأل ويننا من هالبشرى؟؟ من هالميلاد؟؟

• الله بعت ابنو من أجل خلاصنا.. وقلنا لا تخافوا فها أنا ابشركم بفرحٍ عظيم يكون للشعب كلّه:
  – للمسلم ، و للمسيحي
  – للاسود و الأبيض
  – للبناني و الأجنبي..
  من أجل العالم كلّو سوا.. ولد لكم اليوم مخلص وهو المسيح.. عطانا الضمانة، عطانا ابنو لَ يقلنا حبّو.. لحتى تغفرو وتساعدو، وحتى تتواضعو، وتنسحقو..
• ابن الله ما عاش عيشة ملك.. ما كان في مطرح… قولكم يسوع عيّد ببيوتنا… أكيد لاق..!! 99,9% يسوع ما عيّد ببيوتنا، لأنو ملتهيين بالشجرة وبالعشا، وباللبس.. ونيسنا إنو ليلة عيد الميلاد مش عشا وسِكرْ…

• فيشي اسمو 9 أيام صلا
  فيشي اسمو صوم 15 يوم او 40 يوم قبل الميلاد
  فيشي اسمو “قطاعة”..
• وينن عيلنا.. مين صام.. مين قطع.. مين راح عَ كرسي الإعتراف.. لازم اطلب السماح لَ أولد من جديد..
• بس المسيحية صارتْ مظاهر… وصرنا وثنيين.. نحنا متل الوثنيين… منغيّر زينة. ولبس.. وأهم شي شو بقولو عنا العالم.. ليك زينة هيدا البيت، هيدا القصر؟
  – عم يعملو بلبنان اكبر زينة، واكبر Bûche de Noël.. قديه عم ينحط مصاري.. ؟؟؟؟

حطيت على “الفايسبوك” من يومان ، في عيلتين لبنانيي نايمين عَ الطريق، أم وطفلين.. عيلة مسلمة (أم وصبي وبنت)  وعيلة مسيحية (ام وبي و3 ولاد) عايشين بخيمة على البحر.. 

• الكل بيتأثر بالأبونا..
  أبونا نحنا منصليلك….
  أبونا.. أبونا..
• حبيت حدا يتصل يقول: ليلة عيد الميلاد يكونو عم يعيدو ببيوتنا.. يسوع بهيديك الإيام ما حدا استقبلو تيولد، ويوسف كان عم يبرمْ.. وهيك كمان السنة.. ميلاد سنة 2017، يسوع ما في مطرح يسكن فيه..
• كان حابب يخلق بهالعيلتين، يللي عايشين بالخيم.. بشكر الله ع جمعية سعادة السما، يللي ليلة عيد الميلاد عملت لَ يكون عندن بيت.. العيلة المسلمة كان عندا بيت، فرشنالا بيتا كلو سوا.. والعيلة المسيحية أخدنالا بيت.. واليوم كل الباقي رح يكون موجود..

شو حلو عيد الميلاد انو تحسّ بغيرك.. عيد الميلاد هوي عيد الحب.. والرحمة، وانو نحط ايدنا بايد بعض.. واغمرو، واعطيه.. 

• أيا عيد ميلاد نحنا.. وعم نتهّم بعد، وندين بعد.. ودول وملوك عم يجتمعو كيف بدن يعملو حرب، بأيّة دولة… لما منعمل حرب بسورية والعراق.. هيدا عيد ميلاد..

ليلة الميلاد توقف الحرب.. تزهر الأرض.. وبيوقف الحقد والكره.. إجا سلام الكون لَ يعطينا سلام لا كما يعطيه العالم.. 

• بسأل ليه صرنا هيك..؟؟ كيف تحضرنا لعيد الميلاد.. ؟؟ انا مش ضد الزينة ولا اللبس، ولا ضدّ نتعشا مع بعض.. بس حدا عمل عشا متل أيام زمان ببيتو ؟؟؟
• في احلى منا إنو امي تطبخ العشا من قلبا.. لاق افضل نوصّي حتى ريحة شعرا ما تطلع ريحة طبخ؟؟ عيد الميلاد اليوم، صار انو بعيّد أخواتي على “الواتس آب” وبطلّت زورن ببيوتن؟؟

عَ شو عم نربى اليوم؟ ولوين رايحين؟؟ 

• رايحين عَ الهاوية بايدينا.. دايماً منتهّم الدولة والكنيسة، والكهنة والراهبات والمدارس.. لاق..

الأم والبيْ هنّي أول كنيسة

الأم والبيْ هنّي أول مدرسة

كيف بتعلمو ولادكم رح يطلعو..

• كيف بتزرع بتحصد.. بتزرع خير بيطلعو قديسين.. منزرع “بريستيج” رح يطلع عنا شياطين.. نقّو واختارو شو بدكم…
• عيد الميلاد هوي نبع المحبة. والرحمة. وما ممكن نشفى إذا ما منعرف نغفر.. اكبر مرض بالكون وحتى الأمراض النفسية اللي بقولو الحكما ما بينشفى منّو.. (إدمانات..) بقلكن.. بس تغفر انتا بتشفاااا
• بس تعرف تغفر شوكة وانقلعت..
  لازم نعرف نغفر تنحسّ بهيدا الفرح، والاّ ما رح نحسّ بفرح الميلاد

إذا منطلّع بالمغارة.. مين إجا عند يسوع؟؟؟ 

• الكل كان ملتهي؟؟ مبارح الكل ملتهي بالهدايا وبالعشا… حلوين؟؟ بس مين راح لعند يسوع..؟؟؟
• راح ع الكنيسة الفقرا، اللي مش قادرين يعيدو.. راح لعند يسوع الأشخاص اللي هني ضعفا..
• ومين راح لعند يسوع ببيت لحم.. الرعيان والخواريف.. وتاني نهار اجو الملوك سجدوا قدام يسوع..

ربنا يسوع نزل ع الأرض كرمالنا.. لحتى ما تحسسنا بشي؟؟ وانتا وحدك ما بتربحنا جميلة؟؟ ولا بتمننّا؟؟ وبتحبنا متل ما نحناااااا ؟؟ 

• ما حدا بيقدر يحبنا متل ما الله بحبنا..
  انا كبيْ وإم أمنّن..
  أنا كبي وإم بربّح جميلة..
  انا كبي وإم بحبّ بأنانية..
  بدي ابني هيك يكون.. وبدّي..
• يا الله علمني إنو حبّ متل ما إنت حبّيت… وعلمني إعمل مشيئتك، وتتجسّد بقلوبنا وبقلوب عيالنا..

يا رب خلينا نكون متل مريم، اللي قالت نعم وغيرّت وجّ الدنيْ.. وكانت مريم تحفظ كل هذه الأمور وتتأملها في قلبها.. 

• اليوم الأم بتسمع الكلمة، وبتبلش تخبّر.. كلمة بتوجّع.. كلمة بتئدي.. ما قادرين نحط شي بقلبنا.. ليه؟؟ لأنو ما منعرف نصلّي..
• ايمتى بصير اعرف صلّي. بس يصير عندي مشكلة بالبيت.. بس أوقع بمصيبة ويكون عندي حاجة.. !!!
• ويننا من امهاتنا بايام الحرب. ما كان في غسالة ولا غاز وكان يغسلو ع ايديهن؟؟؟ ويننا من أيام اماتنا كان عندن 4 – 5 ولاد ويربوهن؟؟؟
•  بدعي كل ام اليوم تكون متل مريم… الكلمة اللي ما بتفيدْ تتركا بقلبا.. لأنو اللي بيعرف يحبّ ما بيجرحْ…

المحبة ما بتعرف تدمر وتلغي.. المحبة لتبني الإنسان ، والله هوي نبع المحبة.. ننتبه شو بدنا نحكي وشو بدنا نقول.. خلينا نكون متل مريم.. 

• مريم ما كانت عم تتوجّع..!! بس كلشي كانت تحملو بقلبا
• اليوم بالولادة إذا مش كلشي متل ما بدها الأم بتخترب الدنيْ.. مريم ويوسف ما كان عندو الاّ هالقماشة، وهالمزود..

يا اماتنا نتعلّم من مريم.. ومن اماتنا اللي ربونا.. لأنن أكبر مدرسة.. وبالصلا قادرين تعملو اشيا كتيري.. ايمان ورجا ومحبة أعظمن.. اللي بيعرف يحب بيوصل للسما وبيبني عيلة مزبوطة… وبتكونو آداة سلام، واللي بحب بكون ايدين واجرين ليسوع ع الأرض، لأنو يسوع دعانا نكون سفرا لالو لأننا أبنائو..

وُلد المسيح هللويا
وُلد المسيح هللويا
وُلد المسيح هللويا

***

 

عيد الميلاد، لما تدع الله يحب الآخرين من خلالك. نعم، عيد الميلاد لما تبتسم في كل مرة لأخيك وتقدم له يدك. (القديسة الأم تيريزا دو كالكوتا)