حسن مقلد لسمر أبو خليل: ارادة الإصلاح متوفرة عند الرئيس عون وفريقه (Audio)

– قراءة موضوعية عن التحولات وعلاقتها ب الاقتصاد المحلي وضرورة الإصلاح
– نقاش الكهربا بالبلد لا معقول ولا مقبول… الـ”UNDP” راحت عَ سورية وانكحشت
– إنضبطو، الرمز الأكبر (جهاد العرب أو حدا تاني) صار باعت اكتر من 11 شركة لسورية.

***

مقتطف من حديث الخبير الاقتصادي رئيس تحرير مجلة الاعمار والاقتصاد حسن مقلد لقناة “الجديد”: (أيلول 2017)

عن قانون الإنتخاب

• أنا تقديري حدم المتغيرات اللي عم تصير بالإقليم، ما رح تسمح للبنان يكون بعدو قبلان يكفي بالسياق اللي هوي فيه.
• ما عندي معلومات بالحقيقة بخصوص الخلفيات الفعلية ورا المبادرات اللي عم تنطرح، وردود الفعل عليا، لأنو أنا كمواطن بهمني شغلة: أحسن قانون انتخاب (ومني طوباوي) وقابل للتطبيق، مقابل بس يزيح البلد، من المحل المتخلف اللا تمثيل أنا موجود فيه لمحل أحسن بشوي، يسمحلي يعملي مرحلة انتقالية، لأوصل لبلد مش دولة طوائف ومزارع، أصلاً عم تهرّ..
• أنا حكماً مع تسريع الإنتخابات، ولكن كلنا منتذكر أنو وحدو التيار الوطني الحر للأمانة هوي اللي وقف ضدّ التمديدات الماضية.
• يعني في همّ حقيقي عند رئاسة الجمهورية بانو الإنتختبات لو بتصير مبارح، قبل اليوم. وهيذا الموضوع المستعجل أدْ ما بيحمل بطياتو، انتخابات على الأقل بضوابط معقولي أحسن من الانتخابات الماضية، بس ينعمل انتخابات.
  إذا جينا اليوم لرئاسة مجلس النواب، واللي عم يمثلو الرئيس بري، كان بالماضي عراب التمديدات اللي صارت، اليوم موقفو صار واضح مستعجل للإنتخابات، موضوعياً بالتحليل الوحيد اللي عندو مصلحة ومنسجم بتأجيلا هوي الرئيس سعد الحريري.

الاقتصاد

• بعلم الاقتصاد لما ما بكون عندي خيارات، يعني هوي: سوء تقدير ولا علم، لأنو دايماً لازم يكون في خيارات، فليه نحنا مننحطّ تحت خيارات أحلاهما مرّ، الدنيي مش هيك، الأمور أوسع.
• اليوم في مقاربة بالبلد بتقول إنو زمن الإصلاح عنجد ما رح يبلش، الاّ بعد الانتخابات النيابية، ونحنا سمعنا بيان رسمي من رئاسة الجمهورية بقول، انو الحكومة الحالية، هيدي مش حكومة الرئيس، لأنو حكومة الرئيس تبدأ مع العهد النيابي الجديد.
• في مقاربتين للإصلاح،
  – الأولى) بوضع رؤية عامة، ومن بعدا بتجي البرامج، وهيدي الرؤية برجع بجسدها ببرامج وخطط. وبينوضع مداها الزمني، مع مراحلها القصيرة والمتسوطة والطويلة..
  – الثانية) تبدأ بالعمل بكل الملفات، إنطلاقاً من الملفا الجاهزة.. وهي مع المعالجة لهذه القضايا، يتمّ تحضير لأرضية لتقبل خطة تغييرية عامة..
  للأسف الشديد ما عم نعمل شي.. ونحنا المطلوب نسلك بوحدي منن، وإذا سلكنا التنين ما بكون في تناقض. ولكن التباظؤ أو التعامي، عم يخلي الأمر الواقع يتكرّس..

نية الإصلاح موجودة

• اليوم في مواقع ناضجة، وفي إمكانية من دون فلسفة، ولا فزلكة، ولا بدها أينشتاين..
  في كتير قصص بدها تطبيق  القانون أو مراجعات جدية فيها، وبتقدري تزبطي،
  وفي اشيا بدها رؤية، وفي بوادر (وهون فتنا بالجدّ) يعني أعمق بكتير من خبرية هيدي المناقصة وهيدي الصفقة لوين بتروح..
• الإصلاح الجدّي عم ينصدم بحسب رأيي:
  – مواقع قوى كتير كبيري،
  – بتناقضات حقيقية عند المكونات تبع السلطة،
  1) إنو اليوم في رئاسة حكومة عندها مشروع وبرنامج بتعتبر حالها أمينة على تواصل واستمرارية عمرو شي 27 سنة، وبرأيي هيدا اللي عمرو حوالي 25 سنة بالأساس تبعو والجوهر وصلنا لهون برأيي،
  2) والمكوّن الآخر هو لدى رئاسة الجمهورية، ومشروعو على تناقض مع السائد… هيدا التعايش اليوم كيف بدو يستمرّ أو يمشي؟؟
  3) وبالنص في مجلس النواب، كانت شريكة كاملة للمشروع المتواصل والمستمر، وهيي كانت شريكة كانت بتوجّه سهام النقد والإنتقادات، وبأي لحظة مستعدة تتخلى عنو..
  اليوم لا يوجد إمكانية تزاوج حقيقية بين خطة رئيس الحكوومة، وبين خطة رئيس الجمهورية
• بعد في إمكانية لعملية إصلاح حقيقي، وبصراحة بالمحل اللي بِحتكْ فيه من حين لآخر، بشعر انو عند رئيس الجمهورية في إرادة جدية بالتغيير.

كذب البنك الدولي

• هول هني ذاتن، اللي حَكو عن انهيار المالي، صرلنا 25 سنة منحكي ومنقول، هيدي السياسة بتوصل لهون، وهني بيطلعو وبدافعو…!! كيف نقلبت الأدوار؟؟
• اليوم بيتسرّب تقارير من مؤسسات دولية عليها ختم بموافقة على كل السياسات، وفجأة بتقلك هيدي السياسات بتوصّل للإنهيار.

معضلة الكهربا

• أنا بحب قول، وأنا مسؤول عن كلامي بالأرقام، ورشة اعمار الكهربا بكل عهد الإعمار القديم اللي صار، مع محطات التحويل، مع مركز التحكم، كلفو مليار و 750 مليون $، وأنا مش عم فوت قديه كانت المناقصات سليمة، أو لاق، صحيحة أم لاق.
• ال 10 مليار $، اجو من كلفة، أخدت الدولة قرار فيها (ممثلة بالحكومة اللبنانية ومجلس النواب وأقرها مجلس النواب). وبس ياخود مجلس الوزرا قرار:
  – انو انا بسعّر برميل النفط بـ 25$ بموازنة الكهربا
  – لو وصل هيدا البرميل النفط لَ 140$،انا بسعرو بِ 25$
  لو بدي اجبي الكهربا 100%، الفرق بين 25 $ يللي هوي 75$ لكل برميل هيدا خسارة، عم تتسجّل.. ليه ما مناخود قرار انو كلفة الكهربا كان 15 سنت، (بهيداك الزمن كان 7 سنت،وكنت عم بيعو ب 2 سنت أو 3 سنت) وبالنتيجة: الفرق بين سعر الكلفة وسعر البيع خسارة كاملة
• أنا اليوم، بس اقبل قول، انو الفرق بين تكلفتا عنجدّ وبين سعرا عن جدّ، هوي آلية دعم اجتماعي.. مش بعمي عيوني وبقول كلفة الكهربا هالقد..
• نعمل خطة كهربا سنة 2010،
  أوّل شي: شو ما كانت أية خطة بتنعمل، مع كل سيئاتها أفضل من لا خطة، ومن الفوضى.
  تاني شي: إذا نعمل خطة إيجابية ومنيحة فيها ثغرات متل كلشي بالدني، بكون أفضل وأفضل..
  نحنا اليوم كل نقاشنا مش بالخطة

يسأل مقلد: النقاش بالمناقصة

• لاق، النقاش مش المناقصة، عم تناقش الناس الكهربا البديلة. تخيلي، اليوم ما حدا عم يناقش نقاش حقيقي، ما حدا وقف وقال: خطة الكهربا مزبوطة أو مش مزبوطة؟

تقول سمر أبو خليل: مش عم نناقشو، لأنو خلقولنا مشكلة جديدي، صرنا عم نناقش قصة السرقة، والإستفاة، وضبّ الجيوب، يردّ حسن مقلد:

• لاق، إذا خطة الكهربا مفترض تعطينا انتاج كذا الف ميغاواط، نحنا عم نحكي من هلق لوقتا شو منعمل؟
• النقاش اليوم بالبلد، من هلق لوقتا، يعني الكهربا البديلة (هيدي اللي عليها خلاف)
  من وين منجيبا؟ بالنسبة لالي شو هالنقاش المفتوح؟ ما في الف طريقة تنجيبا، وفي 100 طريقة تنحسّن الشروط؟؟
• كمراقب بالموضوع النقاش بالبلد لا معقول ولا مقبول، ولا الطريقة اللي عم يتسوّق فيا معقولة.

إعمار سورية 

• العلاقة مع سورية فيها تكون حل كبير لأزمتنا الإقتصادية،
  إذا منتعاطى مع اعمار سورية بشكل بنيوي، وفيها سورية توفّر كتير وقت عليها وجهد، إذا تعاطت معنا بهيدي الطريقة.

المطلوب والمرتجى

• 1) رؤية إقتصادية، وما فيها الرؤية الاقتصادية ما تاخود بعين الإعتبار المتغيرات اللي حوالينا وبالتحديد إعادة إعمار سورية، وهيك الدول بتتعاطى.
  2) في مستوى تاني، انو في فرصة باعمار سورية، بركي البلد بيستفيد،
  3) وفي فصرة ومستوى تالت، الو علاقة للأسف (هوي المعتمد) انو بركي بيطلعلنا شوية مصاري.. انو كم مسؤول وكم رجل أعمال وكم تاجر (بركي منخبطلنا كم خبطة) منهرّب شوية شغلات، ومنطلّع مصاري..
  

 

• شو معنى يطلع رئيس حكومة، ما بيحكي مع سورية،
  وبروح عَ واشنطن، وبقلن للشركات الأوروبية يفوتوه عَ سورية.
  وبيرجع بنط عَ موسكو، بيطلب من الشركات الروسية تفوتو على سورية. والله دمشق أقرب. وحجم التداخل بيناتنا أقرب.
• هوي بالعنوان تبعو عم يقول: الشركات الخاصة اللبنانية. هلق هوي شو بيقصد ما بحكم عَ النوايا، بس مش عم اكشف سر. في كتير ناس بيعرفو (وأنا من أكثر الناس العاملين بورشة أعمار سورية) بعرف ومش كمراقب ولا من بعيد، بعرف من المطبخ من جوا، مين عم يروح ومين عم يقدّم وراق إعتمادو..
• وزير خارجية بريطانيا بعت وفد بريطاني عَ سورية ليتوسط حتى تفوت الشركات البريطانية على سورية. إذا هودي عم يكذبو على هالمستوى، يروقو جماعتنا شوي. وهني بيعرفو إنو هني عم يبعتو شركات بالسر وبالعلن، وبالوجه المكشوف، وعم يعملو علاقات مع حلفا لسورية، والرمز الأكبر (العرب ما بعرف إذا جهاد أو حدا تاني) صار باعت اكتر من 11 شركة لسورية، اتشتغل مقاولات بسورية.
  – في ناس عم تشتغل بالنفط
  – في ناس عم تروح بدها تشتغل بصناعات معينة.
  – في ناس عم يقولو نحنا جاهزين ندخل كذا مادة بحاجة الها سورية.
  – في ناس عم يشتغلو بزيت المحركات.. (مافي شغلة بتخطر عَ بالك وما في لبنانيي الاّ واقفين بالصف، مطوعين ليشتغلوها…

• ليه بدكم تشتغلو هيك.
  بيطلع واحد بخبرك، مرفأ طرابلس منصة لإعمار سورية.
  يا خيّي تيصير منصة لإعمار سورية، بدك تقول:
  1) شو وظيفتو لمرفأ طرابلس.
  2) بدك تشوف شو السوريي شو بدن
  إذا انتا ما بتعرف ، انو في مينا بطرطوس وباللاذقية توسعو، وتكبرو وتزبطو، وفي شركات روسية عملو أكبر من مرفأ طرابلس، بتكون جاهل.. وبتكون عم تضيّع الفرصة. ولتعرف الفرصة ما فيك تحكي عن سورية وتفتكرا البرازيل.
• بدنا نعرف شو عم يصير في سورية عنجدّ، وهيي مش فرصة من طريقة القنص، فرصة للبلد، ليتصلّح البلد، لنعمل إقتصاد حقيقي.. ولنعمل علاقة سوية بين لبنان وسورية والعراق..
• بدنا شوي نبعّد عن خلفياتنا وعواطفنا،
  حبيت الدولة السورية أو ما حبيتا، هيدي الدولة عم تربح، ما بيقدر يطلع معلّق كبير تابع المستقبل، يقول:
  انو الحيش السوري مسيطر عَ 15% من سورية.
  ما في يكون جاهل هالقد، ويطلع يخبرك عنجد انو بدو يرسم مسيرة إقتصادية بسورية، عَ القليلة تطلّع بالخريطة، وعراف الخريطة كيفيّي، اليوم دير الزور عم ترجع فيها أكبر حقول نفط لسورية، واكبر سلة غذائية موجودي،
• عم يفوت الجيش السوري على غرب الفرات وعلى شرق الفرات.

الحل

• في ركيزتين أساسيتين بالبلد، قلنا ايه وقلنا لاق.
  1) الركيزة الأولى: موقع رئاسة الجمهورية وبالتحديد العماد عون ومع كل فريقه.
  وهيدي ركيزة بتسمحلنا بإعادة تصويب الأمور، وبتسمحلنا نكون معبر جدّي لعلاقة سوية مع سورية.
  2) الركيزة الثانية: المقاومة ولو ما عم تدخّل، وهيي شريكة النصر بسورية،
  وهيي مش بس مرحّب فيا بسورية، مستعدة تروح أبعد بكتير..
  هودي الركيزتين، هنّي منصتين حقيقيتين ليزبط البلد،
  بس كمان مطلوب من التانيين، كل يوم يسبو الدولة بسورية، ويقعد يخبّر انو خلص النظام، وأنا رايح عمّر بسورية.. لا بعيد فيك تعمّر، ولا غيرك في يعمّر ساعتا.. بدّك تنضبط شوي صغيري، وبدّك تقبل بموازين القوى الجديدي.
• مافينا ما نحكي مع السوريين.
  معبر نصيب على الحدود الأردنية السورية إذا فتح، شو منعمل نحنا كلبنانيي مع سورية..
  حاج مكابرة، الأوطان مش هيك بتنبنى.
• حاش تعذّب حالك وتصرف علين مصاري، ليل نهار، تحكي مع ناس بالصندوق النقد والبنك الدولي، مين قلك الصندوق الدولي والبنك الدولي رح يكون الن دور بأعمار سورية؟؟
  مين خبرك اليوم، انو الورشة والمقاربة تبع اعمال سورية، بتشبه ورشة اعمار لبنان، الـ”UNDP” راح على سورية وطرح 16 مشروح متل ما طرح عنا بلبنان سنة 1992، قالولو: الله معك، ما بدنا ياك.
• 16 مشروع، إدارة موازية ما قبلوهم بسورية، يعني بعدو عقلنا بيشتغل هون، إنو إذا أوروبا ما حطّت مصاري، مافي حدا بعمّر.. اليوم اللي معو مصاري عنجدّ، هيي البريكس، والصين.
• روحو شوفواليوم بسورية، على القليلة التلزيمات الكبرى مين أخدا:
  الصين اخدت،
  روسيا أخدت،
  ايران أخدت،
  اندونيسيا أخدت،
  جنوب أفريقيا أخدت،
  البرازيل أخدت..
  معرض دمشق كشف عن صناعات سورية، ظهر انو الدولة السورية ما معا خبرها. كان في 30 شركة برازيلية اجو ع سورية، قعدو 5 ايام، شركات من جنوب أفريقيا.. الفرنسيون وسطّو البعض ليحظوا ببعض التلزيمات.. الورشة ماشية بسورية ومين خبّر بعض اللبنانيي انو بتشبه الورشة عندن؟ وهيدا ما بيعني انو الإعمار بسورية مش صراع، ومش صراع حقيقي.. يمكن الحرب تتكرّس نتائجها بالإنتصار لمجموعة بفعل الإعمار، ويمكن يهتزّ الإنتصار إذا اهتزّت الركائز الجديدي القائمة، بس نحنا كلبنانيي ما النا علاقة فيه.

رصد Agoraleaks.com