– صليب مع خرزة زرقا… العين تردّ عليكن، سمالله عليكن، أش بتعرفو من المسيحية

***

عظة الاب مجدي علاوي قداس جماعة سيدة البشوشي في كنيسة 💒 سيدة الزروع (معاملتين 12 أيلول 2017)

أهمية الشكر

• 10 برص قالولو ليسوع: يا معلم ارحمنا. شفاهم الرب. 9 كملو و1 ما كفّى ورجع.. حسّ بالشفاء، متل التسعة الباقيين، بس رجع عم يمجّد الله وبصوت عظيم وعم يصرخ، وركع عَ إجرين يسوع وعم يشكرو..
  قولكم نحنا من هالـ 9 أو من هيدا الـ 1؟؟؟ (وعم احكي عن حالي)
• البرص، وبهيديك الإيام كانو يحطولن جرس، تَ يدلو العالم علين.
  نحنا من جمعتين، كنا عم نعيّد للأم “تريزيا دي كالكوتا” المعروفة أكتر راهبة بالعالم حبّت اللي معن برص. واشتغلت معن. زرنا مركزن بأثيوبيا، وشفنا كيف بعيشو وكيف بيشتغلو مع الناس..

• ساعة بلشّت الأخت “تريزيا ده كالكوتا” باليمن، مع الأشخاص اللي عندن برص.
  أخدت إذن من رئيس البلد.
  – قلا : Stop لا صليب، ولا بدلة راهبة، ولا كنيسة، ولا شي بعرّف عن المسيح.
  – قالتلو: انا جايي، شوف خيي الموجوع. واخدمو، وشوف شو فيي ساعدو.
  – قلا: إذا هيك، فليكن..
  صارت تشتغل، من 50 الى 100 الى 200 شخص. واجا نهار عيد الأضحى، حبّت تاخدن عَ الجامع، وهوي كان قايلا: كل العالم متساويين بالبلد.. وصلت لهونيك منعوهم يفوتو.. تاني نهار، طلبت أذن تشوف رئيس البلد، وراحت لعندو، وقالتلو”
  قلتلي كل العالم متساويين، مش مزبوط. البرص مش متل البقية.
  قلا: اتي الراهبة، بدك تعمري جامع للبرص؟
  قالتلو: ايه عم اعملن مكان لَ يصلو فيه… بيت الله…
  قلا: رح عمّر أول كنيسة باليمن، قبل ما إعملن جامع.

• هيدا اللي كان معو برص، كان غريب، وما بيعرف المسيح.
  نحنا المسيحيين، مندعّي انو منحب المسيح، ونحنا أخطر من داعش. بتعرفو ليه؟؟
• يكون في نايب برا، وعم يوعظ نهار الأحد يوم الرب..
  شوفو كم واحد في بالكنيسة، وكم واحد عند النايب برا..!!!
• نحنا بهمنا المظهر..
  بهمنا الأرض.
  نحنا منعشق الأرض.
  نحنا منفتخر بعيد الصليب. بس شوفُوني أ̮يا واحد منكم بصلّب ايدو عَ وجو قبل الأكل بشي مطعم.
  شوفوني قبل ما تعملو شغلة بحياتكم، انو بتصلبو ايدكم عَ وجكم..!
• أيمتى بصير صلّب ايدي عَ وجّي، وكل تكّة وكل ثانية، بس أوقع بتجربة. بس أوقع بمشكلة او يصير في حالة مرضية بقلب البيت… شمعة ما بتصير تنطفي بالبيت.

 

• كنا نعمر بيوتنا، ونحفر على الباب صليب، لأنو بهيدي العلامة نحنا مننتصر.
  لأنو هيدي العلامة بتحمينا وبتخلصنا
  الصليب هوي قوة الله، والصليب هوي بوابة لأوصل فيا عَ السما..
• بدون ما احمل صليب بفرح،ما فيني فوت عَ السما..
  قبل كان خشبة للصوص، بس صار خشبة خلاص بعد ما مات يسوع عليه.

نحكي بصدق.

• كيف عم نحمل صليبنا..
  لك إذا دق جرس الكنيسة، ما حدا بصلّب ع وجّو.
  إذا قطعنا حدّ كنيسة، ما حدا بصلّب ايدو عّ وجّو.
  بدلنا عتبة الباب، بدنا نبيع اخواتنا العرب والإسلام، بدنا نتاجر..
  بدلنا إشارة الصليب،
  – بنضوة حصان.
  – أو بخرزة زرقا.
  – أو صباط شي ولد.
• أحسن من هيك، بس نعمّد ابننا، او نعمل أوّل قربانة لإبننا، منلاقي حدا جايب صليب مع خرزة زرقا…
  العين تردّ عليكن، سمالله عليكن، أش بتعرفو من المسيحية
• ما فتت عَ بيت عم زورن بالعالم، ولبنانيي بروحو عّ الكنيسة وملتزمين..
  عّ المدخل، صدقوني، نضوة حصان، او خرزة زرقا، أو عين كبيري زرقا..
  قلن: بدي قيمن، وكبن بالزبالة..
  وأكتر من هيك، بتلعمق، طلع بروحو عند شيوخا..
  قال:

• – ايه بنتي مش عم تتزوج،
  – وابني مش عم يتوفق،
  – بنتي مش عم تجيب ولاد،
  – وابني رجع شغلو لورا..
  بتروح لعند شيخ، (من ينكرني أمام الله، أنكره أمام أبي الذي في السماوات)
  كيف بتروح تقدّس، وبتروح لعند شيخ…
  أيا قداس، وأيّا ايمان..
• ما عم افهم، ما بوقفو مسابح، وكل القداس بيضربو ع صدورتن.. وبروحو يعملو كل هالشي.. سألتن: زبط شي معكن؟ قال: لاق، لحد هلق ما زبط شي؟؟ ايه نطرو بعد..!!

قرية الإنسان

• ساعة بلشنا بقرية الإنسان، واحترق أول بيت،
  كان في خزانات، وبراد وغاز، ورفوف حديد..
  ونشكر الله وسائل الإعلام بينقلو شي الشبع “دايماً”.. كل وسائل الإعلام كانت عم تغطي الحدث، حريق قرية الإنسان. وكان عندي صليب، من شجرة “البطمية” وبقدّس فيه. وكانت احدى التلفزيونات يللي اليوم بتشهّر كتير بالمسيحيي، كانت عم تصوّر..
  وكان الصليب بقلب النار، الصليب مش عم يحترق والنار والعا…
• نعم يا جماعة بهالعلامة مننتصر..
  بهالعلامة أبواب الجحيم ما بتقدر علينا..
  في أجمل منا ارسم علامة الصليب، لَ يكون الله معي. ويكون براسي وبعقلي وبفكري، وبحواسي كلّها سوا..

• كتار بيتذمرو من حمل الصليب.. وبقولو: ليه الصليب يا الله؟
  لازم نشكرو إذا حاملين صليبنا بحب، لأنو رح نصير متلو عَ الصليب.
• ما الها طعمة حياتنا بلا صليب.
  كتير منا بيتذمرو.. وما تخمنو أنو الصليب اللي حاملينو عاطيكم ياه الله أكبر من قدرتكم..!!
  في كتير ناس بقولو: صليبنا كبير عطينا غيرو..
  في مرأة كانت عم تنق، بدها صليب أصغر، فَ الله اخدا على مغارة كبيري، والله فوتي نقي الصليب اللي بدك ياه؟؟
  – اول صليب لاق..
  – تاني صليب لاق…
  – صارت تطلّع وتطلّع، لحتى وصلت عَ صليب صغير..
  قلها يسوع: هيدا الصليب اللي انتي حاملتيه..

• يسوع ما بحملنا أكتر من طاقتنا.. بس الفرق انو كيف بدّي احملو؟؟ 
• ساعة بدّي احملو لحالي:
  – بشهاداتي
  – بمصرياتي
  – بقوتي الذاتية.. ما فيني احملو
• بدي اطلب من يسوع يساعدني بحملو، إن كان صليبي كبير أو صغير، او وسط.. وساعتا هيّن احملو.. مشكلتنا انو نحنا منحبّ نصلب بعض، ونحمّل صلبان لبعض…
• الآخر بالنسبة لالي، الله حاطو مقابيلي:
  – مش تتدلّ على غلطو،
  – لإتمرّن فيه وشوف أغلاطي أنا..
• الله عم يبعتلنا أشخاص يساعدونا، بس نحنا ما بدنا نشوفن.. ولأنو ما بدنا نسمع ونصغي، حتى نشوف، ونقدر نعمل.. هيدا العشار اللي معو برص، مش متلن معو برص.. !! مش ذات الأوجاع، صغيْ ولمس نعمة الشفاء، واجا تيشكر، ويمجّد..

• صليب الأبرص كان صليبو كبير،
  ورغم هيدا كلّو، إجا بوجعو وحط راسو على كعب إجرين يسوع، وشكرو…
  وقبل قلو “إرحمني” واشفيني..
  ما استحى بمرضو..!!!
• نحنا اليوم عنا أهم طبيب،
  وما فينا نفوت عَ السما بلا Visa الصليب..
  كل واحد عنا عندو صليب.
  بس يصير صليبي تقيل، وثقو أنكم وصلتو عَ الصليب.. يوحنا قلو: بشكرك، لأنك خليتني صير شريك معك، وصرت متلك عَ الصليب. بس نصير عَ الصليب، بكون ميزنّا..
• كل ما قربنا من الصليب، كل ما حبينا أكتر.
  ما من حب أعظم من هذا الحب. أن يبذل الإنسان نفسه من أجل أحبائه.
  وين هالشي ظهر؟؟؟ عَ الصليب.

كيف نحمل الصليب؟؟؟

• إذا ما بعرف إغفر، ما رح أعرف حب الصليب..
  هيدي مشكلتنا بهيدا العالم..
  وهوي عَ الصليب، بأعزّ وجعو، والعذاب: قلو “إغفر لهم يا أبتاه، لأنهم لا يدرون ماذا يفعلون”..
• بس تعرفو تغفرو رح تعرفو تحبو الصليب.
  وللأشخاص يللي بقلن الطب ما بقدر ساعدكم.. وعندن جروحات كتيري، خاصة نفسية.
  بقلن: ثقوا، الطبيب الأرضي منو شي؟؟
  عندكم طبيب اسمو يسوع المسيح. قادر يعمل معجزات.
  – أي جرح عندكم ياه.
  – واي وجع عندكم ياه.
  – واي مشكلة عندكم ياه… حدو قادر يلمسو ويشفيه..
  ما تستسلمو.. وللأمهات بقلكم: صلواتكم بتوصل أسرع من الكاهن، لأنو بحبكم كتير..

• يسوع ما بحب يشوف دموع الأمهات.
  وهوي اليوم بيعرف وجعكم، من ورا ولادكم…
  وكيف عايشين ولادنا اليوم: عَ هامش الطريق..
  عطيناهم المسيح، بس ما بدّن المسيح…؟
  بس بصلواتكم قادرين تعملو ولادكن أكبر قديسين
• علينا نسلّم تسليم مطلق لملك هالكون.
  ونحنا منقلو ليسوع:
  – يا يسوع، يا معلم ارحمنا، نحنا متلانين برص.
  – يا يسوع، يا معلم ارحمنا، نحنا متلانين برص.
  – يا يسوع، يا معلم ارحمنا، نحنا متلانين برص.
  آمين.

رصد Agoraleaks.com