رئيس اتحاد بلديات البترون مرسلينو الحرك للرئيس عون: بأكدلك، انو القديسين كانو معك بكل مسيرتك النضالية (Audio)

– نشكر فخامتكم، توقيعكم عَ المرسوم الجمهوري، لاستملاك 40 الف متر لإنشاء معمل لمعالجة النفايات

***

كلمة رئيس اتحاد بلديات البترون مرسلينو الحرك للرئيس عون، بحفل تدشين طريق القديسين: (25 آب 2017)

فخامة الرئيس

• وجودكن معنا اليوم، لتدشين طريق القديسين بالبترون وصولاً لعنايا بجبيل، الو معنى خاص. دروب القديسين صعبي مسالكا ووعرة. بيلزما رجال أبطال، لأنا بتوصّل الناس للجنة، وما اكتر القديسين ببلادنا. وبتوصل وطن للحرية والعدالة والنزاهة، وهالنوع من الرجال صار قليل كتير ونادر.
• فخامتكم بدأت بسلوك الدرب، لحظة اختيارك اللباس العسكري،
  وأقسمت على النضال.
  وكان هيدا الدرب المزروع بالأشواك، نحنا منعرف قديش نزفت على هالطريق.
  لكن كل خطوة من تضحياتك، اثمرت تحقيق آمالنا بعد يأس سيطر علينا، والوصول الى وطن بدأ ينتعش ويلملم جروح، ونزف لفترة طويلة.
• سمحلي فخامة الرئيس بهالمناسبة، أكدلك، انو القديسين كانو معك، بكل مسيرتك النضالية،
  ونحنا بالبترون خاصة ماتركناهم يرتاحو، وفعلاً نضالكم مع صلواتنا حققو الأمل بوصولكم للحكم، وبمستقبل زاهر لوطننا
• طريق القديسين اللي عم تدشنها فخامتك، الا منافع كتيري، بالإضافة للسياحة الدينية، وهيي مشروع انمائي لمنطقتنا، اللي تعرضت للاهمال من سنين كتيري، ووصلت لهون بمتابعة من قبل منطقة البترون الوزير جبران باسيل، يللي حمل على عاتقو هالمشروع من بعد ما كان الو اكتر من 50 سنة منسي.
• بالفعل وبعد جهود معاليه، وصلنا الى تدشين المرحلة الأولى منو، وهون في شكر كمان لوزارة الأشغال، وكل مين سعى مع معاليه لإنجاز هيدا المشروع.
• بحب اشكر فخامتكم، توقيعكم على المرسوم الجمهوري، لاستملاك 40 الف متر لإنشاء معمل لمعالجة النفايات، وهيدا انجاز مهم لللمنطقة.

نحنا كاتحاد

• منتعهد بالسعي الدائم، لانماء المنطقة،
  ونحنا كرؤساء بلديات متحدين ومتوافقين لتحقيق النمو فيها، مافيشي رح يوقف بطريقنا، طالما الدعم من فخامتكم موجود.
• مدينة البترون فخامة الرئيس، وكوني رئيس بلديتها، بتشكرك على الدعم، والإهتمام، حققنا مشاريع كتيري ومهمي، والمسيرة مش رح توقف، من مشاريع معامل لتكرير المياه المبتزلة، والطرقات، او المعاهد والمدارس، والبنى التحتية، وغيرا..
• نحنا مكملين كمجلس بلدي، حتى ترجع البترون العروس اللي حكي عنا التاريخ.
  بكرر تعبيري عن سعادتنا بوجودكم معنا اليوم،
  ومنجدّد محبتنا ودعمنا لمسيرتكم السياسية الحكيمة، ولنظرتكم الإنمائية والعمرانية.
  وباسم منطقة البترون بقدم لفخامتكم كل محبة صادقة.

رصد Agoraleaks.com